ᤋᤡᤋᤛ 1
1
1ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠ ᤏᤢ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤣ᤺ᤰᤕᤢᤰᤔᤡᤒᤠ ᤀᤡᤱᤃᤠ᤹ ᤐᤠᤘᤗᤗᤠᤶᤒᤠ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤧ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤁᤢᤔᤏᤠᤜᤠ᤹ ᤂᤢᤏᤡ᤹ ᤏᤛᤠ᤺ᤴᤏᤥ ᤁᤢᤓᤠ᤹ ᤐᤡᤔᤠᤛᤡ ᤜᤧᤰᤁᤩᤠᤱ ᤀᤠᤏᤡ᤹ ᤛᤠᤶᤕᤥᤖᤧ ᤀᤠᤜᤢ᤹ᤖᤧᤒᤠ ᤛᤧᤰᤂᤠᤀᤥ ᤗᤠᤶᤗᤥᤔᤠᤛᤡ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤛᤣᤃᤠᤱᤗᤥ॥ 2ᤁᤴ ᤛᤧᤰᤂᤠ᤺ᤸᤗᤧ ᤆᤥᤃᤢᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤸᤗᤧ ᤏᤡᤱᤛᤠᤱᤅᤡᤴ ᤀᤠᤄᤥᤛᤢᤶ. ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤀᤡᤱᤗᤧᤰ ᤔᤧᤶᤒᤠ᤺ᤵᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤧᤶᤔᤡᤸᤗᤧ ᤁᤢᤜᤣ᤺ᤰᤛᤡᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤁᤴ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤸᤗᤧ ᤔᤠᤱᤜᤧᤰᤁᤡᤴ ᤆᤥᤃᤢᤀᤠᤱ ᤘᤕᤧᤖᤥ॥ 3ᤜᤧᤰᤁᤩᤠᤱ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤥ. ᤛᤣ᤺ᤰᤕᤢᤰ ᤆᤥᤃᤢᤒᤠ ᤛᤢᤕᤧᤶᤔᤥ ᤁᤢᤒᤠ᤺ᤴᤈᤠᤴᤏᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤠᤱᤅᤠᤱ ᤂᤧᤴ ᤀᤡᤱᤓᤴ ᤆᤥ᤺ᤰᤔᤠ ᤗᤰᤐᤧᤴ ᤂᤥᤛᤢᤱᤅᤠᤱ ᤘᤠ᤹ᤀᤠᤖᤥ॥
4ᤀᤠᤴᤇᤡ᤹ ᤗᤳᤇᤠ ᤏᤛᤠ᤺ᤴᤏᤥ ᤛᤧᤰᤂᤠᤛᤔᤠ ᤀᤠᤛ᤻ᤛᤠ ᤋᤡᤋᤛᤣ.#᥇:᥊ ᤋᤡᤋᤛ—ᤐᤠᤘᤗᤖᤧ ᤁᤢᤔᤠᤱᤛᤣᤘᤠ ᤕᤠ᤺ᤶᤒᤰᤗᤠᤶ ᤋᤡᤋᤛᤖᤧ ᤂᤪᤡᤛ᤻ᤋᤀᤥ ᤏᤛᤠᤴ ᤆᤥᤃᤢᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤛᤢᤏᤠᤀᤡᤱ ᤀᤡᤱᤓᤥᤛᤧ ᤂᤢᤏᤧ᤹ ᤐᤠᤘᤗᤏᤢ ᤗᤠᤶᤍᤡᤰ ᤆᤥᤃᤧ॥ ᤁᤪᤣᤋ ᤘᤠᤃᤵᤂᤠᤶᤔᤥ ᤗᤠᤶᤍᤡᤰ ᤆᤥ᤺ᤰᤔᤠ ᤆᤢᤖᤧᤀᤠᤱ ᤂᤪᤡᤛ᤻ᤋᤠᤏᤡᤜᤠ᤹ ᤜᤠᤱᤜᤠᤱ ᤔᤧᤳᤇᤧ ᤁᤪᤣᤳᤋᤥ ᤕᤠ᤺ᤰᤋᤧ᤹ ᤑᤠ᤹ᤀᤠᤱ ᤐᤠᤘᤗᤖᤧ ᤔᤧᤳᤋᤢ॥ ᤜᤠᤖᤠ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱ ᤏᤢ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤗᤢᤱᤃᤢᤶ ᤏᤢ ᤛᤏᤠᤖᤢᤱ ᤁᤧᤒᤡᤖᤖᤥ॥
ᤁᤪᤣᤋ ᤗᤠᤈᤣ᤹ᤀᤥ ᤋᤡᤋᤛᤖᤧ ᤁᤢᤕᤠ᤺ᤶᤒᤰ
5ᤂᤧᤏᤧ᤹ᤃ ᤀᤡᤱᤃᤠ᤹ ᤁᤪᤣᤋ ᤗᤠᤈᤣ᤹ᤀᤥ ᤔᤧᤴᤈᤢ᤺ᤳᤋᤣ ᤁᤧᤘᤠ᤹ᤒᤠ ᤐᤠ᤺ᤴᤜᤠ᤹ ᤛᤢ᤺ᤵᤔᤠ ᤜᤧᤰᤁᤩᤠᤱ ᤐᤡᤏᤧᤒᤠ ᤀᤥ᤺ᤴᤎᤠᤰ ᤁᤢᤀᤡᤛᤡᤰ ᤁᤠᤰ ᤐᤠᤱᤈᤢᤶᤜᤠ᤹ᤀᤥᤒᤠ ᤛᤣᤛᤣᤜᤢᤵᤗᤰᤜᤠ᤹ᤀᤥ ᤋᤢᤶᤗᤠᤶᤗᤥᤒᤠᤜᤠ᤹ ᤛᤣ᤺ᤰᤕᤢᤰ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤐᤰᤌᤠᤏᤧᤒᤠᤖᤥ॥ 6ᤋᤢᤶᤗᤠᤶᤗᤥᤒᤠᤱᤃ ᤑᤥᤋᤩᤠ ᤔᤣ᤺ᤴᤏᤣᤒᤠ ᤏᤢ ᤌᤡᤰᤗᤰ ᤔᤣ᤺ᤳ ᤁᤧᤃᤵᤐᤠ ᤐᤥᤱᤔᤠ ᤐᤥᤱ॥ ᤜᤧᤰᤁᤩᤠᤱ ᤁᤢᤛ᤻ᤛᤠᤜᤠ᤹ᤀᤠᤱ ᤂᤷᤔᤧᤴᤍᤰ ᤏᤢ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤔᤣ᤺ᤴ. ᤁᤖ ᤏᤛᤠᤏᤡᤒᤠ ᤐᤥᤱᤔᤠᤀᤣ ᤐᤥᤱᤗᤥ॥ 7ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰ ᤆᤥ᤺ᤰᤔᤠ ᤗᤰ ᤁᤧᤄᤥᤒᤠᤖᤥ॥ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ᤃ ᤑᤥᤋᤩᤠ ᤔᤣ᤺ᤴᤏᤣᤒᤠ ᤐᤥᤱᤔᤠᤀᤣ ᤐᤥᤱᤗᤥ—ᤀᤠᤱᤍᤡᤱ ᤁᤧᤗ᤹ᤒᤠ ᤏᤢ ᤜᤠᤖᤠ ᤁᤢᤛᤡᤰ ᤁᤧᤒᤥ᤺ᤰᤐᤠ. ᤌᤡ᤺ ᤛᤡᤈᤱᤘᤠ᤺ᤸᤗᤧ ᤁᤧᤔᤒᤠ. ᤁᤧᤀᤠ᤺ᤶᤒᤠ. ᤑᤧᤴᤕᤠ᤺ᤶᤒᤰᤗᤠᤶ ᤕᤠᤱ ᤁᤧᤎᤰᤐᤠ ᤐᤥᤱᤔᤠ ᤔᤧᤏᤢ᤹ᤏᤧᤴᤗᤥ॥ 8ᤁᤖ ᤂᤢᤏᤧ᤹ᤃ ᤋᤖᤣ ᤁᤧᤍᤥᤒᤠ ᤏᤢ ᤏᤢᤒᤠ ᤐᤠ᤺ᤴᤜᤠ᤹ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤐᤥᤱᤔᤠᤀᤣ ᤐᤥᤱᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤘᤠ᤹ ᤜᤠᤱᤃᤧᤶᤛᤠᤒᤠ. ᤛᤠᤶᤕᤥᤒᤠ. ᤛᤣᤛᤣ ᤏᤢ ᤜᤧᤴᤌᤡᤶᤒᤠ ᤐᤥᤱᤔᤠᤀᤣ ᤐᤥᤱᤗᤥ॥ 9ᤂᤢᤏᤧ᤹ᤃ ᤜᤢ᤹ᤛᤡᤱᤒᤠ ᤛᤧᤰᤂᤠᤛᤔᤠ ᤐᤠ᤺ᤴᤈᤠᤰᤁᤥ ᤘᤠ᤹ᤔᤠᤀᤣ ᤐᤥᤱ. ᤜᤧᤰᤁᤣᤗ᤹ᤖᤡᤰ ᤂᤧᤸᤗᤧ ᤘᤣ᤹ᤜᤠ᤹ ᤛᤧᤰᤂᤠᤛᤔᤠ ᤏᤡᤛᤠᤶᤗᤠᤶᤒᤠ ᤜᤠᤱᤜᤠᤱ ᤔᤧᤵᤔᤠᤛᤡ ᤏᤢ ᤂᤧᤴ ᤏᤡᤛᤠᤶ ᤁᤧᤀᤵᤐᤠᤜᤠ᤹ᤖᤧ ᤂᤢᤏᤡ᤹ ᤐᤣ᤺ᤴᤍᤡ᤺ᤴ ᤀᤥᤛᤣ᤺ᤴᤎᤠᤰᤔᤠ ᤛᤢᤰᤋᤢᤛᤡ᤹ᤖᤥ॥
ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹ ᤀᤵᤔᤠᤛᤡ
10ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤕᤖᤡᤰ ᤕᤢᤰᤁᤥ ᤔᤧᤴᤕᤢᤱᤔᤏᤠᤒᤠ ᤏᤢ ᤐᤠ᤺ᤴᤑᤠᤋᤪᤧᤜᤠ᤹. ᤘᤣ᤹ ᤀᤡᤱᤗᤧᤰ ᤁᤧᤔᤧᤵᤐᤠᤜᤠ᤹ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤀᤥ ᤕᤖᤡᤰᤋᤱᤒᤠᤃ ᤕᤜᤢᤍᤡ ᤜᤷᤍᤥ ᤜᤧᤰᤔᤠ ᤌᤡᤶ ᤏᤠ᤺ᤵᤔᤠᤀᤣ ᤐᤥᤱ ᤗ᤹ᤖᤡᤰ ᤁᤧᤒᤠ᤺ᤵᤐᤠᤛᤡᤖᤥ॥ 11ᤂᤧᤱᤜᤠ᤹ᤃ ᤛᤫᤠ᤺ᤳ ᤆᤥ᤺ᤰᤔᤠᤛᤡᤀᤣ ᤐᤥᤱᤗᤥ. ᤌᤣᤀᤠᤱᤓᤧᤸᤗᤧ ᤑᤧᤴ ᤕᤠ᤺ᤶᤒᤰᤗᤠᤶᤒᤠ ᤕᤠᤱᤛᤠᤁᤢᤴᤎᤣ ᤌᤰᤛᤧ ᤂᤧᤱᤜᤠ᤹ᤖᤧ ᤜᤢ᤹ᤔᤠ ᤔᤧᤴᤏᤢ᤹ᤔᤏᤠᤒᤠ ᤏᤡᤛᤠᤶ ᤔᤧᤜᤢ᤹ᤖᤢᤛᤡᤖ ᤁᤢᤓᤠ ᤜᤡᤶᤛᤕᤱᤜᤠ᤹ ᤁᤠᤰ ᤑᤧᤳᤔᤧᤗᤠ᤺ᤴᤍᤢᤛᤡᤖ ᤔᤧᤕᤠᤰᤗᤥ॥ 12ᤜᤧᤰᤁᤩᤠᤱ ᤁᤱᤃ ᤁᤪᤣᤋ ᤁᤧᤕᤢᤱᤒᤠᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤂᤠᤃᤧᤀᤡᤰᤐᤠᤎᤡᤰᤗᤧ ᤀᤠᤵᤑᤣᤰ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. “ᤁᤪᤣᤋ ᤁᤧᤕᤢᤱᤒᤠᤜᤠ᤹ᤃ ᤛᤍᤠᤍᤡᤱ ᤀᤡᤱᤗᤧᤰ ᤁᤧᤒᤠ᤺ᤵᤐᤠ. ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠ ᤋᤠᤶᤓᤢᤱ ᤌᤰᤛᤠ ᤜᤧᤰᤋᤱᤒᤠ ᤜᤧᤰᤁᤩᤠᤱ ᤗᤧᤶᤛᤢᤘᤠᤒᤠ ᤋ᤺ᤰᤌᤧ᤺ᤰᤁᤣ ᤔᤧᤈᤥᤰᤗᤥ॥” 13ᤁᤴ ᤐᤠ᤺ᤳᤋᤧᤒᤠ ᤐᤠ᤺ᤴᤜᤠ᤹ᤃ ᤛᤧᤰᤂᤠᤀᤣᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤏᤛᤠᤏᤡᤒᤠᤜᤠ᤹ ᤀᤠᤸᤗᤛᤠᤱ ᤏᤢᤖᤡᤰᤁᤠᤱ ᤏᤛᤠᤴ ᤆᤥ᤺ᤰᤔᤠ ᤔᤧᤛᤢᤰᤋᤢᤖ ᤑᤠ᤹ᤀᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤑᤧ᤺ᤰᤋᤧᤛᤧ᤹ᤀᤥ॥ 14ᤜᤧᤰᤁᤩᤠᤱ ᤛᤧᤰᤂᤠᤴ ᤁᤧᤀᤵᤐᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤡᤱᤈᤠᤱᤅᤡᤴ ᤏᤢ ᤕᤜᤢᤍᤡ ᤂᤧᤍᤠ᤹ᤜᤠ᤹ ᤂᤧᤱᤜᤠ᤹ᤖᤧ ᤂᤧᤶᤔᤠ ᤔᤧᤗᤧᤖᤢ ᤔᤧᤍᤣᤛᤢᤖᤖᤥ॥
15ᤛᤣᤛᤣ ᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠᤜᤠ᤹ᤏᤢ ᤁᤠᤰ ᤐᤠ᤺ᤴᤜᤠ᤹ ᤛᤣᤛᤣᤀᤣ ᤆᤥᤰᤗᤥ. ᤁᤖ ᤆᤡ᤺ᤴᤈᤡ᤺ᤶᤒᤠ ᤏᤢ ᤏᤛᤠᤴ ᤔᤧᤱᤃᤵᤔᤏᤠᤒᤠᤜᤠ᤹ᤖᤧ ᤗᤠᤃᤡ ᤌᤣ᤺ᤴᤏᤠᤱ ᤛᤣᤛᤣ ᤔᤧᤈᤥ᤺ᤰᤁᤡᤴᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤏᤢ ᤂᤠᤛᤡᤱᤅᤡᤴ ᤑᤧᤳᤗᤠ᤹ᤖᤧᤀᤠᤱ ᤘᤠ᤹ᤖᤥ॥ 16ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤏᤡ᤺ᤳᤋᤢᤶᤒᤧ ᤗ᤹ᤖᤡᤰ ᤔᤧᤒᤠ᤺ᤳᤋᤢ᤹. ᤁᤖ ᤀᤠᤒᤠᤅᤣ ᤕᤠ᤺ᤶᤒᤰᤁᤥᤗᤠᤶ ᤔᤧᤏᤠ᤹ᤖᤢᤖᤥ॥ ᤂᤧᤱᤜᤠ᤹ᤃ ᤕᤠᤶᤃᤧᤛᤡᤱᤒᤠ ᤏᤢ ᤀᤡᤱᤈᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤶᤔᤏᤠ ᤔᤧᤈᤥ᤺ᤰᤁᤠᤱ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤗᤥ॥
Currently Selected:
ᤋᤡᤋᤛ 1: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.