मर्कुस 8
8
येसु द्या हाजारहेङ चापाहि
(मति 15:29-39)
1आले दिना न्हुसो आरोङ द्याङको बारका जेर येसुको भेरपा लोतेङ जोम्हि। इम्बालाइको चुमाका चाका-आम्का दोनाङ येसु चात्यागेलाइहेङ ताइ दोफा काइतेङ दोअ्हि, 2“इदोइ द्याङगेलाइहेङ तिङतेङ का मेनाङ दायाघा। हाइपालिपानु एबालाइ का दोफा हिका सुम्नि जेङहोइ। एला इम्बालाइको चाका-आम्का बुङ दोका हि।” 3इम्बालाइ मध्ये आधिमि द्याङगेलाइते हेन्जाङ दुरेसो लोका हि। जेसापा का ओबालाइहेङ म्हितुपाङ सिता दिङगिल्घा पानुते, ओबालाइ दामाताङ झाका लोनाङ।
4चात्यागेलाइ येसुहेङ दोअ्हि, “या थामे चाका-मान्दा हि, झाराङको भाअ्सिङ थेम्का तोले हिसोसो चुमालि ला?”
5येसु हिअ्हि, “नेलाइ दोफा हेनोङ तोले हि?” चात्यागेलाइ जोबाफ पिहि, “न्हि लोङ तोले हि।”
6कालाउ येसु द्याङगेलाइहेङ सिङजालजालका जाबाराता योम्लि आग्या पिहि कालाउ इम्बालाइ योम्हि। कालाउ न्हुसो वा न्हि लोङ तोलेहेङ खुरता ताअ्तेङ परमेस्वरहेङ धन्यबाद पिहि। टुक्रा-टुक्रा पोङतेङ चात्यागेलाइहेङ पितेङ बाखाराइलि लागाइहि। कालाउ चात्यागेलाइ द्याङगेलाइहेङ बाखाराइलि तेङहि। 7इम्बालाइ दोफा आतुइसा म्हुइ-म्हुइका हायागेलाइ हिघाहि। येसु हायाको भाअ्सिङ परमेस्वरहेङ बुङ धन्यबाद पिहि कालाउ चात्यागेलाइहेङ बाखाराइलि दोअ्हि। 8कालाउ द्याङगेलाइ घाइपाङ चाहि, कालाउ घाइहि। कालाउ चात्यागेलाइ चालि मादोका दाइका तोलेको टुक्रागेलाइ जोम्पाहि इङको न्हि दाल्हो पोङघाहि। 9इन्ता द्या हाजार झोको द्याङगेलाइ हिघाहि। 10येसु इम्बालाइहेङ बिदा पालि दोतेङ न्हुसो, वा चात्यागेलाइ दोफाङ नाउता धोल्तेङ दलमनुथाको मौजाता हानिहि।
11हेथेते फारिसिगेलाइको समुह येसुकोता लोतेङ नाइसुलि तेङहि। इम्बालाइ येसुहेङ फासिपालि भोघाखे ओदोङ भाअ्सिङ इम्बालाइ येसुहेङ दोअ्हि, “परमेस्वर दोङ नासेहेङ खाबारा पिका हि दोअ्का स्वर्गसो एनोङ चिन्हा तिम्पापि।” 12येसु वाको खाङधुरि मापाका को कारन निरास जेङतेङ ह्रिङका हुसि सितेङ दोअ्हि, “एलाको इदोइ द्याङगेलाइ हाइ पालि चिन्हा खाङलि भोखे? जातिङ भारि का नेलाइहेङ दोअ्खा, इसिका द्याङगेलाइ हिदोइ बुङ भारभुसाइका चिन्हगेलाइ खाङलि मानिनावा।” 13आरोङ वा फारिसिगेलाइहेङ इन्ताङ सिधितेङ ताइको चात्यागेलाइको दोफाङ इन्ताङ नाउता धोल्तेङ गालिल जिल्लाको समुन्द्र वरिपरि जेङतेङ हानेहि।
फारिसिगेलाइको कालाउ हेरोदको साउरि
(मति 16:5-12)
14येसुको चात्यागेलाइ ताइको दोफा थेम्पाङ तोले चुम्पुलि निल्का हिघाखे, कालाउ नाउता इम्बालाइ दोफा एनोङ खिनिङ तोले हिघाहि। 15कालाउ येसु इम्बालाइहेङ इसिका दोअ्तेङ चेताउनि पिहि, “हिङसु, फारिसिगेलाइ कालाउ राजा हेरोदको साउरिसो जोगितेङ हिसु।”
16चात्यागेलाइता-ताइमिता काथा पालि तेङहि, “केलाइ दोफा थेम्पाङ तोले मान्थु ओदोङ भाअ्सिङ येसु दोअ्दोङखे।”
17इम्बालाइको एसापा काथा पाका येसु गितेङ इम्बालाइहेङ हिअ्हि, “तोले थेम्पाङ मान्थु दोअ्तेङ हाइ पालि काथा पासुखेना? हाइ नेलाइ ताइको ह्रदय इदोइ झोको हेन्जा राङका बानाइका हिसुना कि नेलाइ एला बुङ बुझिलि दोका मान्थु सुन्हा? 18ओबालाइको मिसियाँ कालाउ न्हातोङ हि, कालाउ बुङ इम्बालाइ खाङलि कालाउ हिङलि मादोअ्खे। हाइ नेलाइहेङ फोम मान्थु? 19जेलाउ का ना हाजार द्याङगेलाइहेङ गोताङ पातेङ नालोङ तोले पोङतेङ चालि पिघा कालाउ नेलाइ दाइका तोले हेथे दाल्हो जोम्पासुना?” इम्बालाइ येसुहेङ दोअ्हि, “तेन्हे दाल्हो!”
20येसु आरोङ हिअ्हि, “कालाउ न्हि लोङ तोलेहोइ द्या हाजार द्याङगेलाइहेङ चापालाउ नेलाइ दाइका पोङनाका तोले हेथे दाल्हो ल्होपासु?” ओबालाइ दोअ्हि, “न्हि दाल्हो।”
21येसु आरोङ इम्बालाइहेङ दोअ्हि, “का हासु दोअ्तेङ नेलाइ एला बुङ हाइ पालि मागिसुखेना!”
बेथसेदाको कान्हाँ द्याङ
22जेलाउ येसु कालाउ वाको चात्यागेलाइ बेथसेदा देराता लोहि इन्ता द्याङगेलाइ एमि मिसियाँ मातिङका द्याङहेङ वाकोता चुमाहि कालाउ वासेहेङ साइतेङ एल्पापि दोअ्तेङ सेउपाहि। 23येसु उङको मिसियाँ मातिङका द्याङहेङ चातेङ देरासो बाहार चुमाहि। कालाउ येसु ताइको थोअ्चि वाको मिसियाँता तेअ्पातेङ वासेहेङ हिअ्हि, “हाइ नाअ् मिसियाँ तिङलि दोखेना?”
24कालाउ वा खाङकाताङ दोअ्हि, “का द्याङगेलाइहेङ तिङकाते तिङखा कालाउ ओबालाइहेङ रेम्फा तिङलि दोका मान्थुघा। ओबालाइते सिङ हिगिल्का भाइका कि तिङखे।”
25येसु आरोङ वाको मिसियाँ ताइको खुरहोइ साइहि, कालाउ उङको द्याङ एकोरो खाङलाउ गोताङ आनेमाने रेम्फा तिङलि दोहि कालाउ वा एल्हि। 26कालाउ न्हुसो येसु वासेहेङ साअ् घुरितेङ हानिलि आग्या पिहि, येसु वासेहेङ दोअ्हि, “ताइको साअ् हाने, कालाउ इता हाइ जेङका हिघाहि देरागेलाइहेङ दोअ्लिको भाअ्सिङ, देराता मादुल।”
पतरुसको सुइकार पाका
(मति 16:13-16; लुक 9:18-21)
27येसु चात्यागेलाइहेङ बेथसेदा सहर लाअ्तेङ कैसरिया फिलिप्पि सहरको भेरपाको देराता हानिहि। दामाता वा चात्यागेलाइहेङ हिअ्हि, “द्याङगेलाइ कासेहेङ हासु हाइ दोअ्खे?”
28चात्यागेलाइ उत्तारा पिहि, “आधिमि नासेहेङ बप्तिस्ता पिका युहान्ना दोअ्खे आधिमि एलिया दोअ्खे, कालाउ हेथेते चाहि आरोङ भेनेङ एमि परमेस्वरको बक्ता वाला दोअ्खे।”
29येसु आरोङ चात्यागेलाइहेङ हिअ्हि, “कालाउ नेलाइ चाहि का हासु दोअ्तेङ खाङधुरि पासुखेना?” पतरुस जोबाफ पिहि, “नाअ् चाहि ख्रिस्ट हिना परमेस्वर पाहासो दिङगिल्का।”
30जेलाउ येसु इम्बालाइहेङ एसापा दोअ्काताङ थाङका आग्या पिहि कि इदोइ काथाता हासुहेङ बुङ मादोअ्सु।
येसु ताइको सिकाको बारेता आगमबानि पाका
(मति 16:21-23; लुक 9:22-27)
31कालाउ येसु ताइको चात्यागेलाइहेङ धिरपालि तेङहि कालाउ वा दोअ्हि, “हेथेते काथागेलाइ काङको दोफा हिलि आवस्यक हि, का द्याङको चान जेङनाङ का हेन्जा दुख भोगिलि गोयाङ। इदोइ एसापा जेङलि हि, कि केलाइको यहुदि आगुवा, मुलि पुजारि कालाउ व्यवस्था धिरपाका द्याङगेलाइ सुइकार मापाङ, कालाउ का सिलि गोयाङ कालाउ सुम दिना न्हुसो का सिकासो सिन्हुताङका।” 32एसापा वा दोङ चात्यागेलाइहेङ इदोइ काथा भाइ-भाइपा ग्याको दोअ्तेङ दोअ्पिहि, कालाउ पतरुस वासेहेङ एपाहा चुम्पुतेङ या दोअ्तेङ चेरहि कि एन्सा माअ्दो दोअ्तेङ सम्झाइहि।
33कालाउ येसु ताइको ह्राइ घुरिपाहि कालाउ चात्याभारि खाङतेङ पतरुसहेङ चेरहि, “ओइ साइतान, काङकोसो दुरे हाने! हाइपालिपानु नाङको मन खिनिङ द्याङको हि, परमेस्वर पाहासो माको।”
येसुको चात्या जेङलिको आर्थ
34कालाउ न्हुसो येसु ताइको चात्यागेलाइहेङ कालाउ इन्ता हिका द्याङगेलाइहेङ काइतेङ दोअ्हि, “एसापा नेलाइ काङको चात्या जेङलि खाङसुखेना पानु ताइको इच्छा लाअ्लि गोइखे। वा क्रुस फाअ्लि इस्सुक हिलि गोइखे कालाउ काङको चात्या जेङ।” 35हाइपालिपानु जाइ या सुमिङता ताइको प्रान बान्चिपालि खाङखे वा मोअ्पावा, कालाउ इम्बालाइ जाइ काङको भाअ्सिङ कालाउ सुसमाचारको भाअ्सिङ प्रान मोअ्पाखे, वा जातिङको जिबन निनावा। 36जेसापा द्याङ सुमिङहेङ दोङ ताइको बानाइलाउ बुङ ताइको आनान्त प्रान चाहि गुमाइ पानु वासेहेङ हाइ फाइदा जेनावा रो? गुमाइपाका आत्मा आरोङ हाइहोइ घुरिपालि द्वावा? 37कालाउ एमि द्याङ परमेस्वरहेङ हाइ पिलि द्वावा जाइ दोङ वाको आनान्त प्रान चोल्पिखे? हाइ बुङ माको! 38इदोइ सोमोइता पापि कालाउ खाङधुरि मापाका पुसतागेलाइ जाइ कासेहेङ परमेस्वरको रुपता सुइकार पालि कालाउ काङको सिक्स्यागेलाइ केम्लि इन्कार पाखे, का द्याङको चान बुङ आबाको महिमा चुम्तेङ पबित्तरो स्वर्गदुतगेलाइ दोफा लोलाउ, वासेहेङ ताइको दोअ्लि इन्कार पाङका।
Currently Selected:
मर्कुस 8: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.