Matthew 16
16
Pharisee embomeni na God ta hajire avo Iesu na au kesi eto ingia
(Mark 8:11-13; Luke 12:54-56)
1Eto enana Pharisee embomeni te Sadducees embomeni te na puvuto Iesu ta ke be kesi uje eto amina au God na uhu ta eto hajire au kesi eto ingio, 2Iesu na ke mine einge ena, “Eto iji vovuoi ungo uhu pinono kogue evito iji javotoho aisuja ainge eagova 3eto nei iho vujau kuma terou kogue ga veasuja ainge eagova. Ungo uhu ta hajire kiagova avo kito ke be ereva rate iji eha emita hajire nei te nei te ikari amo ungo ere kogova te kiaesira ere ova. 4Ungo God hotembae ari sasapura embomeni eha miheva ungo God ta hajire kesi penunu ereva avo mane kesova rate Jonah na ena hajire vahai avo kesova.” ke ainge eto enana toto pambuna.
Pharisee te Sadducee embomeni ta ahe poekari sapura amita ke
(Mark 8:14-21)
5Eto Iesu ta ambotani na indari tapa umbae jenambueto toto umo tiuka oiho ta puvua 6eto Iesu na enana ta degi oje kahari ke einge ena, “Enana Pharisee te Sadducee embomeni ta bread pajirari sivo sapura ra avoeto indovojo,” ainge enu 7enana ke mine ara eto einge ea, “Dago bread toto puvera avoeto eria.” ainge ijie mihio 8Iesu na ingito ke einge ena, “Ungo indari humbuto puvurae eheva amita ke do eto ere kasiheve? 9Ungo ari nau mo kiae ue erevete? Embo tapa 5,000 na bread tapa 5 indio inono enu indari ihehe handija isapamane ueva avo hotembae ue erevete? 10Eto embo tapa 4,000 na bread tapa 7 indio inono enu indari ihehe handija isapamane ueva avo hotembae ue erevete? 11Na ke eha erena amo bread toto puveva amita ke aera te ke erena amita be amo ungo kiaere? Eto erena amo enana Pharisee te Sadducee embomeni ta bread pajirari sivo be kivujo amo sapurara.” ainge enu 12amita ambotani kia amo bread pajirari sivo be mane rate Pharisee te Sadducee embomeni ta ahe poekari avo be kito toara ue ke amore ena.
Iesu amunure avo Peter na ena
(Mark 8:27-30; Luke 9:18-21)
13Eto Iesu na da Caesarea Philippi amita enda engihita ijimihe pambuna. Eto ai mihie amita ambotani ta degi ke einge eto ingina, “Na Embo ta Meni rate na amunure ke eagore?” ainge enu 14enana ke mine einge ea, “Embo nei uhoho na amo umo John bapataito ari embo ke eagora eto nei uhoho na umo Peroveta Elijah ke eagora eto nei amo Peroveta Jeremiah eto Peroveta nei nei ainge ke eagora” ainge eo 15“Eto ungona amo na do ke eagove?” ainge enu, 16Simon Peter na ke mine einge ena, “Judea embo ta hondate ari embo, umo Kerisora. God vasiri te amita Meni avo vahai enda ta puvurarira,” ainge enu, 17Iesu na, “John ta meni Simon Peter umo ke be na erea avoeto umo tunga javotoho ejo. Ke emo embo visi te na no degi ta ae ingae rate nau Mama uhu ta iraguja amina no degi ta harikehei erea 18avoeto Peter, no degi ta erena, no javo be amo koro ra eto embomeni nau siriketo humbuto nau church koro emita hamo ta gerikasona eto amita degi ahihi pehari embo na isoro aisuja rate mane dembasuja. 19Eto God na uhu ta tihi jigaguja degi amita bokiri ta key no ingeni ta ikasona eto key amina enda ta bokiri ahurekasi uje aisoa amo God na uhu ta kito aravora aisuja eto enda ta bokiri hirikasi uje aisoa amo God na uhu ta kito aravora aisuja.” 20ke ainge Iesu na iketo Judea embomeni ta hondate ari embo eha puvurari avo Iesu ra ainge ijie ke mane hande ara ke ena.
Iesu memenga kito pehasuja avo ambotani ta degi ke ikena
(Mark 8:31—9:1; Luke 9:22-27)
21Eto iji amina Iesu na ihiketo araha ta ke be na pere amita ambotani ta harikena, “Na da Jerusalem ta pambuto embo okokose te priests pepeni te ke pepeni ahe poekari embomeni te ta ingeni ta osaga isapamane kesona. Eto enana na Na taro pehasora rate iji 3 amita ambota na vasiri te erasona.” ainge enu 22Peter na Iesu humbuto degi nei ta saeto pambuto ke ngahia na eto einge ena, “Bada, ari ainge no degi ta mane puvuresuja te God na haekasuja,” ainge enu 23Iesu na egerembeto Peter ta degi ke einge ena, “Satan, na toto pambu. Ke no erea amo God ta degi ta eto puvuraera te embo ta degi ta eto ere puvutuhua. Umo nau degi mane peikasoa.” ainge eto 24ambotani tapa ta degi ke einge ena, “Eto amuna ambo ambo aisi uje aisuja amina amita hamo ta uje tapa toto amita ji atahu koho ta iketo humbuto na ambo ambo aisuja. 25Ke be amo embo amuna amita vasiri oenga simba aisi uje aisuja amo amita vasiri iraesuja rate embo amuna na avoembo amita vasiri toasuja embo amina vasiri be hambasuja. 26Eto embo na enda ta donda tapa humbasuja rate vasiri amita irae aisuja amo amita degi javotoho puveite? Javotoho puvurae be ra. Amita be amo donda no ombuto vasiri ehako humbari iraera. 27Eto Embo ta Meni na amita Mamo ta usasa te kiari te amina amita Anera isapamane amiga tapa puvuresi ere ua eto puvuto embo ta ari do do ere ora amita mine ikasuja. 28Eto ungota degi erena embo nei nei ei ta mihera na pehari mane kesora rate Embo ta Meni na kihi puvuto King eto tihi jigesuja avo kesora.”
Currently Selected:
Matthew 16: OKVH
Highlight
Share
Copy
Want to have your highlights saved across all your devices? Sign up or sign in
© 1988, Wycliffe Bible Translators, Inc. All rights reserved.