Luk 3
3
Zambatisi ate ŋwanzu ati dzikayi mamvu mebi
1Se bisiwu iku ne bitanyi, kani we uneni Tibeli edze ne ukʉma ne Ponse Pilati edze ne ukʉma se ilongo dze Zude, Elodi edze ni kani we ilongo dze Galile, Filipi unkulu we Elodi edze ni kani we ilongo dze Ituli ne dze Tilakoniti, Lisaniyasi edze ni kani we ilongo dze Abilene. 2Ani ne Kayifi bedze ni bekuŋwu be bekabi be bisemi bye Nzambi. Ndili yayu Nzambi awowe ne Zan, ŋwana we Zakali we ibaka se ikanye. 3Zan edze ne ulanda se me longo medze se unkolo ŋwen nzali ye Zulʉden. Zambatisi ate ŋwanzu ati: «Dzikayi mamvu mebi, beyi beboko meteme, yayu ne Nzambi aboloko beyi.» 4Nda Ezayi Muutu we Nzambi etende se sanguvu yedzi. Beyuka muutu ate ŋwanzu se ikanye, yebisayi uŋwombo ŋwen Kuŋwu, yebisayi wangu me peyi medze telee. Yebisayi ne milima mye beyi mye dze telee. 5Uve beyi badzubaka bimbendze byesi, bikudzi byesi bineni ne bite byetse kudzume. Mevunu me mepeyi mesi madze telee, mepeyi me memanyan metse booto, 6batu besi betse yene nda Nzambi ilungise, nda Ezayi etende. 7Batu beyitsi baya kwele ye Zan ati: «Zan akaba bangu meteme.» Wangu ne bangu ati: «Beyi bedzi ni nda tadzi we pili, we tanda beyi ati, beyi betuka lepe kamve ye Nzambi yiya ni nza? 8Pikayi mamvu meve, yayu beyiba ati, beyi badzika mamvu mebi.» Me tanda beyi umbu amene, dzikayi vele dze ne utsimene ati: «Besu ni be imbisa dze Ablaami.» Wayayi memanyan ma, me tanda beyi, Nzambi atuka yikʉle mangu baana be Ablaami! 9Bamana siba wundu ne utsitaka mili nzii mikanga, mili myesi mye nde buta mbulu yive, betse kumaka myangu ne utsumba se ŋwunyan. 10Batu basuŋwule wangu ati: «Ni besu bepika ni vi?» 11Zan akakule ne bangu ati: «Beyi widzi ne mengoyi mole, akaba we nde ingoyi. Widzi ne bila, akaba we nde bila.» 12Ne betolingi be bedolo baya kwele ye Zan ati: «Akaba ne bangu meteme.» Bangu basuŋwule wangu ati: «Kuŋwu ni besu bepika ni vi?» 13Zan akakule ne bangu ati: «Tolongayi si libu le bedolo le beme luma beyi, beyi nde vele dzuka bedolo boko.» 14Ne bewolo basuŋwule wangu ati: «Ni besu bepika ni vi?» Zan ne bangu ati: «Beyi nde boko bedolo ne batu ne singa ne undzuma, ni batayi si bedolo bebi wuteke beyi.» 15Batu bedze ne ubuka ne ivukidze, bangu bedze ne utsimene nati, Zan ni we Nzambi etobo ne uluma. 16Zan akalule ne bangu ati: «Meni wikaba beyi meteme me mangu, ni wiya atakwe me singa, medzi kaka telee ne udondime ne unyangule mikodzi mye bekotoko bedzi. Wangu atse swaka beyi ne Fudzu ye Umpende, wangu atse kaba beyi meteme me Fudzu ye Umpende, ne me ŋwunyan. 17Wangu adzi ni nda unkuni wa kwata nyengese se meboko. Yayu wangu atse nanguse mbulu se bipanzi, wangu atse bata mbulu se me mbinda, ni bipanzi wangu atse tsumba byangu se ŋwunyan ŋwen nde botse.» 18Zan edze ne uvele kaba bangu me ndonzi moko meyitsi, wangu edze ne utanda bangu misisili mive. 19Zan akamve ne kani Elodi nedzi ebala Elodyadi ŋwadzi we unkulu wedzi, Elodi apika mamvu mebi. 20Yedzi evele pika dzamvu dzoko dzibi, ye Elodi esomo Zan ungenenge.
Meteme me Zezu
21Ndili ye batu besi bemana boko meteme ne Zezu aboko meteme. Ndili ye Zezu edze ne ubondo, ikulu dza dzʉve. 22Fudzu ye Umpende yaya ne dzuŋwu ye mbinga, ya sunda kule Zezu, bayuka dzuyi dzi yinga ikulu ati: «Weni ŋwana wami itondo uyitsi, weni itsisa dzami dzesi.»
Me kumvu me batu be imbisa dze Zezu
23Zezu edze ne bisiwu meku mesatu, yedzi ebanda dzanza dzedzi, batu bedze ne utsimene ati, wangu ni ŋwana we Zozefi. Zozefi ni ŋwana we Eli. 24Eli ŋwana we Matati, Matati ŋwana we levi. Levi ŋwana we Melɨki, Melɨki ŋwana we Yanayi. Yanayi ŋwana we Zozefi. 25Zozefi ŋwana we Matatyasi, Matatyasi ŋwana we Amosi. Amosi ŋwana we Nawume, Nawume ŋwana we Esili. Esili ŋwana we Nagayi. 26Nagayi ŋwana we Maati. Maati ŋwana we Matatyasi. Matatyasi ŋwana we Semeyini. Semeyini ŋwana we Yoseki. Yoseki ŋwana we Yoda. 27Yoda ŋwana we Yoyanani. Yoyanani ŋwana we Lesa. Lesa ŋwana we Zolobabeli. Zolobabeli ŋwana we Sayeyatiyeli. Sayeyatiyeli ŋwana we Neli. Neli ŋwana we Melɨki. 28Melɨki ŋwana we Adi. Adi ŋwana we Kosam. Kosam ŋwana we Elemadami. Elemadami ŋwana we Ele. 29Ele ŋwana we Zezu. Zezu ŋwana Eliyeze. Eliyeze ŋwana we Yolimi. Yolimi ŋwana we Matati. Matati ŋwana we Levi. 30Levi ŋwana we Simeyon. Simeyon ŋwana we Zuda. Zuda ŋwana we Zozefi. Zozefi ŋwana we Yonami. Yonami ŋwana we Eliyakimi. 31Eliyakimi ŋwana we Meleya. Meleya ŋwana we Mena. Mena ŋwana we Matata. Matata ŋwana we Natani. Natani ŋwana we Davidi. 32Davidi ŋwana we Zese. Zese ŋwana we Yobedi. Yobedi ŋwana we Bozi. Bozi ŋwana we Salomon. Salomon ŋwana we Nason. 33Nason ŋwana we Aminadabi. Aminadabi ŋwana we Adimini. Adimini ŋwana we Alini. Alini ŋwana we Etosoni. Etosoni ŋwana we Peleti. Peleti ŋwana we Zuda. 34Zuda ŋwana we Zaakobi. Zaakobi ŋwana we Isaaki. Isaaki ŋwana we Ablaami. Ablaami ŋwana we Tela. Tela ŋwana we Nayoli. 35Nayoli ŋwana we Selu. Selu ŋwana we Lewu. Lewu ŋwana we Pelegi. Pelegi ŋwana we Ebeli. Ebeli ŋwana we Sila. 36Sila ŋwana we Kayinami. Kayinami ŋwana we Alepasadi. Alepasadi ŋwana we Sem. Sem ŋwana we Nowa. Nowa ŋwana we Lemeki. 37Lemeki ŋwana we Matusalemi. Matusalemi ŋwana we Enoki. Enoki ŋwana we Yeledi. Yeledi ŋwana we Malali. Malali ŋwana we Kenami. 38Kenami ŋwana we Enosi. Enosi ŋwana we Seti. Seti ŋwana we Adam. Adam ŋwana we Nzambi.
Currently Selected:
Luk 3: WUM
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES