Baruc 6
6
1“Pene rembiapo vai haguére Tupã renondépe, mburuvicha guasu Nabucodonosor pende reraháta tembiguáirõ Babilóniape.#Jer 16.10-13. 2Upe tetãme pende aréta. Peikóta upépe, 7 ñemoñare ohasa peve. Upe rire pogueru jeýta py'a guapýpe. 3Upépe pehecháta opaichagua tupã. Oĩta ojejapóva yvyrágui, pláta ha órogui, ojereroguatáva ati'ýre. Opavave upe rupigua okyhyje chugui kuéra.#Jer 10.2,5. 4Peiko kuaáke aipórõ, ani ágã peẽ ha'e kuéraicha avei, pekyhyje umi tupãgui. 5Pehecha vove Mba'éichapa heta umi ogueroguata ha omomba'éva umi tupã, peje pende py'a pýpe: ‘Nde añónte, ore Jára, upe oñemomba'e guasu vaerã’. 6Tupã remimbou*f** oĩta pende apytépe, ha ha'e pene pytyvõta.
7Umíva umi tupã oñembyape óro ha plátape ha ikũ katu kysépente ojejapo vaekue. Umíva niko tupã gua'únte, ikatu'ỹva oñe'ẽ.#Sal 115.4-8; 135.15-18; Is 40.18-20; 44.9-20; Jer 10.2-16; Sab 13.10—14.21. 8Kuñataĩ oñembojeguaháicha, ha'e kuéra ombojegua órope tupã nguéra. 9Sapy'a-py'a, ipa'i kuéra voi oipe'a umi tupãgui óro térã pláta ha oiporu imba'erã, térã ome'ẽ umi kuña reko vai, itupao kuérape omba'apóvape. 10Umi tupã gua'u pláta, óro ha yvyrágui ojejapóva katu ha'e kuéra ombyao jeguapa, yvypóra ramo guáicha. Amo ipahápe, havẽ ha ikupi'ipa jeýnte avei. 11Ha oñemondeve ramo jepe ao hepyvévape, ombojovahéi vaerã, yvytĩmbo oguapy anambusúgui hese kuéra. 12Oime ipokokáva,*f** ha'e ramo guáicha mbojovakehára. Ha oĩ ramo jepe iñe'ẽ guasúva chupe, ha'e ndaikatúi ojuka. 13Ambue katu oguereko ipópe kyse puku térã hácha, ha ñorãirõháme térã mondaha ou ramo chupe ndaikatúi mba'eve ojapo. 14Pehecháma ko'ãva ndaha'eiha tupã. Upévare ani pekyhyje chugui kuéra.
15Kambuchi jekakuéicha umi tupã gua'u itupaópe oĩva, naiporãi mba'everã. 16Umi hesakua henyhẽ yvytĩmbo omopu'ãvagui tupaópe umi oike ha osẽva. 17Oĩrõ oja'yveréva mburuvicha guasu ndive, oñeñongatu porã koty ñembotypýpe upéi ojejuka haguã. Péicha pa'i kuéra oguereko umi tupã, ani haguã oike chupe kuéra mondaha.
18Omoĩ chupe kuéra mba'e rendy, hetave ijupe kuéra guarãgui, umi tupã katu ndohechái mba'eve. 19Ha'e kuéra niko yvyra tupao peguáicha, ijapyte kupi'ipa. Tigua'ã mante ijao rehe okaru, ha ha'e kuéra noñandúi. 20Tatatĩ tupao pegua hova kuéra omohũmba. 21Mbopi, mbyju'i, guyra opaichagua ha mbarakaja jepe iñakã ári oguejy. 22Péicha pehecha kuaáta ko'ãva ndaha'eiha tupã. Ani pekyhyje chugui kuéra.
23Ko'ã tupã oñembyape órope iporã haguã, ha oĩ mante vaerã oikytýva chupe kuéra ombovera haguã. Upéva ijehegui kuéra ndaikatúi ojapo, Oñemboyku ramo guare ojejapo haguã, ha'e kuéra noñandúi vaekue mba'eve. 24Hepy ojejogua, ha upéicharõ jepe, ha'e kuéra ndoikovéi. 25Ndaha'éi mba'eve. Ndaipýi ha upévare ojereraha mante vaerã ati'ýre.#Is 46.7; Jer 10.5. Ha peichahágui ho'a ramo yvýpe, herojaha mante omopu'ã jey vaerã. 26Oñemoñembo'y ramo ndaikatúi oguata, ijyke'ã ramo ndaikatúinte avei oñemoĩ porã. Mba'e kuave'ẽ chupe kuéra oñeme'ẽva ku omanóvape oñekuave'ẽrõ guáicha.#Eclo 30.18-19. 27Mba'e kuave'ẽ chupe kuéra oñeme'ẽva, pa'i kuéra ho'upa. Hembireko kuéra ombojuky, ombopiru ha oñongatu, ome'ẽ rangue mboriahu térã hasývape. Kuña imemby ramóva térã imba'asy guejýva, oho opoko umívare.#Lv 12.2-5; 15.19-27. 28Upévare ikatu pehecha kuaa ko'ãva ndaha'eiha tupã. Ani pekyhyje chugui kuéra.
29Mba'éicha piko oje'éta ko'ãvape tupã? Kuña niko umi chupe kuéra omoguahẽva opa mba'e kuave'ẽ, ha hi'ári, ko'ã tupã niko pláta, óro ha yvyrágui ojejapóva. 30Umi pa'i oguapy itupao kuérape, ao sorokue ha akã nandi, oñemyakã perõ ha oñendyvapo rire, 31ha osapukái joa hikuái ku oimérõ guáicha omanóvare ñembo'ehápe. 32Ha'e kuéra omboi umi itupã, ha ijaokue ome'ẽ hembireko ha imitã nguérape. 33Rejapo ramo ivai térã iporãva umi tupãre, ha'e kuéra ndaikatúi mba'eve ojapo nde rehe. Ha'e kuéra ndaikatúi omongúi térã ohupi mburuvicha guasúpe.#Dn 2.21. 34Ha'e kuéra ndaikatúi ome'ẽ ñandéve mba'eta ha pira pire, ha oĩ ramo ome'ẽva chupe iñe'ẽ ojapotaha peteĩ mba'e, ha upéi ndojapói, umi tupã ndaikatúi ojapo hese mba'eve.#Dt 23.21. 35Ñamanóta ramo, ndaikatúi ñane pytyvõ,#Dt 32.29; Sal 49.16. ha oĩ ramo ojejopy vaíva imbaretéva po guýpe, mba'evénte avei ndaikatúi ojapo. 36Ohecha'ỹvape ndaikatúi omonguera, ha noipytyvõi oikotevẽvape.#Dt 10.18; Sal 146.7-9. 37Ndohecha kuaái iména manóvape, ha ityre'ỹvape ndoiporiahurerekói. 38Ko'ã yvyra pehẽngue, óro ha plátape oñembyape pyre ojogua umi itápe, itatýgui oñerenohẽ vaekue. Umívape omomba'éva oñemotĩne.#Hab 2.19. 39Mba'éicha piko aipórõ oje'éta hese kuéra, ko'ãva tupãha?
40Umi Babiloniagua voi omoĩ vai itupã nguérape. Oĩ ramo iñe'ẽngúva ogueraha hikuái tupã Bel#Is 46.1; Jer 50.2; 51.44; Dn 14.3-22. rendápe, ha ojerure chupe omoñe'ẽ haguã pe iñe'ẽngúvape. Bel katu ndaikatúi ohendu pe oje'éva chupe. 41Ha mba'eve ndojapói ramo jepe, umi hendápe ohóva naiñakãi hikuái ojehecha kuaa ha ojeheja haguã umi tupãgui. 42Kuña reko vai kuéra oñemoĩ tape yképe, ojeku'a jokua ha ohapy ñana rei insiénso ramo guáicha, 43ha peteĩ kuimba'e ohasa ramo ha ogueraha peteĩvape oñeno haguã hendive, upe kuña ou rire oñembohory iñirũ nguérare ndoúi haguére ogueraháva chupe kuéra ha ojora iku'asã. 44Opa mba'e tupã rehegua, japu meme. Mba'éicha piko aipórõ oje'éta hese kuéra tupãha?
45Yvypóra rembiapokue niko umi ta'ãnga kuéra ha osẽ ijapohare oipota haguéicha. 46Umi ndoikove pukúi, Mba'éicha piko aipórõ ojapóta tupã? 47Japu mante ko'ãva oheja iñemoñare kuérape. 48Ou ramo chupe kuéra ñorãirõ térã ambue mba'e vai, pa'i kuéra oheka moõpa okañýta itupã nguéra reheve. 49Ko'ã tupã ndaikatúi oipytyvõ avavépe, ou ramo ñorãirõ térã ambue mba'e vai. Ndohecha kuaái piko ha'e kuéra upéicharõ, ko'ãva ndaha'eiha tupã? 50Ko'ãva niko yvyra pehẽnguénte, óro ha plátape oñembyape pyre. Upéinte ojekuaáne japu memeha. Opa tetã rupi mburuvicha guasu kuéra ohecha kuaáne ndaha'eiha tupã, yvypóra rembiapokuenteha, ha Tupã Ñandejára mba'evete nomoĩri hague ipype kuéra. 51Máva piko ndohecha kuaa mo'ãi, umíva ndaha'eiha tupã?
52Ko'ã tupã ndaikatúi avavépe omoingo mburuvicha guasúrõ, térã omongy.#Dt 11.14; 28.12; Sal 147.8. 53Ijehe mba'eve ndaikatúi ojapo, térã oguenohẽ avavépe jejopy vaígui. Mba'evete voínte ndaikatúi ojapo. Ha'e kuéra yryvu oveve reivaicha, mba'eve ndojapói. 54Tata ojepota ramo pe tupaópe umíva oĩha, pa'i kuéra pya'ete osẽ okápe ha umi ta'ãnga opytáne ikusugue. 55Ko'ã tupã ndaikatúi oñemoĩ peteĩ mburuvicha guasu térã oúva oñorãirõ haguãre. 56Mba'éicha piko aipórõ ja'éta hese kuéra tupãha?
57Ko'ã tupã yvyrágui ojejapóva ha oñembyapéva pláta ha órope, ndaikatúi mba'eve ojapo ou ramo chupe kuéra mondaha, oipe'apa chugui kuéra pláta, óro ha ijao, ha upéi oho heseve. Umi tupã katu mba'eve ndaikatúi ojapo. 58Upévare, ko'ãva rangue iporãve peteĩ mburuvicha guasu ohechaukáva ipy'a guasuha. Ko'ã tupã gua'u rangue iporãve tembiporu óga pegua, peteĩ okẽ jepe niko iporãve chugui kuéra, okẽ niko oguereko iñongatupy umi mba'e óga ryepýpe oĩva. Peteĩ horkõ iporãiteve ko'ã tupã gua'úgui. 59Kuarahy, jasy ha mbyja kuéra ohesape ha ojapo Ñandejára he'íva chupe kuéra,#Sal 104.3-4; 148.3-8. 60upéichante avei ára vera ha yvytu. Ára otiri vove jahecha porã eterei, yvytu katu opa henda rupi oipeju. 61Ñandejára he'i vove umi araípe yvágare iñasãi haguã, upéicha ha'e kuéra ojapo. Tata ho'áva yvágagui ha ombokusuguéva opa ojuhúva, ojapónte avei pe chupe oje'éva. 62Umi tupã katu ndojoguái ete voi peteĩva ko'ã mba'éguinte jepe. Ha'e kuéra naiporãi térã naimbaretéi umívaicha. 63Upévare ndaikatúi ja'e hese kuéra tupãha. Yvypóra apytépe ndaikatúi mba'eve omoĩ hekópe, ha ndaikatúi ohecha kuaa avavépe. 64Péicha peẽ pehecha kuaa ha'e kuéra ndaha'eiha tupã. Ani pekyhyje chugui kuéra.
65Ha'e kuéra ndaikatúi ojahéi mburuvicha guasúre térã ohovasa chupe. 66Ndaikatúi ohechauka ñandéve mba'e rechapyrã yvágare,#Jl 3.3. ha ndaikatúi kuarahýicha omimbi térã jasýicha ohesape. 67Tymba ñarõ jepe oĩ porãve chugui kuéra, ojecha vai jave ikatúva okañy. 68Jahecha porã eterei upéicharõ, ko'ãva ndaha'eiha tupã. Ani pekyhyje chugui kuéra.
69Ku guyra mondyiháicha oĩ reíva merõtýre, péicha ndojapói mba'eve, ko'ã tupã yvyrágui ojejapóva ha oñembyapéva óro ha plátape. 70Ojogua avei ñuatĩme opu'ãva kokuépe, guyra oguejy haguã hese mante iporã. Ojogua avei te'õnguépe pyharekue oñemombóva okápe ha opyta rei. 71Jahechávo Mba'éichapa umi ao jegua ituju hese kuéra, jahecha kuaa ndaha'eiha tupã. Amo ipahápe, ha'e kuéra avei itujupáne ha opytáne ñemotĩrã pe tetãme. 72Iporãve aipórõ ñane marangatu ha ndajarekói tupã gua'u, ani haguã ñañemotĩ upe rire.
Currently Selected:
Baruc 6: GDC2006
Highlight
Share
Copy
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.