ESEKIEL 45
45
Bagin-bagin negeri si jadi kerajangen TUHAN
1Tupung taneh negeri e ibagi-bagiken man suku-suku jadi pusakana, lebe arus iserapken sada bagin man TUHAN, Taneh e gedangna sepuluh dua setengah kilometer, belangna sepuluh kilometer. Taneh si e badia kerina. 2I je me ibahan taneh pertapaken Rumah Pertoton; gedangna ras belangna 250 meter. Pertapaken e arus ikeleweti taneh kosong, belangna 25 meter; 3setengah i bas taneh ndai si belangna lima ras sepuluh dua setengah kilometer arus isikapken man ingan Rumah Pertoton, janah e me ingan si badiana kal. 4Si e me bagin si badia i bas negeri e si iserapken man imam-imam si erdahin guna TUHAN i bas Rumah PertotonNa. I je me ipajekken rumah imam-imam e ras pertapaken guna Rumah Pertoton. 5Setengahna nari ka iserapken jadi sikerajangen kalak Lewi, si ndahiken dahin-dahin kelatihen i bas Rumah Pertoton. I je me ibahan kuta kalak Lewi e.
6Deherken taneh si badia ndai, arus ka isikapken sada taneh si deban gedangna sepuluh dua setengah kilometer, belangna dua setengah kilometer, jadi sada kuta. I bas kuta e banci ringan ise pe i bas bangsa Israel.
Taneh man penguasa
7Man raja si sangana erkuasa pe arus isikapken taneh. Taneh e mulai i bas baleng si arah kenjahe taneh si badia terus ku Lawit Tengah i bas baleng si arah kenjulu nari terus ku perbalengen negeri si arah kenjulu, seh maka taneh si man raja e bali gedangna ras taneh si ibagiken man sada suku Israel. 8Si e me jadi sikerajangen raja si sangana erkuasa i negeri Israel, gelah olanai itindasna rayat, tapi iberekenna bagin-bagin si deban i bas negeri e man suku-suku Israel.
Peraturen guna penguasa
9Nina TUHAN si Erdolat, “Enggo bias, o penguasa-penguasa Israel. Olanai isega-sega ras itindasndu bangsangKu. Dalankenlah kai si mehuli ras bujur. Ndigan pe olanai ipelawesndu bangsangKu i bas tanehna nari. Aku, TUHAN si Erdolat, Aku kap merentahken si enda man bandu.
10Pakelah timbangen ras sukat-sukat si bujur; #Im 19:36
11Sada epa sukat-sukat gandum arus bali isina ras sada bat sukat-sukat minak saitun. Patoken sukat-sukatna e me homer (+) alu bage sukat-sukat ndai bagenda jadina:
1 homer = 10 epa = 10 bat
12Timbangenndu arus bagenda:
1 sikal = 20 gera
1 mina = 60 sikal
13-15Enda me patokan si ipake i bas erbahan persembahen:
gandum = 1/60 i bas ulih peraninndu nari
dawa = 1/60 i bas ulih peraninndu nari
minak saitun = 1/100 i bas buah saitunndu nari
(Sukatilah e alu bat = 10 bat = 1 homer = 1 kor.)
biri-biri: 1 i bas 200 biri-biri nari.
Kam arus mpersembahken buah gandum, asuh-asuhen man persembahen tutungen ras persembahen persadan, gelah dosa-dosandu ialemi. Aku, TUHAN si Erdolat, Aku kap si merentahken si enda.
16Kerina rayat negeri e arus ngembahken persembahen e man raja si sangana erkuasa i Israel. 17Tugasna me nikapken asuh-asuhen man persembahen tutungen, persembahen buah gandum, ras persembahen lau anggur man kerina negeri Israel tupung wari Raya Bulan si mbaru, wari-wari Sabat, ras wari-wari raya si deban. Persembahen pengalemi dosa, persembahen buah gandum, persembahen tutungen, persembahen persadan e arus isikapken raja lako nangtangi dosa Israel.”
Wari-wari raya
(Kel 12:1-20; Im 23:33-43)
18Nina TUHAN si Erdolat, “I bas wari si pemena, bulan si pemena arus ipersembahkenndu sada jenggi lembu si la lit sitik pe man pandangen lako pebadiaken Rumah Pertoton e. 19Dareh persembahen pengalemi dosa arus ibuat imam sitik, jenari itamakenlah ku binangun pintun Rumah Pertoton, i bas empatna suki batar-batar, ras i bas binangun-binangun kerabangen ku kesain si arah bas. 20I bas wari si pepituken pe arus ka bage perbandu, guna kerina kalak si erdosa alu la sengaja, tah pe erkiteken kebodohenna. Alu bage tetap badia Rumah Pertoton e ibahanndu.
21I bas wari sepuluh empat, bulan si pemena, benakenlah ngerayaken Wari Raya Paskah. Pitu wari dekahna kerina arus man roti si la itama ragi. #Kel 12:1-20; Bil 28:16-25 22I bas wari si pemena tupung perayan e, raja si sangana erkuasa arus mpersembahken sada jenggi lembu jadi persembahen kerna dosa-dosana ras dosa kerina rayatna. 23Kidekah perayan si pitu wari e, tep-tep wari arus ipersembahkenna man TUHAN pitu jenggi lembu ras pitu bajar biri-biri si nguda denga si la lit man pandangen, janah kerina arus itutung. Tep-tep wari arus ka pe ipersembahkenna sada bajar kambing jadi persembahen pengalemi dosa. 24Tambah si e, arus ka pe ipersembahkenna gandum 17,5 liter, guna tep-tep jenggi lembu, bage pe man tep-tep bajar biri-biri si nguda denga, rikut ras telu liter minak saitun.
25Guna Wari Raya Sapo-sapo, si ibenaken i bas wari sepuluh lima, bulan si pepituken, dekahna pitu wari, arus ka pe ipersembahken raja persembahen si seri buena, e me persembahen pengalemi dosa, persembahen tutungen, ras persembahen buah gandum ras minak saitun.” #Im 23:33-36; Bil 29:12-38
Currently Selected:
ESEKIEL 45: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.