Luka 4
4
1Akahunduka Yesu eizue ni Ngoma Mshenete kufuma Yardeni, akarongojwa na Ngoma ishighati misi makumaane, 2ekigheshwa ni Shetani; nete telie kindu misi ila, nayo ikinafike, ikuade akasikia nzaa. 3Shetani akamburra, Kwakicha niwe Mwana wa Izuwa, uliwurre ibwe ili lioke ibumunda. 4Yesu akamtalua, ekiteta, Yatamwa, ti mundu tekia hena ibumunda tiki. 5Akamkweja akambondja matorio mose ma masanga chwi ila. 6Shetani akamburra, Ninekuinga matorio ama mose na ubaha wawo, amu nami naingiwe, nami namwinga ose nimkundie; ukiniinamia, vyose vineoka vyako. 7Yesu akatalua akateta, 8Shetani, itamiwe, Unemwinamia Mzuri Izuwa wako, unemtumikia naye mwenye. 9Akamrongoja Yerusalemi, akamgera wanga ya msudu wa hekalu, akamburra, Kwakicha niwe Mwana wa Izuwa, ukuwirite si kufuma aha, 10amu itamiwe, ti,
Eneaghanya malaika wakwe wakurinde,
11na ti,
Wenekutika mikononi, usikubighe kughu kwako hena ibwe.
12Yesu akatalua akamburra, Itetiwe Tounemghesha Mzuri Izuwa wako. 13Shetani ekinaidiwe maghesho mose, akatana naye magheri mala.
14Yesu akahunduka hena zinya ja Ngoma, akaza Galilaya, luisiso lwakwe lukafuma ghati ya isanga lose la mbai na mbai. 15Akaoka ekilosha ghati ya masunagogi mawo, ekiisiswa ni wandu wose. 16Akaza Nazareti, handu ehie, musi wa sabato akaingia sunagogi hena mikayie yakwe, akaimuka kusoma. 17Akaingwa kitamo cha Mroti Isaya, na ekinakijughue kitamo, akawona handu hetamiwe,
18Ngoma ya Mzuri wanga yangu,
Amu iyo anigera mafuta niwatindie wakiwa Sumu Mshenete;
Akanituma kuwatindia matahwa lushigio,
Na webajikemeso kuwona,
Na kuwachungua wewinywa,
19Nitinde mwaka wa mvono wa Mzuri.
20Akakikoda kitamo, akamwinga mwindi, akaikaa si, na meso ma wandu wose weoho ghati ya sunagogi makamyoa ye. 21Akawoka kuwawurra, Yoo matamo ama mafishwa masikioni henyu. 22Wose wakamyoa, wakarighiwa hena viteto vya mvono vyafuma itumbu lakwe. Wakateta, Siye uu mwana wakwe Yusufu? 23Akawawurra, Tomna huwo kuniwurra mfwanano uu, Mughanga, ukuhodje mwenye; vyose tuvisikia viarehika ghati ya Kapernaum, uarehe na aha kiongo chako. 24Akateta, Kididi namburra, tehena mroti eguriwe nganyi kiongo chakwe. 25Kake hena kididi namburra, weokie ghati ya Israeli wache weingi wesina wome magheri ma Eliya, wanga ikinachungwe miaka mitatu na mieji mitandatu, ikinaoke nzaa mbaha ghati ya masanga mose; 26nete Eliya tetumiwe hena mwe wawo, nde hena mche mwe esina mume, wa Sarepta, kiongo cha Sidona. 27Na wandu weingi wenye kusumura weokie ghati ya Waisraeli magheri ma Elisha mroti, esizerrijwe mwe wawo nde Naaman mundu wa Sham. 28Wakaizua na oro wose weoho ghati ya sunagogi, wekisikia viteto ivi. 29Wakaimuka wakamfunya some ya kiongo chawo, wakamtika mtano iwongo la nduwi kijengiweho kiongo chawo, wamshindikiesi; 30kake ye akavetia ghati yawo, akagura nzia.
31Akasea Kapernaum, kiongo cha Galilaya, akawalosha musi wa sabato. 32Wakarighiwa muno hena kulosha kwakwe, amu kiteto chakwe cheokie na zinya. 33Na ghati ya sunagogi heokie na mundu, eokie na ngoma ya luhungu luwiwi, naye akaloza na ighonda ibaha, 34ekiteta, Ee, tuna kini nawe Yesu wa Nazareti? Waza kututesha? Nakutisiwa ti niwe Mshenete wa Izuwa. 35Yesu akambohia, ekiteta, Huja chwi, fuma hakwe. Luhungu lukamghusha ghati, lukafuma lusimbinye. 36Kurighiwa kukawaingia wose, wakawurrana wonawo, wekiteta, Nikini kiteto iki? amu hena zinya na luidimo aaghanya maluhungu mawiwi, namo mefuma. 37Luisiso lwakwe lukavifumia viongo vyose vya masanga mejunguluke.
38Akafuma sunagogi, akaingia nyumbeni hakwe Siman. Mkwee Siman akaoka eguriwe ni lutighana muno, wakamwomba hena lwakwe. 39Akaimuka mbai wanga yakwe, akalubohia lutighana lula, lukamshiga, akawuka chwi ila, akawatumikia.
40Mtano hekiswa wose weokie na wewadjua wa ndwari nyingi wakawaete hakwe, 41naye akagera mikono wanga mundu ose wawo, akawahodja. Maluhungu makafuma wandu weingi, mekiiya na mekiteta, Niwe Masihi, Mwana wa Izuwa; naye akamabohia, esimashige kuteta; amu memtisiwe ti niye Masihi.
42Na hekinaoke hemusi, akafuma akatonga handu hesina wandu, matorano wakamratera, wakaza hakwe, wakakunda kumkinda asitonge. 43Kake ye akawawurra, Yaniwe kutindia Sumu ya ufumwa wa Izuwa viongo vingi, amu hena iyo nitumiwe. 44Akaoka ekitinda ghati ya masunagogi ma Galilaya.
Currently Selected:
Luka 4: TAVETA
Highlight
Share
Copy

Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.