ULANGEN 9
9
Bangsa Israel la erkemalangen man Dibata
1“Begiken, o bangsa Israel! Sendah ikeparindu me Lau Jordan, janah iinganindu me taneh bangsa-bangsa si belinen ras gegehen asang kam. Kuta-kutandu mbelin, erbentengken tembok si meganjang seh ku langit. 2Rayatna nggedang mbelin bali ras raksasa. Enggo ibegikenndu maka ise pe la ngasup nalukenca. 3Tapi genduari iidahndu jine kuga TUHAN Dibatandu erdalan arah lebendu bali ras api si merawa. ItalukenNa bangsa-bangsa e adi iperangindu, gelah banci ia minter ipelawes ras ikernepkenndu sue ras si enggo ipadanken TUHAN.
4Kenca enggo ipelawes TUHAN Dibatandu bangsa-bangsa e, ola nindu i bas ukurndu, maka ibereken TUHAN man bandu negeri enda e me perbahan kam metunggung. 5Labo erkiteken ulindu ras perbahanenndu benar maka ipelepas TUHAN kam muat taneh bangsa-bangsa e, tapi erkiteken bangsa-bangsa e jahat, janah ate TUHAN nehken si enggo ipadankenNa man nini-ninindu si Abraham, Isak ras Jakup. 6Tek lah maka labo perbahan kam metunggung maka ibere TUHAN man bandu taneh si mehumur e. Lang! Sabap kam bangsa si mekeng kap.
7Ola ndigan pe ilupakenndu kuga TUHAN Dibatandu nembeh i gurun pasir erkiteken perbahanenndu. Mulai kin kam nadingken Mesir seh ngayak warina kam seh i jenda, kam enggo ngelawan TUHAN. 8Sedangken i Deleng Sinai pe, seh kal rawana TUHAN erkiteken kam. Erkiteken nembehna ateNa menam pe ikernepkenNa kam. 9Lawes aku nangkih Deleng Sinai, guna ngaloken papan batu si dua, i ja isuratken perpadanen si ibahan TUHAN ras kam. Empat puluh wari empat puluh berngi aku tading i das la man ras la minem. #Kel 24:18 10Kenca bage ibereken TUHAN man bangku papan batu si dua e, i ja enggo isuratkenNa alu tanNa jine kai si enggo ikatakenNa man bandu i bas api e nari, sanga kam pulung i deleng e. 11Bage me, kenca enggo lepas si empat puluh wari empat puluh berngi e, ibereken TUHAN man bangku papan batu si dua i ja enggo isuratiNa perpadanen e.
12Kenca bage ngerana TUHAN man bangku, ‘Pedasken susuri deleng enda, sabap enggo ceda ras jahat bangsa si enggo ibabandu ndarat i Mesir nari e.’ Enggo nimpang ia i bas perentah-perentahKu jenari ibahanna gana-gana man sembahenna. 13Tole nina TUHAN man bangku, ‘Kueteh maka tuhu mekeng kal bangsa enda. 14Ola iolang-olangindu Aku. Kukernepken ateKu kalak enda, gelah masap gelarna i doni nari. Jenari maka Kujadiken kam bapa sada bangsa si belinen ras gegehen asang ia.’
15Kenca bage maka nusur aku i das deleng e nari, maba dua papan batu i ja perpadanen e isuratken. 16Kuidah maka enggo ilanggarndu perentah si enggo ibereken TUHAN Dibatandu man bandu. Enggo erdosa kam man baNa, erkiteken ibahanndu gana-gana i bas bentuk anak lembu i bas logam nari man sembah-sembahenndu.
17E maka i lebe-lebendu perper kudampesken batu si dua lambar ndai. 18E maka erjimpuh aku ngadap ku lebe-lebe TUHAN sekali nari, empat puluh wari empat puluh berngi dekahna la aku man la aku minem. Kulakoken e, erkiteken enggo kam erdosa man TUHAN erbanca ia merawa. 19Mbiar aku gara pernembeh TUHAN, sabap erkiteken nembeh ateNa menam kam ikernepkenNa; tapi ibegikenNa ka aku sekali nari. #Heb 12:21 20Man Harun pe merawa kal ate TUHAN. Menam pe ia ibunuhna. E maka kerna ia pe ertoto ka aku. 21Kubuat barang si kemali si ibahanndu e, e me kap anak lembu emas e, e maka kuambekken ku api. Kenca bage kuperperken, kugiling jadi abu, jenari kuambekken abu e ku lau si maler i das deleng nari.
22Tole pe ibahanndu ka maka nembeh TUHAN Dibatandu sanga i Tabera, sanga i Massa, ras sanga i Kiberot Taawa. #Kel 17:7; Bil 11:3; 11:34 23Janah isuruh TUHAN kam i Kades-Barnea nari i ja iperentahkenNa kam berkat ras nciati taneh si ateNa iberekenNa man bandu, mberontak kang kam man baNa. La kam tek, dingen la kam erkemalangen man baNa. #Bil 13:25–14:38; 13:31; Ul 1:21,26; Heb 3:16 24Kidekah kam kutandai, berontak nge kam lalap man TUHAN.
25E me sabapna, maka erjimpuh aku ngadap i adep-adepen TUHAN i bas si empat puluh wari empat puluh berngi e, sabap kueteh maka ugapa pe ikernepkenNa ateNa kam. 26E maka ertoto aku ningku, ‘O, TUHAN si Mada Kuasa ola kal ikernepkenNdu bangsaNdu si ipulahiNdu i taneh Mesir nari alu gegeh dingen kuasaNdu si mbelin. 27Ola min taktaki kuga kengna kalak enda, ola min taktaki kejahaten ras dosa kalak enda, tapi ingetlah suruh-suruhenndu Abraham, Isak ras Jakup. 28Adi la bage, tentu nina kalak Mesir, maka la kap tertaruhkenNdu bangsaNdu enda ku negeri si enggo ipadankenNdu man bana. Ikataken bangsa Mesir me maka ibabaNdu bangsaNdu ku gurun pasir guna munuh ia, erkiteken nembeh ateNdu man bana. 29Bangsa enda kap bangsa si enggo ipilihNdu jadi sikerajangenNdu si enggo ibabaNdu ndarat i Mesir nari alu kuasa ras gegehNdu si mbelin.’ ”
Currently Selected:
ULANGEN 9: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.