1 Samuel 3
3
Ãcõrẽba Samuel trʌ̃na
1Cũdra Samuelba Ãcõrẽ quĩrãpita Elira carebabadjia. Maʌ̃ ewarid̶e Ãcõrẽra ẽberãrã ume ara cadrʌa bed̶eaca basía. Mãcua cãĩmocara quĩrãca ne unubica basía. 2Elira dau towa b̶ʌ bẽrã bia unuca basía. Ewari ab̶a idji cʌd̶ad̶e cãĩ b̶asia. 3Maʌ̃ne Samuelera Ãcõrẽ wua ded̶e cãĩ b̶asia. Mama Ãcõrẽ baurudeda b̶asia idjab̶a ĩbĩrãra wad̶i urua nũmasia. 4Mãwã b̶ʌd̶e Ãcõrẽba Samuelera trʌ̃ jarasia:
–¡Samuel!–
Samuelba panusia:
–Nama b̶ʌa.–
5Ara maʌ̃da Eli cãĩ b̶ʌmaa pira wãped̶a nãwã jarasia:
–Nama b̶ʌa. ¿Cãrẽ cãrẽã trʌ̃ b̶ʌ?–
Eliba panusia:
–Bʌra trʌ̃ẽ́ b̶ʌa. Cãĩne wãdua.–
Samuelera jẽda wãped̶a idji cʌd̶ad̶e tab̶esia. 6Maʌ̃ne Ãcõrẽba idjira waya trʌ̃ jarasia:
–¡Samuel!–
Ara maʌ̃da Samuelera piradrʌped̶a Eli b̶ʌmaa wãsia. Maʌ̃ne jarasia:
–Nama b̶ʌa. ¿Cãrẽ cãrẽã trʌ̃ b̶ʌ?–
Eliba panusia:
–Warra, bʌra trʌ̃ẽ́ b̶ʌa. Cãĩne wãdua.–
7Samuelba Ãcõrẽ sãwã bed̶eabarida adua b̶asia Ãcõrẽra wad̶i idji ume bed̶eaca bad̶a bẽrã. 8Maʌ̃be Ãcõrẽba waya Samuelera trʌ̃ jarasia. Ara maʌ̃da Samuelera piradrʌped̶a Elimaa wãsia. Maʌ̃ne jarasia:
–¿Cãrẽ cãrẽã trʌ̃ b̶ʌ?–
Maʌ̃nebʌrʌ Eliba cawasia Ãcõrẽbʌrʌ Samuelera trʌ̃ jara b̶ʌda. 9Maʌ̃ bẽrã idjia Samuelea jarasia:
–Cãĩne wãdua. Baribʌrʌ Ãcõrẽba bʌra waya trʌ̃ jaraibʌrʌ idjía nãwã panudua: “Bed̶eadua mʌ̃ Boro, mʌ̃a ũrĩ b̶ʌa.”–
Maʌ̃ bẽrã Samuelera jẽda wãped̶a idji cʌd̶ad̶e tab̶esia. 10Maʌ̃ne Ãcõrẽra wayacusa zeped̶a Samuelera trʌ̃ jarasia naẽna od̶a quĩrãca:
–¡Samuel! ¡Samuel!–
Samuelba panusia:
–Bed̶eadua mʌ̃ Boro, mʌ̃a ũrĩ b̶ʌa.–
11Ãcõrẽba jarasia:
–Dãrãẽ́ne mʌ̃a bãrã israelerãra ʌ̃cʌrʌ bio cawa oya. Maʌ̃ ũrĩbʌdara bio dauperad̶ia. 12Maʌ̃ ewarid̶e mʌ̃a Eli, idji ẽberãrã sid̶a cawa oi jarad̶ara jũma oya. 13Idji warrarãba mʌ̃ quĩrãpita cadjirua obadara bio cawa b̶ʌmĩna idu obi b̶ʌa. Maʌ̃ carea mʌ̃a jarasia idji ẽberãrãra ewariza cawa o b̶aida. 14Mʌ̃a wãrãneba Eli ẽberãrãa jarasia ãdjia cadjirua obadara ni maãrĩ bid̶a quĩrãdoaẽ́da. Animarãra mʌ̃́a babue diacuabʌda sid̶a wad̶ibid̶a mʌ̃a quĩrãdoaẽ́a. Ne diabʌda sid̶a mʌ̃a quĩrãdoaẽ́a.–
15Ãcõrẽ bed̶ead̶acarea Samuelera idji cʌd̶ad̶e cãĩ b̶esia. Diaped̶a ʌ̃rʌ̃maped̶a Ãcõrẽ ded̶e ed̶a wãbadara ewa nũmʌsia. Baribʌrʌ Samuelba cãĩmocara quĩrãca ũrĩnada Elia jara quĩrĩãẽ́ basía. Waya b̶asia mãwã jaraida. 16Baribʌrʌ Eliba Samuelera trʌ̃sia:
–¡Warra, Samuel!–
Samuelba panusia:
–Nama b̶ʌa.–
17Maʌ̃ne Eliba iwid̶isia:
–¿Ãcõrẽba bʌ́a cãrẽda jarasi? Idjia jarad̶ara ni maãrĩ bid̶a mẽrãrãdua. ¡Ãcõrẽba bʌra bio cawa oya idjia jarad̶ada mʌ̃́a jũma jaraẽ́bʌrʌ!–
18Maʌ̃ carea Samuelba Elia jũma jarasia. Ni maãrĩ bid̶a mẽrãẽ́ basía. Maʌ̃ne Eliba sopuaba nãwã jarasia:
–Idjidrʌ Ãcõrẽ bẽrã idjia quĩrĩã b̶ʌ quĩrãca oida b̶ʌa.–
19Samuel waribʌrʌd̶e Ãcõrẽra idji ume b̶asia. Idjia Samueld̶eba jarad̶ara jũma obadjia. 20Maʌ̃ bẽrã jũma israelerãba Daʌ̃ eyad̶eba ab̶a Beersebá jewed̶ad̶aa cawasid̶aa Samuelera wãrãda Ãcõrẽneba bed̶eabarida. 21Maʌ̃ ewarid̶e Ãcõrẽra Silod̶e Samuelma odjaped̶a idji bed̶eara cawabibadjia.
Currently Selected:
1 Samuel 3: emp
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.