Oˑi'waħ (Psalms) 28
28
OˑI'WAĦ DEˑWUS'HĂ̱ DEˑGYIUĦ'ˑSGAEĦ (PSALM XXVIII.)
1Nehˑhuh hah dä̱ˑgahˑsä̱ˑtoh heħ syahˑdaˑdeh, O Syahˑdaˑgwënˑni'yuħ naˑgesˑdä̱ˑä̱ħ; sä̱ˑnoh tä̱ˑsaˑdyeˑökˑheh gyahˑdaˑdeh; nehˑsä̱ħ' ä̱h ne dyä̱ˑgwah tä̱ˑsaˑdyĭëħ gihˑsä̱h heh gyahˑdaˑdeħ, shahˑdä̱ˑyaˑwä̱ħ heˑniˑyoħˑdä̱ ne waoˑnöˑdyah dä̱hˑdööˑdyĭëħ heh oˑyaˑdeh.
2Satˑhönˑdek neˑgwä̱ˑnöh naˑgaˑdaˑnih dä̱s döħ, noˑnä̱ħ nehˑhuh hah dä̱ˑgahˑsä̱ˑtoh heh syahˑdaˑdeħ, noˑnä̱ħ dä̱ˑgä̱ˑnĭsˑoħˑdahˑgwat heˑgwa dyoˑnokˑdaˑdoˑgä̱hˑdiħ.
3Sä̱ˑnöh nehˑhuh ä̱sˑghaˑwih doˑgä̱ noˑdiˑwáˑnehˑaˑgöh, kuh noˑdiohˑdehˑgöh ne waetˑgä̱h, neh sgä̱ˑnoh thiˑsaˑgoˑdiˑwä̱ˑna̱ˑa̱s nä̱ä̱ nä̱ nöhˑsaˑneˑgä̱ˑnöh, neh naeh ne waetˑgä̱h noˑnä̱ˑnyahˑsaˑgö.
4Dasˑheˑyoh ä̱tˑgasˑhe dak heh niˑoˑdiˑyä̱ˑnöˑwä̱hˑöh, neh kuh ä̱tˑgasˑhe dak héˑniˑgai waˑneˑak'shoħˑdä̱ hä̱ˑnöˑdä̱ˑnöhˑgeäˑtaħ; dasˑhe yöh ä̱tˑgasˑheˑdak he niˑyoi yoħˑdaˑshoħ dä̱ naˑdĭsˑohˑdah; dönˑdaˑsheˑyöħ hehˑniˑgaˑgeoħˑdä̱ noˑnötˑgaˑnyahˑgiˑeh.
5Neh dyoiˑwahˑheh dä̱ˑnösˑdeisˑtaħˑnoˑiˑoh dasˑhäħ Naˑyahˑdaˑgwënˑni'yuħ, kuhˑheˑniˑyoˑdoˑnyáˑnoh nasˑohˑdah, neh naeh ä̱öˑgöi'wahˑdot, tä̱ħ'ä̱h kuh tahˑdöˑdaˑgöˑges'guħ.
6Deaˑä̱ˑsaˑöh Naˑyahˑdaˑgwënˑni'yuħ, neh gaiˑöˑnih heh hoˑtöˑdaˑdöh ne gwä̱ˑnöh ne chiˑwaˑgaˑdaˑniˑdä̱sˑdöh.
7Neh Naˑyahˑdaˑgwënˑni'yuħ gehˑhasˑdeˑgöh neh kuh aˑgaˑdaˑwä̱h'dasˑdoh; neh na gä̱nˑnyahˑsah hoˑyahˑdääˑöh, aˑgyeˑnöˑwöhˑse kuh; neh dih gaiˑöˑnih naˑgä̱nˑnyahˑsaħ hahˑdeˑyoˑdok aöˑesˑhas; neh dih ä̱ˑgyeˑähˑdok naˑgä̱ˑnöh ne deä̱ˑsä̱öˑnyöˑök.
8Neh Naˑyahˑdaˑgwënˑni'yuħˑhaˑdihˑhasˑdeˑgöh, neh kuh naˑöˑhwa̱ħ jaˑgoˑyahˑdaˑgwas heh niˑahˑhasˑdeˑshöħˑdä̱ nöˑwa̱ˑnohˑgaa.
9Sasˑheˑyahˑdaˑguh ne söˑgwehˑdah, sheˑyaˑdähˑswiˑyusˑdä̱ħ kuh heˑniˑsyahˑdaˑgwënˑni yuħ; sheˑnöˑdä̱ˑök kuh dä̱sˑheˑyahˑdahˑgwah döˑok hä̱ˑyoiˑwaˑdaˑdyĭëħ.
Currently Selected:
Oˑi'waħ (Psalms) 28: SEE
Highlight
Share
Copy
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.