NAHUM 2
2
Niniwe ndabuh
1Niniwe, kam sangana iperang.
Kuasa si engkernepken kam enggo reh.
Pesikap bentengndu!
Jagai pasar-pasarndu!
Erbenting kibullah lako erperang!
(2Iulihken TUHAN kap ateNa kemulian Israel, bali ras tupung imbang-imbangna langa ngerampasi ia.)
3Tentera musuh maba ampang-ampang megara,
ipakena seragam megara.
Enggo sikap ia nerangsa!
Gereta perangna erndilap bagi api!
Kudana mengkat-engkat!
4Gereta perangna meter perdalanna i bas pasar-pasar,
si ayak-ayaken i babo taneh lapang.
Harhar bagi obor gara,
si lebe-leben desken kilap sumagan.
5Tentera si mbisa idilondu,
tupung ia reh ngasak tertuktuk ia.
Kalak si nerang kiam kempak tembok kuta,
enggo ipajekken i je perkakas ngeruntuhken tembok.
6Pintu gerbang deherken lau mbelin enggo talang,
istana enggo guntar.
7Kemberahen enggo ibaba tertaban,
tangis ngandung dayang-dayangna,
bali ras nderapati si ndengep,
itemtemina tentenna, ceda kal atena.
8Bali ras lau sampuren mburtas,
bage me perkiam kalak i Niniwe nari.
“Ngadi! Ngadi!” nina kalak si erlebuh.
Tapi la lit si nulihkenca.
9Rampokilah pirak!
Rampasilah emas!
Kuta e dem alu erta-erta!
10Niniwe enggo kernep, jadi taneh melungen si terulang.
Picet kal ukur, perban mbiar,
tiwen nggirgir, gegeh bene,
ayo jadi mbulan.
11I ja genduari kuta e?
Si nai bali ras ingan singa,
jadi ingan anak singa ibere nakan,
ingan singa ras beruna erdalan-dalan,
ingan anak singa nggeluh alu teneng.
12Singa njerngem si man panganna,
jenari icaing-caingna man beruna ras anak-anakna,
idemina liangna alu daging si enggo ijerngemna.
13“Aku kap imbangndu!” nina TUHAN si Mada Kuasa. “Kuciluk gereta perangndu. Tenterandu maten i bas perang jenari Kubuat kerina si ibuatndu i bas kalak si deban nari. Kuasandu i doni enda lanai terbegi.”
Currently Selected:
NAHUM 2: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.