MIHA 4
4
Dame rasa lalap
(Jes 2:1-4)
1I bas wari-wari si reh pagi,
deleng ingan Rumah Pertoton e pajek,
e me deleng si meganjangna kal
ganjangen asa kerina uruk-uruk.
Bangsa-bangsa reh erdemuyung ku je,
2janah nina bangsa-bangsa e,
“Nangkenglah kita ku Deleng TUHAN
ku Rumah Pertoton Dibata nu Israel.
Kai ateNa sibahan, iajarkenNa me banta;
arah dalan si enggo ipilihNa erdalan me kita.
Sabap pengajaren TUHAN i Jerusalem nari kap rehna,
i Sion nari, ngerana Ia.”
3Perjengilen sapih bangsa-bangsa idungiNa,
subuk bangsa-bangsa si megegeh, si ndeher tah ndauh pe ia.
E maka itepa kalak me pedangna jadi gigi tenggala,
janah lembing jadi sabi-sabi ibahanna.
Lanai ndigan pe bangsa erperang ras bangsa
lanai ndigan pe taktik perang ipelajarina. #Jes 2:4; Joel 3:10
4Kerina kalak nggeluh alu dame
sekalak-sekalak kundul i teruh batang anggur ras batang arana jine;
janah la ise pe erbahanca ia mbiar.
TUHAN si Mada Kuasa enggo erpadan si enda. #Sak 3:10
5Tiap bangsa nembah alu erkemalangen man dibatana jine, tapi kita nembah alu erkemalangen man TUHAN Dibatanta rasa lalap seh rasa lalap.
Mulih pagi Israel i bas pembuangen nari
6Nina TUHAN, “Nandangi seh me paksana Kupepulung kerina kalak si enggo Kuukum, kalak si enggo ngenanami kiniseran i pembuangen. 7Ia enggo cempang dingen terbuang, tapi si tading Kubahan pemenan si mbaru, e maka jadi bangsa si mbelin denggo ia. Aku jadi rajana i Deleng Sion mulai i bas paksa e nari seh rasa lalap.”
8Janah kam, o Jerusalem, ingan Dibata njagai bangsaNa desken sekalak permakan, mulihken ka pagi sekali nari jadi ibu kuta kerajanndu nai. 9Engkai maka kam nderkuh bage gangna? Engkai maka mesui akapndu desken diberu si nandangi mupus? Perban lanai lit rajandu? Entah erkiteken enggo mate penasehatndu? 10Nungkalisi dingen ndeherenglah kam, o kalak Jerusalem, bali ras diberu si nandangi mupus, erkiteken genduari terpaksa kam lawes i bas kuta e nari jenari ringan i tengah mbalmbal. Terpaksa kam lawes ku Babilon, tapi ikelini TUHAN me kam i je i bas musuh-musuhndu nari. 11Melala bangsa-bangsa si enggo pulung lako merangi kam. Nina, “Jerusalem arus ikernepken! Sinehen me kuta e radas!” 12Tapi bangsa-bangsa e la ietehna kuga perukuren TUHAN. La ietehna maka ia kerina enggo ipepulung guna iukum, bali ras gandum ierik.
13Nina TUHAN, “O kalak Jerusalem, to ukum musuhndu! Kubahan kam megegeh bagi jenggi lembu; tandukna besi, janah cekilina tembaga. Iripukkenndu melala bangsa, janah kebayaken bekasna ngerampok ipersembahkenndu man bangKu, TUHAN nu kerina doni.”
Currently Selected:
MIHA 4: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.