Genese 44
44
Au havoavape hekako
1La hoa are uvi kiva haela maeape: “La haela ve hurua eapai oaria loarakive, ereve maea hovea, haela oaria ve koni ve moni ereve hurua haroapo ve ape ureve aivavae?-?haitakive. 2Arave hekako, arave silver hekako, ereve la akoreheari ve hurua ureve, areve koni ve kavale moni ila hoa haroapo aivaopakive.” Are Iosepa arero maeape la oharo hovea hovea leipe. 3La opoa vevelare, mea opaki hoa, ere la haela i ereve asini ila le paparaehape. 4Ere okiharo aupe, haiapo ka, karikara maeamaea ve, Iosepa uvi kiva haela maeape: “Urou, la haela ve airekai aukive; a erero koaraki la hoa erero maeaeaki, ‘E veveke ve kavale heaha laleila ehovealeve ha? E va arave silver hekako korea leve laleila ha? 5Arave amua ma hekako ve ma v'ila laravila, are ma hekako v'ila are va aireaki horeavaki eharu ore leivila. E va haiae eapapo la leivahaeaila.’ ”
6Are erero heaorapape la hoa, are erero la oharo maeaeape. 7Ere arero maeape: “Elave amua mahovea oharo lakimaeaila ehovealeve? Ave horova haela lahovea eharu leikive leve kekelakive? 8Iapai, ela hurua ve ape ureve koarape la moni, ela Kanana ve leia avikihoahukape. Ela learia lei ave amua ve uvi ve gold i silver ila korea leikive ha? 9A lela horova haela ve eharu ureve la eharu koarakive, are o iele apakive, ela kara ave amua ve horova haela leivahaeakilai.” 10Are maeape: “E maeaeaki la oharo hovea; lela haela ve eharu ureve la eharu koarakilai, la haela arave horova haela leikilai, haela kepea ve haiae ve mehau karia.” 11Kahara, haela oaria elare hurua ipi ve paraeai ape le hapape. 12Are haropape, haela koare oropa aiai akoreheari ve leia; ere hekako Beniamina ve hurua ureve koarape. 13La hoa ere elare pura haipararapai eharu asini akea ve oreai, helari karikara le pekape.
14Iuda i apoheari ila Iosepa ve uvi aeka ekepe, la hoa, are ka leia; ere areve oropa ve mea ve ekakaopape. 15Iosepa erero maeaeape: “E va le haiae laleila ha? Ara va o iele aireaki kihoreavaki eharu ore haela ka ha?” 16Iuda kai maeape: “Ela va elave amua leari oharo maeakilai ha? Ela va le oharo arilai? Ela va learia lei elave rare lei veveke leivahaeakilai ha? Aualari eve horova haela ve haiae lei hihika la leivahaeaila; eavaila, ela va elave amua ve horova haela, ela, kai areve hurua ureve lakoaraila la hekako la akore kara.” 17Aka are maeape: “Ara laria lei y'arekaea; areve ita hekako lakoaraila la haela hiki arave horova haela leikilai. E haela aea eve oa ve leia havila ila auvahaeakilai.”
Iuda Beniamina v'ila velavela leipe
18La hoa Iuda pekai arero maeape: “Arave amua e, ara, ave horova haela hela, oharo perehekai arave amua ve avako haopakilai, a kai ave horova haela hihiri kalailue, ehovea ave maea Parao ve maea havahu hovea. 19Arave amua, a ave horova haela apevelavela leivahaeape ‘E kai oa ila aka akoreheari ila?’ 20Ela kai arave amua maeape ‘Ela kai oa ila, haela eapapo, kai akoreheari ila, oa ve haela eapapo hoa ve epape akore, areve akoreapo le apape, areve lou ve akore kepea are hiki; areve oa arero ikivere havahu iele.’ 21La hoa a maeape ‘Arero arave maia lai kihoaukive, ara arero ovohae eavakilai.’ 22Ela arave amua maeape ‘La akore areve oa hakurepaki hovea ka; are areve oa la hakurepakilava, areve oa le apakilai.’ 23La hoa a ave horova haela maeaeape: ‘Eve la akoreheari e i hareho kihoauki aue la leikilava, e va aireaki mea oaria arave oropape eava va ka.’ 24Ela kai helari ave horova haela, elave oa, ve leia hoaupe, la hoa ela kai elave amua ve la oharo kileape. 25Kahara, hare aea elave oa elaro kimaeaeape ‘Aeka hoahukakive, eapai perehekai ilaea leikive.’ 26Ela maeape, ‘Ela hoahukakive hovea ka. Elave akoreheari ela i hareho la hoaukilava, ela hoahukakilai; ehovea elave akoreheari ela i hoa haroapo hoauki aue la leikilava, ela la haela ve oropape eava va ka.’ 27La hoa, ave horova haela, elave oa, elaro kimaeaeape, ‘E v'ore, arave uva arave akoremari orahokaila erape; 28haroapo araro hakurepape; ara maeape “O iele, areve maea hai ka leipe la”, ikiki ma hoa ara arero eava va ka. 29E va ma haroapo ara v'ila la hareavakilava, kai are heaha la leikilava, e va arave haro harita kapu ita le lai paraeakilai’. 30Laelave ara va ave horova haela, arave oa ve leia hoauki hoa, kai la akore ela i hareho au va ka, la hoa, ehovea akore ve ovokake o iele areve oa ve ovokake hovea; 31are eavakilai, akore ela i hareho ekeva ka, are le apakilai; ave horova haela, elave oa, ave horova haela, ve haro harita iki kakare ila kapu ita le paraeakilai. 32Ehovea ave horova haela arave la akoreheari v'ila elave oa ve okoare lei mariape, ‘Ara arero ave maia helari lai kihoauki aue la leikilava, arave oa ve oropa ve la haiae ve mehau avakilai aiai karia lei va ka.’ 33Laelave, ikihuru hela, ara ave horova haela la akore ve ita avi ave au hahaki haela leikilai; akoreheari areve huhohoaha ila hela aukive, heroe. 34Ehovea, la akore ara i hareho auki aue la leikilava, ara learia lei aukilai ha? Ehovea ara oaoka eapapo, areve oa laria lei heaha eapapo leikilai la.”
Currently Selected:
Genese 44: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972