1 Samuel 2
2
Anaba Ãcõrẽa trʌ̃ãna
1Maʌ̃be Anaba Ãcõrẽa nãwã bed̶easia:
Ãcõrẽ, bʌ carea mʌ̃ra sod̶eba wãrãda b̶ʌsrid̶a b̶ʌa. Bʌabʌrʌ mʌ̃́a ʌb̶ʌada dia b̶ʌa.
Mʌ̃ dji quĩrũ quĩrãpita ipid̶aya bʌa mʌ̃ra ẽdrʌ b̶ʌd̶a bẽrã. Wãrãda mʌ̃ra bio b̶ʌsrid̶a b̶ʌa.
2Ãcõrẽ, ni ab̶aʌda bʌ quĩrãca neẽ́a. Dai Ãcõrẽ, ni ab̶aʌba daira poya wagacaa bʌa wagabari quĩrãca. Dewara ãcõrẽda bʌ quĩrãca neẽ́a.
3Ãcõrẽba ne jũmada cawa b̶ʌa. Idjiabʌrʌ dadjia o panʌra cawa obaria.
Maʌ̃ bẽrã ni ab̶aʌda dji droma quĩrãca bed̶eaiẽ́ b̶ʌa. Ni maãrĩ bid̶a mãwã bed̶eaiẽ́ b̶ʌa.
4Idjiabʌrʌ ẽberã mẽsrã b̶eara poyabaria baribʌrʌ dji ʌb̶ʌaẽ́ qued̶eaa ʌb̶ʌada diabaria.#2:4. Ẽberã mẽsrã b̶eara poyabaria. Hebreo bed̶ead̶e nãwã b̶ʌ́ b̶ʌa: “Ẽberã mẽsrã b̶earã enedrʌmara b̶ʌabaria.”
5Ne bara b̶ead̶ara id̶ira ne cod̶i carea djãrã itea traja panʌa, baribʌrʌ ne neẽ́ b̶ead̶aba id̶ira ad̶uba eropanʌa.
Wẽrã warra toca bad̶aba warrarãda siete tosia.
Baribʌrʌ warra zocãrã tod̶aba waa warra toẽ́a.
6Ãcõrẽbʌrʌ zocai b̶aira, beui sid̶a diabaria. Idjia ẽberãra beud̶arã panabadama b̶ʌbaria idjab̶a ʌ̃rẽbabibaria.
7Ãcõrẽbʌrʌ ne neẽ́ b̶eada, ne bara b̶ea sid̶a b̶ʌbaria.
Dji droma b̶eara ed̶aara b̶ʌbaria idjab̶a dji ed̶aara b̶eada dji dromada b̶ʌbaria.
8Ãcõrẽba naʌ̃ ẽjũãra od̶a bẽrã idjidrʌ djibaria. Idjid̶eba ne jũmada b̶ʌa.
Maʌ̃ bẽrã ne neẽ́ quirura dji dromada poya b̶ʌya.
Ne b̶atabuebadama b̶abarira dji bororã ded̶e dji dromada poya b̶ʌya.
9Ãcõrẽba idji ĩjã b̶eara wagabaria baribʌrʌ dji cadjiruarãda beud̶arã panabadama pãĩmane b̶ʌbaria.
Ni ab̶aʌba ara idji ʌb̶ʌad̶eba poyacaa.
10Ãcõrẽba idji dji quĩrũra jũma poyaya. Bajãneba baa b̶aebʌrʌ quĩrãca ãdjirãra bio cawa oya.
Ãcõrẽba jũma naʌ̃ ẽjũãne b̶eara cawa oya. Idjia b̶ʌd̶a boroa ʌb̶ʌada diaya. Idjia edad̶a borora dji dromaara b̶ʌya.
11Mãwãnacarea Elcanara Ramá purud̶aa jẽda wãsia. Baribʌrʌ idji warra zaquera sacerdote Eli ume b̶esia Ãcõrẽ ded̶e carebamãrẽã.
Eli warrarãba cadjirua o panana
12Eli warrarãra dji cadjiruarã basía. Ãcõrẽda wayad̶aca basía. 13Sacerdoterãba od̶ida panʌ quĩrãca od̶aca basía.#2:13 Levitico 7:28-36. Ãtebʌrʌ nãwã obadjid̶aa: ab̶aʌba Ãcõrẽa animarã dragada babue diabiped̶a dji djara dju b̶ʌd̶e sacerdote nezocaba mĩãsu quid̶a ũbea erob̶ʌra enebadjia. 14Maʌ̃ba nedjara dju nũmʌra suped̶a idjia jira edad̶ara edebadjia sacerdoteba comãrẽã. Israelerãba Silod̶e Ãcõrẽa animarã draga babue diabʌdaza mãwã obadjid̶aa. 15Maʌ̃ awara dji draga babue diai naẽna sacerdote nezocara zeped̶a dji draga babue diabi b̶ʌ́a nãwã jarabadjia:
–Ne djarara diadua sacerdoteba bá comãrẽã. Idjia nedjara djud̶ada quĩrĩãẽ́a, ãtebʌrʌ dji õgoada quĩrĩã b̶ʌa.–
16Maʌ̃ne ẽberãba dji dragada naãrã babue diad̶ida panʌana aibʌrʌ, dji nezocaba panubadjia:
–Mãwãẽ́a. Ara nawena diadua. Mãwãẽ́bʌrʌ mʌ̃a jãrĩ edaya.–
17Mãwã Eli warrarãba cadjirua o panʌra Ãcõrẽ quĩrãpita bio biẽ́ b̶asia. Israelerãba animarã Ãcõrẽa babue diabadara ãdjia siriẽ́ unubadjid̶aa.
18Mãwã panʌne Samuelba Ãcõrẽ ded̶e careba b̶abadjia. Idjia sacerdote djio lino wua od̶ara jʌ̃badjia. 19Poaza dji papaba idjia cacuad̶e jʌ̃mãrẽã obadjia. Maʌ̃ra diad̶e wãbadjia dji quima ume poaza animarã babue diad̶e wãbʌdad̶e. 20Maʌ̃ne Eliba Elcanara dji quima sid̶a nãwã bia jara b̶ʌbadjia:
–Elcana, Ãcõrẽba bʌ́a dewara warrarãda bʌ quima Ana ume unubiya idjia warra naãrã iwid̶id̶ada Ãcõrẽa diad̶a bẽrã.–
Mãwãnacarea Elcanara idji quima ume jẽda diguid̶aa wãbadjid̶aa. 21Maʌ̃be Ãcõrẽba Anara carebabadjia. Mãwã Anaba umaquĩrã warrada ũbea idjab̶a wẽrãcaurãda umé tosia. Maʌ̃misa Samuelera Ãcõrẽ quĩrãpita b̶ʌda warisia.
22Maʌ̃ ewarid̶e Elira bio drõãda b̶asia. Idjia ũrĩsia idji warrarãba israelerãra biẽ́ o panʌda. [Maʌ̃ awara ũrĩsia ãdjirãra wẽrãrã Ãcõrẽ wua ded̶e ed̶a wãbadama ne obadarã ume mĩã comʌa panabadada.]#2:22. Bed̶ea corcheted̶e b̶ʌra carta dji drõãara b̶ead̶e neẽ́a. 23-24Maʌ̃ carea idji warrarãa nãwã jarasia:
–Mʌ̃ warrarã, bãrãba cadjirua o panʌra jũmarãba jara panʌa. Wãrãda Ãcõrẽ puruba jara b̶ʌra bio cadjirua b̶ʌa. ¿Cãrẽ cãrẽã mãwã o panʌ? 25Ab̶aʌba djãrãda biẽ́ oibʌrʌ, Ãcõrẽba maʌ̃ ẽberãra poya carebaya dewarabema ume bia b̶emãrẽã. Baribʌrʌ ab̶aʌba Ãcõrẽda biẽ́ oibʌrʌ ¿caiba idjira carebai?–
Mãwãmĩna Eli warrarãba ãdji zezaba jarad̶ara ĩjãnaẽ́ basía. Ãcõrẽba ãdjira mãwã erob̶asia beud̶ida quĩrĩãna bẽrã.
26Maʌ̃misa Samuelera wari b̶asia. Ãcõrẽba, ẽberãrã bid̶a idjira bia unusid̶aa. 27Maʌ̃ ewarid̶e Ãcõrẽneba bed̶eabarida ab̶a Elimaa zeped̶a nãwã jarasia:
–Ãcõrẽba nãwã jara b̶ʌa:
“Bãrã drõã naẽnabemarã Egiptod̶ebema boro jʌwaed̶a panasid̶ad̶e mʌ̃a ãdjirãa ara mʌ̃nebemada ebud̶a cawabisia. 28Maʌ̃ne mʌ̃a jũma israelerãnebemada Aaroʌ̃drʌ idjab̶a bãrã, idjid̶eba yõbʌdarã sid̶a edasia mʌ̃ sacerdoterãda b̶ead̶amãrẽã. Mãwã bãrãba animarãda mʌ̃́a babue diabadaa, incienso querada bá diabadaa, idjab̶a mʌ̃ quĩrãpita sacerdote djiora jʌ̃badaa. Maʌ̃ awara mʌ̃a bãrã drõã naẽnabemarãa jarasia israelerãba animarã draga mʌ̃́a babue diabʌdad̶e bãrã sacerdoterãba dji djarad̶ebemada edad̶ida panʌda cod̶i carea. 29¿Bãrãba cãrẽ cãrẽã mʌ̃a animarã babue diabi jarad̶ara, dewara diabi jarad̶a sid̶a siriẽ́ unubada? ¿Cãrẽ cãrẽã bʌ warrarãra mʌ̃ cãyãbara biara quĩrĩã b̶ʌ? Mʌ̃ puru israelerãba animarã draga babue diabʌdad̶e dji biara b̶ʌ nedjara co panʌneba bʌ warrarãra boreguea panʌa.”
30Dadji israelerã Ãcõrẽba naẽna jarasia bʌ ded̶ebemarãra, jũma bʌ ẽberãrã sid̶a ewariza idji sacerdoterãda b̶ead̶ida. Baribʌrʌ id̶ira nãwã jara b̶ʌa:
“Mʌ̃a bãrãra waa mʌ̃ sacerdoterã idu babiẽ́a. Ãtebʌrʌ mʌ̃ bia jara panʌda mʌ̃a bia b̶ʌya idjab̶a mʌ̃ igara panʌra mʌ̃a biẽ́ b̶ʌya. 31Mʌ̃a bãrã cawa oi ewarira jũẽbʌrʌa. Maʌ̃ne bʌ ded̶ebema drõãẽ́ b̶eara, bʌ ẽberãrã drõãẽ́ b̶ea sid̶a mʌ̃a jũma quinibiya. Ni ab̶aʌda waraga beud̶aẽ́a. 32Maʌ̃ ewarid̶e mʌ̃a israelerãra bia o b̶aya baribʌrʌ bʌ ẽberãrãnebema ni ab̶aʌda waraga beud̶aẽ́a. Maʌ̃ bẽrã ewariza bãrãra sobiẽ́ panania idjab̶a sopua panania.#2:32. Bãrãra sobiẽ́ panania idjab̶a sopua panania. Hebreo bed̶ead̶e maʌ̃ra ebud̶a b̶ʌẽ́a. 33Mʌ̃a bʌ ẽberãrãnebemada ab̶a idu sacerdote babiya. Mãwãmĩna idjira sobiẽ́ b̶aya idjab̶a sopua b̶aya. Maʌ̃ne waabema bʌd̶eba yõbʌdarãra drõã b̶ad̶aẽ́ne beud̶ia.#2:33. Hebreo bed̶ead̶e maʌ̃ versículora ebud̶a b̶ʌẽ́a. Elid̶eba yõna sacerdoterã beuped̶ad̶ada 1 Samuel 22:6-23d̶e b̶ʌ́ b̶ʌa. 34Naʌ̃gʌba cawabiya mʌ̃a jarad̶ara wãrãda mãwãida: bʌ warrarã Opnira, Piné sid̶a ab̶ari ewarid̶e beud̶ia.
35Mãwãnacarea mʌ̃a dewarada b̶ʌya mʌ̃ sacerdote bamãrẽã. Mʌ̃a quĩrĩã b̶ʌ quĩrãca idjia jũma arid̶e o b̶aya. Idjid̶eba yõbʌdarãda mʌ̃a b̶ʌya ewariza mʌ̃ sacerdoterãda b̶ead̶amãrẽã. Mʌ̃a israelerã boro b̶ʌi ewarid̶eba ʌ̃taa ãdjira ewariza mãwã b̶ead̶ia. 36Maʌ̃ ewarid̶e bʌ ẽberãrãnebema wad̶i zocai b̶eara ãdji quĩrãpita zed̶aped̶a quĩrã djuburiada iwid̶id̶ia paratada, cod̶i sid̶a maãrĩ diad̶amãrẽã. Maʌ̃ awara ne cod̶i carea iwid̶id̶ia sacerdoterã nezocarãda b̶ʌd̶amãrẽã.”–
Currently Selected:
1 Samuel 2: emp
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.