Like 6
6
Jesu Nkʉmu a cuhu mawuumaha
1Cuhu mawuumaha, Jesu bɨla alwoni a nde aki mayira nca nguunu. Alwoni aki maboloho mburu e ble#6.1 Ble oma kaha mva mburu aluumu, ma syaha na mpeembe bɨla yo.,bo ma miiŋa o jyala, ma aja. 2Afarisi ake na bo ndi: «Be lemasyaha jaa mamalehe saabe ngɨri o cuhu mawuumaha oma?» 3Jesu okaali bo ndi: «Be leka liira osuumbu a Davide asi bɨla abuha a nde, ntini e bo ma aki njala ni?» 4Nde onyuniŋi nca njo e Njyami. Oyahi mpeembe oji, ompi abuha a bɨla nde. Okoroho mpeembe jya eki oji eso asi ma avwoŋi. 5Ŋa Jesu na bo ndi Mwana Mvuuru, nkʉmu a cuhu mawuumaha.
6Eto cuhu mawuumaha e mo, Jesu onyuniŋi ma oyisiha mbari e Njyami nca njo mavwonoho. O ŋa balaha mo eki oleme o kwoho olumi. 7Ayisihi me ekele bɨla Afarisi aki ma akeese yuhu Jesu asalaha nde o cuhu mawuumaha, mo obanaha nde. 8Jesu aki oya ecimiŋi e bo nde na oleme ndi: «Temehe, ka o mwa baari aso.» Nde se otemihi. 9Jesu opɨsi bo ndi: «Ngri e saabe eduha ndi nki? Lesa leve si lebi o cuhu mawuumaha, mo ovusuha mvuuru omwo si mo obuma?» 10Jesu okeesi bo aso, nde na oleme ndi: «Laba kwoho.» Nde olabi co, owuumi. 11Ateendi a mbari e Njyami bɨla Afarisi abiri nkala yo mɨni, bo mawobo o mpaniŋi e bo mo osaha jaa e bo ma buuna osa Jesu.
Jesu aswolo antuma a kuumi na vwele
12Cuhu mo Jesu okumi yula okuri, nde ovwoni Njyami lempiibi leciina. 13Cuhu eca, Jesu ocwoli alwoni a nde. Oswoli kuumi na vwele, nde ompi bo a nkuumi ma antuma. 14Simo a nde aluhi Pyere, na Andɨre a mwana a nguhu a Simo. Jake, bɨla Jan, Filipe bɨla Batelemi, 15Matye bɨla Toma, Jake a mwana Alife na Simo macwoloho o Jelote.#6.15 Jelote, mvuuru ali na njala osi o nde. 16Jide a mwana a Jake na Jida osi Sikariote, atoosihi Jesu.
Jesu ayisiha lemvuuru
17Jesu osurihi okuri bɨla antuma a nde. Bo asuri o biri ojemi. O ŋa eki na lenkɨndi la alwoni a nde. Eki se na lemvuuru le Jide leso, na le Jerusaleme na enguundu e ma osyese okeri a Tiire bɨla Sido. 18Bo ayi na ayuha mbari mo osaha nde se osalaha bo. Jesu se osalihi ma aki na edidima me ebi. 19Lemvuuru leso lesahi otiila nde mo mpari eki o nde. Osalihi bo aso.
Oswere bɨla ndoho
20Jesu okeesi alwoni a nde, na bo ndi:
«Oswere oka na be leli nca owuha,
obila Onkani o Njyami oli bɨla be.»
21Oswere oka na be baari leli na njala o ntini ji,
obila nde adɨla ompa be biila e kuna.
Oswere oka na be baari lelila lobi,
osuuha be le eje osebe!
22Oswere oka na be baari ma ama bele, ma ama cuura, ma atuuha, na leduha le maami ma abi o be obila o Mwana mvuuru.
23O ntini ji leswere, lekina na mpari e nyuru obila o puha enini edɨla be o yulu. Bo ali ma antaami ma akuuru a bo, ma swesihi awobi a mbari e Njyami.
24«Ndoho eka na be anga osolo,
obila be lemi mana obaha e be mvuuha.»
25«Ndoho eka na be le eli na eso lobi,
obila be le eje oka njala.
Ndoho eka na be lesebe lobi,
obila be le eje oka nca ndoho, be lelila.»
26«Ndoho eka na be o ntini e baari aso ma juusa be, jwa osuumbu ataara a be masihi bɨla awobi a mbari e Njyami ma abi!»
Ledya la abuha
27«Me eduha be baari leyuha me, ledya a nga mbele e be. Lesa leve na baari ma amabele be. 28Lempa baari maloho be andosoho. Levwono Njyami o baari mawobiho maami ma abi o be. 29Mvuuru obula we lempali mo baa mo, laha nde baa le ojwele. Mvuuru ayaha we mfa, we i liha nde ngoyi nkɨma ni. 30Mvuuru opɨsa we kiila, we ompi. Mvuuru oyaha we kiila, kaa kalaha nde ni. 31Lesa abuha maami a be ledya mbɨri asa be. 32Yuhu be odya eso baari ma dya be atu, be osaha mbɨri asa be leve buni? Na asi ma ambiini madiiŋa se baari ma ali na njala bo. 33Yuhu be osyaha leve na baari ma syaha be leve, be osaha mbɨri asa be leve buni? Anga ambiini se masyaha vwa. 34Yuhu be obiha eso baari mabuuna ovuura be, be osaha mbɨri asa be leve buni? Na anga ambiini se ma abiha ndi abuha avuura bo mo osuumbu jwa. 35Ŋa ledya anga mbele e be. Lesa leve, lebiha ngori, be ledɨla obaha puha e nini. Be le eje oka baana a Njyami a Nkara Yulu, obila nde oli ove o baari ma anga lebi na baari ma abi. 36Leka ave, mva e taara a be ali ove.»
37Le kaa pamaha abuha ni, Njyami se i pama be ni. Le kaa banaha abuha ni, Njyami se i banaha be ni. Leboloho abuha, Njyami se oboloho be. 38Lempa abuha, Njyami ompa be se. Madɨla oluusa we biibi o mpye kuna. Nde aje ompa we ma lemihi le we ampa abuha. 39Jesu oti bo ncincami ndi: «Mvuuru ali i mono ni abuuna olaha buha njila? Mbaa bo vwele avi nca bila! 40Olwoni i vʉla nkʉmu a nde ni, ŋa olwoni ma ama yisiha yemiŋi abuuna oka mva nkʉmu a nde. 41We amono lemfɨsi leli nca diisi le buha, okoroho otini oti oma diisi le we, we i mono ni? 42We aduha na mwana a nguhu “ocyese lemfɨsi mo diisi le nde”! Okoroho otini oti oli o diisi le we, we i mono ni? We na ompyele, sa cyese o tini oti o diisi le we, omana we ocyese lemfɨsi o diisi le buha.»
Oti bɨla mburu e nde
43«Oti ove i buuna ompa mburu e mbi ni. Oti se obi i buuna ompa mburu e mve ni. 44Oti ma yiimbaha mo mburu e nde. Mvuuru i buna otolo mburu e fiige me eti ma ancyene ni. I buuna otolo mburu e rese#6.44 Reje oma kaaha mburu e mva elili. Ma syaha mali a ba o yo. mo ongama ni. 45Mvuuru ove otusaha nca otima a nde maami ma ave, mva mvuuru ali na osolo ove. Mvuuru obi otusaha nca otima a nde maami ma abi mva osolo obi. Obila maami macuuha mo onywa, magwaha nca otima.»
Anjo a mwele
46«Be lecwolo me o “Nkʉmu, Nkʉmu” okoroho be i sa a me eduha be ni? 47Mpini mvuuru aya na e me, ayuha mbari e me, ove nde o nyiimi me. Ŋa me elaha be osuumbu eli nde. 48Nde omakaha mva mvuuru acwi njo mo ocima owuunu nkara ncina ncye o yula kele. Ŋa ntuuna oya njo eka buuna obooho ni, me etuuŋi ove. 49Ŋa mvuuru ayuha mbari e me, nde i sa a me eduha ni, nde mva mvuuru acuuŋa njo o yula ncye eli esumu kali, ntuuna eya enyuniŋi nca njo, o ŋiŋa yo ecalihi eso.»
Currently Selected:
Like 6: MDT
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES