Hageo 2
2
Spajebal xa no'ox yutsilal slequilal ti ach' ch'ulnae
1Ta jun xcha'vinic (21) c'ac'al yu'un ti yucubal (7) ue, jech ti Diose bat c'opojuc yan velta ta stojol ti j'alc'op Hageoe. 2Pase ta mantal yu'un ti xi ac'o yalbe ya'i ti Zorobabele, ti Josuee, xchi'uc c'u yepal ti jnaclejetique:#Esd 3.1-2. 3“Ti buch'uoxuc ti laj to ox avilic ti c'u s'elan meltsajem ti ch'ulnae xchi'uc scotol ti yutsilale, alic ca'itic mi xco'olaj to yutsil ta xavil jech c'u cha'al avi s'elan cu'untic tanae.#Esd 3.12. ¿Mi mu yanuc ta xavilic jech c'u cha'al ta ba'yele? 4Ja' yu'un un, Zorobabel, tijo ajol avo'nton, tsatsajan. Tsatsajan, Josué ti ja' jun banquilalot yu'un ti paleetique. Ja' jech xtoc, tsatsajanic acotolic ec jnaclejetic yu'un ti jteclume. Abtejanic un, va'alun ta atojolic. Ti vu'un Diosun ti scotol xu' cu'une, mu me lo'iluc no'ox ta xcal. 5Mu jel ti c'u s'elan laj cal c'alal laloq'uic talel ta Egiptoe.#Ex 29.45-46. Staoj yav chi'inbiloxuc cu'un. Mu xaxi'ic.
6“Ta xa xc'ot ta pasel ti ta xlic jniques ti vinajele, ti banomile,#Heb 12.26. ti nabe, xchi'uc ti taquin banomile. 7Ta xc'ot ta pasel cu'un ti ta xniquic ti muc'tiquil lumetique, ti ta xich'ic talel ti sc'ulejalique yo' jech spajeb xa no'ox yutsil ta xbat smeltsanel ti jch'ulnae. 8Ti platae, ti oro xtoque, ja' cu'un. 9Ti xcha'q'uexelal ti ch'ulna li'e, ja' x'ech' to spajeb yutsilal ta xc'ot, ja' mu sta ti ta ba'yele. Va'i un, ta xc'ot ta pasel cu'un ti ta xlamaj ti c'op li'e. Ti vu'un Diosun ti scotol xu' cu'une, mu me lo'iluc no'ox ta xcal.”
Jajantaatic yu'un Dios ti jteclum ti yan sjol yo'ntonique
10Ti ta sc'ac'alil chanib xcha'vinic (24) c'ac'al yu'un ti sbalunebal (9) u ti ja' o no'ox sjabilal stic'lej ta ajvalilal ti Darioe, tal c'opojuc ti Dios ta stojol ti j'alc'op Hageoe. 11Albat mantal yu'un ti xi xcholetuc ac'o sjac'be ti paleetic ta sventa ti Dios ti scotol xu' yu'une, ti ja' sc'oplal ti oy c'usi jbel ti tsots albile: 12“Oy bu xi albil sc'oplal xca'ie: Mi oy buch'u xchupoj batel ts'uiltasbil beq'uet ta sc'u' ti tijil c'ot ta pan ti c'u'il ti jech xlich'ete, mi ta yan ve'lil ti lacanbile, mi ta vinoe, mi ta aceite, mi c'usiuc no'ox yan ve'lilale, ¿mi ts'uiltasbil ta xc'ot ti ve'liletic une?”
“Mo'oj”, xi laj staq'uic ti paleetique.
13Xi no'ox lic sjaq'uilan ti Hageo xtoque: “Ati xcaltic no'ox xtoc une, ti jech mu xa xtal lec yutsil ta q'uelel ti buch'u laj spic ti animae,#Nm 19.11-22. ti ta xbat spic jtosuc xtoc ti c'usitic ts'uiltasbil taje, ¿mi mu tauc soc ti sc'oplale?”
“Tana unbi”, xi laj staq'uic ti paleetique.
14Va'i un, ti Hageoe xi laj yale: “Yu'un ti Diose xi ta xal eque: ‘Yu'un xi s'elan ta spasic ti jnaclejetic ti co'ol sba xchi'uque: Yu'un scotol ti c'u s'elan ta spas ti yabtelique, xchi'uc scotol ti c'usitic ta xaq'uic ta matanale, mu stac' q'uelel ta j'ech'el. 15Li' licuc batel avu'unic ta snopel taje c'alal mu to ta xlic avu'unic ta xcha'meltsanel ti ch'ulnae. 16C'alal mu to ox jechuque, ¿mi mu xiuc to ox s'elan oyoxuque? C'alal oy buch'u ta xbat ti bu busul ti sts'unubal ti yaloj xa ta xloc' jtob (20) ta bise, c'ajomal no'ox ta sta talel lajunbis (10). C'alal oy buch'u ta xbat ti bu ta xich' pits'el ti uva ti yaloj xa ta xloc' lajuneb yoxvinic (50) ta bej q'uibe, c'ajomal no'ox ta sta talel jtob (20) ta bej q'uib. 17Yu'un vu'un laj jtic'be xuvital ti mu'yuc xloc' ti sate. Yu'un laj cac' taluc bot ti mu'yuc xa stabeic sat ti slubel xchamel ti avoc ac'obique. C'u stu un, ti vo'oxuque mi ja'uc lasutic talel ta jtojol. Ti vu'un Diosune, mu me lo'iluc no'ox ta xcal. 18Ti xchanibal xcha'vinic (24) c'ac'al yu'un ti sbalunebal (9) u avi tana li'e, laj yich' aq'uel stsacleb yoc ti jch'ulnae. 19Ja' yu'un un cha'e, q'uelo me avilic lec tana li' une, li' ta xlic batel ti mu xa no'ox jeche'uc pochol ti yavil sat ts'unubaletique. Ac'o mi ma'uc to yorail ta xac' sat ti uvae, ti icuxe, ti granada sbie, ti olivo te'e, yu'un ti c'ac'al tana li'e, ta xlic jva'an jba ta stojolic yo' jech lec ta xac' ti sate.’ ”
Ta xac' ye sti' ti Dios ti ta sva'an sba ta stojol ti Zorobabele
20Ti jech c'ac'al taje, lic c'opojuc no'ox xtoc yan velta ti Dios ta stojol ti Hageoe. 21Yu'un laj yalbe ya'i mantal ti xi ac'o yalbe ya'i ti Zorobabel ti ja' ajvalil yu'un ti jteclum Judae: “Yu'un ta xcac' nicuc ti vinajele, ti banomil xtoque. 22Ta jlilinbe smuc'ul stsatsalic ti ajvaliletic ti oyic ta banomile. Ta jlilinbe xtoc smuc'ul stsatsalic ti muc'tiquil jteclumetique. Yu'un ta jvalc'unbeic ti scarretaique xchi'uc ti buch'utic cajalic batele. Ta xchamic ti ca'etique xchi'uc ti jcajlejetic ta ca'e. Ta xchamic ta jujun ti ts'apajtic ta xc'ot ta stojolic yespadaic ti svinquilel sbaic no'oxe. 23Ti jech c'ac'al taje, cajtunel Zorobabel, ta xajchabiot jech c'u cha'al jtuc'ulanoj ti jsello ti xojol ta jc'obe, yu'un t'ujbilot cu'un. Ti vu'un Diosun ti scotol xu' cu'une, mu me lo'iluc no'ox ta xcal.”
Currently Selected:
Hageo 2: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000