MIKHA 7
7
Israel Qe Ave, Qeim: Ra" Khyo
1Myid: lao" khyo pe" majo,- ngo wa shigae mae pe" shi: mazaui: lo: mung: sabyi naui mae sabyi shi mazaui: lo" rure qhug' myao: ra" vae: moe; yaug we' dakhyo: ngad: byaug va". sabyi shi: alhab' we' myho' ra" pho' ham" shi: alhab' re bin: phyo' pye' vako". 2Ai: mug: mae din:man" ra" byu dayaug re: mana lo:- Mao"So re jhaug' zaug ru dayaug re mana lo:- yaug khao: ngo" wa byu se' mau" kad' nae" agu gai re lao" na: ako". Yaug khao: ngo" wa yao: cao: yao" mang: byu qere jho" kung" na: ako". 3Yao: bam alhab' wa makhyang: mashab: ra" mau" kad' rumae gyai jhao mo, ngad: ako". Mung" zug: qe we' tarha" agyi qe wa khug vag: jhaung qhu" jham mho' zo" ako". kheim: qo" ra" ade, qe wa yao: bam re yao: bam o: ru mho' mung: daga" za: ceim" byin phyo: zin" ako". 4Yao: bam mae gai: thao" mo, we' din man" thao" mo, lhao" re: myo,gae jham we' dakhyo: pe" phug' made, ngad: ako".
Ai: byumyu" qere Mao"So: yang qobo dae byid: nae" ba na wa yao: bam: lhaug' zaung" byu qe ngad: ra" lapa qe khyo" ta" peim" lai: lo: ru we' dakhyo: bin: joe" lo ava". Ana" yao: bam wa athaui: asad' boe" na: avako". 5Ni" yham kyo: re dalam:- ni" ba nam rere: damyid: lam: na- ni" yham sang myhi" re lhao" re nao pe" ta" ru lha" wa. 6Ce: ayo; gu: mae yauggai zo: qe wa yao: bam: yao: pho" qere kopyad' re we' dakhyo: kad' mung: myiqe: zo: qe wa yao: bam: yao: myhi" qere ngag: thaug' ako". Myhi" qae jham wa yao: bam: yao: na qe we' myan" myo: jho" byo, mung: byu dayaug: gyevo qe wa yao: yao" yham byu qe ngad: ako".
7Ngadqere: ngo kam" wa Asang re lhaug' qu" na nae". Ngo wa ngo re khyad' yu: ra" Mao"So mae myid: lao" na nae". Nga" Mao"So wa ngo re gyo: byid' li" naeva".
Asang Wa Khyad' Yu: Ra" Khyo Re Byid: Nae"
8Ngonhaung" nho: gyevo qe: yang ngonhaung" re pe" qu" jung" nae" khyo majo, ngonhaung" gyang: gyo" va" ngadqere: dam: to" lo nae". Ana" ngonhaung" wa mug: cad' khug mae joe" na: jo, qere Asang wa ngonhaung" re bo" bao byid: nae". 9Ngonhaung" wa Asang re shad' nghung" bam va" rumung: ana" ngonhaung" wa yao" yang nhag' yo" rure dayo, dataung zang: qhao" ca" ra" ngadqere: lo" thao" mae yao: wa ngonhaung" re gug: gam byid: mung: ngonhaung" dao mae shad' nghung" rure dam: nyhang" vhang" jo byid' li" nae". Yao: wa ngonhaung" re mug: bo" khyo phoe' thug' yu mung: yao" yang ngonhaung" re khyad' yu: rure ngonhaung" the' myao nae". 10Aimung: ngonhaung" re- naonhaung" nho: Mao"So Asang wa khai: mae i?- ga: myid: mung: jung" ra" ngonhaung" nho: gyevo qe wa ce: rure myao lhao" nga: phoe: byaug: li" genae". Yao: bam jeim" lo" mung: hau" mo" khyo mae" tham: bab: re we' dakhyo: zab: nhae" pye' ru ngonhaung" the' myao nae".
11Yerusalem vogaung" byu qe we"- Ai: vomo" vang re dam: zao nae" ayo, joe" li" na va". Ai: ayo, mae naonhaung" nho: mug: kyo: re ce" ke' ca" genae". 12Ni" nho: byumyu" qe wa khyi" khao: ngo" mae" ba thug' shad' Asuri mae"- mug: am: shad' Egutu mae"- Uphrad qid gyaung: mo" jo; ra" mug: mae" va" ra" panglai: jham we' va: mae jo; ra" bam jham mae" nao jhao" dam: phao: tug' lo genae". 13Ngadqere: myid gaung wa ai: dao mae na: ra" byu qe: nho: makhyang: mashab- mangad mangung" mau" zo" nho: mathao mae din"pyad' yo boe" lo" li" nae".
Asang Israel Re Nhag' Khyag' Ru
14 Asang we"- nao yao" yang khyin: yu: to" ra" ni" nho: byumyu" qere yao zam yaug boe" byid: wa,. Yao: bam wa seyo: din"pyad' khaung: mae yena: qin" bam gengadqere: yao: bam: avai: ayae mae myid xau gai: ra" mug: myid jo; ra". Yao: bam re ganhae" gaco' yo, mae" gyo, zo" lo: ru we' Bashan we' Gilead mae" gai ra" mhin gyo, jao: mae ganhae" gyo, zo" lo: ru we' dakhyo: ye qho zo: nhao wa,.
15 Asang we"- nao ngonhaung" re Egutu mae" jhui" thug' lo: ra" pyad mae" we' dakhyo: ngonhaung" qhid' mae" mug' pho: ve,lho jham re kad' qhu" la,. 16Byumyu" qe wa ceru re myao lhao" yao: bam qam: bo qere: alo qu" kho" byaug: li" genae". Yao: bam wa nhag' lam: thao" ru we' nhad' pyid' pye' mung: no: jhid' ci: li" genae". 17Yao: bam wa phalhug bam mae lhao maui jham we' dakhyo: yoe" qin" genae". Yao: bam wa gyaug: nin" ru we' yao: bam: gyetab vang jham: khug mae" thug' li" genae". Yao: bam wa gyaug: ru we' ngonhaung" nho: Mao"So Asang jhao" lhang: lo: li" genae".
18O" Asang we"- nao we' dau: ra" Mao"So gaje mana lo: ngad: ra". Nao wa mashid: na: dang: ra" ni" nho: byumyu" qenho: qobo re khyad' pye' byid' ra". Nao wa apyad ato mae nhag' yo" na: ru mangad:- nao yaug kam" wa ngonhaung" re ni" nho: mabaui mabyo; ra" jhid'de; myid qhu" byid' ru mae ngaui bau" na: ra". 19Nao wa ngonhaung" re dalhang dam: nhag' khyag' yu: li" nae". Nao wa ngonhaung" nho: qobo jham re khyid qao: mae zab: nhae" pye' mung: panglai: tham: kao" khyo khyo" zaui: pye' byid' li" nae". 20Nao wa- ganhae" gaco' yo, mae ngonhaung" nho: phug' phyid' qere dao:so: to: byid' ru we' dakhyo:- Abraham nho: myid:zo: qe we' Yaku nho: myid:zo: qe ngad: ra" ni" nho: byumyu" qere ni" jhaug' zaug: ru we' mabaui mabyo; ra" jhid'de; myid re qhu" byid' li" nae".
Currently Selected:
MIKHA 7: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009