SHOLAMON NGHAUI" CAUNG: 7
7
Zoqae: pho"
1Nao wa mug' pho: tho' ra" myiqe: zo: ngad nhaung lhe"-
Ni" khyid jham wa khyid zhaung: jham: khug mae khoqhi" yaung" jo; i?
Ni" paung daung: kaui: ru wa sulho tung" yaug: lo, mau" we' dau: ra".
2Nae ngham: cid' ke' to" ra" sabyi qang: khonhae" re: magan: ra" keim jo; jo; ra" nghin bin" yang lhang" kham" to" ra" jung: gaug dang: jo; jo; ra".
3Ni" nug' cug am wa shocid zozam ru:- yo: shid' dau: ru: ngad: ako".
4Ni" lang zang: wa xao zaui: yang kad' ra" gyebyu zaung we' dau: ra".
Ni" myo, jid' wa vogaung: mo" kham: nhae mae" Heshbon vomo" mae" qid tham: we' dau: ako".
Ni" nho wa Damasku shad' khyo lhaug' zaung" ra" Lebanon gyebyu zaung ru: yaung" ra".
5Ni" au: wa Khame bam ru: myhao: jo; ra". Nag: to" ra" ni" xae wa gai: thao" ra" pin: cug' we' dau: ra".
Airu: yaung" yang: kho:kham dayaug re lhao" qo" taung" yu: ra".
6Nao wa yaung" va" lhe"- gyai yao: nyang" ra" lhe"-
Ni" nho: jhid'de; myid mae ngaui bau" ru wa jab byang" va" lhe".
7Nao wa laso' gae we' dakhyo: baug thug' qu" dau: ra".
Aimung: ni" nug' cug am wa zhunpalun shipau: we' dau: ra".
8Ngo wa laso' gae re do, mung: yao" ashi: re phyo' nae" ni" nug' cug am wa nga" qhid' mae" sabyi kaung shipau: ngad: ra".
Ni" aso' wa bin: cug shi: sheim nae pyo" ra".
9Aimung: ni" nhad' wa myho' thao" ra" sabyi qang: we' dau: ra".
Zoqae: myhi"
Ailao" sabyi qang: wa- nga" jhid' zoqae: pho" jhao" khyao za: yug: lo" vashao: yao" nhad' qid we' zaui gyo: khyo yug: byang" lo" vashao:-
10Ngo wa nga" zoqae: pho" yang sang: ru ngad: aimung: yao: wa ngore o: kao bau: ra".
11Nga" jhid' zoqae: pho" we"- li" ri: seyo: vogaung: khyo ye: lang: aimung: seyo: vogaung: jham mae myi" ayo, re yeyab lang:-
12Nga" shid' zo: no' mae" yab so: to" mung: sabyi naui jham khoru: yaug: qi" li" rure yequ" nae"- abu" jham mabu" li" na: laug-
khaung: shi: gae jham abu" mabu" laug yequ" qu" nae".
Ai: jo, qo mae nao re nga" jhid'de; myid byid: nae".
13Nao wa (zo: myhung cid') sheim the' nae nae".
Nga" shid' zo" nho: kham: mo" mae zo: nug dataung" mung: ra" shi: alhab' jo; jo; ra".
Jhid' zoqae: pho" we"- ngo wa nao re sheim nae pyo: ja: axug' we' asag' ni" qhid' mae" zam" to: byid: va".
Currently Selected:
SHOLAMON NGHAUI" CAUNG: 7: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009