Luka 12
12
Maonyo nëivaghokee Anyalakuno
(Mat 10:26-27)
1Ikhondo rasëë maghanajëka a antu arë vihangwëëye itambërëmwedu na vëgagifanangëa mu muntu na muuyakwe, mweeso agaandya uvakhanëa asëywi vakwe tanju, “Ighoji na changa gaAfarisayo, unë uhughangu. 2Gutie në gëkunëkiwe unto nëg'ëtijie ukunukuwa, mba nëgefihiwe nëgitijie umanyëka. 3Gwa uvii roong'e nëmugërighëëtya ukiiti gëjie utegheeywa uweru, na nyenye nëmwifofohea umbee yutanantywa umatembe a nyumba.”
4Nene ngumukhanëa “nyenye anyambuya vane, mutavaoghofe vasaa unë veuragha mwëërë, na nëvadaha hafo vatikweti neveudaha urëtenda kunë nyenye. 5Ëgweeso nene ngumukhanëa nyenye wasuu në mumuoghofa. Mwooghofi mweeso, unë wadaha uraagha, mweeso ukweti udaho wa ughumëa gwa arungu va makhaa. Nhaa, nene ngumukhanëa nyenye mwooghofi mweeso! 6Urë, vamunyasuunta vatano vatiughurwa gwa senti ivëëna? Na gutie mpa umwe në uguviitwaa usonge a Muungu. 7Asikë, mbesa njëë yoong'e ya umëtwe anyu ëvariywe. Mutaoghofe, nyenye mukweti sao nküü ukea ana munyasuunta në aingë.
Umukumua na Umukhana Yesu
(Mat 10:32-33; 12:32; 10:19-20)
8“Na nene ngumukhanëa nyenye, mu muntu në wankumua nene usonge antu, na Mwana wa muntuno ugumukumua usonge a vamalaika va Muungu 9Ëgweeso wasuu nëwankhana nene usonge antu ujieukhanwa usonge a vamalaika va Muungu. 10Na gëkaku muntu nëwarighëëtya ukhani wa umufënga Mwana muntu uguonewa uvai. Ëgweeso wasuu në wamutuka Mwahu Mweru wasuu atiuonewa uvai. 11Na nëvamutoa nyenye usonge a masunagogi na gwa aküü na atemi, mutahange ntenga mwino mwinjë uginenera nampa mwino mwinjë urighëëtya. 12Gusoko Mwahu Mweru winjë umusëya nyenye ikhondo ërëro ntuni në munoneye murighëëtye.”
Winkhori wa Mughwari
13Na muntu umwedu u mwirundo agamukhanëa, “Musëyi, mukhanie muunane anyaghanie usai wane.” 14Ëgweeso mweeso agamusucha, “Mughosya, anyu nëwanjikie nene muramui nampa mwaaghani wanyu?” 15Na mweeso agavakhanëa veeso, ravi tegheeyi na ighoji na nkumbu hiyahiya, “Gusoko uduvi wa muntu uti uwingë wa mari nëumëkweti.” 16Na agavakhanëa veeso wikhori, uguhanya, “Mughunda wa mughwarë umwedu arë ufie ino. 17Na mweeso agaghema mughonjo, ‘Nene ngutenda urë? gusoko ntikweti kunë nkuëka ëyoo yane?’ 18Na mweeso agahanya ngutenda vii: ‘Nene ngukhononta madoma yane na nëjenge në makuu, na hafo nguëka ntënange yane yoong'e na mari yane.’ 19Na ngumeëra nkhoo ane, ‘Nkhoo, ukweti mantu maingë nëwagëëkëye gwa mëakha miingë, lya mantu, ulëë, unywe uyanje.’ 20Ëgweeso Muungu agamukhanëa, ‘Umufutu! utiku urui nkhoo ako ëufenjwa kunë vee. Na mantu nëwayaghondanëya ëutendeka amanyu?’ 21Uyii unë urë nëwiekëye mpamba soko akwe mughonjo na atagighwaifie kunë Muungu.”
Mughonje Muungu
(Mat 6:25-34)
22Na mweeso agavakhanëa asëywi vakwe, “Gwa uvii ëyëyo nene ngumukhanëa nyenye, mutakhasëkëe uduvi wanyu, mulia ntuni nampa umëërë anyu muyaa ntuni. 23Ufanga ukëiye malëwa, na mwëërë ukëiye masaa. 24Ghemi nkunguu; nyeeso itiufandëa na itiutënanga; itikweti ëdoma mba itikweti iiwu; na këë Muungu uguuilësya nyeeso. Nyenye mwaaja ukëra nyonyi! 25Na anyu kunë nyenye në wikhasëkëa nëudahëte uongeya urifu wa uduvi wakwe? 26Uvii nëmbesa mutidahëte utenda intu nanë rënyui mwërasëë asikë nëmukhasëkëa ayoo angëja? 27Ghemanëyi sembe, mwino iteghetie; njeeso itiutenda mwëmo mba itiutumama, këë nene ngumukhanëa nyenye, mbesa Solomoni gwa üküü wakwe woong'e ainatambëëywa mwino narëmwedu ra ayoo. 28Ëgweeso nëmbesa Muungu uguyayaincha mahwa a umëghunda nëarëfo rëo na fadiu aghumëwa umoto, urë mweeso të winjë uvayaecha në maja nanguuna, nyenye në mwina uhuvëi unyui! 29Na mutafënje mulëa ntuni na munywa ntuni na mutaje ëse mwina wisaghasaghëi. 30Gusoko antu voong'e va murëmi vëufenja mantu ayai na Tata wanyu umanyie mwino nyenye muyaseghëëte meeso. 31Uvii fenji utemi wakwe na mantu ayai eutendeka anyu vija.”
Ughwaarë wa Gërunde
(Mat 6:19-21)
32“Mutaoghofe, nyee iburi në inyui, gusoko Tata wanyu waune ija umufa nyenye utëmi. 33Ghurii mari, yanyu muvafe atuki. Ning'anëyi mpinda yanyu aghonjo nëitiutununtika, na ugëëkëya mpamba girunde nëitiuhira, kuukono mwivi atiufika na nondo ëtiuruvanga. 34Gusoko hafo kunë mpamba ako ëri, hafo noo nkhoo ako ëgutënda ërëfo hafo.”
Atumami në Vimwëghuyo
(Mat 6:19-21)
35“Iëno yanyu ëse itungiwe na mëkhua na ëmwëë yanyu ëse yiakëe, 36na ëse mwë mwino antu nëvamwindëre müküü wao asuke ukhaya ufuma ulughuu, usi veeso vaje umurughwëëra gëfando në waja ugonontya. 37Bahu ao atumami vasaa në müküü wao ujie uvahanga vëuriya në waja tutë. Nene ngumukhanëa nyenye, mweeso mughonjo ugitunga mukhua na uvaikhaya umesa, na mweeso ujie na uvatumamë veeso. 38Nesa aje saa nane utiku, nampa saa tisa utiku, na uvahanga vëuyi, bahu ao atumami vasaa! 39Ëgweeso manyi ërëë, uvii nesa munya nyumba aja umanyie ikhondo kë ni mwivi ujie, mweeso aja atiumereka nyumba akwe ikhomowe. 40Nyenyenoo, imunoneye mwighondanëye; gusoko Mwana wa muntu ujie ikhondo nëmutirëghemete.”
Mutumami në Mwëghuyo nanë Atikweti Mwëghuyo
(Mat 24:45-51)
41Fetero agahanya “Müküü wikhori urui në soko itu gwiyene namba gwa antu voong'e?” 42Na Müküü agahanya, “Uvii unë mughondaneyike në muhuvëi na wë ihaa, unë müküü wakwe winjë umuvëka gunto a atumami vakwe uvafa veeso malëwa ao gwa itungo nërënoneye? 43Bahu akwe mutumami unë müküü wakwe itungo në mweeso waja winje umuhanga ugutenda uyii. 44Tutë nene ngumukhanëa nyenye, mweeso winje umweka unto a mari yakwe yoong'e. 45Ëgweeso nesa mutumami uguhanya mughonjo, ‘Müküü wane watinya usuka, na uandya uvakhua atumami vagëghosya na atumami vagëkhema, na ulia na unywa na ughara,’ 46müküü wa mutumami wasuu ujie itiku në mweeso atirëghemete na ikhondo në mweeso atirëmanyie na ujie umufeananja mweeso na umuëka itambërëmwedu na vasaa në vatëhuvëe. 47Na mutumami wasuu unë umanyie mafenji a müküü wakwe ëgweeso atagighondanëye mba utenda gwa uhonga mafenji akwe ujie uhanga makhue në mavë. 48Ëgweeso mweeso nëatimanyie, na watendie në anoneye ukhuwa winje uhanga makhuvi manyui. Na mu muntu unë wafiwe në maingë kunë mweeso ujie udaiwa maingë; kunë mweeso unë antu vamwikëye muntu mantu në maingë veeso vëjie udai utambukëye.”
Yesu në Soko a Ubaghuki wa Antu
(Mat 10:34-36)
49“Nene najië uacha moto mu urëmi; na esa waachiywe. 50Nëkweti ubadiso wagubadiswa nayo, na nene ninje ukhasëka urë faka ukhondëke! 51Nyenye mughema nene najie uetamajëghana murëmina? 52Naheye, nene ngumukhanëa nyenye, ëgweeso ubaghuki. Gusoko ufuma itungwee antu vatano va nyumba ëmwe vëubaghuka, vatatu hiya na vavëë na vavëë hiya na vatatu. 53Veeso vëubaghuka, tata na mwana na mwana ina ihe, yiu ina muncha na muncha ina nyinya, yiu në mukhwe ina nyinya në mukhwe, na nyinya në mukhwe ina yiu në mukhwe.”
Umanya Matungo
(Mat 16:2-26)
54Mweeso noo agaukhanëa mwirundo, “Itungo në nyenye mwaona marunde afumie umweri, muhanya gënyahafo, mbua aja na tutë ëjie. 55Na itungo në nyenye mwaona mpefo në ëfumie taghama muhanya, mumwë ugurëa, na tutë ugurëa. 56Hanyee anyalakuno! Nyee mumanyie urakanuanga ëkëru ra ngë na irunde, ëgweeso na nyenye mutimanyie urakanua ikhondo nërërëfo? 57Na asikë në nyenye aghonjo mutiuramua tutë? 58Mwino veve winjë itambëëmwedu na musitaki wako usonge amwa hakimu, tintara nanguu mufatane mwinakwe në këë mumunjëa, ataje uguututa vee agutoe kunë hakimu, na hakimuno agutoe kunë müküü, na müküü ugutendea ujera. 59Nene ngugukhanëa veve, utiufuma unji kamwe faka veve urëfe nanë senti aifaja.”
Currently Selected:
Luka 12: RIMRC
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.