मत्ती 9
9
मेःराङ चीग चा खोङ्क्योक मीः टाःक्योक
(मर्कुस २:१-१२; लुका ५:१७-२६)
1ओः तीङ्ला येशु टुःला जादी छोइ फार्केनला काःल्सी, ओःले खुङ राःङगीइ क्याःसाला लोःदी ओःङ्सी।#९:१ ओः तेःकासु येशु कपर्नहुम लाःकेन क्याःसाला तेःकुके 2ओःला मीःक्याइ चा खोङ्क्योक मेःन्दा चीग मीःला तेनलारा ङ्याल्दी खुर्ती खुङसाःला ख्योङ्सी। ओः मीःक्याइ सेमल्हुक लुक्योक थोङ्दी येशुइ ओः चा खोङ्क्योक मीःला लाःसी, “ए पुः, साहस पेःदो, ख्योइ लाःयो क्षमा काःल्दी एः।” 3येशुइ लाःक्योक दीखो ताम कोःदी छ्येइ ठीमगीइ लोबेनक्याइ राःङ राःङलारा लाःकाला स्युःसी, “दीखोइ नी कोन्ज्योला नीन्दा पेःउदु।” 4खुङक्याइ सेमगीइ ताम येशुइ सेसी ओःले खुङगीइ लाःसी, “ख्योक्या चीले एःन्डुबा माःरीक्पा ठीवा चेकुबा? 5ताः लोःप ले, दीखो मीःला ‘ख्याइ लाःयो क्षमा काःल्दी एः’ लाःचे रा ‘ख्यो लाःङ्दी डो’ लाःचेला काःखोदी तेःमु एःस्वाँ? 6इःनाङ, तादो दी साजाम्बुलीङला ङाः मीःइ पुः ङीमु मीःइ लाःयो क्षमा पेःगेन आङ्ज्या एः।” ओःले येशुइ ओः चा खोङ्क्योक मीःला लाःसी, “ताः लोःङ, राःङगीइ तेन खुर्ती खीमला सुङ।” 7ओःले ओः मीः जुरुक्का लाःङ्दी राःङगीइ खीमला काःल्सी। 8दी याःमाछाककीइ लेःगा थोङ्दी ओः मीःक्या जीसी, ओःले मीःला एःन्डुबा आङ्ज्या तेर्केन कोन्ज्योइ प्रशंसा पेःसी।
येशुइ मत्तीला केक्याःप्क्योक
(मर्कुस २:१३-१७; लुका ५:२७-३२)
9येशु ओःलाःम्ले डोदेरा एःकासुना मत्ती#९:९ मत्ती खुङला लेबीङ लाःकुके। लाःकेन मेःराङ चीग च्याल्गो तुःगेन्दी मीःला च्याल्गो च्याल्साला तेःक्योक थोङ्सी। येशुइ खुङला लाःसी, “ङाःइ तीङ्ला स्यो।” ओःले मत्ती लाःङ्दी खुङगीइ तीङ्ला काःल्सी।
10येशु योबाक्या ङीमु मत्तीइ खीमला साःप्च्या साःजेला तेःसी। ओःला माःङ्बुरा च्योःङ्रा च्याल्गो तुःगेनक्या ओःले लाःयो पेःगेन राःङ्सा मीःक्याङ एःके। 11दीखो थोङ्दी चीङ फारीसीक्याइ येशुइ योबाक्याला लाःसी, “ख्योक्याइ लोबेन चीले एःन्डुबा च्याल्गो तुःगेन्दीक्या ओःले लाःयो पेःगेनक्या ङीमु#९:११ लाःयो पेःगेनक्या ङीमु यहुदीक्याइ गोछेस्यो मीःक्याइ येशु ङीमु साःदेरा पेःक्योक लाःयो पेःगेनक्यालादी असुद्ध मीःक्या लाःकुके। ओःले खुङक्या ङीमु तेःती सुइ साःबा, ओःखो मीःङ असुद्ध ओःङ्गुए लाःकुके। तेःती साःक्योक?” 12खुङक्याइ लाःक्योक ताम कोःदी येशुइ एःन्डुबा लेःन लोदी लाःसी, “डाक्टर नी मेःनाःगेनक्याला मीःङे, इःनाङ नाःगेनक्याला चीग्रा कोःउए। 13ताः सुङ ओःले छ्येइ पेज्याला प्रुःक्योक दी तामगीइ लेःन ची इःङे चाल्दो, ‘ङाःला पशुक्याइ बली मेःको, इःनाङ ख्योक्याइ राःङ्साक्याला नीङ च्योःक्योक सेम थेकुए।’#होशे ६:६ ङाः नी ताःक्पाक्याला केक्याःप्काला ओःङ्क्योक मीःङे, इःनाङ माःताक्पाक्याला केक्याःप्काला ओःङ्क्योक इःङे।”
खा चाङ्मा तेःकेन बारेला
(मर्कुस २:१८-२२; लुका ५:३३-३९)
14ओः तीङ्ला बप्तीस्मा तेर्केन युहन्नाइ योबाक्या येशुसाःला ओःङ्दी खुङला टीःसी, “ङीःक्या ओःले फारीसीक्या माःङ्बुरा खेप खा चाङ्मा तेःकुए, इःनाङ ख्याइ योबाक्यादी चीले नाःमाङ खा चाङ्मा मेःतेपा?” 15येशुइ लेःन लोदी लाःसी, “ची याःर्का क्याःप्साइ डेनला माःक्पा सेम्बा ङीमुरा एःथुप जन्तीक्याला खा चाङ्मा ज्याउबा ले? इःनाङ ओःन्डुबा ङीःमाक्याङ ओःङ्गुए, काःन्दी ङीःमु माःक्पा सेम्बा खुङक्यालाःम्ले थारीःङ्बु खेर्पा, ओः ङीःमामीःजीक का जन्तीक्या खा चाङ्मा तेःकेन एः।
16सुइयाङ सेम्बा केःला राल्दी नीङ्बा केःलाला लेःम्बा मेःक्याःपए, चीलेलाःना सेम्बा केःला खुम्चीइतीउए ओःले नीङ्बा केःलाला ताःरुङ राल्तेर्कुए। 17सुइयाङ सेम्बा अङ्गुरकीइ नीःङ्गार नीङ्बा कोबाइ काःल्दाला मेःज्याए, चीङ पेःदी ज्यासी लाःनाङ काःल्दा केःकुए ओःले नीःङ्गार पुःङ्गुए। सेम्बा अङ्गुरकीइ नीःङ्गारदी सेम्बा कोबाइ काःल्दालारा ज्याकोःउए ओःले ओः ङीक्कार खाती मेःन्डोए।”
यहुदी शासककीइ पोःमो रा मेःराङ चीग पेःन्पीःजा टाःक्योक
(मर्कुस ५:२१-४३; लुका ८:४०-५६)
18येशुइ खुङक्याला दी ताम लाःसुना लाःसुनारा मेःराङ चीग यहुदी शासक ओःला लेप्सी। ओःले खुङगीइ येशुइ तोःङ्ला पीमु चुदी लाःसी, “ङाःइ पोःमो ताःसेरा सीसी, इःनाङ ख्या ओःङ्दी ङाःइ पोःमोखाला ख्याइ लाःक्पा ज्यातेर्सी लाःना खुङ सेन्ङेन एः।” 19येशु लाःङ्सी ओःले राःङगीइ योबाक्या ङीमु खुङगीइ तीङ्ला काःल्सी।
20ओः तेःकासुरा लोः चीङ्ङीमीःजीक माःङ्बुरा ठा डोगेन नाःजालाःम्ले तुःक्पु ज्योर्क्योक मेःराङ चीग पेःन्पीःजा येशुइ तीङ्लाःम्ले ओःङ्दी खुङगीइ केःलाइ सुःरला देसी, 21चीलेलाःना खुङगीइ, “येशुइ केःला चीग्रा देजे ज्योर्सी लाःनाङ ङाः टाःजेके” लाःती ठीवा साल्दी एःके। 22ओःले येशु छ्याक लोःदी क्याःपछ्योले तासुना ओः पेःन्पीःजाला थोङ्सी ओःले लाःसी, “पोःमो, साहस पेःदो। ख्योइ सेमल्हुक लुक्योक सोङ्गारा ख्यो टाःदी एः।” ओः पेःन्पीःजा ओः तेःकासुरा टाःसी।
23ओः तीङ्ला येशु यहुदी शासककीइ खीमला काःल्सी। खुङगीइ ओःला तुःङालगीइ लेमु फुगेनक्या ओःले ङुःदेर तुःङाल पेःगेन मीःक्याला थोङ्सी। 24येशुइ खुङक्याला लाःसी, “ख्योक्या थाम्जेर फीला सुङ। दी पीःजा सीदी म्याः, खुङ ङी चीग्रा लोःदी एः।” दीखो कोःदी खुङक्याइ येशुला केःमु क्याःप्सी। 25इःनाङ येशुइ ओः मीःक्याला फीला तेङ्मीःजीक खुङ नाःङ्ला स्युःसी, ओःले ओः पीःजाइ लाःक्पा जुम्सी ओःले ओः पीःजा होप लाःङ्सी। 26ओः तीङ्ला दीखो लेःङ्गो ओः देश काःङ्रा टाःम्सी।
मेःराङ ङी मी मेःथोङेन्दी ओःले मेःराङ चीग लेम्बा मीः टाःक्योक
27येशु ओःलाःम्ले डोदेर एःकासुना लाःमला मेःराङ ङी मी मेःथोङेनक्याइ खुङला ब्य्राङ्दी केताङ्देरा लाःसी, “ए दाऊदकीइ पुः, ङीःला नीङ च्योःदो!” 28येशु खीम नाःङ्ला स्युःमीःजीक ओः मेःराङ ङी मी मेःथोङेनक्याङ ओःलारा लेप्सी। येशुइ खुङक्याला टीःसी, “ची ङाःइ ख्योक्याला टाःच्युखुउए लाःती सेमल्हुक लुउबा?” खुङक्याइ लाःसी, “इःङे, प्रभु।” 29ओःले येशुइ खुङक्याइ मीला देदेरा लाःसी, “ख्योक्याइ सेमल्हुक लुक्योक सोङ्गारा ख्योक्याला टाःज्युक।” 30ओःले खुङक्या थोङेन्दी काःल्सी। येशुइ खुङक्याला आज्ञा तेर्ती लाःसी, “दी ताम सुलाङ माःलाःप!” 31इःनाङ खुङक्या ओःलाःम्ले काःल्सी ओःले येशुइ बारेला ओः क्षेत्रइ थाम्जेरछ्योले लाःतेर काःल्सी।
32खुङक्या काःल्मीःजीक मीःक्याइ हेन्डी क्याःप्ती लेःम्बा काःल्क्योक मीःला येशुसाःला ख्योङ्सी। 33येशुइ हेन्डी तेङ्लुङ म्याःपा ओः मीः ताम लाःकेन्दी काःल्सी, ओःले मीःक्या याःमाछाक नेतेर लाःकाला स्युःसी, “एःन्डुबा नी इस्राएलला उःइ नाःमाङ थोङ्दी म्याःके!” 34इःनाङ फारीसीक्याइ लाःकाला स्युःसी, “दीखोला नी हेन्डीइ क्याःल्बुइरा हेन्डी तेङेन ल्हे तेर्क्योक इःङे।”
तीबी लेःमीक्या
(मर्कुस ६:३४; लुका १०:२)
35येशुइ थाम्जेर क्याःसाक्याला ओःले युःलक्याइ जोम्साखीमक्याला लोप्तेरा काःल्सी ओःले नाःम्खालीङगीइ क्याःल्खापकीइ याःबु लेःङ्गो लाःतेर मीःक्याइ थाम्जेर नाःजाक्या टाःच्युसी। 36मीःइ पोर्चोमला थोङ्दी खुङगीइ सेमला नीङ च्योःदी ओःङ्सी चीलेलाःना खुङक्या नी कोःरालु म्याःक्योक लुःक च्योःङ्रारा जोल्क्योक ओःले सहारा माःज्योर्क्योक मीःक्या एःके। 37खुङगीइ योबाक्याला लाःसी, “तादो, तुःकोःन डु नी माःङ्बुरा एः, इःनाङ तुःगेन लेःमीक्या लाःना तीबी एः। 38ओः सोङ्गारा, ख्योक्याइ डुइ ताःक्पु ङीमु डु तुःजेला लेःमीक्या ताङ्तेर लाःती रेःम्दो।”
Currently Selected:
मत्ती 9: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.