Sofonías 2
2
1Volo abaic, tsobo abaic, jnaclejetic ti vo'oxuc ti mu xa xava'iic ti q'uexlal apune, 2yo' to mu ta xavich'ic jipel batel jech c'u cha'al junuc taquin jobel#Sal 1.4; Jer 13.24; Os 13.3. ti oy bu jun c'ac'al tub xi ac'oplalique, ti lamal ta xvul ta atojolic stilemal sc'ac'al yo'nton ti Diose, yo' to mu ta xvul ta atojolic ti sc'ac'alil soquemal sjol ti Diose. 3Sa'ic ti Dios acotolic ti vo'oxuc ti biq'uit avac'oj abaic li' ta banomile, ti buch'utic ta xch'unbeic ti smantaltaque. Nijil chimil xavac' abaic, lecuc ti c'usi ta xapasique, xu' to nan ta xataic ti pojel coltael c'alal ta xc'ot sc'ac'alil ti ti'em capem sjol ti Diose.#Is 55.6-7; Jl 2.12-14.
Ti tsitsel ta xc'ot ta stojol ti muc'tiquil lumetique
4Ta xc'ot ta jun sts'ijlajan banomil ti jteclum Gazae; jeche' pochol ta xcom xtoc ti jteclum Ascalone. Ta c'ac'altic lec bec'bil ta xbatic ti buch'utic nacalic ta Asdode; j'ech'el ta stsutsesatic ti buch'utic nacalic ta jteclum Ecrone. 5Mu xa ono'ox cha'belucoxuc un, jnaclejetic yu'un ti jteclum Cretae, ti nacaloxuc ta ti' nabe. Xi xa s'elan chapbil ac'oplalic yu'un ti Diose: “Banomil Canaán, steclumalot ti filisteoetique,#Is 14.29-31; Jer 47.1-7; Ez 25.15-17; Jl 3.4-8; Am 1.6-8; Zac 9.5-7. mi junuc jnaclejetic ta xquictabot comel, yu'un ta jtubbot ac'oplal. 6Ta xjoybij ta jun pulem yaxaltic ti muc' ta lum ti oy ta ti' nabe, ti bu ta svol sbaic ti jq'uel-chijetique, ti bu ta spasbeic scorral ti xchijique.”
7Ti c'u yepal cuxul ta xcom scomelal ti jnaclejetic yu'un ti jteclum Judae, ta xu'ninic ti banomil taje, c'alal ta xtal pojaticuc yu'un ti Diose, ti ta xjeltabat ti yorailic xtoque. Ti bu taje, ta xlic sq'uel ti xchijique, ja'uc ti ta ac'ubaltic xtoque, ta x'och xcuxiic ta naetic yu'un ti jteclum Ascalone.
8Xi ta xal ta jamal ti Diose: “Laj ca'i ti c'usi chopol ta xloc' ta yeic ti moabitaetique,#Is 15—16; 25.10-12; Jer 48; Ez 25.8-11; Am 1.13-15. ti chopol ta xc'opojic ti amonitaetic#Jer 49.1-6; Ez 21.28-32; 25.1-7; Am 1.13-15. ti ja'ic laj soquesic ti jteclumale, ti caj tsacal xa'i sbaic c'otic yu'un ti jteclum taje. 9Manchuc mi jech un, yu'un ti cuxul Diosun scotol xu' cu'une, ti Diosun yu'un ti Israele, ti jteclum Moabe, jech ta xc'ot cu'un jech c'u cha'al ti jteclum Sodomae. Ti jnaclejetic yu'un ti jteclum Amone, jech ta xc'ot cu'un jech c'u cha'al ti jteclum Gomorrae#Gn 19—24. ti pochol ta xcom sbatel osile. Ta xjoybij ta ch'ieb ch'ixtic, ta xminaxil ats'am; ti c'u yepal scomelal ti jteclumale ta spojic ti c'usitic oy yu'unique, ta xu'ninbeic ti yosilique.”
10Ti va'i s'elan taj une, ja' me stojol ta xich'ic ti jteclum Moabe xchi'uc ti jteclum Amone ta scoj ti chopol c'opojic yu'un steclumal ti Diose, ta scoj ti oy c'usi laj staic ti laj yilbeic svocol steclumal ti Dios ti scotol xu' yu'une. 11Ti Diose, toj xi'bal sba ta j'ech'el ti c'usi ta spas ta stojolique. Ta j'ech'el ta stubbe sc'oplal scotol ti sbiinoj diosetic yu'un ti jteclume yo' jech ti stuque ich'bil ta muc' ta xc'ot yu'unic scotol ti buyuc no'ox oyique.
12Ja' jech ti vo'oxuc nacaloxuc ta jteclum Etiopiae,#Is 18.1-7. q'uiil ta xacomic ta milel yu'un yespada ti Diose.
13Ta syales yoc sc'ob ta scontrainel ti buch'u xi oyic ta stuq'uil ti yolon xocon sloq'ueb c'ac'ale yo' jech ta stubbe sc'oplal ti muc' ta lum Asiriae,#Is 10.5-34; 14.24-27; Nah 1—3. sts'ijlajan ta xicta comel ti muc' ta jteclum Ninivee, ta sjoybin ta jun taquin sbajtical banomil. 14Ta xlilinbat loq'uel ti ste'eltac snaique, ja'uc ti spac'balile, ta xcom ta corral chij yu'unic, ti c'usuc xa no'ox chon bolomalile. Ti mutal bolome, ti ch'ix-uche luchajtic no'ox ta xvayic ta yoyaltac ti naetique, yan to s'elan ta vochetel ti jojetic ti x'avlajetic no'ox ta caj ti' ventanaetique, ta caj ti'naetique. 15Taj une, ja' jech ta xc'ot ta stojol ti jteclum ti spajeb xa no'ox jelavem ti stoyobbaile, ti snopoj mu'yuc c'usi ta xc'ot ta stojole, ti ta xalic ti jnaclejetic yu'une ti stuc xa no'ox lec oy ta xa'iic ta banomile. C'u stu un, c'ot ta stojol ti sts'ijlajan come, ti joybij ta yavil c'usiuc no'ox te'tical chone. Ti buch'utic nopol ta x'ech'ique, sjic' xa yo'ntonic, sjim xa sjolic ta slabanel comel.
Currently Selected:
Sofonías 2: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000