1 Samuel 17
17
David ya smil Goliat
1Te filisteohetic la stsob te soldadohetic yu'unic scuenta yaq'uel guerra, la stsob sbahic ta Soco te ay ta sq'uinal Judá; la spas scampamentohic ta Efes-damim, ta ohlil yu'un Soco soc Azeca. 2Ha nix hich te Saúl soc te winiquetic yu'un Israel la stsob sbahic, la spas scampamentohic ta spamlej Ela; la schahpan sbahic yu'un ya'beyel guerra te filisteohetique. 3Te filisteohetic ayic ta jun wits, te Israel ayic ta jehch yan wits, ay spamlej ta ohlil.
4Loc' tal ta campamento yu'un te filisteohetic jtuhl jtsalaw-soldado, Goliat sbihil, talem ta Gat; waqueb jxuhc'ubil soc jtahn c'abal snahtil#17.4 Jteb ma sta 3 metros. 5Ay smahquil sjol pasbil ta bronce soc ay smahquil stahn pasbil ta bronce, j'ohlil yoxlajunbahc' (5,000) siclo#17.5 55 kilos bronce yalal. 6Spotsoj yacan ta bronce, soc scuchoj ta spat jun lanza pasbil ta bronce. 7Te ste'el te muc'ul lanza yu'un hich te bin ut'il ste'el jalabil. Te staq'uinal sni'il te lanza yu'un ha lajunwinic scha'bahc' (600) ciclo#17.7 c'axem ta 6 kilos yalal. Ha nahil yac ta bahel te jcuch-a'tejibal yu'une.
8Te Goliat la stehc'an sba, hich la yawtay te soldadohetic yu'un Israel: ¿Bin yu'un achapoj abahic ta yaq'uel guerra? ¿Ma bal filisteohucon, soc te ha'ex ya'batex Saúl? Tsahahic loq'uel tal jtuhluc winic ta awohlilic te ya jtsac jba soc. 9Teme ha ya xhu' yu'un te mach'a ya jtsac jba soc, teme ya stsalone, ya x'ochotcotic ta mosohil awu'unic. Yan teme ho'on ya jtsal soc ya jmil, cu'uncotic ya xc'ohex soc ya me awac' abahic ta a'batinel cu'uncotic, xchi. 10Soc hich la yal xan: Yo'tic la jtijbe hahchel yo'tanic te campamento yu'un Israel. A'bonic jtuhluc winic te ya jtsac jba soc, xchi.
11Te c'alal la ya'iy te Saúl soc spisil Israel te sc'op te filisteo, chebaj yo'tanic yu'un, tal xiwel la ya'iyic yu'un.
12Te David ha snich'an jtuhl efrateo-winic te talem ta Belén ta sq'uinal Judá, Isaí sbihil; ay waxactuhl snich'nab. Mamalix a ta yorahil Saúl. 13Te oxeb banquilaletic te snich'nab Isaí la st'unic ta guerra te Saúl. Te sbihilic te oxtuhl snich'nab te bahtic ta guerra, ha Eliab te banquilal, Abinadab te schebal, soc Sama te yoxebale. 14Te David ha mero ihts'inal. Te yoxebal banquilaletic la st'unic bahel te Saúl, 15yan te David ya xbaht yilulan tal te Saúl, yu'un ya scanantaybe te tuminchijetic yu'un te stat ta Belén.
16Te filisteo-winic ya xloc' tal ta sab soc ta tibiltic, hich la spasulan cha'winic c'ahc'al.
17Te Isaí hich la yalbe te David te snich'ane: Ich'beya bahel te abanquiltac jun efa#17.17 22 litros te ch'ilbil trigo ini soc te lajuneb panetic ini, ich'a bahel ta ora ta campamento te banti ay te abanquiltaque. 18Soc ich'beya bahel te lajunpehch queso ini te jtsobaw yu'un lajunwinic yoxbahc' (1,000) ta tuhl yu'unic. Ilawil teme lec ayic te abanquiltac, soc ich'bon tal quil seña teme lec ayique, xchi.
19Te Saúl soc te sbanquiltac David soc spisil Israel ayic ta spamlej Ela, yaquic ta guerra a soc te filisteohetique.
20Hich sab hahch te David, la ya'be hilel ta scuenta yan te ya scanantay te tuminchijetic, la yich' bahel te ihc'atsil te pasot ta mandar yu'un Isaí. C'oht ta campamento te c'alal ya xloc' tal schahpan sbahic te soldadohetic soc yacalic ta aw scuenta guerra. 21La schol sbahic ta guerra te Israel soc te filisteohetic, snuhp'usitayej sbahic ta scha'chahpal soldadohetic. 22Ha yu'un te David la ya'be hilel yihcats ta scuenta te mach'a ya scanantay te biluquetic, ora baht ta ahnimal ta banti ay te soldadohetique. C'alal c'oht tey a la sjoc'oy teme lec ayic te sbanquiltaque. 23Te c'alal yac ta c'op soc a, te jtsalaw-soldado te ya stehc'an sba ta yohlil te cheb campamentohetic, ha te Goliat te talem ta Gat, loc' tal ta yohlil te banti scholoj sbahic te filisteohetic, hich nix la yal te bin ut'il ya yalulan spisil ora; la ya'iy te David.
24Spisil te winiquetic yu'un Israel te ya yilic te winique, ya x'ahnic loq'uel ta stojol soc ya xiwic yu'un. 25Hich ya yalic ta jujutuhl te mach'atic yu'un Israel: ¿La bal awilic te winic te loc' talel? Ya xloc' tal stijbe hahchel yo'tan te Israel. Te mach'a ya xhu' yu'un stsalele, ya x'a'bot bayel sc'ulejal yu'un te ajwalil soc ya x'a'bot te yantsil-nich'an, soc ma ba ya yac' spatan te mach'atic ay yu'un te stat ta Israel, xchihic.
26Ha yu'un te David la sjoc'obe te mach'atic ayic ta sts'ehl: ¿Bin ya spasbeyic te winic te ya stsal te filisteo ini, te hich ya xlaj sc'oblal a te labanel yu'un Israel? ¿Mach'a ya scuy sba a te filisteo te ma ba yich'oj circuncisión yu'un ya stijbe hahchel yo'tanic te soldadohetic yu'un te cuxul Dios? xchi.
27Hich nix halbot yu'un te soldadohetic: Hich me ya xpasbot te winic te ya ya'iy tsalaw, xchihic.
28Te Eliab te sbanquil David, c'alal la ya'iy te hich yac yalbebel te winiquetic, ilin yu'un ta stojol David, hich la yal: ¿Bin tal apas? ¿Mach'a la awihquitaybe hilel te cha'oxcoht tuminchijetic ta jochol taquin q'uinal? Quilbeyejat atalel te muc' yac acuy aba soc te ma lecuc awo'tan, ha nax talemat ta yilel te guerra, xchi.
29La sjac' te David: ¿Bin jpasoj? ¿Ma bal ha'uc nax yacon ta c'op? xchi. 30La yihquitay hilel te sbanquil, baht ta stojol yantic, ha nix hich la scha'joc'obe. Ha nix hich halbot te bin halbot ta nahil to. 31A'iybot te bin la yal te David, hich halbot ya'iy te Saúl; ha la sticon ta iq'uel tal. 32Te David hich c'oht yalbe te Saúl: Ma me ayuc mach'a ya smel yo'tan yu'un ta scuenta te filisteo; te a'bat awu'un ya xbaht stsac sba soc te filisteo, xchi.
33Te Saúl la yalbe te David: Ma xhu' awu'un ha'at te ya xbaht atsac aba ta guerra soc te filisteo, como queremat to, yan stuquel ay ta soldadohil c'alal ta squeremil to, xchi.
34Te David la sjac'be te Saúl: Te a'bat awu'un ha jcanan-tuminchij yu'un te state. C'alal ya xtal choj o ya xtal oso te ya stsac bahel jcoht tuminchij ta yohlil te yantique, 35ya jnuts bahel, ya jmil, hich ya jpojbe ta ye. Teme ya sut sba ta jtojol, ya jtsac ta yahlan-e, ya jmil. 36Aunque choj, aunque oso, pero te a'bat awu'un la smil. Te filisteo ini te ma ba yich'oj circuncisión pajal ya xc'oht soc, como stijbeyej yo'tan te soldadohetic yu'un te cuxul Dios. 37Te Jehová te la scoltayon loq'uel ta yehch'ac choj soc ta yehch'ac oso, ha nix hich ya scoltayon loq'uel ta sc'ab te filisteo ini, xchi.
Te Saúl la yalbe te David: Bahan, soc ac'a sjoquinat te Jehová, xchi.
38Hich te Saúl la ya'be slap te sc'u' yu'un guerra, la ya'be smahquil sjol pasbil ta bronce soc la ya'be slap smahquil stahn. 39Te David la schuc te espada yu'un ta sba te sc'u', la spas prueba ya'iy teme ya xhu' ya xbehen, como mayuc bin ora hich slapoj. Te David la yalbe te Saúl: Ma xhu' jbehel soc, como ma ba c'ahyemon a, xchi. Hich la sloq'ues spisil te bintic slapoje. 40Patil la stsac te snahbate', la stsa ho'eb ch'ulul tonetic ta uc'um, la yotses ta smorral jcanan-tuminchij, la yich' te sjihmuch', baht sta sba soc te filisteo. 41Te filisteo yac ta nohpojel tal ta stojol David, nahil yac ta bahel yu'un te mach'a cuchbil smahquil yu'une. 42Te filisteo c'alal la yil te David, mayuc sc'oblal la yil, como querem to, ha tsajal querem soc t'ujbil ta ilel. 43Te filisteo hich la yalbe te David: ¿Yu'un bal ts'i'on te tal awa'bon te'? xchi. Hich la sbohlc'optay te David ta scuenta te diosetic yu'une. 44Patil hich la yalbe te David: La', ya ca'be sti'bat abaq'uetal te mutetic ya xwihlic ta toyol soc te chambahlametic ta q'uinal, xchi.
45Ha yu'un te David la yalbe te filisteo: Ha'at talat ta jtojol soc espada soc lanza soc tut lanza, pero te ho'one talon ta atojol ta scuenta te sbihil Jehová te scuentahinej spisil, ha te Dios yu'un te soldadohetic yu'un Israel te yac atoybel aba ta stojole. 46Te Jehová ya me yac'at ta jc'ab yo'tic, ya jtsalat soc ya jxot'bat anuc'. Yo'tic nix ya ca'be sti'ic abaq'uetal soc te sbaq'uetal filisteohetic te mutetic ya xwihlic ta toyol soc te chambahlametic ta q'uinal. Hich me ya sna' a swohlol bahlumilal te ay Dios ta Israel. 47Soc ya me sna' spisil te pueblo ini te Jehová ma xcoltaywan ta espada o ta lanza; como ha yu'un Jehová te guerra, ha ya yaq'uex ta jc'abcotic, xchi.
48C'alal hahch bahel sta sba soc David te filisteo, te David ora baht ta ahnimal ta stojol banti scholoj sbahic te soldadohetic ta stahel te filisteo. 49La yotses sc'ab ta smorral, la sloq'ues jp'ij ton, la sch'oj ta sjihmuch', c'oht ta sti'ba te filisteo, c'uhb ochel, pacal c'ohel ta lum. 50Hich te David la stsal te filisteo ta scuenta sjihmuch' soc jp'ij ton, la yehchentes soc la smil, ma ba yich'oj espada stuquel te David. 51Ora baht ta ahnimal te David, la sjetuntay te filisteo, la stsacbe loq'uel te espada yu'un, jc'axel la slajin smilel soc la xot'be loq'uel sjol.
Te c'alal la yilic te filisteohetic te lajix te jtsalaw-soldado yu'unic, loq'uic ta ahnel. 52Ora hahchic te winiquetic yu'un Israel soc Judá, tulan awonic soc la snutsic bahel te filisteohetic c'alal ta Gat soc c'alal ta yochibal Ecrón. Te filisteohetic pujajtic hilel ta sbehlal Saaraim c'alal ta Gat soc Ecrón.
53Te c'alal suhtic tal ta snutsel te filisteohetic te snich'nab Israel, och yich'beyic te biluquetic ta campamento yu'unique. 54Te David la stsacbe te sjol te filisteo, la yich' bahel ta Jerusalén, yan te ya'tejib yu'un guerra la yac' ta snahilpac' stuquel.
55Te Saúl, c'alal la yil te loc' bahel te David yu'un ya stsac sba soc te filisteo, hich la yalbe te Abner te jtsobaw yu'un te soldadohetic: Abner ¿mach'a snich'an te querem ini? xchi.
Jamal ya calbat, ajwalil, ma jna', xchi te Abner.
56Joc'oya mach'a snich'an te quereme, xchi te ajwalil.
57Te c'alal suht tal David ta smilel te filisteo, te Abner la yic' bahel ta stojol Saúl, yich'beyej to bahel ta sc'ab a te sjol te filisteo. 58La sjoc'oy te Saúl: Querem, ¿bin sbihil atat? xchi.
La sjac' te David: Ha jtat te Isaí ta Belén, te a'bat awu'un, xchi.
Currently Selected:
1 Samuel 17: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.