1 Samuel 9
9
Saúl tsahbil scuenta ajwalil
1Ay jtuhl winic yu'un Benjamín te ich'bil ta muc', Cis sbihil, ha snich'an Abiel, snich'an Zeror, snich'an Becorat, snich'an Afía, sts'umbal Benjamín. 2Ay jtuhl snich'an, Saúl sbihil, buen t'ujbil jcolel winic. Ta yohlil te snich'nab Israel mayuc mach'a c'ax hich st'ujbilal a; ha toyol mohel snehquel c'ax hich snahtil a te bin ut'il yantic.
3Ay ch'ayem burrahetic yu'un te Cis te stat Saúl. Ha yu'un te Cis hich la yalbe Saúl te snich'an: Ic'a bahel jtuhluc a'bat, bahan, leha te burrahetique, xchi.
4Hich te Saúl c'ax bahel ta witsiltic yu'un Efraín soc c'ax bahel ta sq'uinal Salisa, ma ba la sta te burrahetique. Soc c'axic xan bahel ta sq'uinal Saalim, ma ba tey ayic a. Patil c'axic bahel ta sq'uinal Benjamín, ma ba la stahic. 5C'alal c'ohtic ta sq'uinal Zuf, te Saúl la yalbe te a'bat sjoquinej: Con suhtucotic bahel, teme repente ma ba ya sna'ix te burrahetic te jtate, ha ya smelix yo'tan cu'untic, xchi.
6La sjac' te a'bat: Li' ta pueblo ini ay jtuhl winic yu'un Dios, buen ich'bil ta muc' te winique, spisil te bin ya yal ya xc'oht ta pasel. Conic tey a, ya wan xhu' ya yalbotic banti behil ya sc'an ya jt'untic bahel, xchi.
7Te Saúl la sjac'be sc'op te ya'bat: Conic hiche; pero ¿bin ya ca'betic te winique? Yu'un mayuquix we'elil ta yawil cu'untic, mayuc bin ya ca'betic te winic yu'un Dios. ¿Bin ay cu'untic? xchi.
8Ha yu'un te a'bat la yalbe te Saúl: Ilawil, quich'oj jun ta schanebal ta sehp plata; ya ca'be te winic yu'un Dios scuenta yu'un ya yalbotic banti behil ya xbohotic a, xchi.
9(Ta namey ta Israel, mach'ayuc a te ay bin ya sc'an ya sjoc'obe te Diose, hich ya yal: Con quiltic te j'il-q'uinal, xchihic; como te mach'a jalwanej sbihil ta ora ini, ha j'il-q'uinal sbihil ta hich ora.)
10Ha yu'un te Saúl la yalbe te ya'bat: Lec bin yac awal; conic hiche, xchi. Hich bahtic ta pueblo te banti ay te winic yu'un Dios.
11Te c'alal yacalic ta mohel bahel ta stojol a te pueblo, la stahic ach'ixetic te yacalic ta loq'uel tal yu'un ya xbaht slic tal ya'alic, hich la sjoc'obeyic: ¿Li' bal ay te j'il-q'uinal? xchi.
12La sjaq'uic te ach'ixetic: Tey. Ilawil, tey xanix ay bahel awu'unic. Suja aba, como hulem talel ta pueblo, yu'un yo'tic te ants-winiquetic ya xbaht yaq'uic milbil mahtanil ta toyol awilal. 13Te c'alal ya x'ochex bahel ta pueblo, lehahic, te ma to xmo bahel ta we'el ta toyol awilal a; como ha to ya xwe'ic te ants-winiquetic teme c'ohte, como ha ya ya'be bendición te milbil mahtanil, patil ya xwe'ic te mach'atic ic'bilique. Mohanic bahel hiche, yu'un ya to xc'oht atahic ta ora, xchihic.
14Ha yu'un mohic bahel ta pueblo. C'alal ochelic to ta pueblo a, la yilic te tey yac ta talel a te Samuel yu'un ya xmo bahel ta toyol awilal.
15Te c'alal pajel xanix ya xc'oht a te Saúl, te Jehová ay bin la ya'be sna' te Samuel: 16Ta hichilan ora pajel ya jticombat tal jtuhl winic talem ta sq'uinal Benjamín, ha te mach'a yac amalbe aceite scuenta jcuentahinwanej ya xc'oht yu'un te jpueblo Israel. Ha me ya scoltay loq'uel ta sc'ab filisteohetic te pueblo cu'une; yu'un la jquilbeyix swocol te pueblo cu'un, c'ohtix ta jtojol te awetic yu'unique, xchi.
17Te Samuel, c'alal la yil te Saúl, hich halbot yu'un te Jehová: Ha me te winic ini te la jcalbate; ha te ya scuentahin te pueblo cu'une, xchi.
18Te Saúl nohpoj tal ta stojol Samuel ta yochibal te pueblo, hich la yalbe: Awocoluc, halbon ca'iy banti ay te sna te mach'a ya yil, xchi.
19Ho'on te j'il-q'uinalon, xchi te Samuel. Con, nahilijan mohel cu'un ta toyol awilal, joquinawon ta we'el yo'tic; pajel ta sab ya cac'at bahel soc ya calbat spisil bintic ay ta awo'tan. 20Te burrahetic te ayix oxeb c'ahc'al sch'ayel, ma xamel awo'tanic yu'un, como tahbiliquix. Soc ¿mach'a a te ya sc'anic spisil mach'atic ayic ta Israel, ma bal ha'ucat soc spisil mach'atic ay yu'un te atate? xchi.
21La sjac' te Saúl: Pero ho'on sts'umbalon Benjamín, te ha mero tut c'ohem yu'un spisil ta chahp sts'umbal Israel. Soc te mach'atic ay cu'un ha te mero tut c'ohemic yu'un spisil ta chahp sts'umbal Benjamín. ¿Bin yu'unix a hiche te hich la awalbon? xchi.
22Ha yu'un te Samuel la yic' bahel te Saúl soc te ya'bat, la yic' ochel ta yut na, la shuhcanlan ta lugar te bayel sc'oblal ta stojol te lajuneb scha'winic (30) te mach'atic ic'bilique.
23Te Samuel la yalbe te jpas-we'elil: Ich'a tal te ti'bal la jca'bat, ha te la jcalbat te parte yac awac', xchi.
24Ha yu'un te jpas-we'elil la stsac tal te ya' ti'bal soc te bin junax ay soc, la ya'be te Saúl. Hich la yal te Samuel: Li' ay te bin q'uejbil; ich'a, we'an, como ha scuentahil te la yich' q'uejel yu'un ha'at awu'un, te c'alal hich la jcal: La jquic' tal te pueblo, te xchihone, xchi. Hich te Saúl la sjoquin ta we'el te Samuel ta hich ora.
25C'alal cohic tal ta toyol awilal soc ochic bahel ta pueblo, te Samuel la sc'opon te Saúl ta yamaq'uil ba na. 26Ta sacubel q'uinal te Samuel la yic' te Saúl te ay ta yamaq'uil ba na, hich la yalbe: Hahchan, scuenta yu'un ya cac'at bahel, xchi. Hich hahch te Saúl, loq'uic bahel schebalic. 27C'alal yacalic ta cohel bahel ta sti'il te pueblo, te Samuel hich la yalbe te Saúl: Halbeya te a'bat te ac'a nahilijuc bahel, (hich nahilij bahel te a'bate) yan te ha'ate mahliyawon ts'ihnuc yu'un ya calbat awa'iy bin ya yal te Diose, xchi.
Currently Selected:
1 Samuel 9: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.