Mataayo 27
27
ɄYeesu atwalwa hwa Pilaato
(Maalʉko 15:1; Luuka 23:1-2; Yoohani 18:28-32)
1Lwa hwasha, abhalongozi bha bhasayi bha Ngʉlʉbhɨ bhonti na bhagoosi bha Bhayahuudi bhahajeehana hu nongwa ya Yeesu huje bhanʼgoje. 2Bhahamʼpinya ʉYeesu, bhahanʼtwala hwa Pilaato, ʉnʼnongozi wa Bhaluumi.
ɄYuuda Sikalyoti ahwinionga
(ƗMbombo ɨzya Bhasontwa 1:18-19)
3Ɨshi ʉYuuda, ʉyo ahanʼsambushiiye ʉYeesu, ahahwiyʉmvwa shibhiibhi lwa waalola huje ʉYeesu alongwilwe agogwe. Aheega ɨmpɨɨya ziila ɨnsabhaazya amashʉmi gataatu, ahabhaweezezya abhalongozi bha bhasayi na bhagoosi bha Bhayahuudi. 4Ahabhabhʉʉzya ahaga, “Nabhomba ɨmbiibhi humʼmɨɨshe mu nyoobhe zyenyu ʉmuntu wa saga ali ni‑ilando lyolyonti.” Leelo abheene bhahaga, “Ɨgo saga geetu atɨ nantele, ɨgo gaaho wʉmwene.” 5Ɨpo ʉYuuda ahazitaaga ɨmpɨɨya ziila mu lubhaga ʉlwɨ nyumba ɨmfinjile ɨya Ngʉlʉbhɨ, ahasogola na‑abhale hwinionje. 6Abhalongozi bha bhasayi bha Ngʉlʉbhɨ bhahasebha ɨmpɨɨya ziila, bhahayanga bhahaga, “Saga ɨhwanziwa asangaanye ɨmpɨɨya ɨzi nɨ zya mu nyumba ɨmfinjile ɨya Ngʉlʉbhɨ, pɨpo zisombwilwe huje ʉmuntu agogwe.” 7Ɨpo bhahajeehana huzyeje ɨmpɨɨya ziila na‑akalile ʉnʼgʉnda ʉgwa mʼmʉmba nsonta huje bhabhasyɨlaje abhajenu ʉmwo. 8Ɨsho sha shɨɨsho ʉnʼgʉnda ʉgwo itaawa lyakwe bhakwizya Nʼgʉnda ʉgwi‑Idanda afishe sanyʉʉnʉ.
9Ɨsho sha lyahabhombeha izwi ɨlyo lyahayangwilwe nʉ nʼkuwi ʉYelemiya huje, “Bhaheejile ɨmpɨɨya ɨnsabhaazya amashʉmi gataatu, ɨmpɨɨya ɨzyo aBhaizilaeeli bhahɨtɨhɨɨne. 10Bhahakala ʉnʼgʉnda ʉgwa mʼmʉmba nsonta nanshi ʉMwɨnɨ sha‑ahandajiziizye.”#Bhaazya Zakaliya 11:12-13; Yelemiya 19:1-13; 32:6-9.
ɄYeesu pitagaalila lya nʼnongozi ʉPilaato
(Maalʉko 15:2-15; Luuka 23:2-3, 18-25; Yoohani 18:29-19:16)
11Ɨpo ʉYeesu ahɨmɨlɨɨye pitagaalila lya nʼnongozi ʉwɨ Shiluumi. Ʉnʼnongozi ʉla ahamʼmʉzɨɨlɨzya ʉYeesu ahaga, “Aawe ʉli Mwɨnɨ wa Bhayahuudi?” ɄYeesu ahamʼmwamula ahaga, “Weewe wayanga.” 12Ɨpo abhalongozi bha bhasayi bha Ngʉlʉbhɨ na bhagoosi bha Bhayahuudi bhahanda hunʼtaake ʉYeesu, leelo ʉmwene saga ahaamula izwi nka limo. 13Ɨpo ʉPilaato ahamʼmʉzɨɨlɨzya ahaga, “Wɨlɨ, saga ʉhwʉmvwa ɨgo gonti ga bhahutaaka?” 14Leelo ʉYeesu saga ahamʼmwamula izwi nka limo. Ɨpo ʉPilaato ahaswiga tee.
15Ɨshi, pa shikulukulu ɨshɨ Paasaka, ʉnʼnongozi ʉyo ahali na miiho aga hubhigulile ʉnʼkʉngwe weeka ʉla abhantu bhahanʼnaabhaga huje ayigulilwe. 16Mu habhaazyo ɨho hwahali nʉ nʼkʉngwe ʉmo ʉyo itaawa lyakwe ahali yʉ Balaaba. Ʉnʼkʉngwe ʉyo ahamanyiishe tee hu mbiibhi zyakwe zya‑ahabhombaga. 17Abhantu lwa bhabhʉngɨɨne, ʉPilaato ahabhabhʉzɨɨlɨzya ahaga, “Weenu wa muhwanza huje ɨmbigulile mu bhakʉngwe ɨbha bhabhɨɨlɨ? Wɨlɨ, muhwanza huje ɨmbigulile weenu, ʉBalaaba awe ʉYeesu ʉyo bhahunʼkwizya Kilisiti?” 18ɄPilaato ahabhabhʉzɨlɨzɨɨzye ɨsho, pɨpo ahamɨɨnye huje abhagoosi bha Bhayahuudi bhahɨnzɨle hwa mwene nʉ Yeesu hu nongwa yɨ jɨɨla.
19ɄPilaato lwa‑akhɨɨye pi‑itengo lyakwe ɨlya‑alonjele, ʉnʼshɨ waakwe ahasonteelezya ɨnongwa huje, “Ʉsahamʼmombe ibhiibhi lyolyonti ʉmuntu ʉyo wa‑ali nʼgolosu, pɨpo ɨndabhile tee nʉsiku mu nzozi hu nongwa yaakwe.”
20Leelo abhalongozi bha bhasayi bha Ngʉlʉbhɨ na bhagoosi bhamo abha Bhayahuudi bhahayisooha ɨmpʉga ɨya bhantu huje, ɨnʼnaabhe ʉPilaato abhigulile ʉBalaaba na hunʼnonje ʉYeesu huje agogwe. 21ɄPilaato ahabhabhʉzɨɨlɨzya nantele ahaga, “Weenu wa muhwanza huje ɨmbigulile mu bhakʉngwe ɨbha bhabhɨɨlɨ?” Bhahamʼmwamula bhahaga, “Tihwanza huje ʉtigulile ʉBalaaba.” 22ɄPilaato ahabhabhʉzɨɨlɨzya nantele ahaga, “Ɨshi, ɨmbombe wɨlɨ nʉ Yeesu wa muhunʼkwizya Kilisiti?” Abhantu bhonti bhahabwaga ibwago bhahaga, “Nʼkhomeele pa shikhobheehanyo!” 23ɄPilaato ahabhabhʉzɨɨlɨzya nantele ahaga, “Abhombile mbiibhi wɨlɨ huje tinʼkhomeele pa shikhobheehanyo?” Leelo abheene bhahonjela abwaje ibwago bhahaga, “Nʼkhomeele pa shikhobheehanyo!”
24ɄPilaato lwa waalola huje saga abhajiiye abhombe lyolyonti na huje ʉvwalanganu wuhwanda, ɨpo aheega amɨnzɨ na‑asamvye amakhono gaakwe pitagaalila lya bhantu bhonti. Ɨpo ahaga, “Anɨ saga ɨndi na malando gogonti hwi‑idanda lya muntu ʉnʼgolosu ʉnʉ. Ɨga malando geenyu mwɨmwɨ!” 25Abhantu bhonti bhahamʼmwamula bhahaga, “Ʉlongwe ʉlwa‑afwe hwakwe lubhanje lwetu na bhaana bheetu!” 26Ɨpo ʉPilaato ahabhigulila ʉBalaaba nanshi sha bhahanzaga, ahabhalajizya abhalwi bhaakwe huje bhanʼshete ʉYeesu nʉ chapo na hunʼkhomeele pa shikhobheehanyo.
Abhalwi bhahunʼsʉfwanya ʉYeesu
(Maalʉko 15:16-20; Yoohani 19:2-3)
27Ɨpo abhalwi bha nʼnongozi ʉla bhahamʼmwega ʉYeesu, bhahabhala nawo pa shinamwɨnɨ sha Pilaato. Bhahabhʉngaanya ɨmpʉga ɨngoosi ɨya bhalwi. 28Bhahamʼmwawula amenda gaakwe, bhahanʼkwatizya igolole ishamamu. 29Bhahatabha ɨnsushe ɨyɨ mimvwa,#27:29 Enya Yoohani 19:2, ɨshifwani ɨshɨ nsushe ɨyɨ mimvwa. bhahanʼkwatizya hwi‑itwe na humʼmɨɨshɨle ilanzi hu nʼkhono gwakwe ʉlɨɨlo huje aloleshe nanshi ʉmwɨnɨ. Bhahasugamila pitagaalila lyakwe nanshi aje bhahumʼpuuta na hwande hunʼkenyensye na hunʼsʉfwanye bhahaga, “Mwagona, wee Mwɨnɨ wa Bhayahuudi!” 30Ɨpo bhahanda hunʼswɨlɨle amatɨ ʉYeesu, bhaheega ilanzi liila mu nyoobhe yaakwe na hunʼkhome nalyo pi‑itwe. 31Lwa bhaamala hunʼsʉfwanye, bhahamʼmwawula igolole ishamamu liila na hunʼkwatizye nantele amenda gaakwe. Bhahamʼfumya hwʉnzɨ, bhahasogola nawo abhale hunʼkhomeele pa shikhobheehanyo.
Bhahunʼkhomeela ʉYeesu pa shikhobheehanyo
(Maalʉko 15:21-32; Luuka 23:26-43; Yoohani 19:17-27)
32Hu habhaazyo ɨho ʉYeesu na bhalwi bhafuma mwi‑ibooma ɨlyɨ Yelusaleemu, bhahakhomaana nʉ muntu ʉmo ʉyo itaawa lyakwe ahali yʉ Siimoni, ʉyo ahali nʼkhaaya wa hwi‑ibooma ɨlyɨ Kileene. Abhalwi ɨbho bhahamʼbijiilizya huje abhʉʉsye ɨshikhobheehanyo sha Yeesu. 33Ɨshi, bhahafiha paala pa bhahagaga Goligoota, hwa huje Pi‑Ifupa li‑Itwe. 34Bhahamʼpeela ʉYeesu ɨdivaayi ya bhahasangɨɨnye nʉ nʼnembo ʉnʼkhali. Ʉnʼnembo ʉgwo gwahamʼmwavwaga ʉmuntu asahahwiyʉmvwaje tee amavune. Leelo, ʉmwene ʉYeesu ahakhaana amwele. 35Lwa bhanʼkhomeela pa shikhobheehanyo paala, bhahagabhana amenda gaakwe#27:35 bhahagabhana amenda gaakwe Bhahabhombile ɨsho alɨngaane na miiho gaabho agɨ Shiluumi huje, abhalwi bha bhahunʼkhomeela pa shikhobheehanyo ʉmʼmomba mbiibhi, bheegaje amenda gaakwe. hwi‑idala ɨlya‑aduunye ɨnduunya#27:35 hwi‑idala ɨlya‑aduunye ɨnduunya Lumo abhalwi bhaala bhahabhɨɨshɨle ʉtusanzʉ twa tuli nɨ vimanyishizyo awe amawe ga gali na mataawa mu shɨlɨɨlo. Bhahabhombile ɨsho huje, weenu mu bheene ayeeje hantu heenu. huje weenu anza hweje mwenda wɨlɨ.#Bhaazya ɨNsalifyo 22:18. Ɨpo lyahabhombeha izwi ɨlyo ʉnʼkuwi ahayanjile huje, “Bhahagabhɨɨne amenda gaanɨ, lyope ikooti lyanɨ bhahalidunyiiye ɨnduunya.”#27:35 Ɨpo lyahabhombeha izwi ɨlyo ʉnʼkuwi ahayanjile huje, “Bhahagabhɨɨne amenda gaanɨ, lyope ikooti lyanɨ bhahalidunyiiye ɨnduunya Amazwi ɨgo saga galɨɨho mu nsimbo zimo ɨzyɨ mandɨ ɨzyɨ Shiyunaani. 36Ɨpo bhahakhala papaala huje bhanʼdiime. 37Pa mwanya pi‑itwe lyakwe pahali nɨ nsimbo ɨzyɨ malando gaakwe zya zyahagaga,
Ʉnʉ yʉ Yeesu, Mwɨnɨ wa Bhayahuudi
38Hu habhaazyo hɨnɨɨho bhahalɨɨho abhankoonya bhabhɨɨlɨ pa vikhobheehanyo vyabho. Weeka bhahanʼkhomelɨɨye hu lubhazu ʉlwa hu lɨɨlo ʉlwa Yeesu nʉ wamwabho hu lubhazu ʉlwa hu mongo. 39Abhantu bha bhahashizanyaaga pi‑idala paala, bhahanʼnigaga na‑ayinzye amatwe gaabho bhahagaga, 40“Wɨlɨ, saga weewe wa wahajile wɨnzaga‑abhugule ɨnyumba ɨmfinjile ɨya Ngʉlʉbhɨ na huyizenje nantele hu nsiku zitaatu? Ɨshi nkashele aawe ʉli Mwana wa Ngʉlʉbhɨ, teenye ʉhwifyʉle weewe, ʉyiishe pa shikhobheehanyo ɨpo.” 41Bhope abhalongozi bha bhasayi bha Ngʉlʉbhɨ na bhamanyizyi abhɨ ndajizyo zya Moose peeka na bhagoosi bha Bhayahuudi bhahanʼsʉfwanyaaga ʉYeesu, 42bhahagaga, “Bhaya, abhanjɨ ahabhafyʉlaga, leelo apootwa ahwifyʉle yʉʉyo! Bhasi, ʉmwene ahwiyanga huje yʉ Mʼfyʉli, Mwɨnɨ wa Bhaizilaeeli. Ɨshi teenye ayiishe pa shikhobheehanyo huje natɨ timʼmwɨtɨshe. 43Ʉmwene ahunʼsʉʉbhɨla ʉNgʉlʉbhɨ, ɨshi ʉNgʉlʉbhɨ amʼfyʉle ɨshi nkashele anʼgɨɨne, pɨpo ahayangaga ahagaga, ‘Anɨ nɨ Mwana wa Ngʉlʉbhɨ.’ ” 44Bhope abhankoonya bhaala bha bhahakhomeliilwe peeka nʉ Yeesu bhahanda hunʼnije.
Afwe hwa Yeesu
(Maalʉko 15:33-41; Luuka 23:44-49; Yoohani 19:28-30)
45Ahwande mu saala nʼtanda ɨshi pasanya afishe mu saala ɨya fundihandwɨmo (9), hwahabha hiisi mu nsi yonti. 46Mu saala ɨya fundihandwɨmo (9), ʉYeesu ahakhoola ɨhoolo ɨngoosi ahaga, “Eloyi, Eloyi, lama sabakitaani?” Hwa huje, “Wee Ngʉlʉbhɨ waanɨ, Ngʉlʉbhɨ waanɨ, yeenu wandeha?”#Bhaazya ɨNsalifyo 22:1. 47Abhantu bhamo bha bhahɨmɨlɨɨye paala, lwa bhʉmvwa ʉYeesu zya‑ayanga, bhahaga, “Ahunʼkwizya yʉ Eliya ʉnʼkuwi wa Ngʉlʉbhɨ.”#27:47 ABhayahuudi abhinji bhahali bhahwɨtɨha huje ʉEliya saga afwiye nka lumo, lyoli ʉNgʉlʉbhɨ ahamʼmwejile mu nsi hu habhaazyo lwa‑ali mwʉmi na‑abhale nawo hu mwanya. Nantele bhahali bhasʉʉbhɨla huje ʉEliya anza hwɨnze nantele mu nsi. Bhaazya 2 aBhamwɨnɨ 2:11; Malaaki 4:5. 48Ʉmuntu ʉmo ahashɨmbɨla nalinaali, ahazubhiha ɨsabhula ɨnzelu mu divaayi ɨndozu, ahapinyila mwi‑ilanzi itali. Ahalibhʉʉsya hu mwanya, ahamʼpeela ʉYeesu huje amwele. 49Abhanjɨ bhahaga, “Leshi teenye nkashele ʉEliya abhala hwɨnze humʼfyʉle!” 50Ɨpo ʉYeesu ahakhoola nantele ɨhoolo ɨngoosi, ahafwa pɨnɨɨpo.
51Ɨpo mu nyumba ɨmfinjile ɨya Ngʉlʉbhɨ ʉwiizigo ʉwi‑igolole#27:51 Igolole ɨlyo lyahazigaga abhantu bhasahatʉʉhaje aPafinjile pa Pafinjile, pa‑akhala ʉNgʉlʉbhɨ. Bhaazya izwi Nyumba ɨmfinjile ɨya Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi. wahazembuha pabhɨɨlɨ afume pa mwanya afishe pa nsi.#27:51 Enya Maalʉko 15:38, ɨshifwani ɨshɨ wiizigo ʉwi‑igolole sha wuzembuha pabhɨɨlɨ. Nantele ʉNgʉlʉbhɨ ahaleeta intensya igoosi ɨlyo lyahaleetile amaalawe abazushe. 52Ɨnkʉngwa zyahiiguha na bhantu abhinji abhasangalusu bha Ngʉlʉbhɨ bha bhahafwiye bhahazyʉha. 53Bhope bhahazyʉshɨle mu nkʉngwa zyabho, lwa wazyʉha ʉYeesu, bhahatʉʉshɨle mwi‑ibooma ifinjile ɨlyɨ Yelusaleemu, bhahabhafumiiye abhantu abhinji.
54Ɨshi ʉnʼnongozi ʉwa bhalwi peeka nɨ‑ɨbho bha bhahanʼdiimaga ʉYeesu, lwa bhalilola intensya na ganjɨ ga gahafumiiye, bhahogʉʉpe tee, bhahaga, “Lyoli, ʉmuntu ʉnʉ ahali Mwana wa Ngʉlʉbhɨ!”
55Bhahali abhashɨ abhinji paala ɨbho bhahenyaaga sha hutali. Ɨbho bha bhɨɨbho bhahamʼmɨnjɨlɨɨye ʉYeesu afume hu mukowa ʉgwɨ Galilaaya na humʼmombele. 56Mu bhashɨ bhaala ahali ʉMaliya ʉwa hu Magidaala, ʉMaliya ʉnyina wa Yaakobo nʉ Yoosefu, nʉ nʼshɨ wa Zebedaayo.
Asyɨlwe hwa Yeesu
(Maalʉko 15:42-47; Luuka 23:50-56; Yoohani 19:38-42)
57Lwa hwabha lyabheela, ahɨnza ʉmuntu ʉmo wa‑ahali nʼtabhazi, ʉnʼkhaaya ʉwa hwi‑ibooma ɨlyɨ Alimasaaya. Ʉmuntu ʉyo itaawa lyakwe bhahagaga Yoosefu, ʉmwene wope ahali nʼsundwe wa Yeesu. 58ɄYoosefu ahabhala hwa Pilaato hunʼnaabhe huje amʼmwɨtɨshɨzye abhale agweje ʉmʼvimba gwa Yeesu. Ɨpo ʉPilaato ahabhalajizya abhalwi huje bhamʼpeele ʉmʼvimba gwa Yeesu. 59ɄYoosefu ahagwega ʉmʼvimba guula na huguniempeele ni‑ikɨbha izelu. 60Ahagubhɨɨha ʉmʼvimba guula mu nkʉngwa yaakwe ya yahabaniilwe nzɨɨla mwi‑ilyalawe. Ɨnkʉngwa ɨyo, saga bhahasyɨlɨle ʉmʼvimba gwa muntu nalumo. Ɨpo ahalibhungulusya iwe igoosi azije ʉlyango ʉgwɨ nkʉngwa ɨla, ahasogola.#27:60 Enya Maalʉko 15:46, ɨshifwani ɨshɨ nkʉngwa ɨya Bhayahuudi. 61Ahabhaazyo ɨho, ʉMaliya ʉwa hu Magidaala nʉ Maliya ʉwɨnjɨ bhahakhɨɨye paala ahwenye ɨnkʉngwa.
Ɨnkʉngwa ɨlɨndɨɨlɨlwa
62Isiku ɨlya bhɨɨlɨ ɨlyo lyahali lisiku lyɨ Sabaato, abhalongozi bha bhasayi bha Ngʉlʉbhɨ na Bhafalisaayo bhahabhʉngɨɨne hwa Pilaato. 63Ɨpo bhahamʼmʉʉzya bhahaga, “Wee mwɨnɨ, tihwizuha huje ʉwi‑ilenga ʉla sha‑asɨɨle afwe ahayanjile huje, ‘Isiku ɨlya taatu, nahayizyʉha afume hwa bhafwe.’ 64Ɨshi tihulaabha ʉbhalajizye abhalwi bhaaho bhalɨndɨlɨlaje ɨnkʉngwa afishe isiku ɨlya taatu, huje abhasundwe bhaakwe bhasahasheele humʼmwibhe na hubhabhʉʉzye abhantu aje azyʉshɨle. Ilenga ɨli ɨlya hu malishilo lyahayibha libhiibhi tee ashile ilenga ɨlya hwande.” 65ɄPilaato ahabhaamula ahaga, “Bheeji abhalwi, bhali hu nkʉngwa na‑alɨndɨɨlɨle hwi‑ikhone lyenyu lyonti.” 66Ɨpo bhahabhala, bhahalɨndɨɨlɨla ɨnkʉngwa shinza, bhahabhɨɨha ɨshimanyishizyo pi‑iwe huje bhahamanyaje nkashele ʉmuntu alibhungulusiizye. Hu malishilo bhahabhaleha abhalwi paala huje bhalɨndɨlɨlaje ɨnkʉngwa.
Currently Selected:
Mataayo 27: SBK
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.