Éxodo 40
40
Moisés ya stehc'an te Nahilpac' Templo
1Te Jehová la yalbe te Moisés: 2Ta sba c'ahc'alil yu'un te shahchibal u ya me atehc'an te Nahilpac' Templo, ha te Nahilpac' Templo yu'un tahojibal. 3Otsesa tey a te scaxahul Testigo-c'op, ya me amac ta tsalul pac'. 4Otsesa te mesa soc chahpana ta lec; otsesa te scajtajib c'ahc' soc chahpanlana te yawil c'ahq'ue. 5Ya me awac' ta stojol te scaxahul Testigo-c'op te scajtajib schic'ojibal pom pasbil ta oro, soc ya me ajohc'an te pac' ta yochibal te Nahilpac' Templo. 6Ya me awac' te scajtajib ta chiq'uel mahtanil ta stojol te yochibal te Nahilpac' Templo, ha te Nahilpac' Templo yu'un tahojibal. 7Patil ya me awac' te yawil ha' ta ohlil yu'un te Nahilpac' Templo yu'un tahojibal soc te scajtajib ta chiq'uel mahtanil, soc ya me anojes ta ha'. 8Ya me achahpan te amac' ta sjoyobal soc ya me ajihpan te pac' ta yochibal.
9Ya me awich' tal te aceite yu'un ch'ultesel, ya me amal a te Nahilpac' Templo soc spisil te bintic ay tey a; ya me ach'ultes soc spisil te bintic ya xtuhun tey a, hich ch'ultesbil ya xc'oht a. 10Soc ya me amal a te scajtajib ta chiq'uel mahtanil soc spisil te bintic ya xtuhun tey a, ya me ach'ultes, hich mero ch'ultesbil ya xc'oht a. 11Ha nix hich ya me amal a te yawil ha' soc te scajtajib, ya me ach'ultes.
12Ya me awic' tal te Aarón soc snich'nab ta sti'il te Nahilpac' Templo yu'un tahojibal, ya me apocticlan ta ha'. 13Soc ya me awa'be slap te ch'ul c'u'uletic te Aarón, ya me amal ta aceite, ya me ach'ultes scuenta yu'un sacerdote cu'un ya xc'oht a. 14Patil ya me awic'ticlan tal te snich'nab, ya me awac'ticlambe slapic te muc'ul c'u'uletic; 15ya me amal ta aceite hich te bin ut'il la amal ta aceite te static, scuenta yu'un sacerdotehetic cu'un ya xc'oht a. Te ya yich'ic malel ta aceite hich me ya x'ochic ta sacerdotehil te ma xlaj sc'oblal ta cajalcaj sts'umbalic, xchi. 16Te Moisés la spas spisil hich te bin ut'il halbot yu'un te Jehová.
17Ta sba c'ahc'alil yu'un te shahchibal u ta schebal ha'bil la yich' tehc'anel te Nahilpac' Templo. 18Te Moisés la stehc'an te Nahilpac' Templo, la yac'ticlambe te scajtajib, la stehc'an te tablahetic, la sohlteslambe te sc'atal-te'eletic, soc la stehc'anlan te yoyale. 19La yac' te pac' ta sba te Nahilpac' Templo soc la slimbe xan smuhquil ta sba, hich te bin ut'il halbot yu'un Jehová te Moisés.
20La stsac te Testigo-c'op#40.20 Ha te lajuneb mandariletic. soc la yotses ta yutil te scaxahul; la sohlteslan te sq'uechojibal soc la yac' te yawil stahel perdón ta sba. 21Patil la yotses te scaxahul te chapbil-c'op ta yutil te Nahilpac' Templo, la st'im te pac', hich la smac a te scaxahul te chapbil-c'op, hich te bin ut'il halbot yu'un Jehová te Moisés.
22La yotses te mesa ta yutil te Nahilpac' Templo yu'un tahojibal ta stojol norte, ta fuera yu'un te tsahlul paq'ue; 23tey la scholticlan a te pan ac'bil ta stojol Jehová, hich te bin ut'il halbot yu'un Jehová te Moisés.
24La yotses te scajtajib c'ahc' ta yutil te Nahilpac' Templo yu'un tahojibal, snuhp'usitayej sba soc te mesa, ta stojol sur; 25soc la stsunticlan te c'ahc' ta stojol Jehová, hich te bin ut'il halbot yu'un Jehová te Moisés.
26Soc la yotses te scajtajib ta chiq'uel pom pasbil ta oro ta yutil te Nahilpac' Templo yu'un tahojibal ta stojol te tsalul pac', 27soc tey la schic' a te pom te sumet yic', hich te bin ut'il halbot yu'un Jehová te Moisés.
28La sjohc'ambe spac'al ta yochibal te Nahilpac' Templo. 29La yac' te scajtajib ta chiq'uel mahtanil ta yochibal te Nahilpac' Templo, ha te Nahilpac' Templo yu'un tahojibal, soc tey la yac' a te scohtol chic'bil mahtanil soc te mahtanil harina, hich te bin ut'il halbot yu'un Jehová te Moisés.
30La yac' te yawil ha' ta ohlil yu'un te Nahilpac' Templo yu'un tahojibal soc te scajtajib ta chiq'uel mahtanil, soc la snojes ta ha' scuenta poquel. 31Tey ya spoc sc'abic soc yoquic a te Moisés, Aarón soc te snich'nabe. 32Te c'alal ya x'ochic bahel ta Nahilpac' Templo yu'un tahojibal soc te c'alal ya xnohpojic bahel ta scajtajib ta chiq'uel mahtanil, tey ya spoc sbahic a, hich te bin ut'il halbot yu'un Jehová te Moisés.
33Ta slajibal, la schahpan te spac'al amac' ta sjoyobal te Nahilpac' Templo soc te scajtajib ta chiq'uel mahtanil, soc la sjohc'ambe spac'al te yochibal te amaq'ue. Hich la shu'tes te a'tel te Moisés.
Te yutsilal Jehová ya snojes te Nahilpac' Templo
34Ha yu'un te tocal la smuc te Nahilpac' Templo yu'un tahojibal, te yutsilal Jehová noj yu'un te Nahilpac' Templo. 35Te Moisés ma ba hu' och bahel ta Nahilpac' Templo yu'un tahojibal como hul spuhl sba tey a te tocal, soc noj ta yutsilal te Jehová.
36Ta spisil banti behenic, te c'alal ya xhahch bahel te tocal ta sba te Nahilpac' Templo, hich ya xhahchic ta behel te snich'nab Israel; 37yan teme ma ba ya xhahch te tocale, ma ba ya xhahchic ta behel, ha to teme ya xhahch te tocale. 38Como te tocal yu'un Jehová ay ta sba te Nahilpac' Templo ta c'ahc'alel, soc ta ahc'abal ay c'ahc' ta sba, te chican ta ilel yu'un spisil te snich'nab Israel te jayeb c'ahc'al behenique.
Currently Selected:
Éxodo 40: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.