BILANGEN 34
34
Baleng-baleng negeri e
1Ibereken TUHAN man Musa 2pedah si tersurat arah teruh enda guna bangsa Israel nina, “Adi bengket kam ku taneh Kanaan, taneh si Kubereken man bandu, baleng-baleng daerahndu, e me kap bagi si arah teruh enda. 3Balengna si arah Selatan mulai i taneh mesawang Sin nari terus ku perbalengen Edom. Arah Timur mulai i ujung Lawit Mate. 4Kenca bage mbelok ku Selatan nuju ku dalan Akrabim janah terus arah tengah-tengah taneh si mesawang Sin seh ku Kades-Barnea i Selatan. Kenca bage mbelok ku Barat Lawit ku Hasar Adar janah terus ku Asmon, 5janah i jenari mbelok ku berneh si lit i bas perbalengen Mesir, janah ujungna i Lawit Tengah.
6Balengna si arah Barat e me kap Lawit Tengah.
7Balengna si arah Utara e me kap pinter i Lawit Tengah nari ku Deleng Hor, 8janah i jenari ku dalan Hamat. I jenari terus ku Sedat, 9ras ku Siperon janah ujungna i Hasar Enan.
10Balengna si arah Timur e me kap pinter i Hasar Enan nari ku Sepam. 11Kenca bage terus ku Selatan seh ku Harbel, arah Timur Ain, jenari terus ka ku uruk-uruk si lit i bas tepi Danau Galilea arah Timur. 12Kenca bage ku Selatan ngikuti Lau Jordan terus ku Lawit Mati. Enda me empatna baleng-baleng tanehndu e.”
13E maka nina Musa man bangsa Israel, “Enda me taneh si ialokenndu pagi alu erbahan tikam tanduk, taneh si enggo itetapken man siwah setengah suku-sukundu. #Bil 26:52-56 #Jos 14:1-5 14Suku-suku Ruben ras Gat bage pe setengah i bas suku Manase enggo ngaloken tanehna, si ibagi-bagi rikutken keluargana, 15arah Timur Lau Jordan, petingtang ras Jeriho.”
Peminpin-peminpin si ertanggung jawab magiken taneh e
16Nina TUHAN man Musa, 17“Si magiken taneh e man bangsa Israel e me kap Imam Eleasar ras Josua anak Nun. 18Tambah si e buat sekalak peminpin i bas tep-tep suku nari nampati ia magikenca.” 19-28Enda me gelar-gelar kalak si ipilih TUHAN:
| Suku: | Peminpinna: |
|---|---|
| Juda | Kalep anak Jepune |
| Simeon | Selumiel anak Ammihut |
| Benyamin | Elidat anak Cislon |
| Dan | Bukki anak Jogeli |
| Manase | Hanniel anak Epot |
| Eperaim | Kemuel anak Siptan |
| Sebulon | Elisapan anak Parnah |
| Isakar | Paltiel anak Assan |
| Aser | Ahihut anak Selomi |
| Naptali | Pedahel anak Ammihut |
29Enda me kerina kalak si itugasken TUHAN magiken taneh e man bangsa Israel i taneh Kanaan.
Currently Selected:
BILANGEN 34: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.