DAO: ZHAM" 4
4
Pha,jhi" Bo: Ra" Akyu"
1Nga" zo: we"- ni" pho" mho" shid' ra" khyo re tae" gyo" yu wa,- aire gyo" yu: re nao ba: gyo" ra" myid qo" yu: li" nae". 2Ngo nao re mho" shid' kyo" ra" khyo wa gai mung: aijham alhab' re xam" ci wa,- 3ngo ngai shi" ra" nau" ngha' au: re nga" myhi" pho" tao: zote: zo: ngad:- 4nga" pho" lhaung" mho" shid' ra". Yao: ta" ru wa ngo ta" ru gyo" yu mung: khonhae" re: dato" myhid'- ngo ta" ra" khyo: kad' wa,- aire nao daui: na: li" nae".
5Pha,jhi" we' ba: qu" lag: phad' ra" nyan: re qho: yu wa,. Ngo ta" ra" dao: re dangag: pye'- to: re: dato" myhid' pye'. 6Pha,jhi" re dalhaui" pye'- aire yao: wa nao re lhaug' zaung" byid' li" nae". Aire jhid'de; wa, nao re gug: gam byid' li" nae". 7Aung khug: pha,jhi" qho: yu: ru wa akhyag: thao" ra" mau" ngad:- nao qho: yu: ra" ja: alhab' mae ba: qu" lag: phad' ra" nyan: re qo" sho' boyu: to: wa,. 8Ai: pha,jhi" re jhid'de; wa,- yao: wa nao re qi" qhang nhao: li" nae". Yao: re ge; vo; yu wa,- yao: nao re nga: yhe' byid' li" nae". 9Aiwa ni" nho: phungbao ngad: li" nae".
10Nga" zo: we"- ngo ta" ru tae" gyo" yu wa,- nao re ngo ta" kyo" na: ra" khyo re jhaug' za: gyo" yu: ngad: re nao kao qhang nae". 11Ngo wa nao re pha,jhi" we' jo: ra" khyo" kao so' daui: ye: nae" khyo mho" byid: va". 12Pha,jhi" bo bo za: na: ye" lo" re ni" khyo mae pe" re: li" tha: byid: nae" mangad:. Nao tao: ngadqere: khyid au: thaung: nae" mangad:. 13Nao mho" yu va" khyo re khonhae" re" myid: beim" na wa,- ni" pha,jhi" wa ni" kao so' ngad mung: aire nyang" za: lhaug' zaung" na wa,- 14makhyang: mashab mo, ye" ra" khyo khyo daye:- magai mo; ave, re dacao". 15Dacao" kad'- makhyang: mashab; ra" mau" we' va: va: na wa,- aire ngag: pye' mung:- nao su" ra" khyo mae din: za: su: wa,- 16makhyang: mashab mo, wa- shad' ru daja: ja: makad' re maqo" yab ngad: ako". Dayaug yaug re dae maqo" te' te' wa mayab lo: gyang" na: ako". 17Makhyang: mashab: ru we' aqan alan kad' ru wa yao: bam: zo: shaug' we' dakhyo: ngad: ako".
18Din:man" ra" yaug su" ye" ra" khyo wa ba zho: thug' li" ru we' dakhyo: ngad; ra". Na" gaung myo, myao mug: bo" sho' zo" zo" re" bao: lo: ra" ba thug' so' we' dau: ra". 19Ngadqere: makhyang: mashab mo; khyo kam" wa myi" we' dakhyo: cad' jo; ra". Yao: bam wa su" lang: qere: khyid au: khai: mae thaung" yu: rure maba ngad: ako".
20Nga" zo: we"- ngo ta" ra" khyo re nyang" za: gyo" yu wa,- nga" dao: kheim: jham re tae" gyo: wa, 21Ai: gu: re nao mae" khonhae" dalhag' ke'- aijham re zam" ci mung: ni" nhag' lam: mae ke' to: wa,- 22Aijham wa ba: gyo" yu mo, re kao so' we' qao" zin" ra" qam: so' byid' li" nae". 23Nao myid: qu" ra" khyo re lha" na wa,- nao myid: thug' ra" khyo wa ni" apyad kao so' akhyao boe" nhao: ra". 24Madang: rure khonhae" re: data"- mhug' ta" ra" dao: we' madang: ra" dao: re khonhae" re: dabo: cao: sin:. 25Nhag' lam: lam lam za: qhid' khyo din: din: qu" wa,- qho' yang: ni" au: re dagam" ci. 26Nao kad' ye" lo" nae" khyo khe' khao: ngo" nyang" za: yaung: to: mung: kad' wa,- nao kad' ra" lo, mau" ja: khao: ngo" jo: ru za: boe" li" nae". 27Makhyang: mashab: ra" khyo re jao" pye' mung: qhid' khyo vang" za: su" ye: wa,- dangman" ra" khyo mae" ayae khyo dabye re: dace" ye:.
Currently Selected:
DAO: ZHAM" 4: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009