1 Samuel 3
3
Jehová ya sc'opon Samuel
1Te querem Samuel la yac' sba ta a'batinel yu'un Jehová ta stojol Elí. Ha yorahil a te ma ba nopic tal te sc'op Jehová soc te bin ya x'a'bot yil ta nahalsit.
2Jun buelta te Elí metsel ta stsalul sna, yaquix ta maquel sit a, ma ba ya yilix q'uinal ta lec. 3Te Samuel wayal ta templo yu'un Jehová te banti ay te scaxahul te chapbil-c'op yu'un Dios, ma to ba tup'en a te tsumbil c'ahc' yu'un Dios. 4Te Jehová la sc'opon te Samuel.
Li' ayoni, xchi te Samuel. 5Hich ahnimal baht ta stojol Elí, hich c'oht yal: Li' ayoni; ¿bin yu'un la awic'on? xchi c'ohel.
Ma ba la jquic'at; bahan, mehtsana aba, xchi te Elí. Hich baht smehtsan sba te Samuel.
6Te Jehová la sc'opon yan buelta te Samuel. Hich hahch te Samuel, baht ta banti ay te Elí, hich la yalbe: Li' ayoni ¿bin yu'un la awic'on? xchi.
Ma ba la jquic'at, jnich'an; bahan, mehtsana aba, xchi te Elí.
7Te Samuel ma to ba sna'beyej sba a te Jehová, soc ma to ba a'bot sna' te sc'op Jehová.
8Te Jehová la sc'opon te Samuel scuenta yoxebal buelta. Hich hahch, baht ta stojol Elí soc la yalbe: Li' ayoni, ¿bin yu'un la awic'on? xchi c'ohel.
Te Elí tey la sna'ix a te ha te Jehová yac ta iq'uel yu'un te quereme. 9Ha yu'un hich la yalbe te Samuel: Bahan, mehtsana aba. Teme ya sc'oponat xan, jac'beya: C'opojan, Jehová, yac ya'iybelat te a'bat awu'un, xchi te Elí. Hich baht te Samuel, c'oht smehtsan sba ta lugar yu'un.
10Tal te Jehová, la stehc'an sba soc la sc'opon hich te bin ut'il ta yan buelta: Samuel, Samuel, xchi.
C'opojan, yac ya'iybelat te a'bat awu'une, xchi te Samuel.
11Te Jehová la yalbe te Samuel: Ay bin ya cac' c'ohtuc ta pasel ta stojol Israel, te mach'a ya ya'iy ya me xc'opoj schiquinic yu'un. 12Ha yorahil a te ya cac' c'ohtuc ta pasel ta stojol Elí spisil te bin la jcalbe sc'oblal te mach'atic ay yu'un, c'alal ta shahchibal ha to ta slajibal. 13Soc ya ca'be sna' te spisil ora ya ca'be castigo te mach'atic ay yu'un, ta scaj te bin chopol sna'oj; como la sbohlc'optayic Dios te snich'nab, pero ma ba la scomticlan. 14Ha yu'un calojix ta jamal ta stojol te sna Elí te bin ut'il te mach'atic ay yu'un ma xhu'ix ta tojbeyel smulic ta scuenta milbil mahtaniletic o ta scuenta yantic mahtaniletic, xchi.
15Te Samuel hil ta swayib ha to ta sacubel q'uinal, patil la sjambe sti'il te sna Jehová; pero la xi' yalbeyel Elí te bin a'bot yil ta snahalsit. 16Ha yu'un te Elí la yic' tal, hich la yalbe: Samuel, jnich'an, xchi.
Li' ayoni, xchi.
17¿Bin a te la yalbate? Awocoluc, ma me xamucbon ta awo'tan. Dios ac'a ya'bat castigo, soc c'ax to xan hich a, teme ay bin yac amucbon ta awo'tan yu'un spisil te bintic la yalbate, xchi te Elí.
18Ha yu'un te Samuel la yalbe ya'iy spisil te bintic halbot, mayuc bin la smuc ta yo'tan. La yal te Elí: Ha Jehová stuquel; ac'a spas te bin lec ya ya'iy, xchi.
19Muc'ub te Samuel soc joquinot yu'un Jehová, soc ma ba la yac' ch'ayuc jp'ahluc te sc'ope. 20Spisil Israel, c'alal ta Dan ha to ta Beerseba, la sna'ic te Samuel ha jalwanej yu'un Jehová te jun yo'tan ta stojol. 21Te Jehová yan buelta la yac' sba ta ilel ta Silo; como tey ta Silo ya yac' sba ta na'el ta stojol Samuel te sc'op Jehová.
Currently Selected:
1 Samuel 3: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.