Keriekitho 50
50
1Sitse Josef-e tsu puo puo zie merepfülie, di puo krükra mu puo mebo ibata. 2Süsie Josef-e puo kituo darukesiko bu daru pie puo puo mo kenhewanu di diekhashü. Süla daru kesikoe mha pie Israel kenhewa; 3ukoe zha hiedia lie di süu chü, süu la puotei süde se morosuocü la. Siro Ijiptmiako zha hiethenie puo krü.
4Siro puo krükecü zhako vota tse, Josef-e Faro kinuko ki mha pu di sie, “A nie mhi ki nie khriepfülieta üro, Faro ki hai di pucie: 5A puoe a bu rüse puo rüse, puoe, ‘A siatatuo üzhie, a Kanan kijü nunu a mekhru puo thiepie zhü ho, mu no sünunu a khrucie si,’ süla tsie a bu kho a puo khruwacie, süsie a la vortatuo.” 6Sitse Faro sie, “Kholie di n puo khruwalie, puo n bu rüsepie kezhü mhiei di.”
7Süla Josef puo puo khrutuo üdi khota; mu Faro kituoko pete puo ze kho, puo kinu phichüko, mu Ijipt kijü nu phichüko pete. 8Siro Josef kinuko pete mu puo siezedzürieko, tsiu puo puo kinuko rei kho, uko nuonuo kecünuoko, uko kuo kroko mu u thukroko rübei khapie Goshen kijü nu keba zota. 9Siro kierbageiko mu kier themiako rei puo ze kho; süu themia krodi kro kezha se puo chü di. 10Siro uko Jordan khie keba Atad sieu nu vorlie tse, uko sünunu thekrü kezha se puo chüshü; mu puo zha thenie puo puo la thekrü chü. 11Sitse kijü sünu lhou keba Kanankoe Atad sieu nu thekrü kechüu ngu tse, ukoe sie, “Hauha Ijiptmia la thenousuo sekecü thekrü kezha se puota zo.” Süla thechü süu za pie Abel-mizraim#50:11 Puoca Ijiptmia thekrü kechü (moro phiechü). kieta, süu Jordan khie lutsa ba. 12Sidi puo nuonuokoe puo diekhakeshü mhiei chülie. 13Puo nuonuokoe puo toupie Kanan kijü nu vo di, Abraham-e Hitmia Efron kinu khrüpiekezhü Mamre khieki Makpela lie nu tsiepfüu nunu puo khruwa. 14Sidi Josef-e puo puo khrukewa sie, puo siezedzürieko mu puo puo khruketuo la puo ze kekhoko pete ze Ijipt nu la vorta.
Josef Puo Dzürieko Kejo Vakeshü
15Josef dzüriekoe uko puo siaketa sie, “Josef uko gei puo nei motuo zo ro, sidi uko puo gei mha kesuo chükeshüko pete chüpie uko gei shü lata ro ki ta?” 16Süla uko Josef ki vo di, “N puoe siaketa mhodzü die hau khashü, 17‘Hau pie Josef ki pushülie: A n ki chaya, n dzürieko kejo mu uko n gei kekrü di n pechükewau vashüwacie.’ Süla hieko tsie n ki chaya, n puou Kepenuopfü kituoko kejokemou vashücümu.” Siro uko puo ki die pushü tse Josef-e krata. 18Siro puo dzürieko rei krata mu uko vor tetsu puo mhodzünu zhüta, sidi sie, “Harie, hieko sü n diemiata zo.” 19Derei Josef uko ki, “Michie hiecie, a Ukepenuopfü tha nu ba zo memu? 20Nieko a gei mha kesuo chüketuo rhü; derei Kepenuopfü we süu se mha kevi chülie zo, thie chü keba kemhie di, sidi themia kekra bu rheilieketuo chüliete. 21Süla michie hiecie, a thuo nieko mu nie nuonuoko meholietuo.” Sidi puo uko ki die kevi pie pu di uko nou chü kethepfushü.
Josef Se Dze
22Sidi Josef-e Ijipt nu lhou tuota, puo mu puo puo kinuko; siro Josef-e cie krie puo di ker lhoulie. 23Siro Josef-e Efraim nuonuo phou se ketso nguwa; Manasseh nuou Makir nuonuo rei penuopie Josef phi ki shülie. 24Siro Josef puo siezedzürieko ki, “A siatatuo üzhie, derei Ukepenuopfüe nieko ki vor zotuo, sidi kijü hau nunu nieko ze la vo puoe pie Abraham, Isak mu Jakob tsütuo üdi rüsepie kezhü kijüu nu lashü zotuo.” 25Sidi Josef-e Israel nuonuoko ki, “Ukepenuopfü nie ki vor zotuo, mu nieko bu hanunu a ruko pfü khotuo.” Sidi uko bu süu chüketuo rüsewa. 26Sidi Josef cie krie puo di ker lhoulie di siata, sitse uko mha pie puo mo kenhelie, sidi Ijipt nu mekoula puo nu shüwa.
Currently Selected:
Keriekitho 50: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More