ମାତ୍ତିଉ 2
2
ପୂରୁବ୍ ପାଡ଼୍ ରାଃ ଦିଶୁମ୍ ରେନ୍ ସେଣାନ୍ ହୋଡ଼ୋକୋ
1ହେରୋଦ୍ ରାଜା ରାଃ ସାମାୟ୍ ରେ ଚିମ୍ତା ୟାହୁଦୀୟା ଜିଲ୍ଲା ରାଃ ବେଥ୍ଲେହେମ୍ ହାତୁ ରେ ୟୀଶୁ ଜାନାମ୍ ଜାନାଏ, ଇମ୍ତା ୟାହୁଦୀୟା ଜିଲ୍ଲା ରାଃ ପୂରୁବ୍ ପାଡ଼୍ ରାଃ ଦିଶୁମ୍ ରେନ୍ ଚିମିନ୍ ସେଣାନ୍ ହୋଡ଼ୋକୋ ଅକନ୍କୋଚି ଇପିଲ୍ କୋକେ ପାଢ଼ାଅ ସାରି ତାଇନାକୋ ୟୀରୁଶାଲେମ୍ ସାହାର୍ ରେ ହିଜୁଃକେତେ କୁଲିକେଦାକୋ, 2“ୟାହୁଦୀ କୋୱାଃ ରାଜା ଅକନିଜାଃ ଜାନାମ୍ ହୋବାକାନା, ହିନିଃ ଅକ୍ତାଃ ରିୟାଏ? ଚିୟାଃଚି ଆଲେ ପୂରୁବ୍ ଦିଶା ରେ ଆଜାଃ ଇପିଲ୍ କେ ନେଲ୍କେତେ ଆଏଃକେ ଜୋହାର୍ ଲାଗିନ୍ ହିଜୁଃ କାନାଲେ।” 3ନେୟା ଆୟୁମ୍କେତେ ହେରୋଦ୍ ରାଜା ହାର୍ ୟୀରୁଶାଲେମ୍ ସାହାର୍ ରେନ୍ ମିଃଥିମ୍ବା ହୋଡ଼ୋକୋ ଘାବ୍ରାଓ ଜାନାକୋ।
4ଏନ୍ତେ ହେରୋଦ୍ ରାଜା ହୋଡ଼ୋକୋୱାଃ ସବେନ୍ ପ୍ରାଧାନ୍ ୟାଜାକ୍କୋକେ ହାର୍ ଆଇନ୍ ଗୁରୁକୋକେ ହୁଣ୍ଡି କେତେ ଇନ୍କୁକେ କୁଲିକେଃକୋୱାଏ, “ମାସୀହ୍ ଅକ୍ତାଃରେ ଜାନାମୋଗାଏ?” 5ହିନ୍କୁ ଆଏଃକେ କାଜିକିଜାକୋ, “ୟାହୁଦୀୟା ଜିଲ୍ଲା ରାଃ ବେଥ୍ଲେହେମ୍ ହାତୁ ରେ, ଚିୟାଃଚି ନାବୀ ରାଃ ହୋରାତେ ନେଲେକା ଅଲାକାନା,
6ହେ ୟାହୁଦୀୟା ଜିଲ୍ଲା ରାଃ ବେଥ୍ଲେହେମ୍ ହାତୁ ରେନ୍ ହୋଡ଼ୋକୋ, ଆପେୟାଃ ହାତୁ ୟାହୁଦୀୟା ରାଇଜ୍ ରାଃ ଆଧିକାର୍ ରେ ଜେତାନ୍ ଏତେ ଜାଲେକାତେ ହୁଡିଙ୍ଗ୍ ନାହାଲା, ଚିୟାଃଚି ଆପେ ଏତେ ମିହୋଡ଼୍ ହୋଡ଼ ଅଡୋଙ୍ଗ୍ ଅଗାଏ ଇନିଃ ରାଇଜ୍ ରିକାନିଃ ବାଇୟୋଗାଏ, ଅକନିଃ ଇଙ୍ଗ୍ଆଃ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋ କୋକେ ଗୁପି କୋୱାଏ।”
7ଏନ୍ତେ ହେରୋଦ୍ ରାଜା ଏନ୍ ସେଣାନ୍ ହୋଡ଼ୋକୋକେ ଅକନ୍କୋ ଇପିଲ୍ କୋକେ ପାଢ଼ାଅ ସାରି ତାଇନାକୋ ହାପା ତେ କେଡ଼ାକେତେ ଇନ୍କୁକେ କୁଲିକେଃକୋୱାଏ, ଚି ଇପିଲ୍ ଠିକ୍ ଅକନ୍ ସାମାୟ୍ ରେ ନେଲ୍ ଲେନା। 8ଏନ୍ତେ ଇନିଃ ନେୟା କାଜିକେତେ ଇନ୍କୁକେ ବେଥ୍ଲେହେମ୍ ହାତୁ କୁଲ୍ କେଃକୋୱାଏ ଚି, “ସେନ୍କେତେ ହେନ୍ ବାଲେଃ ହୋନ୍ ରାଃ ବିଷାୟ୍ ରେ ଠିକ୍-ଠିକ୍ ଜାଞ୍ଚ୍ଏପେ ହାର୍ ଚିମ୍ତାଙ୍ଗ୍ ନାମ୍ କେନୋଗାଏ ଦୋ ଇଙ୍ଗ୍କେ ଉଦୁବାଇଙ୍ଗ୍ ପେ ଏନାତେ ଇଙ୍ଗ୍ ହଗି ସେନ୍ କେତେ ଆଏଃକେ ଜୋହାର୍ ୟାଇଙ୍ଗ୍।”
9ଇନ୍କୁ ରାଜା ରାଃ ବାକାଣ୍ ଆୟୁମ୍କେତେ ସେନ୍ ଜାନାକୋ, ହାର୍ ଅକନ୍ ଇପିଲ୍ କେ ଇନ୍କୁ ପୂରୁବ୍ ଦିଶା ରେ ନେଲ୍ ଲେଦାକୋ, ହେନା ଇନ୍କୁୱାଃ ଆୟୁର୍-ଆୟୁର୍-ସେନ୍ ଜାନା, ହାର୍ ଅକ୍ତାଃ ରେ ବାଲେଃ ହୋନ୍ ତାଇନ୍ କେନାଏ, ଏନ୍ ଜାଗା ରାଃ ଚେତାନ୍ ସେଟେର୍ କେତେ ତାଇନ୍ ଜାନା। 10ହେନ୍ ଇପିଲ୍ କେ ଚିମ୍ତା ନେଲ୍କେଦାକୋ ଇନ୍କୁ ଥିମ୍ବାଗି ରାଶିକା ଜାନାକୋ।
11ଇନ୍କୁ ଏନ୍ ଅଡ଼୍ଆଃ ରେ ସେଟେର୍ କେତେ ଏନ୍ ବାଲେଃ ହୋନ୍ କେ ଆଜାଃ ଏଙ୍ଗା ମାରିୟାମ୍ ଲୋଃ ନେଲ୍ କିଜାକୋ, ହାର୍ ଇନ୍କୁ ବୋଅ ତିରୁବ୍ ଇକ୍ଡ଼ୁମ୍ କେତେ ଆଏଃକେ ଜୋହାର୍ କିଜାକୋ। ଏନ୍ତେ ଆକୋ ଆକୋୱାଃ ଥାଇଲା ଖଲାଅ କେତେ ଆଏଃକେ ସୋନା, ହାର୍ ଗୋନୋଙ୍ଗାନ୍ ସୋୱାନ୍ ଧୁୱାନ୍ ଲୋବାନ୍, ହାର୍ ଗାନ୍ଧରାସ୍ ରାନୁ ରାଃ ଭେଁଟ୍ ଏମ୍ କିଜାକୋ। 12ଏନା ତାୟୋମ୍ତେ ପାର୍ମେଶ୍ଵାର୍ ପାଡ଼େତେ କୁମୁ ରେ ନେୟା ଚେତାୱନୀ ନାମ୍ କେଦାକୋ ଚି ହେରୋଦ୍ ରାଜା ତାଃ ଆଡୋଃ ଆଲୋପେ ରୁଆଡ଼ା, ଇନ୍କୁ ରାଜା କେ କାଉଦୁବ୍ କେତେ ଏଟାଃ ହୋରାତେ ହୋବାକେତେ ଆକୋୱାଃ ଦିଶୁମ୍ ତେକୋ ସେନୋଃ ଜାନାକୋ।
ମିଶାର୍ ଦିଶୁମ୍ ତେ ନିର୍
13ଇନ୍କୁୱାଃ ସେନ୍ଜାନ୍ ରାଃ ତାୟୋମ୍ତେ ପ୍ରାଭୁ ରାଃ ମିହୋଡ଼୍ ସିର୍ମାଦାସୀ କୁମୁ ରେ ଯୋଶେଫ୍ କେ ନେଲ୍ ଜାନାଏ ହାର୍ କାଜିକେଦାଏ, “ବିରିଃମେ, ଏନ୍ ବାଲେଃ ହୋନ୍ କେ ହାର୍ ଆଜାଃ ଏଙ୍ଗା କେ ଇଦିକେତେ ମିଶାର୍ ଦିଶୁମ୍ ତେ ନିର୍ କେନୋଃମେ। ଏନ୍ତେ ଚିମ୍ତାଙ୍ଗ୍ ସାନ୍ତେ ଇଙ୍ଗ୍ ଆମ୍କେ କାଇଙ୍ଗ୍ କାଜିୟା, ଏନ୍ ସାନ୍ତେ ହେନ୍ତାଃ ରେ ତାଇନ୍ ପେ; ଚିୟାଃଚି ହେରୋଦ୍ ରାଜା ନେ ବାଲେଃ ହୋନ୍ କେ ଗୋଏଃ ଲାଗିନ୍ ଦାଣା ବାଡ଼ା ୟାଏ।” 14ଏନ୍ତେ ଯୋଶେଫ୍ ହେନ୍ ନୁବାଃ ଗି ବିରିଃ କେତେ ବାଲେଃ ହୋନ୍ ହାର୍ ଆଜାଃ ଏଙ୍ଗା କେ ଇଦିକେତେ ମିଶାର୍ ଦିଶୁମ୍ ତେ ସେନ୍ ଜାନାଏ। 15ଏନ୍ତେ ହେରୋଦ୍ ରାଜା ଗୋଜୋଃ ସାନ୍ତେ ହେନ୍ତାଃ ରେ ତାଇନ୍ ଜାନାଏ। ନେୟାଲାଗିନ୍ତେ ଚି ଏନ୍ ବାଚାନ୍ ଅକନାଃ ପ୍ରାଭୁ ଆଜାଃ ନାବୀ ହୋରାତେ କାଜିଲେଦାଏ ଏନା ପୁରା ହୋବାଅଃ କା ଚି, “ଇଙ୍ଗ୍ ଇଙ୍ଗ୍ଆଃ ହୋନ୍କଡ଼ା କେ ମିଶାର୍ ଦିଶୁମ୍ ତେ କେଡ଼ା କିଜାଇଙ୍ଗ୍।”
ହେରୋଦ୍ ରାଜା କୋଡ଼ାହୋନ୍ କୋକେ ଗୋଏଃ ରିକା
16ଚିମ୍ତାଙ୍ଗ୍ ହେରୋଦ୍ ରାଜା ନେୟା ନେଲ୍କେଦାଏ, ଚି ସେଣାନ୍ ହୋଡ଼ୋକୋ ଅକନ୍କୋ ଇପିଲ୍ କୋକେ ପାଢ଼ାଅ ସାରି ତାଇନାକୋ ଆଏଃ କେ ଲୋଗୋ କିଜାକୋ, ଇମ୍ତା ଇନିଃ ଖିସ୍ ରେ ଫେରେଃ ଜାନାଏ, ହାର୍ ହୋଡ଼ୋକୋକେ କୁଲ୍ କେତେ ସେଣାନ୍ ହୋଡ଼ୋକୋ ଅକନ୍କୋ ଇପିଲ୍ କୋକେ ପାଢ଼ାଅ ସାରି ତାଇନାକୋ ଇନ୍କୁୱାଃ ଠିକ୍-ଠିକ୍ ଉଦୁବ୍କାନ୍ ସାମାୟ୍ ରାଃ ଲେକାତେ ବେଥ୍ଲେହେମ୍ ହାତୁ ହାର୍ ଏନାରାଃ ନାଡ଼େଏ ଜାପାଃ ସବେନ୍ ଜାଗା ରେନ୍ କୋଡ଼ାହୋନ୍ କୋକେ ଅକନ୍କୋ ଚି ଦୁଇ ବାରାଶ୍ ରେନ୍ କୋ, ୟାଦୋ ଇନ୍କୁ ଏତେ ହୁଡିଙ୍ଗ୍ ତାଇଲେନାକୋ, ଗୋଏଃ ରିକା କେଃକୋୱାଏ।
17ଏନାତେ ପାର୍ମେଶ୍ଵାର୍ ପାଡ଼େତେ ଅକନ୍ ବାଚାନ୍ ୟିର୍ମିୟାହ୍ ନାବୀ ରାଃ ହୋରାତେ କାଜିୟାକାନ୍ ତାଇକେନା, ହେନା ପୁରା ଜାନା,
18“ରାମାହ୍#2:18 ରାମାହ୍ ମିୟାଃ ଜାଗା ତାନାଃ ଏନ୍ତାଃ ରେ ଦାଉଦ୍ ରାଜା ରାଃ କିଲି ରେନ୍ କୋ ତାଇନ୍ ତାଇନାକୋ ଜାଗା ରେ ମିୟାଃ ଦୁକୁ ରାଃ ଗେରାଙ୍ଗ୍ ହୋଡ଼ୋକୋ ଆୟୁମ୍ କେଦାକୋ, ରାଆ ହାର୍ ମାରାଙ୍ଗ୍ ଦୁକୁ, ରାହେଲ୍#2:18 ରାହେଲ୍ ୟାକୁବ୍ ରାଃ କୁଡ଼ି ଆଜାଃ ହୋନ୍କୋ ଲାଗିନ୍ ରାଆ ତାଇକେନାଏ, ହାର୍ ହାପା ହୋବାଅଃ କାଏ ସାନାଙ୍ଗ୍ ତାଇନାଏ, ଚିୟାଃଚି ଇନ୍କୁ ଗୋଏଃ ଲେନାକୋ।”
ମିଶାର୍ ଦିଶୁମ୍ ବାଗେ କେତେ ନାଜ୍ରେଥ୍ ସାହାର୍ ରେ ହିଜୁଃ
19ଯୋଶେଫ୍, ମାରିୟାମ୍ ହାର୍ ହୋନ୍ ୟୀଶୁ ମିଶାର୍ ଦିଶୁମ୍ ରେଗି ତାଇକେନାକୋ, ଏନ୍ତେ ହେରୋଦ୍ ରାଜା ଗୋଏଃ ତାୟୋମ୍ତେ, ପ୍ରାଭୁ ରାଃ ସିର୍ମାଦାସୀ ମିଶାର୍ ଦିଶୁମ୍ ରେ ଯୋଶେଫ୍ କେ କୁମୁ ରେ ନେଲ୍ ଜାନାଏ ହାର୍ କାଜିକେଦାଏ, 20“ବିରିଃମେ, ବାଲେଃ ହୋନ୍ ହାର୍ ଆଜାଃ ଏଙ୍ଗା କେ ଇଦିକେତେ ଇସ୍ରାଏଲ୍ ଦିଶୁମ୍ ତେ ସେନ୍ କେନୋଃମେ। ଚିୟାଃଚି ହେରୋଦ୍ ରାଜା ହାର୍ ଇନିଜାଃ ହୋଡ଼ୋକୋ ଅକନ୍କୋ ବାଲେଃ ହୋନ୍ ରାଃ ଜୀଉ ଇଦି ଦାଣା ତାଇକେନାକୋ, ଇନ୍କୁ ଗୋଏଃ ଜାନାକୋ।” 21ଏନାଲାଗିନ୍ ଯୋଶେଫ୍ ବିରିଃ ଜାନାଏ, ହାର୍ ବାଲେଃ ହୋନ୍ ହାର୍ ଆଜାଃ ଏଙ୍ଗା କେ ଆଏଃ ଲୋଃ ଇଦିକେତେ ମିଶାର୍ ଦିଶୁମ୍ ବାଗେ କେତେ ଇସ୍ରାଏଲ୍ ଦିଶୁମ୍ ରେ ହିଜୁଃ ଜାନାଏ।
22ମେନ୍ଦୋ ଯୋଶେଫ୍ ଚିମ୍ତା ନେୟା ଆୟୁମ୍ କେଦାଏ ଚି, ଆର୍ଖିଲାଉସ୍ ଆଜାଃ ଆପୁ ହେରୋଦ୍ ରାଜା ରାଃ ଜାଗା ରେ ୟାହୁଦୀୟା ଜିଲ୍ଲା ରେ ରାଜା କାନାଏ, ଏନାଲାଗିନ୍ ହେନ୍ତାଃ ସେନ୍ ବୋରୋ କେଦାଏ। ଏନ୍ତେ ପାର୍ମେଶ୍ଵାର୍ ପାଡ଼େତେ କୁମୁ ରେ ଚେତାୱନୀ ନାମ୍ କେତେ ଗାଲିଲୀ ଜିଲ୍ଲା ତେ ସେନ୍ ଜାନାଏ, 23ହାର୍ ନାଜ୍ରେଥ୍ ସାହାର୍ ନୁତୁମ୍ ଜାଗା ରେ ସେନ୍ କେତେ ତାଇଜାନାଏ, ଏନାତେ ଏନ୍ ବାଚାନ୍ ପୁରା ହୋବାଜାନା, ଅକନାଃ ୟୀଶୁ ବିଷାୟ୍ ରେ ନାବୀ କୋୱାଃ ହୋରାତେ କାଜିଲେନା, “ଇନିଃ ନାଜ୍ରେଥ୍ ସାହାର୍ ରେନ୍ କାଜିୟୋଗାଏ।”
Currently Selected:
ମାତ୍ତିଉ 2: UNXNT
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
Munda (ମୁଣ୍ଡା) Bible by The Love Fellowship is licensed under Creative Commons Attribution-ShareAlike 4.0 License.