Danyeli 8
8
Danyeli nɛ pi-bala dedaane boŋo veera
1Pɛ Bɛlesaza paare dim bena yatɔ maŋa ne mo amo Danyeli daa nɛ veera yadwonna na saŋe boboa veera yam kwaga ne to. 2A veera yam wone, a nɛ we a wo Susa te-fɔrɔ kom ne.#Nehemia 1:1; Ɛseta 1:1 Elam kateiri dem ne mo konto. Ko ke ne a vei a zege mɛ na bwola de Yulayi buga kam to mo. 3Amo na kwoni a yuu se a nii to, a nɛ pi-bala mo na zege buga kam ni ne de ka yuu nyea yalei na dɔra. Nyeŋa dedoa maa dɔra ka dwoi kadwoŋi kam ye ka saŋe kadwoŋi kam ka nwoŋi. 4Pi-bala kam ma yɔɔre wɛ-zoore seeni, de baŋa seeni, de tega-kuri seeni ka duri de dam ka chu vara babam bam maama. Ba wolowolo maa ware pi-bala kam yiga se o che. Nɔɔn-nɔɔno tera o na wae o jwoŋi nɔɔna o yaga ka jeŋa ne. Ka yɔɔre ka ke ka na lage tei maama to mo, pa se ka bere ka tete kamunim.
5A ta na zege a maane keim dem to, mo a nɛ bo-bala de na pi ka nwoŋi wɛ-zoore seeni ka beena. Ka yɔɔre ka wurigi de baare mo. Ka wurigim dem ke ne ka nɛ sem ba yi se dwei tega mo. Bo-bala kam maa jege nyeŋa dedoa na dana ye ka jeini bo-bala kam yia yam tetare ne. 6Bo-bala kam ma vo ka jeeri pi-bala kam a ya na nɛ buga kam ni ne to. Ka yɔɔre pi-bala kam mo de ban-lom, dedaane ka dam maama. 7A nɛ we bo-bala kam bane dem tiini de zaŋe dedɛ. Ka ma yɔɔre ka dole pi-bala kam ka de tega ne, pa se ka nyea yalei yam bwori. Ka ta ma nɔne pi-bala kam pa ko tiini ko zo ka yera. Pi-bala kam ma ware ka tete se ka jwoŋi ka yage, ye nɔɔn-nɔɔno de ware-ka se o jwoŋi o yage.
8Amo ta nɛ we bo-bala kam laam tiini ka bere ka tete kamunim. Maŋa kalo ka dam dem na tiini de gaale konto to, mo ka nyeŋa kam bwori. Nye sena na dana to ma leiri nyeŋa kam konto yuu ne se nwoŋi. Se dedoa dedoa ma jeeri tega baŋa sapɛ sena sem.
9Nyeŋ-balaŋa de daa ma zege nye sena sem dedoa yera ne ka nwoŋi. Nyeŋa kam konto ma tiini ka ji kamunu. Ka dam dem vei de yi tega-kuri seeni mo, dedaane wɛ-puli seeni. De ta ma vo de yi te-ŋoŋa kam tete. 10Nyeŋa kam dam dem yɔɔre de gaale mo de vo de yi wɛyuu kom seeni pa se ka kwaare jara de wɛyuu kɔgɔ kom jar-keira. Ka déem ma wane banto badwonna, de chalechwe sedwonna ka dole ka de tega ne, ye ka daare ka nɔne ba baŋa ne. 11Ka ma bere ka tete kamunim ka dwoni de wɛyuu kɔgɔ kom Yuu-tu wom tete. Ka ma che dɛ maama kaanem keim dem, ye ka daare ka pa se Wɛ wara-jei sem chɔge. 12Wɛ nɔɔna bam maa wo ka jeŋa ne pa se Wɛ kaanem daa tera dɛ de dɛ wone, ba na nwoŋi Wɛ kwaga ne to ŋwaane. Ka ma kweele chega ye ka daare ka ke tei maama ka na lage to.
13Amo laam ma ni maleka dedoa na ŋɔɔne dedaane ka dwoŋi tei to. Kadwoŋi kam ma bwei ka we, “Ko wó kwei maŋa tetɛ mo se wonnu tento maama na le te bere to ke te ti? Ko wó kwei maŋa tetɛ mo se wo-zɔɔne dento leiri dɛ maama wone kaanem dem? Ko wó kwei maŋa tetɛ mo se ba nɔne wɛyuu kɔgɔ kom de Wɛ diga kam baŋa ne ba ti?” 14Maleka kam ma leiri ka we, “Da morro telei de bia yatɔ (2,300) mo wó kɛ, dedaan-ni maŋa de tetete maama wone, se ba laam wane ba fɔge ba kwɛ Wɛ diga kam pa se ka taa ye chekke.”
Ba tage veera yam kuri na ye tei to
15Amo Danyeli na nɛ veera yam to mo a kwaane se a lɔre ya kuri. Wolo na nye de nabiinu to laam ma pɔpɔ o nwoŋi o zege a yiga ne. 16A daa ta ma ni nabiinu kwora na nwoŋi Yulayi buga kam ni ne ka ta we, “Gabireli, pa nɔɔno wonto lɔre veera yalo o na nɛ to kuri.”#Luka 1:19, 26
17Gabireli ma ba o zege amo tei ne. Foone ma tiini de ja-ne ye a to a vwi a yibia tega ne. O ma ta de amo o we, “Nabiinu bu, lɔre lanyerane we veera yanto wora kweelim maŋa kam ŋwaane mo.”
18O ta wora o ŋɔɔne de amo mo ye a dɔ a beiri. A yibia ta ma vwi tega ne. Gabireli ma dwei a yera, ye o gɔ-ne wɛɛne pa se a zaŋe a zege a nɛ baŋa ne. 19O ma ta o we:
“A lage a pa se n lɔre Wɛ bane na wó ba de zaŋe se ko taa ye tei kwaga ne to mo. Kokuri to, veera yam n na nɛ to lage ya ke kweelim maŋa ne mo. 20Pi-bala kam nmo na nɛ de ka nyea yalei to zege ka pae Media teo kom, de Peresia teo kom pwa mo. 21Bo-bala kam n na nɛ to, zege ka pae Girisi teo kom mo. Nyeŋa kalo na dana ye ka wo bo-bala kam yia yam tetare ne to, maa zege ka pae teo kom konto boboa pɛ wom. 22Nyeŋa kam konto na bwori tei to bere we Girisi teo paare dem wó pɔɔre kuni bena se pwa bana mo taa jege-ya ba di. Banto paare kateira yam nam bá taa dana ne boboa pɛ wom paare dem na ye tei to.
23Pwa bam konto paare dim ná gɛ fee se de ti ye ba tusim kikia ná puli ya su, pɛ wolo keim na chana ye o jege nia yalei to wó ba. 24Wonto wó taa tiini o dana, ye ko nam bá taa ye o tete dam mo o jega. O ta wó tiini o chɔge wonnu dedɛ, pa se o na yiga-veiŋa de kolo maama o na jege o ke to. O nam ta wó wane babɛ dedaane Wɛ tete nɔɔna bam o chɔge. 25Pɛ wom konto wó ke swa pa se vwa taa daga dedɛ o tei ne. O wó bere o tete kamunim, ye o pɔpɔ o chɔge nɔɔna dedɛ. O ta wó dwoni de Pɛ wolo na dwoi pwa maama to. O nam wó na chɔgem, ye ko dae nabiinu dam ŋwaane.
26Veera yalo na tɛ dedaan-ni maŋa kaanem, de tetete maŋa kaanem taane to seene ya ye chega mo. Ko nam wó dáane dedɛ se wonnu tento maama laam ke. Konto ŋwaane, seigi veera yam, se nɔɔn-nɔɔno yé ni ya ŋwa.”
27Amo Danyeli déem yɔɔre a male mo de a na nɛ wonnu telo maama to, pa se a weele da dedɛ wone. Ko kwaga ne mo a zaŋe wɛɛne a daa vo a toŋe totoŋa yalo pɛ wom na pɛ-ne se a ke to. A na nɛ veera yalo to tiini ya daane-ne dedɛ, a na wo wane se a lɔre ya kuri to ŋwaane.
Currently Selected:
Danyeli 8: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)