Dmak 8
8
1Onini a dmak to nipipatay ci Stifanoan i, mihaydaay ci Sawlo.
O Pikari'ang ni Sawlo to Kiwkay
Nanitiya a misatapang ko tata'angay a pikari'ang to kiwkay i Yirusalim. Maliwasak a ma^min ko mitooray ci Kristoan a tayra i Yutaya ato Samariya a pala. Dengan o tarokos a ccay ko caay ka liwasak. 2Tadem hanto no malalokay a mitooray to Kawas a tamdaw ci Stifano. Tadamararom cangra a tomangic to pakayniay cingraan.
3Forifor han ni Sawlo ko kiwkay. Comod sa cingra to lomaloma' a mirpet to mitooray a fa'inayan ato fafahiyan a mikidkid a pacomod i pirofoan.
Mapatnak ko Nga'ayay Ratoh i Samariya
4Oya maliwasakay a tamdamdaw i, rakaten nangra ko niyaroaro' a mipatnak to sowal no Kawas. 5Tayra ci Filip i tata'angay a niyaro' i Samariya a pala a patnak i tamdamdaw to pakayniay i ci Kristoan. 6Laccay sa ko faloco' no finawlan a mitngil to sowal ni Filip. O romasato, minengneng cangra to kafahka'an a dmak ningra. 7Nawhani alaclicli' sa koya kaackan a 'adingo a masadak nai kamaro'an nangra a tamdamdaw. Maadah ko 'alomanay a ma'piay ato mapi'iway a tamdaw. 8Orasaka, tata'ang ko lipahak no finawlan noya niyaro'.
9Ira itira toya niyaro' ci Simon hananay a tamdaw. O cikawasay cingra to ha:tiniay a pafahka' to finawlan no Samariya. O tadamaanay kako sa cingra to tireng ningra. 10Ano o sasafaayto, ano o tadamaanayto ko 'orip, ano masamaamaanayto a tamdaw i, pasayra i cingraan a ma^min ko faloco' nangra. <<Onini a tamdaw i, iraay ko 'icel no Kawas, o <Tadaci'icelay,> hananay,>> saan cangra. 11Halafinto cingra a cikawas a mipafahka' to finawlan. Saka, pasayra ko faloco' no finawlan a ma^min i cingraan. 12Nikawrira, yo patnak ci Filip to pakayniay i Nga'ayay Ratoh to pikowan no Kawas ato pakayniay i ngangan ni Yis Kristoan a paso'lin cangra haw i, ta mapaino' cangra o fa'inayan ato fafahiyan. 13Halo ci Simon a paso'lin ta mapaino' cingra. Rarid sa cingra a mihaklong ci Filipan. Fahka' cingra a minengneng to ci'icelay a kafahka'an a dmak ni Filip.
14Matngil no i tiraay i Yirusalim a tarokos ko nipilayap no Samariya a tamdaw to sowal no Kawas. Saka, ocor hanto nangra ci Pitiro aci Yohani a patayra i cangraan. 15Tahira koya tatosaay i, mitolon cangra to sapilayapaw noya Samariya a tamdaw to Fangcalay 'Adingo. 16Nawhani caho ka ^pod i cimacimaan nangra ko Fangcalay 'Adingo. Deng o nika paino'ho nangra pakayni i ngangan no Tapang ci Yis. 17Kapa hanto noya tatosaay cangra i, malayapto nangra ko Fangcalay 'Adingo.
18Paka'araw ci Simon to nipipafli no tarokos to Fangcalay 'Adingo i cangraan pakayni i nipikapa nangra i, pasadak sa cingra to payso to sapafliaw to tarokos. 19Sowal sa, <<Paflien kako tonini a 'icel. Ta ano cimacima ko nikapaan ako i, mapafli cingra to Fangcalay 'Adingo,>> han ningra.
20Pasowal sa ci Pitiro i cingraan, <<Mamana ma'kak kiso a tora payso iso. Nawhani ma^deng a ma'aca no ^kim ko sapafli no Kawas a Fangcalay 'Adingo saan kiso. 21Caay ko cacitodong kiso tonini a tayal niyam. Nawhani caay ka mo^cel ko faloco' iso i ka'ayaw no Kawas. 22Orasaka, falicen ko faloco' iso a miliyas tonini a tatiihay a dmak iso. Pitolon kiso to Tapang to sapihpolaw Ningra to mararaway a harateng iso. 23Nawhani mahapinang ako ko nika sahto o ma'anofay ko faloco' iso. Mapalitho no raraw kiso,>> han ningra.
24Pasowal sa ci Simon ci Pitiroan aci Yohanian, <<Tolonen ko Tapang to saki takowanan ta caay ka lahci i takowanan kora nisowalan namo a dmak,>> han ningra.
25Mahrek koya tarokos a pawacay a pasowal to sowal no Tapang i, kala pinokay han nangra i Yirusalim ko nipipatnak to Nga'ayay Ratoh i kasaniyaroaro' no Samariya a pala.
Ci Filip atoya Iciyopiyaay a Tamdaw
26Ira ko coyoh no Tapang a pasowal ci Filipan, <<Kalomowad a talatimol. Katayra i sakatayra i Kaca a saliklon a lalan to nani Yirusalimay,>> han ningra. (O kohkohanto anini kora lalan.#8.26 O kohkohanto anini kora lalan -- ano ^ca i, o nita'lifay to kohkohan konini a lalan.) 27Lowad sato cingra a tayra. Ira a malitmoh ningra ko ccay a maliti'ay a Iciyopiya a tapang a tamdaw. O misimaway to polong no dafong ni Kantaki hananay a fafahiyan a hongti no Iciyopiya cingra. O nano tayraay cingra i Yirusalim a mita'ong to Kawas. 28Kalanipiasip han ningra to nitilidan ni Isaya o pali'ayaway to sowal no Kawas a cudad ko nika maro' ningra i paliding a minokay. 29Pasowal han no Fangcalay 'Adingo ci Filip, <<Raoden kora paliding ningra a mihaklong,>> han Ningra. 30Saka, cikay sato cingra a miraod i, matngil ningra ko nipiasip noya tamdaw to nitilidan ni Isaya o pali'ayaway to sowal no Kawas a cudad. Saka, <<Mafana'ay kiso tora niasipan iso saw?>> han ningra a milicay.
31Pasowal sa cingra, <<Ano awaay ko patadoay a misahci i, maanen ako ko nika fana' saw? Pidakaw i paliding ako a maro' i tatihi ako,>> han ningra ci Filip a pasowal. Saka, dakaw sa ci Filip a maro' i tatihi ningra. 32O niasipan ningra a rkad no Fangcalay Cudad i,
<<Matiya o nikitingan a siri a patayra i pipacokan,
Matiya o pahater sanay a tofor a siri i ka'ayaw no misaitay to fanoh Cingra a trep saan.
33Mapakangodo Cingra.
Awaay ko mipatadoay i Cingraan a mipa'ading to mo^celay.
Awaay ko mamalotloc Ningra to sasowalen no tamdaw.
Nawhani mapalasawadto ko 'orip Ningra i tini i hkal,>> saan.
34Licay sa koya misimaway to dafong no hongti a tamdaw i ci Filipan, <<Cima ko nisowalan no pali'ayaway to sowal no Kawas tonini saw? O tireng ningra haw? O tao haw? Pasifana'en kako,>> han ningra. 35Saka, pakayni han ni Filip tonini a tosir ko pipasowal ningra cingraan to Nga'ayay Ratoh to pakayniay ci Yisan. 36Yo romakat cangra i, ma'araw nangra ko nanom. Pasowal sa koya tapang a tamdaw, <<Nengnengen, ira ko nanom i tini. Caay ka nga'ay a mapaino' kako i tini saw?>> han ningra.#8.36 Ira ko katlangay a cudad matongal i 37 a tosir Pasowal sa ci Filip cingraan, <<Ano so'linay ko faloco' iso a paso'lin i, manga'ayto a mipaino',>> han ningra. Paca'of sa cingra, <<Paso'lin kako to nika o Wawa no Kawas ci Yis Kristo,>> han ningra.
38Saka, papipatireng hanto noya tapang ko parakatay to paliding ningra. ^Pod sato cangra a tatosa a maloklon a tayra i nanom. Ta paino' hanto ni Filip koya tapang a tamdaw. 39Yo macakat cangra nai nanom i, siyop#8.39 siyop -- o roma i, cfis (ka'amis). han no 'Adingo no Tapang a miala ci Filip. Saka, awato a ma'araw noya tapang a tamdaw cingra. Salipahak sa cingra a minokay. 40Nanoya, ma'araw i Acotus a niyaro' ci Filip. Rakat han ningra ko polong no kasaniyaroaro' a patnak to Nga'ayay Ratoh tangasa i Kaysariya.
Currently Selected:
Dmak 8: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019