Éxodo 36
36
1Ha yu'un te Bezaleel, Aholiab soc spisil mach'atic ay smahtanic yu'un spasel bintic t'ujbil ta pasel, te ha a'botic sp'ijil yo'tanic yu'un Jehová ta sna'el spasel spisil te bintic ya xtuhun ta ch'ul awilal, ha'ic ya spasic spisil te bin la yal ta mandar te Jehová, xchi te Moisés.
Moisés la scom te pueblo ta yaq'uel mahtaniletic
2Te Moisés la yic' tal te Bezaleel, Aholiab soc spisil te mach'atic ay sp'ijilic ta spasel te bintic t'ujbil ta pasel, te a'botic sp'ijil yo'tanic yu'un te Jehová, spisil te mach'atic tijbot yo'tanic yu'un ya xtal spasic te a'tel tey a. 3A'bot ta sc'abic yu'un Moisés spisil te mahtaniletic la yich'ic tal te snich'nab Israel yu'un spasel te a'tel ta ch'ul awilal. Ta jujun sab jun yo'tanic la yich'ic tal mahtaniletic. 4Ha yu'un spisil te mach'atic ay sp'ijilic te ayic ta a'tel ta ch'ul awilal la squehchanic hilel te ya'telic, 5hich tal yalbeyic te Moisés: C'axix a te yac yac'belic te pueblo te bin ya xtuhun yu'un te a'tel te la yal ta mandar te Jehová te ya yich' pasele, xchihic.
6Ha yu'un te Moisés la sticon bahel ta halel ta spisil te campamento: Ma me ayuquix winic soc ants te ay bin ya spasic xan scuenta mahtanil yu'un te ch'ul awilal, xchi. Hich la yich' comel te pueblo ta yaq'uel xan mahtaniletic, 7como bayelix sobra te bintic ya xtuhun yu'un spasel spisil te a'tele.
Ya yich' pasel Nahilpac' Templo
8Spisil te mach'atic ay sp'ijil yo'tanic ta yohlil te mach'atic ayic ta a'tel, la spasic lajunlihc pac' ta ts'otbil lino, ta yax, chi'in-yax soc tsajal estambre yu'un te Nahilpac' Templo; soc buen t'ujbil la sch'ahlic ta ts'isel ta sloc'omba querubinetic. 9Te jujulihc pac' ha waxaqueb scha'winic (28) xuhc'ubil#36.9 12.5 metros snahtil, soc chaneb xuhc'ubil#36.9 2 metros sjamalil. Pajal sp'isol spisil te paq'uetique. 10La ya'be stsacticlan sba ho'lihc, ha nix hich la ya'be stsacticlan sba te yan ho'lihc xane. 11La yac'ticlambe schiquin pasbil ta yaxal pac' ta sti'il te slajibal pac' ta sba chahpale, ha nix hich la spasbe te slajibal pac' ta scha'chahpale. 12La spasticlambe lajuneb yoxwinic (50) schiquin te sba chahpale, soc yan xan lajuneb yoxwinic (50) ta scha'chahpale. Nuhp'ulnuhp' la ya'be yil sba te schiquine. 13Soc la spasic lajuneb yoxwinic (50) ganchohetic ta oro te la stsac sba ta scha'chahpalic a, hich junax c'oht te Nahilpac' Templo.
14La sjal pac' ta stsotsel tentsun yu'un smuhquil te Nahilpac' Templo; buluchlihc la sjal. 15Te jujulihc pac' ha lajuneb scha'winic (30) xuhc'ubil#36.15 13.5 metros snahtil soc chaneb xuhc'ubil sjamalil. Junax sp'isol ta sbuluchebal. 16La ya'be stsacticlan sba ho'lihc te paq'ue, ha nix hich te yan waclihc xane. 17La spasbe lajuneb yoxwinic (50) schiquin ta sti'il te slajibal pac' ta sba chahpale; soc yan xan lajuneb yoxwinic (50) schiquin ta sti'il te slajibal pac' ta scha'chahpale. 18Soc la spas lajuneb yoxwinic (50) ganchohetic ta bronce yu'un ya yich' tsaquel a te nahilpac', scuenta yu'un junax ya xc'oht a.
19La spasbe smuhquil te nahilpac' ta snuhculel tat tuminchijetic te bombil ta tsaj, soc yan xan smuhquil ta sba te pasbil ta nuhculetic.#36.19 Ilawil 25.5
20Soc la spasbe te Nahilpac' Templo tablahetic ta acacia-te' te toj teq'uele. 21Te jujun tabla lajuneb xuhc'ubil#36.21 4.5 metros snahtil soc j'ohlil scheb xuhc'ubil#36.21 65 centímetros sjamalil. 22Te jujun tabla ay cheb slawuxte'el te ya stsac sba soc a te yane. Hich la spasticlambe spisil te tablahetic yu'un te Nahilpac' Templo. 23La spasbe jtahb (20) tablahetic ta stojol sur. 24Soc la spasbe cha'winic (40) scajtajib ta plata ta ye'tal te jtahb tablahetic; chebcheb scajtajib ta ye'tal te jujun tabla ta schebal slawuxte'ele. 25Ha nix hich ta jehch te Nahilpac' Templo, ta stojol norte, la spas jtahb (20) ta pehch tablahetic, 26soc cha'winic (40) scajtajib ta plata, chebcheb scajtajib ta ye'tal te jujun tabla. 27Ta spat te Nahilpac' Templo, ta stojol banti ya xmahl c'ahc'al, la spas wacpehch tablahetic. 28Soc ta jujun xuhc te Nahilpac' Templo ta spat la spasbe cha'pehch tabla. 29Cheb cheb la stsac sba ta ye'tal c'alal ta toyol te banti ay te shahchibal sch'ocowile; hich la schahpan te cheb tabla ta jujun xuhc. 30Ha yu'un ay waxaqueb tablahetic soc waclajuneb scajtajib ta plata; chebcheb scajtajib ta ye'tal te jujun tabla.
31Soc la spasbe sc'atal-te'el ta acacia-te': ho'eb yu'un te tablahetic ta jehch te Nahilpac' Templo, 32ho'eb ta yan jehch, soc ho'eb ta spat ta stojol banti ya xmahl c'ahc'al. 33La yac' te ya xc'oht ta jehch ta jehch te sc'atal-te'el te ay ta ohlil yu'un te tablahetique. 34La spots ta oro te tablahetic soc la spas ta oro te ch'ocowiletic te banti ya xc'ax te sc'atal-te'el; ha nix hich la spots ta oro te sc'atal-te'ele.
35Soc la spas te tsalul pac' ta yax, chi'in-yax soc tsajal estambre, soc ta ts'otbil lino; buen t'ujbil la sch'ahl ta ts'isel te querubinetic. 36La spasbe chaneb yoyal ta acacia-te' soc la spots ta oro; ha nix hich pasbil ta oro te ganchohetic yu'un, soc la yuhltesbe ta pasel chaneb scajtajib ta plata.
37Soc la spas pac' yu'un te yochibal te Nahilpac' Templo te pasbil ta yax, chi'in-yax soc tsajal estambre, soc ts'otbil lino; t'ujbil ch'albil ta ts'isel. 38La spasbe ho'eb yoyal soc sganchohil; la spotsbe ta oro te sni'il te oyetic soc te sc'atal-te'el, soc la spas ta bronce te ho'eb scajtajibe.
Currently Selected:
Éxodo 36: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.