Números 36
36
Q'uinal ya x'ac'bot jilel yu'un stat antsetic
1Te jtsobwanejetic yu'un sts'umbal Galaad te mero sts'umbalic stuquel te Maquir, Manasés soc José, ba sc'oponic Moisés soc te jtsobwanejetic yu'un spisil Israel, jich la yalbeyic:
2—Tatic Moisés, la spasat ta mandal te Cajwaltic te ya apucbey israeletic ta snumeroil ta na'el te q'uinal ya xc'ot ta swentaic juju-jtul. Soc la yalbey sc'oplal te q'uinal ya xc'ot ta swenta te anima Zelofehad, te ja' pajal jbiiltic soc, te ya awac'bey te yantsil-nich'nabe.#Nm 27.7. 3Ja'uc me to, teme ya xnujbinic soc yan jchajp sts'umbal Israel, te q'uinal ya xc'ot ta swentaic, tey nix ya xbajt' ta wentainel a, jchajp nix sq'uinal ya xc'ot soc a te mach'atic ya xnujbinic soque. Jich me yac ta ch'ayel bael cu'untic te q'uinal la quich'tic ta swenta snumeroil ta na'el. 4Te c'alal ya xc'ot te ja'wil te ya xjil ta libre te israeletique, te sq'uinal te antsetic jc'axel ya xjil ta swenta te yan sts'umbale, jich ya xch'ay ta wentainel cu'untic —xiic.
5Jich yu'un te Moisés la spas ta mandal te israeletic, jich bit'il snopjibal ac'bil yu'un te Cajwaltique:
—Te winiquetic te sts'umbal José, melel xyalic. 6Te Cajwaltic ya nax yac'bey spas te mach'auc ya xnujbin soc te yantsil-nich'nab Zelofehad, ja' nix ya sc'an ya xnujbinic soc te mach'atic pajal sbiilic soc te statique. 7Te q'uinal la yich'ic juju-jtul, ma xju' xc'ax bael ta yan jchajp sts'umbal Israel. Spisil Israel ya me scanantay te q'uinal ta bay nix ayic ta juju-jchajbe. 8Teme jtul ants ya yich'bey jilel sq'uinal te state, chican ta bay sts'umbal taleme, ya me sc'an ya xnujbin soc jtul winic te pajal sts'umbal soque. Jich me juju-jtul israel ya scanantay te bila yu'uninej te yich'oj jilel yu'un te sme'-state. 9Ma me ayuc q'uinal te ya xc'ax bael ta swenta te yan jchajp sts'umbal Israel, juju-jchajp ya me scanantayic te sq'uinalic te c'oem ta swentaique —xi'.
10-11Jich yu'un te Maala, Tirsa, Hogla, Milca soc Noa, te yantsil-nich'nab Zelofehad, jich la spasic te bit'il yalojbey mandal Cajwaltic te Moisés: nujbinic soc te snich'nab stajunic, 12te ja'ic sts'umbalic Manasés te snich'an José. Jich yu'un te sq'uinalic jil ta swenta te jchajp sts'umbal te state.
13Ja' mandaliletic soc snopjibal la yac'bey Cajwaltic te israeletic ta swenta Moisés ta bay spamlej q'uinal yu'un Moab ta sts'eel Jordán, ta jejch' ja' yu'un Jericó.
Currently Selected:
Números 36: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.