ᤗᤢᤁᤠ 19
19
ᤕᤧᤛᤢᤴ ᤏᤢ ᤈᤰᤁᤤ
1ᤕᤧᤛᤢᤴ ᤕᤧᤖᤡᤜᤥ ᤕᤧᤰᤕᤰᤗᤠᤶ ᤐᤥ᤺ᤰᤂᤧᤖ ᤐᤣᤖ ᤐᤳᤇᤧ॥ 2ᤂᤧᤴ ᤕᤧᤰᤕᤰᤁᤥ ᤈᤰᤁᤤ ᤔᤡᤱ ᤁᤧᤘᤠ᤺ᤵᤐᤠ ᤕᤠᤱᤛᤠᤁᤢᤴᤎᤣᤛᤠᤒᤠ ᤋᤢᤶᤀᤣ᤺ᤱᤕᤠᤱ ᤁᤧᤓᤥᤱᤒᤠᤎᤡᤰ ᤘᤕᤧ॥ 3ᤕᤧᤛᤢᤴ ᤐᤣᤖ ᤐᤳᤇᤧᤸᤗᤧ ᤂᤢᤏᤧ᤹ᤀᤠᤱ ᤀᤥᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤕᤧᤛᤢᤖᤧ ᤁᤢᤀᤥᤔᤧᤳᤇᤧ ᤐᤣ. ᤁᤖ ᤋᤠᤱᤛᤠ ᤆᤥᤃᤧᤒᤠᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤎᤣ᤺ᤰᤋᤢᤀᤠᤱ ᤏᤡᤔᤠ ᤔᤧᤛᤢᤰᤋᤢᤴ॥ 4ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤋᤃᤡ ᤐᤣᤀᤠᤱ ᤕᤧᤛᤢᤖᤧ ᤁᤢᤀᤥᤔᤧᤳᤇᤧ ᤗᤠᤶᤔᤡᤸᤗᤧ ᤁᤢᤒᤣᤛᤠᤱᤒᤠ ᤐ᤺ᤳᤇᤣ᤹ᤒᤢᤱᤔᤥ ᤗᤠᤛᤧᤀᤠᤱ ᤕᤢᤱᤛᤡᤱ॥ 5ᤕᤧᤛᤢᤴ ᤂᤧᤵᤔᤥ ᤁᤧᤖᤧᤸᤗᤧ ᤌᤥ ᤀᤥᤔᤕᤧᤀᤠᤱ ᤔᤧᤳᤋᤢ. “ᤈᤰᤁᤤᤀᤣ. ᤂᤧᤏᤧ᤹ ᤜᤠᤖᤠ ᤌᤩᤧ᤹ᤀᤥ॥ ᤀᤠᤀᤡᤴ ᤀᤡᤱᤃᤠ᤹ ᤁᤧᤜᤡᤶᤔᤥ ᤏᤧᤀᤠᤒᤠᤖᤥ॥”
6ᤜᤧᤰᤁᤣ᤺ᤸᤗᤧ ᤈᤰᤁᤤᤴ ᤕᤥ ᤌᤩᤧᤀᤠᤱ ᤁᤢᤛᤡᤖᤠ᤹ ᤐᤎᤠᤱᤌᤠᤅᤧᤖ ᤕᤧᤛᤢᤴ ᤁᤢᤜᤡᤶᤔᤥ ᤗᤠᤶᤍᤠ᤺ᤰᤔᤠ ᤐᤡᤖᤢ॥ 7ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤕᤧᤛᤢᤴ ᤗᤠᤕᤥᤒᤠᤸᤗᤧ ᤁᤢᤜᤡᤶᤔᤥ ᤕᤠᤱᤎᤥ᤺ᤰᤛᤧ ᤐᤣᤖᤥ ᤑᤠ᤹ᤀᤠᤱ ᤁᤠᤏᤠᤰᤏᤠᤰ ᤔᤧᤗ᤹ᤖᤧᤖᤥ॥
8ᤕᤠᤱᤛᤡ ᤈᤰᤁᤤᤴ ᤕᤧᤶᤛᤡᤱᤅᤠᤱ ᤍᤠᤱᤒᤠᤴ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ ᤁᤳᤋᤢᤱᤒᤠ ᤕᤠᤱᤛᤠᤁᤢᤴᤎᤣᤴ ᤁᤢᤓᤪᤧ᤺ᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤜᤠ᤺ᤳᤋᤢᤱᤛᤡᤱᤗᤥ॥ ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ ᤀᤡᤱᤗᤧᤰ ᤔᤧᤳᤋᤢᤱᤛᤡᤱᤅᤠᤱ ᤕᤖᤡᤰ ᤕᤠᤱ ᤑᤥ᤺ᤰᤂᤢᤱᤛᤡᤱᤅᤠᤱ ᤘᤠ᤹ᤀᤠ. ᤂᤧᤱᤜᤠ᤹ ᤀᤡᤱᤃᤠ᤹ ᤗᤡᤛᤡᤗᤧᤱ ᤌᤠᤖᤡᤰ ᤏᤢ᤺ᤰᤋᤢᤱ ᤐᤡᤖᤢᤱᤛᤡᤱᤗᤥ॥”
9ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢ. “ᤀᤠᤀᤡᤴ ᤁᤴ ᤜᤡᤶᤛᤕᤱᤅᤡᤸᤗᤧ ᤛᤧᤴᤗᤵ ᤂᤥᤛᤢᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤈᤰᤁᤤ᤺ᤴᤏᤠᤱ ᤀᤒᤪᤠᤜᤠᤔᤖᤧᤴᤏᤣ ᤁᤢᤔᤢ᤹ᤀᤡᤍᤠᤱᤛᤠᤖᤥ॥ 10ᤔᤧᤴᤇᤠᤶᤛᤠᤴ ᤗᤠᤕᤥᤀᤥ ᤁᤧᤔᤠᤒᤠᤜᤠ᤹ ᤁᤥ᤺ᤵᤔᤠ ᤏᤢ ᤜᤡᤱᤔᤠᤛᤡ ᤑᤠ᤹ᤀᤠᤱ ᤋᤩᤧᤒᤠᤖᤥ॥”
ᤛᤠᤶᤔᤩᤠᤱ ᤕᤠᤱᤀᤡᤳᤇᤡᤸᤗᤧᤴ ᤂᤧᤍᤠ᤹
(ᤔᤳᤋᤡ ᥈᥋:᥇᥊-᥉᥆)
11ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤧᤛᤢᤖᤧ ᤘᤣ᤹ᤛᤔᤠ ᤂᤧᤍᤠ᤹ᤎᤡᤰ ᤔᤧᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤕᤖᤢᤛᤗᤧᤔ ᤏᤡ᤺ᤳᤋᤠᤱ ᤔᤧᤃᤧᤖᤧᤀᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤁᤢᤓᤠᤖᤧ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤂᤡᤔᤥ ᤋᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤕᤧᤖᤥ॥ 12“ᤁᤢᤴᤎᤣ ᤛᤠᤒᤠᤎᤡᤰ ᤔᤠ᤺ᤱᤄᤠ ᤗᤠᤈᤣ᤹ᤀᤥ ᤜᤠᤱᤕᤢᤰ ᤂᤥᤔᤠᤀᤠᤱ ᤏᤢ᤺ᤱᤔᤠ ᤋᤠᤔᤠ ᤑᤠ᤹ᤀᤠᤱ ᤗᤠᤶᤍᤡᤰ ᤆᤥᤃᤧᤖᤥ॥ 13ᤂᤢᤏᤧ᤹ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ ᤌᤡᤒᤥᤱ ᤁᤢᤛᤧᤘᤠᤖᤥᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤗᤳᤇᤠ ᤗᤳᤇᤠ ᤛᤠᤶᤔᤩᤠᤱ ᤕᤠᤱ#᥇᥏:᥇᥉ ᤗᤳᤇᤠ ᤗᤳᤇᤠ ᤛᤠᤶᤔᤩᤠᤱ ᤕᤠᤱ—ᤃᤪᤡᤁ ᤐᤠ᤺ᤴᤍᤠᤱᤅᤥ “᥇᥆ ᤔᤡᤏᤠ॥” ᤔᤡᤏᤠ ᤑᤠ᤹ᤀᤡᤴ ᤗᤠ ᤛᤢᤶᤛᤡᤖᤧᤴ ᤏᤠᤶᤕᤠᤰ ᤐᤥᤱ॥ ᤐᤡᤖᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. ‘ᤀᤡᤱᤃᤠ᤹ ᤔᤧᤴᤏᤢ᤺ᤱ ᤔᤧᤴᤍᤠᤀᤣ ᤌᤠᤖᤡᤰ ᤁᤸᤗᤧ ᤗᤧᤱᤜᤱ ᤆᤥᤃᤧᤶᤔᤧ᤹ᤀᤥ॥’” 14ᤁᤖ ᤁᤢᤕᤰᤕᤢᤱᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤈᤡ᤺ᤳᤋᤢᤀᤠᤱ ᤁᤢᤀᤣᤃᤠᤱ ᤁᤢᤀᤣᤃᤠᤱ “ᤁᤴ ᤔᤏᤠ᤺ᤸᤗᤧ ᤀᤠᤏᤡᤃᤣ ᤛᤶᤍᤠᤱ ᤜᤠᤱ ᤆᤥᤃᤢᤒᤠ ᤛᤡᤖᤠ᤹ ᤔᤧᤎᤠᤱᤅᤡᤴᤗᤥ” ᤔᤧᤒᤠ᤺ᤳᤋᤢᤖ ᤀᤡᤱᤛᤠᤒᤠᤜᤠ᤹ ᤔᤧᤒᤠᤱᤄᤢᤛᤡ॥
15ᤜᤧᤰᤁᤩᤠᤱ ᤂᤧᤸᤗᤧ ᤜᤠᤱᤕᤢᤰ ᤂᤥᤛᤢᤀᤠᤱ ᤏᤢ᤺ᤰᤂᤧ ᤋᤩᤧᤖᤥ॥ ᤀᤠᤸᤗ ᤂᤢᤏᤧ᤹ ᤕᤠᤱ ᤐᤡᤖᤢᤛᤡᤒᤠ ᤁᤢᤛᤧᤘᤠᤖᤥᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤗᤧᤱᤜᤱ ᤁᤧᤈᤥᤃᤢᤶᤔᤠᤱ ᤀᤠᤰᤂᤧᤶᤔᤩᤠᤰ ᤕᤠᤱ ᤁᤧᤎᤃᤢᤶ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤛᤡ॥ 16ᤌᤡᤰᤛᤡᤃᤣᤰᤐᤠ ᤛᤧᤘᤠᤖᤥᤒᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤁᤧᤕᤠᤱᤎᤡᤰᤁᤡᤸᤗᤧ ᤘᤣ᤹ ᤌᤡᤒᤥᤱ ᤕᤠᤱ ᤌᤃᤢᤱᤅᤠᤱ ᤘᤠ᤹ᤖᤥ॥” 17ᤜᤧᤰᤁᤩᤠᤱ ᤂᤧᤸᤗᤧ ᤔᤧᤳᤋᤢ. “ᤏᤢᤖᤧᤖᤥ ᤀᤠᤛᤣᤘᤠᤖᤥᤒᤣ. ᤛᤠ᤹ᤖᤡᤰ ᤏᤢᤒᤠ ᤁᤧᤈᤥᤃᤢᤖᤥ᥄ ᤂᤧᤏᤧ᤹ ᤌᤡᤒᤥᤱ ᤕᤧᤰᤕᤰ ᤛᤶᤍᤠᤱ ᤛᤢᤜᤠᤱᤃᤧᤶᤒᤠ ᤁᤧᤒᤥᤱᤗᤥ. ᤌᤣᤀᤠᤱᤓᤧᤸᤗᤧ ᤆᤢᤰᤛᤠ ᤐᤠ᤺ᤴᤏᤥ ᤏᤛᤠ᤺ᤴᤛᤠᤒᤠ ᤁᤧᤒᤥ᤺ᤰᤂᤧᤖᤥ॥” 18ᤜᤧᤰᤁᤩᤠᤱ ᤏᤡᤛᤡᤃᤣᤰᤐᤠ ᤛᤧᤘᤠᤖᤥᤒᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤁᤧᤕᤠᤱᤎᤡᤰᤁᤡᤸᤗᤧ ᤘᤣ᤹ ᤅᤠᤛᤡ ᤕᤠᤱ ᤌᤃᤢᤱᤅᤠᤱ ᤘᤠ᤹ᤖᤥ॥” 19ᤜᤧᤰᤁᤩᤠᤱ ᤂᤧᤴ ᤔᤧᤳᤋᤢ. “ᤂᤧᤏᤧ᤹ᤀᤠᤱ ᤅᤠᤛᤡ ᤕᤧᤰᤕᤰ ᤛᤶᤍᤠᤱ ᤛᤢᤜᤠᤱᤃᤧᤶᤒᤠ ᤁᤧᤒᤥᤱᤗᤥ॥” 20ᤜᤧᤰᤁᤩᤠᤱ ᤛᤢᤶᤛᤡᤃᤣᤰᤐᤠ ᤛᤧᤘᤠᤖᤥᤒᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤧᤕᤠᤱᤎᤡᤰᤁᤡᤴ ᤒᤠ ᤁᤵᤔᤥ ᤘᤠ᤹ᤖᤥ. ᤁᤧᤕᤠᤱᤅᤡᤴ ᤀᤡᤱᤃᤠ᤹ ᤋᤣᤳᤋᤥ ᤛᤢᤅᤢᤱ ᤆᤡᤰᤂᤢᤱᤅᤠᤱ ᤁᤳᤋᤢᤱᤗᤥ॥ 21ᤂᤧᤏᤧ᤹ᤏᤢ ᤀᤡᤱᤃᤠ᤹ ᤁᤡᤛᤠᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤈᤡ᤺ᤵᤐᤠ ᤁᤧᤈᤥᤰ॥ ᤂᤧᤏᤧ᤹ ᤁᤧᤶᤒᤡᤖᤢᤴᤛᤡᤴᤒᤠᤴ ᤁᤧᤏᤠ᤺ᤰᤋᤢᤛᤡ᤹. ᤁᤧᤴᤍᤣᤛᤢᤶᤒᤠᤴ ᤁᤧᤛᤢᤵᤛᤢ᤹ᤖᤥ॥” 22ᤜᤧᤰᤁᤣ᤺ᤸᤗᤧ ᤜᤠᤱᤅᤡᤸᤗᤧ ᤂᤧᤴ ᤛᤧᤘᤠᤖᤥᤒᤠᤴ ᤔᤧᤳᤋᤢ. “ᤂᤧᤏᤧ᤹ ᤋᤠᤰᤁᤧᤓᤧ᤹ᤒᤠ ᤛᤣᤘᤠᤖᤥᤒᤣ᥄ ᤀᤠᤸᤗ ᤒᤠ ᤂᤧᤏᤧ᤹ ᤁᤧᤒᤠ᤺ᤴᤏᤥᤗᤠᤶ ᤀᤠᤵᤋᤡᤰ ᤁᤢ᤺ᤳᤏᤧ᤹ᤖᤥ॥ ᤀᤡᤱᤃᤠ᤹ ᤌᤣ ᤔᤧᤒᤡᤖᤢᤱᤅᤡᤴ ᤒᤠ ᤂᤧᤴ ᤏᤠ᤺ᤰᤋᤢᤱ. ᤌᤧᤔᤠ ᤔᤧᤍᤣᤛᤢᤱᤅᤡᤴ ᤂᤧᤴ ᤛᤢᤵᤛᤢᤱ ᤑᤠ᤹ᤀᤠᤱ ᤂᤧᤏᤧ᤹ᤀᤣ ᤏᤡᤱᤘᤠ᤹ ᤁᤧᤃᤳᤋᤢᤖᤥ॥ 23ᤜᤧᤰᤁᤣ᤺ᤸᤗᤧ ᤂᤧᤴ ᤀᤠᤕᤠᤱᤅᤡᤴ ᤌᤣᤀᤠᤱ ᤛᤡᤱᤏᤠᤳ ᤁᤧᤃᤧᤒᤠᤜᤠ᤹ᤖᤥ ᤁᤧᤴᤕᤢᤰᤂᤢᤴ᥅ ᤀᤡᤱᤃᤠ᤹ ᤋᤩᤠᤱᤅᤡᤸᤗᤧ ᤀᤠᤕᤠᤱᤅᤡᤸᤗᤧ ᤁᤢᤛ᤻ᤛᤠᤃ ᤂᤥᤛᤢᤱᤒᤠ ᤘᤕᤧ॥” 24ᤂᤧᤴ ᤜᤠᤱᤅᤡᤸᤗᤧ ᤂᤧᤵᤔᤥ ᤁᤧᤕᤧᤵᤐᤠᤜᤠ᤹ ᤔᤧᤳᤋᤢᤛᤡ. “ᤂᤧᤸᤗᤧ ᤁᤳᤋᤢᤒᤠ ᤕᤠᤱᤀᤡᤳᤇᤡᤴ ᤏᤠᤵᤋᤧᤶᤔᤧ᤹ᤀᤠᤱ ᤌᤡᤒᤥᤱ ᤕᤠᤱᤀᤡᤳᤇᤡ ᤁᤧᤃᤵᤐᤧᤴ ᤐᤡᤖᤧᤶᤔᤧ᤹ᤀᤥ॥”
25ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤸᤗᤧᤃ ᤀᤠᤴᤍᤣ᤺ᤴᤇᤠ ᤌᤡᤒᤥᤱ ᤕᤠᤱ ᤁᤳᤋᤢᤱᤃ᥄”
26ᤜᤧᤰᤁᤣ᤺ᤸᤗᤧ ᤜᤠᤱᤅᤡᤸᤗᤧ ᤏᤥᤃᤵ ᤐᤡᤖᤢᤛᤡ. “ᤂᤧᤵᤛᤧᤶᤔᤧ᤹ᤀᤥ. ᤁᤧᤃᤵᤐᤠᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤂᤥᤛᤢ᤹ᤖᤥ. ᤁᤖ ᤜᤠ᤺ᤳᤗᤧ ᤔᤧᤃᤳᤋᤢᤴ. ᤂᤧᤸᤗᤧ ᤁᤳᤋᤢᤒᤠᤴᤏᤠᤱ ᤏᤠᤵᤗᤥ॥ 27ᤀᤠᤸᤗ ᤀᤡᤱᤃᤠ᤹ ᤂᤢᤏᤡ᤹ ᤛᤶᤍᤠᤱ ᤜᤠᤱ ᤆᤥᤃᤢᤱᤏᤡ ᤑᤠ᤹ᤀᤠᤱ ᤂᤢᤏᤡ᤹ ᤛᤡᤖᤠ᤹ᤔᤧᤴᤎᤠᤱᤔᤏᤠᤒᤠ ᤀᤠᤏᤡᤱᤔᤡᤜᤠ᤹ ᤁᤵᤔᤥ ᤋᤠᤖᤧᤶᤛᤡᤶᤔᤧ᤹ᤀᤠᤱ ᤀᤡᤱᤃᤠ᤹ ᤀᤠᤍᤃᤡᤀᤣ ᤛᤧᤖᤧᤶᤛᤡᤶᤔᤧ᤹ᤀᤥ॥”
ᤕᤧᤛᤢᤴ ᤕᤖᤢᤛᤗᤧᤶᤔᤥ ᤔᤡᤔᤡᤍᤡᤱᤏᤢ ᤗᤠ᤺ᤳ
(ᤔᤳᤋᤡ ᥈᥇:᥇-᥇᥇; ᤔᤷᤁᤢ ᥇᥇:᥇-᥇᥇; ᤕᤢᤜᤢ ᥇᥈:᥇᥈-᥇᥏)
28ᤜᤧᤰᤁᤩᤠᤱ ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤕᤖᤢᤛᤗᤧᤔ ᤗᤧᤵᤔᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤋᤃᤡ ᤌᤠᤛᤡᤱᤗᤥ॥ 29ᤜᤧᤰᤁᤩᤠᤱ ᤂᤢᤏᤧ᤹ ᤒᤧᤌᤑᤠᤃᤣ ᤏᤢ ᤒᤣᤌᤠᤏᤡ ᤐᤠᤱᤈᤢᤶᤜᤠ᤹ᤖᤧ ᤏᤡ᤺ᤳᤋᤠᤱ ᤁᤧᤖᤧᤸᤗᤧ ᤈᤤᤋᤢᤏ ᤁᤥ᤺ᤰᤔᤠᤀᤥ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡᤖ ᤐᤠᤱᤄᤢᤛᤡ. 30“ᤂᤡᤴᤇᤡ᤹ ᤋᤃᤠᤱᤒᤠ ᤐᤠᤱᤓᤣ᤹ᤀᤥ ᤐᤣᤛᤧ᤹॥ ᤂᤧᤵᤔᤥ ᤁᤧᤗᤠ᤺ᤳᤇᤡᤸᤗᤧ ᤀᤠᤵᤑᤠᤸᤗᤧᤀᤠᤱ ᤔᤧᤴᤕᤢᤰᤁᤣ ᤁᤧᤘᤠ᤹ᤒᤠ ᤀᤍᤱᤛᤠᤎᤡᤰ ᤀᤡᤔᤧᤄᤣ᤺ᤰᤂᤢᤀᤠᤱ ᤕᤧᤵᤐᤠ ᤁᤧᤍᤢᤶᤛᤢ᤹॥ ᤂᤧᤴ ᤗᤧᤖᤧᤳᤇᤧ᤹ᤀᤠᤱ ᤁᤳᤏᤠ ᤑᤧᤳᤋᤧᤳᤇᤧ᤹॥ 31ᤔᤏᤠᤜᤠ᤹ᤖᤧ ᤌᤣᤀᤠᤱ ᤁᤴ ᤀᤍᤱᤛᤠᤴ ᤁᤧᤗᤧᤳᤇᤢᤒᤠᤒᤣ ᤑᤠ᤹ᤀᤠᤱ ᤛᤣ᤺ᤴᤃᤧᤶᤗᤠᤵᤛᤡᤏᤧ ᤑᤠ᤹ᤃᤪ ᤁᤱᤃ ᤍᤠᤱᤒᤠᤴ ᤆᤠᤜᤠᤒᤠ ᤆᤥᤃᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤔᤧᤳᤋᤧᤛᤧ᤹ᤀᤥ॥”
32ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤣᤛᤡᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤛᤧᤰᤂᤠᤀᤣ ᤀᤍᤱᤛᤠᤴ ᤏᤡ᤺ᤛᤧᤳᤇᤢ॥ 33ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤗᤧᤖᤧᤳᤇᤢᤖ ᤐᤳᤇᤧᤳᤇᤡᤸᤗᤧ ᤂᤧᤵᤔᤥ ᤁᤢᤴᤍᤠᤱᤒᤠᤜᤠ᤹ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢᤛᤡ. “ᤌᤣᤀᤠᤱ ᤁᤴ ᤀᤍᤱᤛᤠᤴ ᤁᤧᤗᤧᤳᤇᤢᤒᤠᤒᤣ᥅”
34ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤁᤱᤃ ᤍᤠᤱᤒᤠᤴ ᤆᤠᤜᤠᤒᤠ ᤆᤥᤃᤧᤀᤠᤱ ᤘᤠ᤹ᤖᤥ॥”
35ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤀᤍᤱᤛᤠᤴ ᤕᤧᤛᤢᤖᤥ ᤋᤠᤖᤧᤳᤇᤢᤀᤠᤱ ᤀᤍᤱᤛᤠ᤺ᤸᤗᤧ ᤁᤢᤀᤣ᤺ᤰᤁᤥ ᤂᤢᤏᤡ᤹ ᤋᤣᤳᤜᤠ᤹ ᤔᤧᤓᤧᤛᤢ. ᤜᤧᤰᤁᤩᤠᤱ ᤕᤧᤛᤢᤴ ᤂᤧᤴ ᤛᤶᤍᤠᤱ ᤔᤧᤕᤢᤰᤂᤢᤖᤥ॥ 36ᤂᤧᤴ ᤕᤢᤰᤋᤢᤀᤠᤱ ᤐᤣ᤺ᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤣᤳᤜᤠ᤹ ᤗᤠᤶᤔᤥ ᤔᤧᤓᤧᤛᤢᤖ ᤂᤢᤏᤧ᤹ ᤗᤠᤶᤍᤠ᤺ᤰᤔᤠ ᤔᤧᤒᤡᤖᤢᤖᤥ॥
37ᤜᤧᤰᤁᤩᤠᤱ ᤕᤧᤛᤢᤴ ᤈᤤᤋᤢᤏ ᤁᤥ᤺ᤰᤔᤠᤀᤥᤗᤠᤶ ᤛᤱᤔᤠᤱ ᤌᤠᤔᤠ ᤁᤧᤒᤥᤱᤒᤠ ᤋᤧᤴᤏᤥ ᤁᤧᤵᤔᤠ ᤀᤡ᤺ᤳᤋᤧᤀᤠᤱ ᤘᤕᤧᤸᤗᤧ ᤕᤖᤡᤰ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤏᤡᤒᤠᤴ ᤔᤧᤀᤡ᤺ᤳᤋᤢᤀᤠᤱ ᤔᤧᤛ᤺ᤳᤋᤧᤖ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤔᤠ ᤔᤧᤜᤣ᤺ᤰᤋᤢ—
38“ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤁᤧᤍᤠᤒᤠ ᤜᤠᤱᤅᤡᤴ
ᤔᤢ᤹ᤀᤡᤛᤠᤒᤠ ᤐᤥᤱᤗᤖᤥ॥
ᤛᤠᤱᤃᤪᤠᤶᤐᤣᤍᤠᤱᤅᤥ ᤛᤏᤠᤖᤢᤱ ᤐᤥᤱᤗᤖᤥ.
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥᤱᤗᤖᤥ॥”
39ᤁᤖ ᤂᤧᤵᤔᤥ ᤔᤏᤠᤗᤢᤶᤔᤥ ᤁᤧᤘᤠ᤹ᤒᤠ ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤕᤧᤛᤢᤴ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ ᤁᤧᤜᤢ᤹ᤛᤠᤶᤒᤠᤜᤠ᤹ ᤜᤧᤰᤁᤣ ᤔᤧᤒᤠ᤺ᤳᤋᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤑᤧ᤺ᤰᤋᤧᤛᤧ᤹ᤀᤥ॥”
40ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤧᤵᤛᤧᤶᤔᤧ᤹ᤀᤥ. ᤂᤧᤱᤜᤠ᤹ ᤛᤫᤠ᤺ᤳ ᤔᤧᤕᤢᤱᤅᤡᤸᤗᤧᤃ ᤁᤴ ᤗᤢᤱᤜᤠ᤹ᤀᤠᤱ ᤔᤧᤛ᤺ᤳᤋᤠᤱ ᤔᤧᤒᤠ᤺ᤳ ᤔᤧᤗ᤺ᤴᤗᤥ॥”
ᤕᤧᤛᤢᤴ ᤕᤖᤢᤛᤗᤧᤔᤖᤧ ᤁᤢᤗᤠᤃᤡ ᤜᤠ᤺ᤵ
41ᤁᤖ ᤕᤧᤛᤢᤴ ᤕᤖᤢᤛᤗᤧᤔ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱ ᤁᤧᤖᤧᤸᤗᤧ ᤂᤧᤴ ᤕᤧᤰᤕᤰᤁᤡᤴ ᤀᤥᤔᤧᤳᤋᤢᤀᤠᤱ ᤜᤠᤒᤧ. 42ᤜᤧᤰᤁᤩᤠᤱ ᤀᤰᤂᤣ ᤐᤠ᤺ᤳᤋᤢ. “ᤀᤠᤸᤗ ᤂᤡᤏᤡ᤹ᤃ ᤛᤏᤠᤖᤢᤱ ᤂᤥᤔᤠ ᤔᤠᤖᤠᤶᤔᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤡᤸᤗᤧ ᤐᤥ᤺ᤰᤂᤧᤒᤠᤖᤥ. ᤁᤖ ᤁᤴ ᤁᤧᤖᤧᤰᤃ ᤁᤧᤔᤡᤰᤛᤠᤀᤥᤗᤠᤶ ᤌᤣ᤺ᤰᤛᤡᤱᤒᤣᤀᤠᤱ ᤘᤠ᤹ᤖᤥ॥ 43ᤀᤠᤸᤗ ᤁᤧᤏᤡᤱᤔᤡᤜᤠ᤹ᤖᤧ ᤂᤧᤏᤧ᤹ ᤁᤠᤰ ᤐᤡᤛᤠᤱᤗᤠᤶ ᤁᤧᤶᤃᤵᤐᤠᤱ ᤂᤡᤖᤡ ᤁᤧᤶᤎᤣ᤺ᤰᤁᤠᤱ ᤆᤡᤜᤢ᤹ ᤁᤧᤶᤜᤢ᤹ᤒᤠ ᤕᤧᤶ ᤋᤠᤖ ᤐᤳᤗᤥ॥ 44ᤂᤧᤏᤧ᤹ ᤁᤧᤶᤕ ᤁᤧᤶᤗᤢ᤺ᤴᤏᤠᤱ ᤁᤧᤛ᤻ᤛᤠᤜᤠ᤹ᤏᤢ ᤂᤠᤶᤔᤥ ᤁᤧᤶᤍᤱᤗᤥ॥ ᤌᤡᤰ ᤗᤢᤱ ᤛᤶᤍᤠᤱ ᤘᤣ᤹ ᤗᤢᤱᤅᤡᤴᤏᤣ ᤐᤰᤔᤧᤴᤎᤏᤧᤴ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ ᤁᤧᤛᤧ᤺ᤵᤛᤧ ᤕᤧᤒᤠ ᤛᤢᤕᤧᤶᤔᤡᤴ ᤁᤧᤏᤠ᤹ᤖᤢᤖᤥ॥”
ᤕᤧᤛᤢᤴ ᤔᤠᤱᤜᤡᤶᤔᤥ ᤐᤣᤰ
(ᤔᤳᤋᤡ ᥈᥇:᥇᥈-᥇᥍; ᤔᤷᤁᤢ ᥇᥇:᥇᥋-᥇᥏; ᤕᤢᤜᤢ ᥈:᥇᥉-᥈᥈)
45-46ᤜᤧᤰᤁᤩᤠᤱ ᤕᤧᤛᤢᤴ ᤔᤠᤱᤜᤡᤶᤔᤥ ᤗᤠᤛᤧᤀᤠᤱ ᤂᤧᤵᤔᤥ ᤗᤧᤱᤜᤱᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤏᤠ᤺ᤵᤔᤠ ᤗ᤺ᤵᤔᤠ ᤜᤣ᤺ᤰᤋᤢᤛᤡ. “ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. ‘ᤀᤡᤱᤃᤠ᤹ ᤀᤠᤜᤡᤶᤔᤡᤱᤃ ᤋᤢᤘᤠ ᤆᤥ᤺ᤰᤔᤠ ᤜᤡᤶ ᤐᤥᤱ.’#ᤕᤛᤤ ᥋᥌:᥍; ᤕᤷᤔᤡ ᥍:᥇᥇ ᤁᤖ ᤂᤡᤏᤡ᤹ᤃ ᤑᤠ᤺ᤴᤍᤠᤜᤠ᤹ ᤆᤡᤱᤛᤡᤱᤔᤠ ᤋᤧᤴ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ᥄”
47ᤜᤧᤰᤁᤩᤠᤱ ᤂᤢᤏᤧ᤹ ᤌᤡᤰᤕᤠ᤺ᤴᤎᤰ ᤔᤠᤱᤜᤡᤶᤔᤥ ᤏᤡᤛᤠᤶ ᤜᤢ᤹ᤖᤢᤛᤡᤖᤥ॥ ᤁᤖ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤧ᤹ ᤛᤧᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢ. 48ᤁᤖ ᤀᤠᤵᤋᤡᤰ ᤁᤢ᤺ᤵᤔᤠ ᤐᤠᤴ ᤌᤣᤀᤠᤱ ᤂᤧᤱᤜᤠ᤹ᤖᤧ ᤔᤧᤱᤄᤥᤛᤢᤴ. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧᤃ ᤂᤢᤏᤧ᤹ ᤜᤢ᤹ᤖᤢᤛᤡᤒᤠ ᤏᤡᤛᤠᤶᤜᤠ᤹ ᤂᤢᤏᤡ᤹ ᤛᤡᤖᤠ᤹ ᤌᤠᤅᤧᤖ ᤔᤧᤄᤧᤵᤛᤢᤖᤥ॥
Currently Selected:
ᤗᤢᤁᤠ 19: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.