Luke 12
12
Sema Bancha Maypangkep Na Pengibili-biling Iren Ma Pharisees Na Pengemag Na Mapteng
(Matthew 10:26-27)
1Nontan a timpo, diniboy toon esa-sa-nop cha kad-an Jesus ingkathod mankinathin ira. Et imesel nin si Jesus ired ma disipolos ton kigwan to i “Tanchaani yoy pengibili-biling iren ma Pharisees na pengemag na mapteng. Tep inges to ma para debag a naiyaygwadsak cha emiin a iyaydaohan to. 2Tep emiin a nat iyaybiybiy niman, maybiybiy no sa-ki din akow, tan emiin ngon nat aamtaan niman, maypaamta no sa-ki din akow. 3Isonga, sema kigwa-kigwan jo nonta agos jo, maamtaan cha emiin a too. Sema ngon kigwa-kigwan jod kwadto yo say nagwariy mengi-ngel, maykelkeljaw cha ketoo-too.”
Sema Tekothan Koma Na Tothoo
(Matthew 10:28-31)
4Kigwan ngon Jesus i “Kakajem ko, konen kod si-kayo i enog i tiyahotan i toon piyan chen memono na angel jo. Tep no a-magen cha wa man, nagwara wiy mebedin a a-magen ched si-kayo. 5Nem konen kod si-kayo no siya komiy tekothan jo. Tahoti yos Afo Chiyos tep si-kathoy gwariy panakabalin ton memono na angel jo tan iba-tok to kayod ma inpiyirno. Ahow, konen kod si-kayo i tekothan jo koma. 6Tep sema dimen tilin, naiyaydaho na chegwen sintimos, anya? Nem si Afo Chiyos, eg to nadiningding i angken sa-kid si-kara. 7Sinto pay kayo! Tep angken bowek jo, amta thoy bilang to. Isonga, enog i tahot tep epateg kayo iy say piyen tilin.”
Sema Toon Naengowan I Naematid Jesus Tan Sema Toon Naengowan I Nat Naematid Jesus
(Matthew 10:32-33; 12:32; 10:19-20)
8Intoloy men Jesus a engowan i “Konen kod si-kayo i angken siyen toon naengowan i naematid si-kak cha sangoanan na too, si-kak a Anak na Too, konen ko ngo i iyayka-chom cha si-kak cha sangoanan na anghilis Afo Chiyos. 9Nem sema ngon naengidibak i naematid si-kak cha sangoanan na too, idibak ko ngo i iyayka-chom cha si-kak cha sangoanan na anghilis Afo Chiyos. 10Et sema ngon toon naengowan na ngaaw maypangkep cha si-kak a Anak na Too, mebedin a mepekawanan, nem sema ngon naengowan na ngaaw maypangkep na Ispirito Santo, eg mepeka-pekawanan. 11Et no ikowan cha kayod synagog ono cha naengibalbalnay tan naiyantoray say icharom cha kayo, enog i chanag maypangkep na isongbat jo tan sema konen jo. 12Tep setan a kosto-koston oras, itoroan to kayo na Ispirito Santo na konen jo koma.”
Sema Arig Maypangkep Na Egwenggweng A Toon Baknang
13Et sema sa-kin toon ekisa-nop cha chakel a too, kigwan to i “Maistoro, kowan mo pangod ahik i manbingay kawi na tawid mi.” 14Nem kigwan Jesus i “Ahi, nat iyay-i-kananak na karebengan a mengowis cha si-kayo tan nagwara ngoy karebengan kon memingay na tawid jo.” 15Et kigwan Jesus cha emiin a too i “Pantanchaan kayo. Aragwii yon emiin i ekila-kilasin kinaagom. Tep say biyag na too, nat iyaybasar cha kokowa tho, angken piyay kinabaknang to.” 16Et engiarig si Jesus a kigwan to i “Gwariy sa-kin baknang a toon gwariy payo-payow to. Chakel i ani tho ired ma payow. 17Isonga, kigwan tod nemnem to i ‘Ngoy pesing ko? Tep sema kamiran ko na iyanik, nat on-anay.’ 18Et kigwan to i ‘Sejay i pesing ko. Bagbagen ko ira ma kamiran ko et mengitegwenak na mas banay say gwariy dogad a pengikamiran na emiin a anik tan sema kokowak. 19Et konen ko wed angel ko i “Magesathak! Chakel i mapteng a inkamid ko, et on-anay na piyen tawen. Mebedin a man-inanaak ma. Menganak tan man-inomak tan kenasen koy biyag ko.” ’ 20Nem kigwan Afo Chiyos cha si-katho i ‘Si-kam a egwenggweng a too, niman a edagwi odien koy biyag mo. Et emiin a insaganam para cha angel mo, siyay mengeda?’ ” 21Et kigwan Jesus i “Inges ngon man i toon naengikamid na kinabaknang to para cha angel to, nem eg to naniyemnemnem i piyan Afo Chiyos. Cha nemnem Afo Chiyos, gwariy banay a kolang niwa too.”
Nakiyajoan Afo Chiyos Ira Ma Toon Naemiyal Cha Si-katho
(Matthew 6:25-34)
22Et kigwan Jesus ired ma disipolos to i “Isonga, konen kod si-kayo i enog i chanag na panbiyag jo--sema kakanen jo tan sema ibaro yo. 23Tep mas epateg i biyag jo iy say mekan, tan mas epateg i angel jo iy say baro. 24Nemnem jo ira ma titit. Eg ira naiyan tanem tan eg ira naiyan-ani, tan nagwara ngoy agong cha tan kamiran na kakanen cha, nem eg ira naaofa tep nain-i-kanan iren Afo Chiyos na kakanen cha. Ampet siya iy nat epateg kayo iy say titit? 25Et siyed si-kayoy mebedin a mengi-chom na angken sa-kin oras cha panbiyag jo kagol na chanag jo? 26No nat mebedin a a-magen jo i angken otikel a inges to man, niyana chanagan joy echom?
27“Nemnem joy nainpasing na sabsabong a nabimadeg. Nat naiyan-obda ira tan nat naengagwel ira, nem konen kod si-kayo i angken si Ari Solomon a baknang a pasiya, sema kamapteng na baro tho, kolang pay iy say sema sa-ki iren ma sabsabong. 28No inges niwan i kamapteng a nain-i-kan Afo Chiyos cha do-bet a mabiday cha payow niman, nem mepoolan nem megwa-gwa, ampet siya iy eg to kayo pay baroan? Niyana chechan enka-jas i pamati yo? 29Enog i niyemnemnem na olay i pengedaan jo na kakanen jo tan inomen jo, tan enog i chana-chanag. 30Tep emiin a tothood dobong a eg mahaamten Afo Chiyos, natiyofog cha ira man, et si Awejo, amta tho waliy mesepol jon emiin ira man. 31Nem si-kayo ngo, tofog joy pantorayan Afo Chiyos et i-kan to ngo ira man cha si-kayo.”
Sema Kinabaknang Cha Dangit
(Matthew 6:19-21)
32Kigwan mowan Jesus i “Si-kayon disipolos ko, angken otikel kayo, enog i tahot. Tep si Afo Chiyos a Awejo, maradsak a mengika-chom kayod pantorayan to. 33Idaho yoy kokowa yo et i-kan joy pilak ired ma iyangkebitheg. Et no pesing jo wa man, singen engala kayo na kofiten eg mechecha-chechal a sema piyan ton a-seden i ena-nop kayo na kinabaknang a gwared dangit a eg ma-ma-pos. Tan nagwara ngoy on-esop a mengibot niwan tan nagwariy oncharal 34Tep sema kawad-an na kinabaknang jo, chiwan ngoy kawad-an na nemnem jo.”
Sema Bagaen A Esagana
35Intoloy Jesus a engowan ired ma disipolos to i “Inges jo komay bagaen a iyanbaro na para cha obda tan sinilowan chiy intohan cha 36say seskeren chiy afo ren kimowan a mekiatindar na kasal. Et no onmothok aliy afo ren menogtog, esagana iren mandokat a chakos na bengbeng. 37Magesat ira ma bagaen no sebien ira na afo ren manseseked tan esagana. Sejay a konen kod si-kayo, podnon mansa-dat iwa afo na baro thon mengisagana na kakanen cha, et ipatokkong to ma bagaen to, et pekanen to ira. 38Angken kawa na kalebiyan ono chanchanin kagwis i imothok na afo ra, magesat ira ma bagaen no sebien to iren manseseked tan esagana! 39Nem nemnem joy mahabaliy. No iyamta tho komay oras a inkowan ali na mengibot, insingpet to komay baliy to say nat mahasekep iwa mengibot. 40Isonga, mesepol ngon mansagana kayo tep si-kak a Anak na Too, onkowanak ali na oras a eg jo namnamaen.”
Sema Bagaen A Naepiyal Tan Sema Bagaen A Nat Naepiyal
(Matthew 24:45-51)
41Et inbagen Peter i “Afo, si-kawi bengat i mowan konain ta arig, ono emiin a too?” 42Insongbat Jesus i “Sema bagaen a naepiyal tan edaing, si-kathoy pengipiyalan na afo thon bantayan toy echom a bagaen say iap-ap niwa bagaen i kakanen cha na gwiya-gwa-gwa. 43Magesat iwa bagaen no onmothok aliy afo ton sebien ton towan amagiy inpiyal tod si-katho. 44Sejay a konen kod si-kayo, podnon ipiyal na afo thod si-katho i emiin a kokowa tho say bantayan to. 45Nem no bilang i konen niwa bagaen cha nemnem to i ‘Mebejag pay emo diy ioli na afok.’ Et ichogi thon memaras na echom a bagaen, daleki tan bibii, et menga-mengan tan man-ino-inom tan mebothe-botheng. 46On-oli wa diy afo niwa bagaen na akow a eg to namnamaen tan oras a eg to amta. Et chosaen na afo tho, et ika-chom to ired ma nat naematin mechosa na ingked ingka. 47Sema bagaen a mahaamta na piyan na afo thon a-magen to, nem nat mansagana tan nat a-magen to, enbel-at i baras to. 48Nem sema bagaen a nat mahaamta na piyan na afo thon a-magen to, tan ngaaw i a-magen to, enka-jas i baras to. Tep sema toon iyay-i-kanan na chakel, chakel ngoy menamnamed si-katho, tan sema too ngon iyaypiyalan na gwa-gwa-cha, mas gwa-gwa-cha ngoy menamnamed si-katho.”
Si Jesus I Kagol Na Pansi-si-janan Na Too
(Matthew 10:34-36)
49Et kigwan pay Jesus i “Kimowanak ali say mekowis i too, et sema pengowis, inges toy afoy. Et konen ko i sapay koma manchachalang miy afoy! 50Gwara diy bonjag a mesepol a da-kaman ko, et enbel-at i nemnem ko ingkathod mekcheng. 51Kin jo aya i kimowanak alin mengi-kan na talned ja dobong? Enchi, konen kod si-kayo i nat talna, no diket pansisi-jan. 52Tep manipod niman, mansi-si-jan i too kagol cha si-kak. No gwariy dimed pamilja, sema tedo, kontraen chiy chegwa, tan sema chegwa, kontraen chiy tedo. 53Sema san-aama, mankokontra ira, tan sema san-iina, mankokontra pay ira, pati sema ngon san-iinepo.”
Sema Pesing Na Pengegwat Na Banag Na Emangkapasamak Niman
(Matthew 16:2-3)
54Et kigwan pay Jesus cha chakel a too i “No si-nengen joy kolpot a emangkedafod denekan, nakigwan jon chakos i ‘Igwa diy oran,’ et on-oran ma. 55Et no medepoy chahem cha pesaw, nakigwan jo i ‘Onpetang,’ et onpetang ma. 56Si-kayon naengibili-biling a naengamag na mapteng, amta yon mengegwat na nasini-neng jod iyaykayang tan chiya dobong, apay nga eg jo amten mengegwat na sinjal a nainbiybiy Afo Chiyos maypangkep na emangkepasamak niman a timpo?”
Pekisingpet Ked Ma Engibasol Cha Si-kam
(Matthew 5:25-26)
57Kigwan mowan Jesus i “Apay nga eg jo nemnemnemen a kosto i mapteng a a-magen jo? 58Tep no bilang i gwariy toon mengicharom cha si-kam kagol na othang mod si-katho, et itolod toked ma kowis. No mankokowan kayo pay cha korti, ipahat mon mekisingpet cha si-katho, nahol ni ikoyod toked kad-an na kowis, et sema kowis, iawat toked polis, et ikalebos toka na polis. 59Konen kod si-kam i nat mebedin a maybolos ked kalebosan ingkathod bejaran mon emiin i othang mo.”
Currently Selected:
Luke 12: KAR
Highlight
Share
Copy
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.