Genese 47
47
1Laelave, Iosepa pekai Parao maeape: “Arave oa i arave apoheari ila, ereve mamoe i boromakau i eharu oaria ila, Kanana ve leia ve kihoahukape, ere va ma hoa Gosena la ita apearo.” 2Are areve apoheari 5 ila hareavi Parao oropa ve kari hoahukape. 3Parao la apoheari maeaeape: “E va le horova leilula haela ha?” Ere Parao maeape: “Ave horova haela va mamoe kiva haela, elave aualau haela hovea.” 4Ere Parao maeape: “Ela ve eve ita perehekai apeakive ekevahaeape ehovea ave horova haela ve ita Kanana hohera eapapo, laelave mamoe ve hohe karia; kahara, ela aro here leiro, ave horova haela Gosena ve ita hela apeakive.” 5La hoa Parao Iosepa maeape: “Ave oa i ave apoheari ave leia kihoahukape. 6Aigupito ita hareho ave oropa ve; a va ave oa i ave apoheari ila ita veveke avaraki; ere va Gosena la ita apeakive, heroe; a v'ore ereve aru ve haela mekaka la apeakilava, erero arave boromakau kiva leikive horova avarakive.”
7La hoa Iosepa areve oa Iakobo Parao oropa ve lai hoaupe, aea Iakobo Parao lei morapaeape. 8Parao Iakobo maeape: “Ave hitolo oaria leavaila ha?” 9Iakobo Parao maeape: “Ara va ovokake ve hahi hoa va hitolo 130 ila; arave hitolo perehekai, kai heaha ila, aeka hitolo oaria havahu ka: ere va arave aualau ve hahi hitolo oaria hovea hovea au leila.” 10Iakobo Parao lei morapaeape, kai Parao ve ita le hakurepape. 11Kahara, Iosepa areve oa i areve apoheari ila ita veveke avarape, kai erero Aigupito ve ita aea avarape, ita veveke iele la, Ramesese la ita ve, Parao arero maeape la oharo hovea. 12Iosepa areve oa i areve apoheari ila, kai areve oa ve lalava haela oaria, eapai hovea hovea aiarape, ereve akoremari ve numera hovea hovea.
Iosepa hohera hoa kiva leiki mai
13Ita hareho eapai karia, ehovea hohera eapapo, laelave Aigupito i Kanana ila lei merava leipe, ehovea hohera heraho iele. 14Iosepa Aigupito i Kanana ila la ita ve moni oaria, koni ilaea leivahaeape la moni, korukaiavahaeai Parao ve uvi leia aihoahukape. 15Kahara, Aigupito i Kanana ila la ita ve moni ilaea lei karia leipe la hoa, Aigupito haela oaria iki Iosepa leia mari maeape: “Elaro hela eapai aikiarakive; ela ave oropa apihaeai ehovealeve ha? Ehovea elave moni karia leilai.” 16Kahara, Iosepa kavale maeape: “Eve animala aikiaraki; eve moni karia la leikilava, ara eve boromakau ve eapai kakavae leikilai.” 17Laelave, ere ereve animala Iosepa ve leia aiauvahaeape; Iosepa ereve hosi, boromakau, nanaikosi i asini ila ve eapai kakavae leivahaeape; are la hitolo haroapo ereve animala oaria ve eapai ve kakavae leivahaeape. 18La hitolo karia lei aire la hitolo kara ere areve leia hoahukai maeape: “Ela elave amua oropa ve hehepo leivahaea va ka, elave moni karia leilai; elave amua elave animala le aeape, elave amua oropa ve elave eharu aea karia, elave maea i kekele ila hiki. 19Ela ave oropa ve apihaea ehovealeve, ela i elave kekele kara? Ela i elave kekele ila eapai ve ilaea leikive; ela i elave kekele ila Parao ve au hahaeaki horova haela leivahaeakilai; elaro wheat hae aikiaraki, laria ela apihaea va ka, aka ovokake leivahaeakilai, elave ita kara merava lei va ka.”
20Laelave, Iosepa Aigupito ve mea hareho Parao ve ilaea lei avape, ehovea Aigupito haela oaria ereve oru ilaea leivahaeape, ehovea ere hohera ve heraho eapapo leivahaeape. Ita hareho Parao le avape. 21Are haela oaria areve hahaeaki haela leivahaeape, Aigupito ita ve ukai ukai ve. 22Oharo haela ve kekele hiki are ilaea au leila; ehovea Parao oharo haela ve kavale hovea hovea aiarape, ereve la kavale ve ereve ovokake hoveahovea leivahaeape; laelave are ereve ita ilaea au leila. 23La hoa Iosepa haela oaria maeaeape: “Iapaila, ara mahau hare e i eve kekele ila Parao ve ilaea laleila. Eve wheat hae uku ma, e kekele ve puravai velarikive apoporaukive. 24Hae hovare hoa, e va hiru 5 hamureaki, hiru haroapo Parao avaraki, hiru 4 ila e havahu ve, aeka apoporaukive, kai e i eve lalava haela i eve akoremari ve eapai ve.” 25Ere maeape: “A elaro lei la makukurila; elave amua ikivere la leikilava, ela Parao ve horova haela leivahaeakilai.” 26Laelave Iosepa la eharu Aigupito la ita ve pupu le leipe. La pupu ikiki ma hoa laria hiki aeavila; Parao ve hiru 5 ve hiru haroapo avakilai: oharo haela ve kekele hiki Parao au availa.
Iakobo ve hita hoa
27Laelave Iseraela Aigupito la ita, Gosena leia, apeape, ere leia eharu oaria koarape, ere kai haela maeakoko leivahaeape. 28Iakobo Aigupito la ita hitolo 17 aeaveape; laelave Iakobo ovokake hoa va hareho va hitolo 147.
29Iseraela ve apaki hoa maeamaea, la hoa are areve akore Iosepa itavi maria maeape: “A araro ikihuru iele la leikilava, ave mai arave mauki ureve aipeki, kai ave okoare arilai, a va arave ikivere oharo iapa hiki leikilai, Araro Aigupito ma ita karu iha va ka. 30Araro arave aualau ve la karu ita ihakive; araro Aigupito hareavi kaivi ereve la kapu ita ihakive hela.” Are kavale maeape: “Ave la oharo hovea ara leikilai.” 31Are maeape: “Arave okoare havahu arive.” Are kai okoare havahu ape. La hoa Iseraela areve avuku haha ve haro ve le ekaopape.
Currently Selected:
Genese 47: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972