Luka 9
9
Yesu Uguvatuma Vasaa Ikumi na Vavëë
(Mat 10:5-15; Mrk 6:7-13)
1Na mweeso agavaëtana vasaa ikumi na vavëë itambërëmwedu na agavafa udaho na nguu gwa inyonyinyonyi yoong'e na uforya marue. 2Na agavatuma vende utanantya utemi wa Muungu na uforya. 3Na agavakhanëa, “Mutahoe gëntu umuhënjo wanyu, mwanga#9:3 Mwanga: Gëmanyëko ga utongeeri na ughoji. nanë mpënda, nanë mukaate, na hela na mutaje ësee mwina nkhaanju ausaghe. 4Na gëkaku nyumba në mwaingëa ikhai hafo, na faka kunë mujie uheghea. 5Na hafo nëvadëa umughenyifa nyenye, nëmwaufuma umuji wasuu kununti ukungu nëëugumëghuu anyu ësee ëtendeke usudanga kunë veeso.” 6Na veeso vëgauka vëgaenda na ukëra mukëjiji, vëutanantya Sayu Njija na vëuforya antu goong'e.
Wova waMwa Herode
(Mat 10:5-15; Mrk 6:7-13)
7Itungwee mutëmi Herode agategheya oong'e në atendekie, na mweeso agaoghofa gusoko vangëja arë vëuhanya mwino Yohana wadahie ufëtya ufuma gwa akuyi, 8na gwa vangëja Elia wadaha gëghea na gwa vangëja urë umwedu wa anyagëdaghu vakhae wadaha ufëtya. 9Herode agahanya, “Yohana nene namukigitie itwe, ëgweeso uyi anyu vii nënëtegheye mantu asaa?” Na agafenja umuona mweeso.
Yesu Uguvafa Malëwa Antu Maghana Anjou Atano
(Mat 14:13-21; Mrk 6:30-44; Yoh 6:1-14)
10Atumami naarë vasuka vëgamukhanëa Yesu mugëntu nëvakitendie. Na mweeso agavahoa vëenda viyene umuji nëuguëtanwa Betisaida. 11Mwirundo naarë wamanya kunë wendaa veeso vëgamuhonga, na mweeso agavaghenyifa veeso na agavasanyea veeso utemi wa Muungu na uvaforya vasaa naarë vasëghëte ufora. 12Na yuva naarë raandya uharëa na asëywi ikumi na vavëë vëgaenda umuhanga na umukhanëa, “Nyaghwisya mwirundo wende uvijiji na umëghunda afifë, veende uraa na vahange malëwa gusoko hafai guumbugha.” 13Ëgweeso mweeso agavakhanëa, “Vafi nyenye malëwa aulëa.” Veeso vëgahanya, “Gukweti mekaatë ëtano gutufu na somba ëvëë, urë sese aghonjo gwende ughurëya malëwa mwirundo urui woong'e.” 14Gusoko hafo arë varefo aghosya maghana anjou atano. Na agavakhanëa asëywi vakwe, “Vikhayi fang'ë maanja maanja, makumi atano atano.” 15Na veeso vëgatenda uyii, vëgavikhaya voong'e fang'ë. 16Na agahoa mëkate ëtano na sompa ëvëë agarava unto girunde, agaviforya, agavafa asëywi vakwe vëgavafa mwirundo. 17Na voong'e vëgalëa na vëgagikuta. Na vëgahangwëëya manyinyukango naarë vasanya ikafu ikumi na ëvëë.
Ukumui në Ukuu Wamwa Petro
(Mat 16:20-28; Mrk 8:27-29)
18Itiku rëmwedu naarë Yesu uguromba iyene, asëywi vakwe arë vitambërëmwedu na mweeso. Na mweeso agavawëëya “Antu vëuhanya nene nëanyu?” 19Na veeso vëgamusucha, vëuhanya “Yohana në mubadisi, ëgweeso vangëja, vëuhanya, Elia na vangëja, umwedu wa anyagëdaghu wa vakhae wafëtya.” 20Na mweeso agavakhanëa, “Gweeso urë nyenye muhanya nene nëanyu?” Na Fetero agasucha, “Veve wë Kiristo wa Muungu.”
Yesu Ugurëgheityia Nkhani ya Makhasëko Akwe na Ikuya Rakwe
(Mat 16:20-28; Mrk 8:30–9:1)
21Ëgweeso agavafema na uvaghëëya vatamukhanëe muntu mpa umwedu, ukhani urui, uguhanya, 22“Mwana wa muntu unoneye ahange makhasëko maingë, na uhitwaa na anyampaa na akumbëki në aküü na asëyi va seria, na uraghwa, na itiku ra gatatu ugufëtya.” 23Na mweeso agavakhanëa voong'e, “Nëmbesa gëkaku muntu ugufenja ung'onga nene, nëikhane mughonjo na auhoe musalaba wakwe muitiku na ang'onge nee. 24Gusoko muntu woong'e nëuguutyoa uduvi wakwe winjë guyaghaya; na muntu woong'e nëuguyaghaya uduvi wakwe soko ane, mweeso uguutyoa weeso. 25Gwina sao ëkë në muntu nëmbësa mweeso ahange urëmi woong'e na uyaghaya mweeso mughonjo? 26Gusoko muntu woong'e nëwanyonea mënyaa nene na nkhani yane na mweeso Mwamuntu ujie umuonea mënyaa në hikwë mweeso waja muukuu wakwe na gwa üküü wamwa Tata na wa malaika në vaeru. 27Ëgweeso nene ngumukhanëa nyenye tutë, varëfo vangëja nëvaimëkie hafai nëvëtiukuya nëvakëë veeso vënauona utëmi wa Muungu.”
Yesu Ugufeuka Ikeru
(Mat 17:1-8; Mrk 9:2-8)
28Naarë akëa matiku muunana ufuma kunë Yesu warighëëtëye ayai, mweeso agavahoa itambërëmwedu Fetero na Yohana na Yakobo na vëgaenda unto a gëtanto uromba. 29Naarë uguromba ikeru rakwe rëgafeuka, na masaa akwe ëgatendeka meeru na ufëmpina ino. 30Na keengea antu vavëë arë varighëëtiye na mweeso arë va Musa nanë Elia. 31Veeso vëgagighea mung'ë a üküü na vëusanya itunguya rakwe nirejie ukhondëka kuuko uYerusalemu. 32Na Fetero na vasaa naarë vë itambërëmwedu inao, arë vahumwa na tuo. Naarë vauka vëgauona üküü wakwe na antu vavëë arë vaëmëkie na mweeso. 33Na Musa ina Elia naarë vooka, Fetero agamukhanëa Yesu, “Müküü në guja ëse gwëhafai! Nëgujenge makumbu atatu, rëmwedu gusoko ako, na riuya gusoko amwa Musa na riuya gusoko amwa Elia.” Arë mweeso atimanyie ntuni nëugumërighëëtya. 34Mwino mweeso naa këë urighëëtëye uyii, gënyafafo irunde rëgaja na rëgavakunëkëa veeso. Na asëywi avoo në vatatu vëgaoghofa mwino Musa nanë Elia vëgingëa girunde. 35Na ruri ugafuma girunde, uguhanya, “Uyui në Mwanane në nene namuhwaniye, mutegheyi mweeso!” 36Na nënaa ruri wadaha urighëëtya, Yesu agagighea iyeenedu. Na veeso vëgakiatwë na vënamukhanëa muntu mpa umwedu matiku asaa a intu roong'e gwa asaa në veeso vendie uyaona.
Yesu Ugumuforya Mwana në Winagënyonyinyonyi
(Mat 1:7-14; Mrk 9:14-27)
37Itiku nërëhongie, naarë veeso vasima ufuma ugëtanto, iburi rikuu rigataana inao. 38Na kengea, muntu ufuma giburi agarëa “Musëyi, nguguromba veve umurave mwanane. Gusoko mweeso në mwanane umwedu duduri. 39Na kengea, gënyonyinyonyi arë gëumumankëa mweeso na gënyahafo ugurëa. Ugukhakhata faka afumwe na ifombou. Mbesa getumurekea, ëgweeso geumukhasya na umukuuranga. 40Na nene navarombaa asëywi vako vagëjunche unji, ëgweeso vinadaha.” 41Yesu agasucha, “Hanyee ufafo, në utina uhuvëi na në uyaghae nene nikhae nanyee faka nanai na umughimëëya nyenye? Mwete mwanako hafai.” 42Itungo naarë winjë umuhanga, gënyonyinyonyi gasëkë gëgamutagha mweeso fang'ë na umukhakhatia mweeso. Ëgweeso Yesu agagëkenea gënyonyinyonyi gësëkë nëgëve, na agamuforya mwana, na agamusucha kunë ihe wakwe. 43Na voong'e vëgataka üküü wa Muungu.
Yesu Ugurighëëtya Kangë Sayu Aikuya Rakwe
(Mat 17:22-23; Mrk 9:30-32)
44Ëgweeso antu voong'e naarë vatakëte mantu oong'e në mweeso watendie, mweeso agavakhanëa asëywi vakwe, “Ghëmbë nkhani ëyëë ikëe umatwë anyu; gusoko Mwamuntu wooka utendewa umëkhono a antu.” 45Ëgweeso veeso vinamanya murighëëtyo urui, arë ufihiwe ufuma kunë veeso, gusoko vataje umanya. Na veeso, na vëgaoghofa umuwëëya mweeso neeghokee murigheetyo urui.
Anyu Wasuu në Müküü?
(Mat 18:1-5; Mrk 9:33-37)
46Na wikungumë ugadwëëra mukhatë ao mwino anyu nëujie utendeka müküü mukhatë ao. 47Ëgweeso Yesu naarë wamanya masëgho nëunkhoo yao, mweeso agahoa mwana në munyui na umwëka guuvaru wakwe, 48na agavakhanëa, “Gëkaku muntu nëwamughenyifa mwana uyi në munyui gwa rina rane wang'ënyifa nene, na gëkaku muntu nëwang'ënyifa nene wamughenyifa wasuu në wantume nene, gusoko wasuu në munyui ukëa woong'e mukhatë anyu wasuu unë mukuu.” 49Yohana agasucha, “Müküü, sese goona muntu nëugujucha inyonyinyonyi gwa rina rako, na sese gwesa umughiiya mweeso, gusoko atigihongaa itambëëmwe nasee.”
Wasuu në Atihiya na Nyee Wasuu Uguuvaru Wanyu
(Mrk 9:38-40)
50Ëgweeso Yesu agamusucha, “Mutamughiiye gusoko wasuu nëatihiya nanyee mweeso wë itambëëmwe na nyenye.”
Asamaria Veuhita Umughenyifa Yesu
51Ikhondo naarë matiku ahumbea kunë mweeso uhowa unto, agakëngeya usyu wakwe uenda uYerusalemu. 52Na mweeso agatuma atumwa vatongee usonge akwe. Veeso vëgenda na uingëa u gëjiji ga uSamaria ughondanëya ikhondo gusoko akwe. 53Ëëgweeso antu vinamughenyifa mweeso, gusoko mweeso naa ukengeye usyu wakwe uYerusalemu. 54Na asëywi vakwe Yakobo na Yohana naarë vaona uyii, vëgahanya, “Müküü, usëghëëte guraghëëye moto usime fang'ë ufuma girunde na uvarungwëëya avaina?” 55Ëgweeso mweeso agavafetukëa na agavakenea veeso. 56Na veeso vëgaenda ugëjiji gëngëja.
Nevanoneye Utendeka Asëywi
(Mat 8:19-22)
57Naarë vëuenenda mung'e a njëa, muntu ungëja agamukhanëa Yesu, “Nene nguguhonga goongë kunë winjë.”
58Yesu agamwëëra, “Vaamura vakweti makhombo, na nyonyi ya unto ikweti iruye, ëgweeso Mwamuntu atikweti kunë winjë uraiicha itwe rakwe.” 59Kunë muntu ungëja mweeso agahanya, “Ng'onga nene.” Ëgweeso mweeso agahanya, “Müküü ndeka tanju neende umuëka tata wane.” 60Ëgweeso mweeso agamusucha, “Vareke akuyi vavaëke akuyi vao. Ëgweeso vee enda utanantye utëmi wa Muungu.” 61Muuya agahanya, “Nene nguguhonga vee, Müküü, ëgweeso ndeka tanju nende uvafa gwa heri antu vakhane.” Yesu agamukhanëa, 62“Gutie muntu mpa umwedu nëwakwatëra umukhono wakwe ighembe arëme na urava unyuma atiunoneya muutëmi wa Muungu.”
Currently Selected:
Luka 9: RIMRC
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.