Sabiduría 16
16
Kuanasïcha ka k'urhuecha jinkuni terukutaparini, Ejiptu anapu ka Israeli anapuecha jinkuni
1Ejiptu anapuechaksï
maiampetaranhaspti,
eskaksï na uétarhenchani jápka,
imeni járhati manakorherichani jimpo
ka jimpoksïsï xáni uáni nósesi járhati
manakorhericha jimpo chéranhapti.
2Ka chéti iretani jima ménterueni,
sánteruri sési kámaska
ka uékaniri
eska no k'arhimani japirinka
imani amperi t'ireraska
enka ima no mítepka:
K'urhuechani.
3Ka Ejiptu anapuechani
t'irekua jamperiri ikichataaspka
imani ikichakueni járhati
manakorherichani exearini
enkaksï axamenhapka.
Ka chéti ireta jimini ménterueni,
enkaksï na namoni jurhia
nósesi úkorhenchakua nitamatarapkia
áspemuntasptiksï
imani jimpanhe t'irekuani
enka imecheri jimpo
jimpanhe t'irekuepka.
4Sési jarhasti
eskaksï nósesi kámpiticha
kánekua k'arhimakua janokuapirinka
ka eska chéti ireta
eramkurhantaapirinka
imani ampe exeparini
enkaksï imecheri ikiatspiricha
úkorhenchani jápka.
Chóchuecha ka akuitse tiámueri
5Ka enkaksï manakorhericha
jámani jápka chéti iretarhu,
imeni járhaticha,
enkaksï uántikpek'a katsarhpetini
ka enkaksï akuitsecha
nósesi jámani jápka katsarhpeni
ka enkaksï uánekua uántikpepkia,
t'úri no ióni jamperi ikiaspka.
6Chéraaspkari sáni
eskaksï jurhenkorhepirinka
no ísï jámani
ka tátsekuari xarhatakuapka
néna enkari p'íp'ant'aapirinka,
uékaniri eskaksï míapirinka
chéti juramukuechani.
7Ka ne enka antarhentempka
imani enka xarhatani jápka,
ima p'íp'anhantasïrempti,
no imani jimpo enka exempka
sánteru sáni t'únkini jimpo
enkari iámentuechani p'íp'ant'aak'a.
8Ísï jámaniri exeraska
juchari ikiatspirichani
eskari t'úsï kéntitatspek'a
iámentu nósesi jásï ampe.
9Imechani chóchuecha
ka kúpueni járhaticha ataasti
ka uarhistiksï,
ka nóma sïpiatiksï xéntapsti
enka úpirinka
imecheri tsípekuani kuáp'eni.
Jimpokaksï ísï uétarhenchaxapka.
10Ka chéti uátsïtichaksï,
jima ménterueni,
nómpema ampe úkuaspti
akuitsechaksï jamperi
no katsarheaspti
jimpoka chéti p'amok'perakua
jurhaspka jarhuataani
ka p'íp'ant'aaspti.
11Imechaniksï akuitsecha katsarheasïrempti
ka imaksï sóntku ampekentasïremti
jimpoksïsï no mirikurhiempti
chéti uantakuechani
eskaksï ísï jámani
no sóntku miripakurhipirinka
ka eskaksï no ísku kurhapirinka
sési ampe enka t'u íntspek'a.
12No uitsakua ampesï ampakerpentapti,
nít'u tamari atarhekorhekua ampe,
Chéti uantakuasï ampakerantaapti
enka iámentuechani ampakerantaak'a.
13Jimpokari t'u juramukusïnka
ístu tsípekuani ka uarhikuani,
t'úts'ïni pásïnka uarhikuarhu,
ka t'úts'ïni p'ínhantasïnka,
t'úts'ïni pérasïnka
uarhikueri irechekuarhu
ka ménteruts'ï t'u juánkusïnka.
14Ka parhakpeni napu nema,
úsïnti némani tsípekua auani
ka no úsïnti k'uanhaskutspentani,
ka no úsïnti álmani k'uanhaskuntani
enka uarhikua jimpo euap'eranhantak'a.
Mana ka kueraakata ampe
15Nónemakini úati uék'uni.
16Nósesi ampe úricha
enkaksïni no uékaka míteni
imaniri chéti ják'i jimpo k'uíkirheaska,
k'érati janikuari axakuaska
k'ératiri xanuatakuaska
ka nósesi járhati janikuari axakuaska,
ka kurhiantaskari.
17Ka enkani sánteru sési exeka
enka ítsï sánteru k'éri tixatempka,
nánti itsï iámentu ampe pátak'i,
jimpoka juátarhu anap ampe jamperi
kuáp'easïnka kaxumpitichani.
18Méni chpíri kétsesïrempti
no uékani imani
manakorherichani kurhiraani
enkaksï nósesi niátaticha axamenhapka,
uékani eskaksï ima kurhankupirinka,
imani ampe ísï exeparini
eska Diósï maiampetaraaxapka.
19Ka méni jamperi
itsïrhu terumekua
sánteru uinhamu kurhisïrempti
ka k'amantskarasïrempti
imani ireteri t'irekua.
20Ka chéti iretani, jima ménterueni,
ánjelicheri t'irekua íntskuska.
Ka no jamperi nema ánhekorhesti,
ka t'úri auantarhu uératini
kurhinta ma axakuaska
enka sóntku apakueka
ka enka iámentuecha anhech'anhapirinka.
21Inteni t'irekua jimpori xarhatasïnka
na enkari xáni xénhchak'a
chéti sapichani:
Iámentu anhech'anhani
ka iámentu jaiapanhenhantani.
22Ka nánti iéstakueni jáxepi
no echentasïrempti
na uék'i chpírirhu jarhani.
Ísï jámaniksï exesïrempti
néna enka chpíri xanuaparini éstkurhini jarhempka
ka enka misiri úkorheni jarhempka
na uék'i janini jarhani
ka enka k'amap'ani jarhempka
imecheri ikiatspiricheri t'irekua,
23ka ima chpíri sapichentasïrempti
eskaksï úpirinka kaxumpiticha
jima jurherakorhentani t'irekua.
24Jimpoka ima ampe
enka t'u kueraaka
sánteru nósesi jámasïnka
nósesi niátatichani maiampetaraani
ka sési jámasïnti
imechani jinkuni
enkaksïni t'únkini mintsikak'a.
25Ísï jimposï imani jurhia
ima ampe iámu p'irhikorhepti,
ka chéti kóntperata úkorhentani
enka iámentuechani t'ireraak'a
ka iámentu ampe íntsaani
eskaksï xáni ampe uékani jápka
ima enkaksïni antarhentani jápka.
26ACHA, uékaskari ísï jámani
jurhentaani chéti xénhchakatechani
eska no parhakpeni anapu p'ikuntskatasï t'irerpek'a
ka eska chéti uantakuasï
uinhaperak'a imechani
enkaksïni t'únkini mintsikak'a.
27Mana, enka chpíri no uémpka echerantani
jurhiata jimpok'u echentasïrempti,
28jimpoka uéksïrempka
eska chéti ireta mítepirinka
eska uétarhesïnka no erantu juarani
diósmaiamukua arhintani
ka uantamukukorheni
enka jurhiata nótki antarani jauaka,
29jimpoka ima ampe
enka nósesi ampe úri mintsikani jaka,
ísï niuaka echentani
eska iauakua na nirak'a echentani
ka ísku ísï niuati iurheni
eska iurhekua
enka nómpema marhuak'a.
Currently Selected:
Sabiduría 16: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.