Genese 50
50
1Kahara, Iosepa areve oa ve oropape hahavi hi ape, kai arero ape popoape. 2Iosepa areve muramura horova leivahaeaki haela areve oa ve maea muo veveke muramura roroa hahaki maeaeape. Laelave muramura haela Iseraela ve maea muramura veveke roroa hahape; 3la horova leipe hoa hare 40 ila, ehovea roroapai hahaki horova ve hare hovea la. Aigupito haela are v'ila hare 70 ila ikihuru lei hi avahaeape.
4Ikihuru leiki hoa karia leipe la hoa Iosepa Parao ve lalava haela maria maeaeape: “Ara ero here leive, e araro ikivere iele la leikilava, Parao ve avako ureve hela maria maeakive: 5‘Arave oa arave okoare aheke iele arive maeape, “Arave apaki hoa maeamaea, ara Kanana ita ve ara v'ila ihape koru ureve leia e araro koru ihakilai,” mahau ara aro here leive, ara ma hoa arave oa leia ihakive pekakilai. Aireaki ara helari ekekilai’.” 6Parao kavale maeape: “Ave oa ve la oharo hovea pekai arero karu ihakive.” 7Laelave, Iosepa areve oa karu ihakive pekape; Parao ve horova haela, Aigupito ve haela hoaha oaria, 8Iosepa ve lalava haela oaria, areve apoheari, areve oa ve lalava haela, are i hareho pekahavape; ereve akoremari titaeka i ereve mamoe i boromakau ila hiki ere Gosena la ita haitapape. 9Kariota i hosi akea horeaki haela ila are i hareho pekahavape; haela maeakoko iele. 10Ere Ioridana la ukai ve Atada ve la wheat hae haipepekaki uvi ekevahaeape la hoa, ere va leia hivavara eapapo avahaeape; are hare 7 ila leia areve oa ve ikihuru leipe. 11La ita ve Kanana haela, Atada ve wheat hae haipepekaki la uvi leia leipe la ikihuru ovohae eavavahaeape la hoa, ere mariape: “Ma va Aigupito haela ve ikihuru eapapo iele.” Laelave ere la ita rare Abela‐miseraima rare itavape, are Ioridana la ukai ve. 12Laelave areve akoremari are erero maeaeape la oharo hovea hovea leivahaeape; 13ehovea areve akoremari arero Kanana ve la ita oraiavi aupe, ere arero Mamere ve kauri ukai ve Makepela la oru ureve la have ura ureve koru ihape, Aberahamo la have ura i Eperona Hiti haela ve la oru ilaea leipe, ehovea kapu ita leikive. 14Iosepa areve oa oropa karu ihape, aireaki are i areve apoheari i are i hareho pekahavape haela oaria ila helari Aigupito hoahukape.
Iosepa apoheari okoare veveke ape
15Iosepa ve huhohoaha ereve oa apape ovohae eavape la hoa, ere maeape: “Ore ka, Iosepa elaviilara iki heaha leivahaeai elaviila arero leipe la haiae oaria ve kavale heaha leivahaeakilai,” 16laelave, ere Iosepa paraeape oharo maria: “Ave oa ve apaki hoa maeamaea la hoa, areve oharo maria: 17‘Iosepa maeaki, “Ava apoheari aro leivahaeape la heaha oaria hela ikihuru lei hapurukavakive, heroe, ehovea ere aro lei haiae eapapo leivahaeape.” ’ Mahau ela aro here leive, ave oa ve Aualari ve horova haela ve hahaiae hela hapurukavaki.” Iosepa ereve oharo iapai hi ape. 18Areve apoheari iki areve oropa ve ekakaopi maria maeape: “Eavaki! ela ave horova haela.” 19Aka Iosepa erero maeaeape: “E oaoka kalaivahaelue! Ara Aualari ve ita avape haela ha? 20E va learia ha? E va araro lei heaha leikive ikivere leivahaeape, aka Aualari leia ve veveke leikive kekelape; ehovea, mahau ve la oki hovea, haela oaria lei makukurikive. 21Laelave, e horahora kalaivahaelue; ara e i eve akoremari titaeka ila kiva leivahaeakilai.” Lahovea are erero oharo veveke ila hakakaeape.
Iosepa apape hari
22Kahara, Iosepa Aigupito aeaveape, are i areve oa ve lalava haela ila; Iosepa ve ovokake aeaveape hoa va hitolo 110 ila. 23Iosepa Eparaima ve akoremari, areve meavohula, ovohae eavape; aeka Manase ve akore Makira ve akoremari Iosepa oropa ve erape. 24Iosepa areve apoheari maeaeape: “Arave apaki hoa maeamaea; aka, Aualari ero ovohae eavavahaeakilai; are ero ma ita ve hareavi Aberahamo, Isako i Iakobo ila okoare maeape la ita kari hoaukilai.” 25La hoa Iosepa Iseraela ve akoremari ve okoare avape maria: “Aualari ero ovohae eavavahaeakilai. E va arave uki haro maia ve kairi ai aukilai.” 26Kahara, Iosepa apape; la hoa areve hitolo va 110 ila. Ere areve maea muo veveke muramura roroa hahape. Ere Aigupito leia arero karu ihaki mauaharo paraeai kokaukape.
Currently Selected:
Genese 50: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972