ᤜᤡᤒᤪᤢ 13
13
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠᤒᤠ ᤜᤡᤱᤔᤴ
1ᤀᤠᤸᤗ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ ᤁᤧᤒᤥ᤺ᤰᤂᤡᤒᤠᤸᤗᤧ ᤆᤥᤃᤢᤸᤗᤧ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ᤀᤥ॥ 2ᤜᤡᤶᤔᤥ ᤁᤧᤍᤠᤒᤠᤜᤠ᤹ ᤋᤖᤣ ᤔᤧᤴᤍᤥᤛᤡᤱᤅᤣ ᤔᤧᤒᤠᤱᤄᤧᤶᤛᤡᤶᤔᤧᤴᤏᤧ᤹ᤀᤥ॥ ᤁᤢᤓᤠᤖᤧ ᤜᤧᤰᤁᤣ ᤔᤧᤈᤥᤃᤢᤸᤗᤧ ᤏᤡᤱᤘᤠ᤹ ᤔᤧᤱᤄᤥᤀᤣ ᤔᤠᤱᤗᤠᤀᤡᤱᤒᤠᤜᤠ᤹ ᤋᤖᤣ ᤔᤧᤍᤥᤛᤢᤛᤡᤀᤠᤱ ᤘᤠ᤹ᤖᤥ॥ 3ᤂᤡᤏᤡ᤹ᤀᤠᤱ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤩᤧ᤹ᤀᤡᤀᤠᤱ ᤁᤧᤘᤕᤡᤒᤠ ᤁᤢᤀᤡᤛᤡ᤺ᤰᤁᤣ ᤐᤢᤱᤗᤠᤜᤡᤶᤔᤥ ᤁᤧᤕᤠᤰᤐᤠᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤛᤡᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤌᤰᤁᤥ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤈᤩᤧ᤹ᤀᤡᤀᤠᤱ ᤁᤧᤘᤕᤡᤒᤠ ᤜᤧᤰᤁᤣ ᤀᤡ᤺ᤳᤋᤧᤶᤔᤧ᤹ᤀᤠᤱ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ॥
4ᤋᤧᤴᤎᤠᤶᤃᤧᤴ ᤔᤣ᤺ᤰᤂᤡᤶᤔᤡᤴ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤒᤠ ᤐᤥᤱᤔᤠ ᤐᤥᤱᤗᤥ॥ ᤜᤧᤰᤁᤩᤠᤱ ᤔᤣ᤺ᤳ ᤕᤧᤶᤒᤠ᤹ ᤗᤢᤶᤔᤥ ᤏᤛᤠ᤺ᤴᤛᤠᤒᤠ ᤐᤥᤱᤔᤠ ᤐᤥᤱᤗᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤏᤢ ᤁᤧᤖᤧᤰ ᤐᤖᤡᤰᤗᤧᤴ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤂᤠᤛᤧᤴ ᤆᤥᤃᤢᤛᤡ᤹ᤖᤥ॥
5ᤕᤠᤱᤛᤠᤁᤢᤴᤎᤣ ᤌᤰᤔᤠᤀᤥ ᤛᤩᤠᤱᤐᤧᤴᤍᤠᤱ ᤔᤧᤒᤳᤇᤧᤶᤔᤡᤴᤏᤧ᤹ᤀᤥ. ᤁᤖ ᤁᤧᤃᤳᤋᤢᤶᤒᤠ ᤐᤠ᤺ᤴᤜᤠ᤹ᤀᤥᤀᤣ ᤂᤡᤏᤡ᤹ ᤏᤡᤱᤘᤠ᤹ ᤋᤠᤛᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹.
“ᤀᤡᤱᤃᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤳᤏᤡᤱᤅᤡᤴ. ᤀᤠᤵᤑᤠᤸᤗᤧᤀᤠᤱ ᤔᤧᤏᤠ᤹ᤏᤡᤱᤅᤡᤴᤗᤥ॥”#ᤛᤠᤶᤕᤥ ᤀᤡᤱ ᥉᥇:᥌.᥎
6ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡ᤹ ᤜᤠᤱᤜᤠᤱᤅᤠᤱ ᤀᤰᤂᤣ ᤐᤠ᤺ᤵᤔᤠ ᤀᤠᤛᤢᤰᤋᤢᤶᤗᤥ.
“ᤀᤡᤱᤃᤠ᤹ ᤕᤠᤵᤔᤡ ᤁᤢᤓᤠ᤹ ᤁᤧᤒᤡᤒᤧᤱᤃ ᤍᤠᤱᤒᤠᤸᤗᤥ. ᤀᤡᤱᤃᤠ᤹ ᤔᤧᤃᤡᤀᤠᤴᤗᤥ॥ ᤀᤡᤱᤃᤠ᤹ ᤜᤠ᤺ᤳᤗᤧ ᤌᤣ ᤔᤧᤵᤔᤠ ᤛᤢᤰᤁᤠᤒᤣ᥅”#ᤏᤡᤱ ᤛᤢᤶ ᥈᥍:᥇. ᥇᥇᥎:᥌
7ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰ ᤁᤧᤜᤢ᤹ᤒᤠ ᤂᤡᤏᤡ᤹ ᤗᤠᤶᤗᤥᤒᤠᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤛᤡᤶᤔᤧ᤹ᤀᤥ॥ ᤂᤢᤏᤡ᤹ ᤜᤡᤱᤔᤴᤏᤥᤒᤠ ᤏᤢᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤠᤱ ᤏᤛᤠᤴ ᤔᤧᤈᤥᤃᤢᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ᤀᤠᤱ ᤆᤥᤃᤧᤶᤔᤧ᤹ᤀᤥ॥ 8ᤕᤧᤛᤢ ᤂᤪᤡᤛ᤻ᤋᤧᤱᤃ ᤔᤡ᤺ᤵᤔᤠ. ᤀᤠᤀᤡᤴ ᤜᤧᤰᤁᤩᤠᤱ ᤀᤠᤓᤧᤸᤗᤧᤛᤠᤱ ᤁᤢᤀᤡᤛᤡᤰ ᤘᤠ᤹ᤖᤥ॥ 9ᤐᤖᤡᤰ ᤐᤖᤡᤰᤐᤠ ᤁᤢᤛᤱ ᤏᤡᤛᤠᤶᤜᤠ᤹ᤀᤥ ᤗᤠᤶᤔᤧᤒᤥ᤺ᤳᤋᤧᤶᤔᤡᤴᤏᤧ᤹ᤀᤥ॥ ᤛᤠᤰᤌᤡᤶ ᤁᤢᤀᤡᤛᤡ᤺ᤰᤐᤠ ᤆᤠᤔᤠ ᤌᤢᤱᤔᤠᤸᤗᤧᤃ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢ ᤗᤢᤱᤃᤢᤶᤗᤠᤶᤒᤠᤏᤧ ᤂᤡᤏᤡ᤹ ᤕᤠᤶᤛᤠᤶᤔᤡᤴ ᤁᤧᤎᤢᤶᤒᤠ ᤐᤥᤱᤔᤠ ᤏᤢᤒᤠ ᤐᤥᤱᤗᤥ॥ ᤜᤧᤰᤋᤱᤒᤠ ᤆᤠᤔᤠ ᤌᤢᤱᤔᤠ ᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤌᤣᤀᤠᤱ ᤀᤡᤴᤎᤠ᤺ᤰ ᤔᤧᤱᤄᤥᤛᤢᤴᤗᤥ॥
10ᤜᤧᤰᤁᤩᤠᤱ ᤀᤠᤏᤡ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤎᤡᤰ ᤀᤠᤃᤳᤋᤢᤶ॥ ᤂᤧᤵᤔᤥ ᤋᤥ᤺ᤶᤔᤏᤠᤒᤠ ᤆᤥᤓᤠ᤹ᤜᤠ᤹ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤔᤠᤱᤛᤧᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤌᤣᤀᤠᤱ ᤆᤠᤔᤠ ᤕᤢᤰ ᤜᤥ᤺ᤵᤋᤧᤖᤥ॥ 11ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤠᤰᤏᤢ᤺ᤸᤗᤧ ᤛᤣᤛᤣᤒᤠᤍᤧᤴᤏᤥ ᤌᤰᤛᤠ ᤔᤠᤰᤂᤡ᤹ᤀᤡᤴ ᤕᤠᤱᤛᤡᤱᤅᤠᤱ ᤗᤠᤕᤥᤖᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤗᤠ᤺ᤳᤗᤥ. ᤁᤖ ᤌᤰᤛᤠ᤺ᤱᤃ ᤔᤏᤠ ᤘᤠ᤹ᤔᤠ ᤐᤠᤱᤈᤢᤶᤔᤡᤸᤗᤧ ᤗᤠ᤺ᤰᤁᤠᤳ ᤔᤡᤔᤧᤎᤡᤰᤂᤢᤖᤥ॥ 12ᤒᤠ ᤁᤸᤗᤧᤆᤥᤃᤢᤸᤗᤧ ᤕᤧᤛᤢ᤺ᤴᤏᤠᤱ ᤀᤠᤒᤠᤅᤣ ᤁᤢᤔᤠᤰᤂᤡ᤹ᤀᤡᤸᤗᤧ ᤔᤏᤠᤜᤠ᤹ ᤛᤢᤳᤌᤥ ᤆᤥ᤺ᤰᤛᤧ ᤕᤧᤰᤕᤰ ᤗᤠ᤺ᤰᤁᤠᤳ ᤛᤩᤧᤖᤥ॥ 13ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ᤀᤠᤱ ᤂᤢᤏᤧ᤹ᤀᤥ ᤐᤥ᤺ᤰᤂᤡᤀᤠᤱ ᤗᤠ᤺ᤰᤁᤠᤳ ᤐᤡᤃᤡ. ᤜᤧᤰᤁᤩᤠᤱ ᤂᤢᤏᤧ᤹ ᤋᤠ᤺ᤰᤋᤢᤒᤠ ᤜᤡᤏᤠ᤺ᤶᤔᤡᤴ ᤋᤠ᤺ᤰᤋᤢᤶᤗᤥ॥ 14ᤌᤣᤀᤠᤱᤓᤧᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤍᤠᤍᤡᤱ ᤁᤧᤏᤧᤒᤠ ᤕᤧᤰᤕᤰ ᤀᤠᤱᤃᤳᤋᤢᤶᤔᤡᤴᤗᤥ. ᤁᤖ ᤀᤠᤏᤡ᤹ᤃ ᤁᤧᤍᤠᤒᤠᤖ ᤁᤧᤒᤵᤐᤠ ᤕᤧᤰᤕᤰᤁᤡᤴ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤀᤠᤜᤠᤱᤄᤢᤶᤗ ᤀᤠᤘᤠ᤹ᤖᤥ॥ 15ᤀᤠᤸᤗ ᤕᤧᤛᤢᤖᤧ ᤁᤢᤓᤠ᤹ᤗᤠᤶᤒᤠ ᤀᤠᤏᤡ᤹ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤰᤔᤧᤸᤗ᤹ᤀᤣ ᤁᤢᤏᤠᤖᤠ ᤑᤥᤛᤢᤶᤗᤥ॥ ᤂᤧᤱᤃ ᤂᤢᤏᤧ᤹ ᤍᤠᤱᤒᤠ ᤗ᤹ᤖᤡᤰ ᤋᤧᤴᤍᤡᤱ ᤆᤥ᤺ᤰᤔᤏᤠᤒᤠ ᤔᤢᤖᤠᤀᤥᤗᤠᤶ ᤁᤧᤗ᤺ᤶᤒᤠ ᤆᤥᤓᤠ᤹ᤖᤥ॥ 16ᤀᤠᤸᤗ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤢ ᤁᤶᤒᤪᤠᤱ ᤔᤧᤳᤇᤡᤱᤔᤠ ᤁᤢᤓᤠ᤹ ᤐᤡᤛᤡᤱᤔᤠ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤰᤋᤱᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤛᤢᤖᤥ॥
17ᤂᤡᤏᤡ᤹ ᤗᤠᤶᤗᤥᤒᤠᤜᤠ᤹ᤖᤧ ᤁᤧᤶᤔᤧᤳᤋᤡᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹. ᤜᤧᤰᤁᤩᤠᤱ ᤂᤢᤏᤡ᤹ ᤕᤢᤰᤁᤥ ᤘᤕᤧᤶᤔᤧ᤹ᤀᤥ॥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤶᤒᤪᤠᤱ ᤁᤧᤶᤔᤧᤳᤋᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤗᤰᤐᤧᤴᤛᤠᤒᤠ ᤔᤧᤒᤥᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤂᤧᤴ ᤕᤠ᤺ᤶᤒᤰᤁᤡᤴ ᤔᤧᤛ᤺ᤳᤗ ᤏᤡᤱᤘᤠ᤹ ᤔᤧᤴᤍᤢᤰᤁᤣ ᤔᤧᤈᤥᤃᤢᤖᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤁᤧᤍᤢᤰᤛᤢᤶ ᤁᤧᤒᤡᤖᤢᤶᤛᤡᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤗᤠᤃᤡ ᤌᤣᤀᤠᤱ ᤀᤡᤴᤎᤠ᤺ᤰ ᤔᤧᤒᤥᤱᤏᤧᤸᤗᤥ॥
18ᤀᤠᤏᤡᤃᤣ ᤗᤠᤃᤡ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥ ᤀᤠᤏᤡᤃᤧᤃ ᤛᤣᤛᤣ ᤂᤠᤛᤡᤱ ᤁᤳᤋᤢᤶᤒᤠ ᤜᤧᤰᤁᤩᤠᤱ ᤁᤧᤖᤧᤰ ᤐᤖᤡᤰᤗᤧᤴ ᤔᤡᤱᤛᤥ ᤀᤡᤱᤎᤠᤱᤅᤥ ᤜᤡᤱᤔᤠ ᤏᤡᤱᤘᤠ᤹ ᤆᤥᤃᤢᤶᤒᤧᤖᤥ ᤑᤠ᤹ᤀᤠᤱ ᤏᤡᤛ᤻ᤛᤣ ᤘᤕᤡᤃᤧᤖᤥ॥ 19ᤀᤠᤸᤗᤥ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤕᤠᤶᤔᤥ ᤜᤠᤖᤠᤀᤣ ᤋᤠᤔᤠ ᤛᤢᤰᤁᤠᤏᤡᤖᤥ ᤑᤠ᤹ᤀᤠᤱ ᤀᤠᤗᤠᤃᤡ ᤋᤢᤘᤠ ᤆᤥᤃᤧᤶᤔᤧ᤹ ᤗ᤹ᤖᤡᤰ ᤐᤣᤗᤡ ᤑᤠᤰᤏᤡᤱᤗᤥ॥
ᤁᤢᤏᤢᤵᤔᤠ ᤋᤢᤘᤠ ᤏᤢ ᤛᤧᤶᤔᤢ᤹ᤀᤡ ᤛᤧᤘᤠ
20ᤀᤠᤸᤗ ᤐᤕᤶ ᤕᤶᤒᤠ ᤔᤧᤸᤗᤢᤰᤁᤶᤒᤠ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ᤺ᤸᤗᤧ ᤔᤧᤴᤏᤢᤵᤔᤏᤠᤒᤠ ᤔᤠᤱᤜᤢᤵᤐᤡᤸᤗᤧ ᤁᤢᤔᤠᤰᤂᤡ᤹ᤀᤡᤴ ᤘᤠᤃᤧᤍᤣ᤺ᤶᤒᤠᤀᤠᤱ ᤛᤡᤔᤧᤴᤗᤠᤶ ᤕᤠᤶᤔᤥ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠ ᤛᤏᤠᤖᤢᤱᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ 21ᤂᤢᤏᤧ᤹ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤆᤥ᤺ᤰᤔᤠ ᤆᤠᤜᤠᤒᤠ ᤁᤧᤈᤥᤃᤡᤒᤠ ᤁᤠᤰ ᤐᤠ᤺ᤴᤜᤠ᤹ᤖᤧ ᤁᤧᤃᤠᤵᤋᤡᤖᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠᤒᤠ ᤁᤠᤰ ᤐᤠ᤺ᤴᤜᤠ᤹ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠ ᤂᤡᤏᤡ᤹ᤀᤥ ᤆᤥᤃᤢᤏᤡᤖᤥ॥ ᤜᤧᤰᤁᤩᤠᤱ ᤛᤍᤠᤍᤡᤱ ᤛᤍᤠᤍᤡᤱ ᤂᤪᤡᤛ᤻ᤋᤖᤧ ᤁᤢᤔᤡᤔᤡᤍᤡᤱ ᤐᤥᤱᤏᤡᤖᤥ॥ ᤀᤠᤔᤧᤴ॥
22ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤛᤠᤵᤋᤢᤱᤒᤠ ᤁᤴ ᤋᤠᤱᤛᤠ ᤛᤰᤀᤡᤱᤄᤱᤅᤥ ᤁᤧᤒᤵᤐᤠ ᤂᤠᤜᤢᤴᤜᤠ᤹ ᤏᤡᤱᤘᤠ᤹ᤒᤥ ᤋᤠ᤺ᤰᤋᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥
23ᤀᤠᤏᤡ᤹ ᤏᤢᤛᤠ᤹ ᤋᤡᤔᤥᤌᤡᤴ ᤐᤢᤱᤗᤠᤜᤡᤶᤔᤥᤗᤠᤶ ᤗᤧᤖᤧᤀᤠᤱ ᤘᤠ᤹ᤒᤠᤴ ᤂᤡᤏᤡ᤹ ᤏᤡᤱᤘᤠ᤹ ᤂᤥᤛᤧᤶᤔᤧ᤹ ᤁᤧᤗ᤹ᤒᤠ ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤘᤠ᤹ᤖᤥ॥ ᤂᤢᤏᤧ᤹ ᤁᤵᤔᤥ ᤀᤡᤱᤃᤠ᤹ᤀᤥ ᤜᤠᤖᤠᤀᤣ ᤋᤠᤏᤧ ᤑᤠ᤹ᤃᤪ ᤂᤡᤏᤡ᤹ ᤋᤢᤶᤛᤧ ᤀᤠᤴᤇᤡᤃᤣ ᤛᤥᤖᤡᤰ ᤑᤧᤴᤇᤡᤃᤧ᤹ᤖᤥ॥
24ᤂᤧᤵᤔᤥᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤏᤢ ᤏᤛᤠᤏᤡᤒᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ ᤁᤵᤔᤥ ᤀᤡᤋᤠᤗᤡ ᤗᤠᤈᤣ᤹ᤒᤠ ᤏᤛᤠᤏᤡᤒᤠᤜᤠ᤹ᤖᤧᤀᤠᤱ ᤛᤧᤘᤠ ᤁᤧᤶᤜᤠᤰᤋᤡᤀᤠᤱ ᤘᤠ᤹ᤖᤥ॥ 25ᤏᤡᤱᤘᤠ᤹ᤑᤢ ᤗᤢᤱᤃᤢᤶᤔᤡᤴ ᤂᤡᤏᤡ᤹ ᤁᤧᤖᤧᤰᤏᤢ ᤘᤠ᤹ᤖᤖᤥ॥
Currently Selected:
ᤜᤡᤒᤪᤢ 13: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.