1 Samuel 15
15
Saúl la sc'axuntay mandar soc ch'aybil c'oht
1Ta patil, te Samuel hich la yalbe te Saúl: Ho'on te ticombilon yu'un Jehová yu'un ya jmalbat aceite ta ajol yu'un ya x'ochat ta ajwalil ta Israel te pueblo yu'une; ha yu'un a'iya awa'iy te bin ya yal te Jehová. 2Hich ya yal te Jehová te scuentahinej spisil: Ya ca'be castigo te Amalec yu'un te bin la spasbe te Israel, ha te la smaquic ta be te c'alal yacalic ta talel ta Egipto a. 3Ha yu'un bahan, a'beya guerra te Amalec, jc'axel lajina spisil bintic ay yu'un, ma me xana'be yo'bolil sba; milticlana winiquetic, antsetic, alaletic soc tut alaletic te ya to xchu'unic, soc nix wacaxetic, tuminchijetic soc tentsunetic, camellohetic soc burrohetic, xchi.
4Ha yu'un te Saúl la sticon ta tsobel tal te winiquetic, la yahtay ta Telaim: ha ho'eb scha'winic ta pic (200,000) ta tuhl winiquetic, soc jpic soc ho'bahc' (10,000) winiquetic yu'un Judá. 5Te Saúl baht ta pueblo yu'un Amalec, la snac' sba ta spamlej. 6Hich la yalbe te queneohetic: Bahanic, jitsa abahic, loc'anic bahel ta yohlil te mach'atic ayic ta Amalec scuenta yu'un ma pajaluc ya jlajinex soc; como la ac'uxultayic spisil te snich'nab Israel te c'alal mohic tal ta Egipto, xchi. Hich loq'uic bahel te queneohetic ta yohlil te snich'nab Amalec.
7Te Saúl la ya'be guerra te amalequetic c'alal Havila ha to ta Shur te ay ta stojol banti ya xloc' tal c'ahc'al yu'un Egipto. 8Cuxul la stsac te Agag ajwalil yu'un Amalec, pero la smil ta espada spisil te pueblo. 9Pero te Saúl soc te soldadohetic cuxul hil yu'unic te Agag soc te banti t'ujbilic tuminchijetic, wacaxetic, juhp'en wacaxetic soc tut tuminchijetic, spisil te bintic lec, ma ba la sc'anic te jc'axel la slajinic; ha nax jc'axel la slajinic te bintic ma lecuc soc te ma xtuhune.
10Tal sc'op Jehová ta stojol te Samuel: 11Ya jmel co'tan yu'un te la jcotses ta ajwalil te Saúl, como la yihquitayonix soc ma ba la spas te bin la jcal, xchi.
Te Samuel ma ba lec la ya'iy, sjunal ahc'abal la yalbe bayel wocol Jehová yu'un. 12Sab hahch te Samuel yu'un ya xbaht sta te Saúl, pero c'oht ta halbeyel te Samuel: Bahem ta Carmel te Saúl soc la stehc'an ton scuenta sna'ojibal yu'un; patil co bahel ta Gilgal, xchi. 13Hich baht te Samuel te banti ay Saúl, hich halbot yu'un te Saúl: Ac'a ya'bat bendición te Jehová. C'ohtix ta pasel cu'un te bin la yal te Jehová, xchi.
14Pero te Samuel la sjoc'oy: ¿Bin yu'unix a te yacon ta ya'iybeyel yoq'uel tuminchijetic soc wacaxetic? xchi.
15La sjac' te Saúl: La yiq'uic tal ta Amalec, como te soldadohetic cuxul hil yu'unic te mero t'ujbil tuminchijetic soc wacaxetic scuenta yu'un ya ya'beyic chic'bil smahtan Jehová te Dios awu'une; pero spisil te yantic jc'axel la jlajincotic stuquel, xchi.
16Ha yu'un te Samuel hich la yalbe te Saúl: ¡Ac'a calbat awa'iy te bin la yalbon ahc'abe te Jehová! xchi.
C'opojan, xchi te Saúl.
17La yal te Samuel: Aunque peq'uel la awa'iy aba, ¿ma bal ochucat ta jcuentahinwanej yu'un spisil ta chahp sts'umbal Israel, soc ma bal lajuc stsahat ta ajwalil yu'un Israel te Jehová? 18Te Jehová ay bin la sticonat ta spasel, hich la yalbat: Bahan, jc'axel lajina te jmulawiletic ta Amalec, a'beya guerra ha to c'alal yac alajinlan spisilic, xchi. 19¿Bin yu'unix a te ma ba la ach'uhumbe sc'op te Jehová? ¿Bin yu'un la atsac te biluquetic soc la apas te bin chopol ta stojol Jehová? xchi.
20Te Saúl la sjac'be sc'op te Samuel: ¡La jch'uhumbe sc'op te Jehová! La jpasix te bin la sticonon ta spasel te Jehová. La quic' tal te Agag ajwalil yu'un Amalec, soc jc'axel la jlajin te snich'nab Amalec. 21Pero te soldadohetic la yiq'uic tal tuminchijetic, wacaxetic, spisil te bintic t'ujbilic te sc'oblal jc'axel ya yich'ic lajinel, scuenta yu'un ya ya'beyic ta milbil smahtan Jehová te Dios awu'un ta Gilgal, xchi.
22Ha yu'un hich la sjac' te Samuel:
¿Ha bal c'ax lec xan yo'tan Jehová yu'un
scohtol chic'bil mahtaniletic soc milbil mahtaniletic,
te bin ut'il sch'uhumbeyel te sc'op Jehová?
Ha lec xan a te xch'uhumbeyel smandar
te bin ut'il a'beyel milbil mahtaniletic;
soc ha lec xan a te a'iybeyel sc'op
te bin ut'il sjuhp'el tuminchijetic.
23Como te toybahil ha pajal mulil soc
te bin ay ta lom-na'el,
te tulan-o'tanil ha pajal mulil soc
sch'uhuntayel loc'ombahetic.
Te bin ut'il la ap'ajbe sc'op te Jehová,
ha nix hich la sp'ajat
te ma ba ya xhilatix ta ajwalil, xchi.
24Te Saúl la yalbe te Samuel: La jta jmul, como la jc'axuntaybe smandar te Jehová soc te ac'ope, ta scaj te la jxi' te pueblo soc la jquich'be ta cuenta te sc'opique. 25Ha yu'un pasbon perdón yu'un te jmule; joquinawon bahel scuenta yu'un ya jch'uhuntay te Jehová, xchi.
26Ma ba ya joquinat bahel, como la ap'ajbe sc'op te Jehová, soc te Jehová la sp'ajatix scuenta yu'un ma ba ajwalil ya xhilatix ta Israel, xchi te Samuel.
27Hich te Samuel la sut sba yu'un ya xbahtix, pero te Saúl la stsacbe te sti'il smuc'ul-c'u', toj ch'i'el loq'uel. 28Ha yu'un te Samuel hich la yalbe: Te Jehová la sch'i'batix loq'uel ta atojol te awa'tel ta ajwalil ta Israel, la ya'beyix ta scuenta jtuhl apat-axuhc te ha lec xan a te bin ut'il te ha'ate. 29Te mach'a ha Yutsilal te Israel ma sna' lot soc ma patiluc ya sut sc'op, como ma winicuc te patil ya sut te sc'ope, xchi.
30La yal te Saúl: La jta jmul; pero awocoluc, ich'awon ta muc' ta stojol te mamaletic yu'un te pueblo cu'un soc ta stojol Israel, joquinawon bahel scuenta yu'un ya jch'uhuntay te Jehová te Dios awu'un, xchi. 31Hich te Samuel baht soc Saúl, la sch'uhuntay Jehová te Saúl.
32Patil hich la yal te Samuel: Ic'bonic tal ta jtojol te Agag ajwalil yu'un Amalec, xchi. Te Agag buen tse'el yo'tan a tal ta stojol, yu'un la yal ta yo'tan: C'axix te sc'uxul te lajele, xchi. 33Pero la yal te Samuel: Hich te bin ut'il te espada awu'un la yac' te mayuc yalatac a hil te antsetic, ha nix hich mayuc yal ya xhil te anan ta yohlil te antsetique, xchi. Hich te Samuel la sesen te Agag ta stojol Jehová ta Gilgal.
34Patil baht ta Ramá te Samuel, te Saúl mo bahel ta sna ta Gabaa yu'un Saúl. 35Te Samuel tey mayuquix bin ora la yilbe xan sit a te Saúl; pero la yoq'uetay te Saúl, como te Jehová la smel yo'tan yu'un te la yotses ta ajwalil ta Israel te Saúl.
Currently Selected:
1 Samuel 15: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.