1 Juan 4
4
Te Espíritu yu'un Dios soc te espíritu yu'un anticristo
1Ha'ex te c'uxex ta co'tan, ma me xach'uhunic spisil espírituhetic, nahil me xatsahtayic teme ha yu'un Dios, como ay bayel lotil jalwanejetic te puhquemic bahel ta bahlumilal. 2Hich ay ta na'el teme ha yu'un te Espíritu yu'un Dios: Spisil te mach'atic te jamal ya yalic te xtaluc soc sbaq'uetal te Jesucristo, ha me yu'un Dios stuquel. 3Pero spisil te mach'atic te ma ba jamal ya yalic te xtaluc soc sbaq'uetal te Jesucristo, ma me yu'unuc Dios stuquel; ha me yu'un te espíritu yu'un te anticristo te awa'iyejic te ya xtale, te li' ayix ta bahlumilal ta ora ini.
4Cal-jnich'nab, yu'unex Dios te ha'exe soc atsalojiquix te lotil jalwanejetic, como te Mach'a ay ta awo'tanic c'ax hich yu'el a te bin ut'il te mach'a ay ta bahlumilal. 5Te lotil jalwanejetic ayic ta scuenta te bahlumilal, ha scuentahil te ya yalic te bin scuenta bahlumilal, soc ya x'a'iybot sc'opic yu'un te bahlumilale. 6Yan te ho'otic yu'unotic Dios. Te mach'a ya sna'beyic sba te Diose, ya ya'iybotic jc'optic; te mach'a ma yu'unuc te Diose, ma xya'iybotic te jc'optique. Tey ya jna'betic sba a te espíritu yu'un smelelil c'op soc te espíritu yu'un lotil c'op.
Ha jc'uxultaywanej te Diose
7Ha'ex te c'uxex ta co'tan, talel c'axel c'ux ac'a ca'iy jbahtic, como ha yu'un Dios te c'uxul-o'tanil. Spisil te mach'a ya sna' c'uxultaywanej, ayinemix ta stojol Dios soc ya sna'be sba te Diose. 8Yan te mach'a ma sna' c'uxultaywanej, ma sna'be sba te Diose, como jc'uxultaywanej stuquel te Diose. 9Hich la yac' ta ilel te c'uxotic ta yo'tan te Dios, ha te la sticon tal ta bahlumilal te hip jtuhl Snich'an scuenta yu'un ya xcuxajotic ta scuenta. 10Hich ay te sc'uxul-o'tanile: Ma ha'uc te c'ux la jca'iy ta co'tantic te Diose, ha te c'ux la ya'iyotic ta yo'tan stuquel soc te la sticon tal te Snich'an yu'un ya stojbotic jmultic.
11Ha'ex te c'uxex ta co'tan, teme hich la sc'uxultayotic te Diose, ya sc'an te ha nix hich talel c'axel c'ux ya ca'iy jbahtique. 12Mayuc mach'a yiloj te Diose; pero teme talel c'axel c'ux ya ca'iy jbahtic, ay ta co'tantic te Diose soc ts'acal c'oht te sc'uxul yo'tan ta co'tantic. 13Hich ya jna'tic te jc'axel ayotic ta stojol Dios soc te ay ta co'tantic te Diose, ha te la ya'botic te Espíritu yu'une. 14Ho'otcotic quilojcotic soc ya calcotic ta testigo te Tatil la sticon tal te Nich'anil scuenta Jcoltaywanej yu'un te bahlumilale. 15Spisil mach'a ya yal ta jamal te ha Snich'an Dios te Jesús, Dios ay ta yo'tan soc ha ay ta stojol Dios. 16Jna'ojtic soc jch'uhunejtic te c'uxotic ta yo'tan te Diose. Ha jc'uxultaywanej te Diose, soc te mach'a spisil ora ya ya'iy c'uxultaywanej, ay ta stojol Dios soc Dios ay ta yo'tan. 17Ts'acal c'ohem ta co'tantic te c'uxul-o'tanil scuenta yu'un ay smuc'ul co'tantic ta yorahil ich'el ta c'op, como li' ta bahlumilal hich ayotic te bin ut'il ay stuquel te Diose. 18Mayuc xiwel te banti ay c'uxul-o'tanil. Te c'uxul-o'tanil te ts'acal ay, ya sloq'ues te xiwele; como te xiwel ya xi' te castigo. Te mach'a ya xiw ma ba ts'acal c'ohem ta yo'tan te c'uxul-o'tanile.
19C'ux ya ca'iy ta co'tantic te Dios como ha nahil c'ux la ya'iyotic ta yo'tan stuquel. 20Teme ay mach'a ya yal: C'ux ta co'tan te Dios, teme xchihe, pero teme ya yil-o'tantay te yermano, yac ta lot abi, como te mach'a ma ba c'ux ta yo'tan te yermano te yilbeyej sit, ¿bin ut'il c'an c'uxuc ta yo'tan te Dios te ma ba yilbeyej sit stuquel? 21Hich pasbilotic ta mandar yu'un te Diose: Te mach'a c'ux ta yo'tan te Dios, ha nix hich c'uxuc me ac'a ya'iy ta yo'tan te yermano, xchi.
Currently Selected:
1 Juan 4: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.