MATHAI 13
13
Cangti Haehkung Patahhaih
(Mrk 4:1-9; Luk 8:4-8)
1To ni toengtoeng ah Jesuh loa im hoitoah tacawt moa tuilitaeng ah caeh; toah anghnut moa a patuk pae. 2Anih ka ven bung mipui to pop phi pongah Jesuh loa palong thungah akun moa anghnut; mipuinawk loa tuilitaeng ah angdoet o.#Luk 5:1-3 3Anih loa patahhaih lok hoiah hmuen zetpui patuk pae. “Nito na-ah cangti haehkung longto loa cangti haeh hanah a caeh.
4Cangti loa lawk thungah a haeh na-ah thoemto loa loklam ah krak moa tava mah akhuih poeng. 5Cangti thoemto loa hlungrong ah krak, long tampa pongah amprawk palang. 6To-e ni tacawt na-ah cang kamprawk tanawk to ni kana mah dawk moa duek o boih let, tangzun to kathuk ah pakhrah thaih ai pongah angqo roeprap. 7Cangti thoemto loa khringzang thungah krak, khringkung to qoeng tahang moa cang kamprawk to tacet thuih kang. 8To-e cangti thoemto loa long kahoih longtang pongah krak moa aquih athaih to a thawn. Thoemto loa alet cumvaito, alet quitarukto, alet quithumto ah a thawn” a naa pae.
9Jesuh mah, “Thaihkop ih naa na tawnh o nahaeloa thaih oah,” tiah a naa pae.
Patahhaih Ih Thuihkoehhaih
(Mrk 4:10-12; Luk 8:9-10)
10Topacoengah a hnukbangnawk loa Jesuh khaeah angzoh o moa, “Mipui khaeah lok na thuih na-ah tipongmaw patahhaih na patoh loa?” tiah duengh o.
11Jesuh mah anihcae khaeah, “Van Poenghaih ih loktamqu kawng panoekhaih to nangcae khaeah kang paek o boah; to-e anihcae khaeah paek ah om ai. 12Ami doeh ka tawn loa thap pae ueloa a tawnh ih ponghdoeh kamhlai tawn aep tih; to-e tidoeh ka tawn ai loa a tawnh ih ta mataeng doeh la pae kik tih.#Mat 25:29; Mrk 4:25; Luk 8:18; 19:26 13Anihcae khaeah lok a thuih na-ah patahhaih ka patohhaih ih loa anihcae mah a khet o e hnuh o ai, tahngaih o e thaih o kop ai. 14Topongah tahma Isaiah mah a thuih coek ih lok to anihcae khaeah akoep.#Isa 6:9-10 A thuih ih lok loa:
‘Hi kaminawk mah tahngaih loa tahngai o tih, to-e thaihkop o mak ai;
khet loa khen o tih, to-e hnuh o mak ai,
15kawmawtiah anihcae ih palung loa a maengh,
naa to tamuep o khoep moa,
a mik to doeh pasim o ving boah.
Toti ai nahaeloa anihcae ih mik mah hnuh o tih,
naa mah thaih o ueloa,
palungthin mah doeh thaihkop o tih.
Totitoah kai khaeah amlaem o ueloa,
ka hoihsak moeng tih, tiah Sithaw mah a thuih,’ tiah a naa.
16“Nangcae loa natanmaw taham na hoih o! Na mik mah hnuk o moa naa mah na thaih o.#Luk 10:23-24 17Loktang ta-ah kang thuih o: Na hnuk o ih hae tahma paroeai hoi Sithaw kami paroeai mah na hnuk o ih to hnuk han koeh o parai e hnuh o thaih ai; na thaih o ih to thaih han a koeh o parai e thaih o thaih ai,” tiah a naa pae.
Cangti Haehkung Patahhaih Ih Thuihpacaihhaih
(Mrk 4:13-20; Luk 8:9-10)
18“Topongah cangti haehkung patahhaih thuihkoehhaih hae tahngai oloa amtuk oah. 19Ami doeh van Poenghaih kawng tamthang lok a thaih e, ka thaihkop ai loa loklam ah ka krah cangti hoiah ahmong. Anihcae ih palungthin thungah haeh ih cangti to Kami Kahoih ai Setan angzoh moa a lomh pae ving. 20Hlungrong ah ka krah cangti loa van Poenghaih tamthang lok a thaih na-ah ka talawk phrat kami hoiah ahmong. 21To-e anihcae ih plungthin thungah tangzun pakhrah ai pongah ka sawk ah akraa ai. Topongah tamthang lok kawng pongah raihaih ih maw, tiaibaloa pacaekhlaekhaih ih maw a tongh na-ah angnong o tak roeprap. 22Khringzang thungah ka krah cangti thuihkoehhaih loa van Poenghaih tamthang lok to a thaih e, hae longprae khosak kawng pongah mawnhaih hoi longnui lensawk koehhaih ih mah tamthang lok to a paduek moa athaih kathai thaih ai kaminawk ni. 23Long kahoih longtang pongah ka krah cangti loa van Poenghaih tamthang lok ka thaih moa thuihkoehhaih ih doeh ka thaihkop kaminawk ni. Anihcae loa athaih doeh athaih o moa thoemto loa alet cumvaito, thoemto loa alet quitarukto, thoemto loa alet quithumto ah athaih o” a naa pae.
Phroh Patahhaih
24Jesuh mah anihcae khaeah patahhaih kalah maeto a thuih pae bae: “Van Poenghaih loa hitiah ni oh. Kami longto mah a lawk thungah cangti kahoih to a tuk. 25Qumhto loa mi boih mah iih cing nathuemah a misa longto angzoh moa cang thungah phroh mu to a haeh moa a caehtak ving. 26Cangkung loa qoengh tahang moa aquih thoh na-ah phroh to doeh amtueng tahang toengh. 27Lawk tawnkung ih tamtoehnawk angzoh o moa, ‘Angraeng, na lawk thungah cangti kahoih bae na haeh loa, naabanghoiah maw phroh hae angzoh?’ tiah duengh pae o. 28Anih mah, ‘Hi ka sahkung loa misanawk ni,’ tiah pathim pae. Anihcae mah, ‘Phroh hae ka phong o han maw?’ a naa pae o. 29Anih mah, ‘A phong o hmah,’ kawmawtiah phroh to na phong o na-ah cangkung hoiah nawnto na phong o haih maek moeng tih. 30Cang aah tue phak airoek loa cangkung hoi phroh to qoeng hoi nawn halat na soe. Cang ka aat kaminawk khaeah, ‘Phroh to a phong o hmaloe ah, taoeng oloa hmai thungah thum oah; topacoengah cang to aat oloa kai ih sapai thungah haeng oah, ka naa pae han,’ a tih,” tiah a naa pae.
Antam Muu Patahhaih
(Mrk 4:30-32; Luk 13:18-19)
31Jesuh mah patahhaih lok kalah maeto anihcae khaeah a thuih pae bae: “Van Poenghaih loa hitiah a oh. Kami longto mah antam mu a lak moa angmah ih lawk thungah a haeh. 32Atimunawk boiboih pongdoeh kathoeng koek ni. To-e a qoeng tahang na-ah loa cangkungnawk boih pongdoeh kalen koek akung maeto ah oh. Tavanawk loa ato akung ih tanghang pongah tabu boh o,” tiah a naa.
Tae Patahhaih
(Luk 13:20-21)
33Jesuh mah patahhaih kalah anihcae khaeah a thuih bae: “Van Poenghaih loa hitiah a oh. Nongpui longto mah tae tetta to a lak moa takaw lahom maeto thungah a phuih ih batiah a oh. To tae mah lahom thungih takaw boih to anguengsak king” tiah a naa.
Patahhaih Ih Patohhaih Kawng
(Mrk 4:33-34)
34Jesuh mah hibatih loknawk hae mipui khaeah a thuih na-ah patahhaih patoh toemoe. Patahhaih patoh aialoa anihcae khaeah tidoeh thuih ai. 35Hitiah a thuih ih hae tahma mah a thuih ih akoephaih hanih ni. Tahma mah,
“Anihcae khaeah lok ka thuih na-ah patahhaih ka patoh han;
Longlai thaep tangsuek hoikamtong panoek vaih ai ih hmuen to anihcae khaeah ka taphong han,” tiah a thuih.#Sam 78:2
Phroh Patahhaih Ih Thuihpacaihhaih
36Jesuh loa mipui to caehtak moa im thungah akun na-ah a hnukbangnawk to anih khaeah angzoh moa, “Lawk thungih phroh patahhaih to thuihkoehhaih na thui ah,” tiah a naa pae o.
37Jesuh mah, “Cangti kahoih ka haeh loa kami Capa ni; 38Lawk loa longprae hae ni; cangti kahoih loa van Poenghaih ka toep kaminawk ni; phroh loa Kami Kahoih ai Setan ih kaminawk ni. 39Phroh ka haehkung aicae ih misa loa Diabol ni. Cang aah tue loa dung aboenghaih tue moa cang aatkungnawk loa vanminawk ni. 40Phroh to pakuem cu moa hmai thungah thumh batiah dungh aboenghaih tue aloa totiah om toengh tih. 41Kami Capa mah vanminawk to patoeh ueloa a ukhaih thungih kaminawk zaesakkung boih hoi hmuen kahoih ai ka sahkung boih to takoksak ueloa, 42hmai kamngaeh thungah va o tih, to hmuenh ah qah hoi haa ta-aihhaih om tih. 43Tona-ah Sithaw kaminawk loa Ampa ih Prae thungah nii batiah aang o tih boah. Topongah naa na tawnh o nahaeloa thaih oah,” tiah a naa.
Qawkhmuen Hawk Ih Patahhaih
44“Van Poenghaih loa hitiah ni a oh. Kami longto mah lawk thungah vawn hawk ih to a hnuk. Hoihdak ta-ah aphum let moa anghoehaih hoiah im ah amlaem. A tawnh ih hmuenmae boih to a zawh pacoengah amlaem let moa ato lawk to a qanh.
Pale Hlung Kanglung Patahhaih
45“Topacoengah Van Poenghaih loa hitiah ni oh. Kami longto mah pale hlung kanglung kahoih to pakrong, 46Atho kaom kahoih phi to a hnuk na-ah a caeh moa a tawnh ih hmuenmae boih to a zawh moa ato pale hlung kanglung to a qanh.”
Proek Palok Patahhaih
47“Van Poenghaih loa tuili thungah haengh ih palok batih ni oh. Palok ka haeng thoemto mah palok to tuili thungah haengh zawh moa tangaa congca aman. 48Palok to tangaa a koi na-ah tuitaeng ah yaeh o, anghnut o moa tangaa to tapraek o; tangaa kahoih to loa daengkraem thungah pacaengh o moa kanuen to loa a vah o. 49Tobatih toengah dung aboenghaih tue aloa om tih; vanminawk to caeh ueloa kami kahoihnawk thungih hoitoah kahoih ainawk to tacu ueloa 50hmai kamngaeh thungah va o tih. Toah to qah hoi asuh azet ueloa haa to ta-ai o tih,” tiah a naa.
Loktang Kangtha hoi Kangquem
51Jesuh mah anihcae khaeah, “Hinawk boih hae na thaihkop o maw?” tiah a duengh.
Anihcae mah, “Ue, ka thaihkop o” tiah pathim pae o.
52Topongah Jesuh mah, “Totibaloa van Poenghaih thungah hnukbang longto ah ka om pacoeng, Tawklok patukkung boih loa angmah ih vawnsai huemhhaih im thung hoi-ih hmuen kangquem hoi kangtha ka taprok im tawnkung batiah ni a oh,” tiah a naa pae.
Nazareth Ah Jesuh Koeh O Ai
(Mrk 6:1-6; Luk 4:16-30)
53Jesuh loa patahhaih lok a thuih boih na-ah to hmuenh to tacawt tak moa, 54angmah vang ah ahloih let. Sinakok ah to a patuk pae moa anih ih lok ka thaihnawk boih mah a dawnrai o. “Hibatih ciinghaih hae naa ih maw a hak?” tiah duengh o. Hibatih dawnraihaih kawbangmaw a sak thaih? 55Lehtama capa na ai maw? Meri to amno na ai maw? Jaem, Joseph, Simon hoi Judas hae amnauknawk na ai maw? 56Hiah ka om hae a tanunawk na ai maw? Naa ih maw hibatih hae a hak?” a naa o. 57Topongah anihcae mah Jesuh to takhoe o.#Jhn 4:44
Jesuh mah anihcae khaeah, “Tahma loa angmah vangpui hoi a imthungtako tiaialoa hmuenh kalah boih ah khangzahaih ih a oh,” tiah a naa. 58Anihcae mah taanghaih tawn o ai pongtoah to dawnraihaih ih ka pop ah sah ai.
Currently Selected:
MATHAI 13: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.