1 Tesalonicenses 2
2
Sc'oplal yabtel ti Pablo ta Tesalónicae
1Ti jech co'ol jchi'il jbatique, xana'ic lec atuquic ti mu ta jeche'uc no'ox li'aycutic ta atojolic. 2Manchuc mi quich'ojcutic talel jvocolcutic ta ilbajinel ta jteclum Filipose,#Hch 16.19-24. xana'ic lec ti ja' laj scoltauncutic ti Diose, yu'un laj yac'bun quipcutic ta yalbeloxuc ava'iic ti lequil ach' c'ope manchuc mi ep ti contrainele.#Hch 17.1-9. 3Yu'un jna'cutic lec ti mu'yuc ch'ayemuncutic ta be ti c'usi laj calcutic ava'iique, mi ja'uc laj jc'oponoxuc ta xchopolal co'ntoncutic, mi ja'uc oy ta co'ntoncutic ta jlo'laoxuc. 4Yu'un ti Diose lec laj yiluncutic, laj yac' jbaincutic ta yalbel sc'oplal ti colebal lequil ach' c'ope, co'ol jech c'u cha'al laj calcutic ava'iique. Yu'un ma'uc laj jc'ancutic ti lecuc xi'ilatcutic yu'un ti jnaclejetic ta banomile.#Gá 1.10. Ja' laj jc'ancutic ti lec xi'ilatcutic yu'un ti Diose, ti ja' yiloj ti co'ntoncutique. 5Xana'ic lec ti mu yu'unuc jun xa yutsil ti que jti'cutic laj jpas jbacutic ta atojolique, ti xtal no'ox ta jolcutic ta yalel c'usi c'opetic yo' ta jloq'uescutic ti ataq'uinique. Ja' rextico stuc ti Diose. 6Yu'un xi s'elan laj jpas jbacutic ti ma'uc laj jsa'cutic ti ich'biluncutic xa ta muc' yu'un junuque: mi ja'uc ti vo'oxuque, mi ja'uc ti yane. Xu' nan ta xcac'cutic avocolic ta yac'beluncutic ti c'usi ta xtun cu'uncutic jechuque, ti jech tacbiluncutic yu'un ti Cristoe. Ja'uc le'e, mu jechuc laj jpascutic. 7Yu'un ja' no'ox laj jc'uxubinoxuc jech c'u cha'al ti me'il ta sts'itesel ta xc'uxubinel ti yalabe. 8Ti jech toj ech'em c'uxoxuc ta co'ntoncutique, ma'uc no'ox laj calcutic ava'iic ti sc'op Diose, yu'un laj jip laj jten ti jcuxlejcutic ta aventaic yo' lec oyoxuque, yu'un mu tuch'bajoxuc ta co'ntoncutic. 9Ti co'ol jchi'il jbatique, xana'ic lec ti laj jpascutic tsatsal ta abtel yo' jech ta jta ti jve'elcutic ti jech li' cuxuluncutique. Yu'un c'ac'al ac'ubal li'abtejcutic yo' jech mu'yuc buch'u junucal avu'unic ta xisbainuncutic c'alal laj calcutic ava'iic ti sc'op Diose.#Hch 18.3; 2 Ts 3.8.
10Vo'oxuc rexticooxuc, rextico xtoc ti Diose ti laj jtuc'ulan jbacutic lec ta atojolic ti vo'oxuc jch'unolajeloxuque yo' jech mu'yuc buch'u xisa'bun ti jmulcutique. 11Xana'ic lec xtoc ti laj jtsatsubtas laj jmuq'uibtas ti avo'ntonique jech c'u cha'al ta spas ti totil ta stojol ti xnich'nabe. 12Yu'un ic'biloxuc ochel yu'un Dios ti bu ta xventainvane xchi'uc ta yich'bel ti slequil yutsilale. Jech o xal laj jc'ubanboxuc ti jechuc me xapasic jech c'u cha'al ti buch'utic ja' yu'untaque. 13Ti jech taj une, mu xquicta jbacutic ta yalbel vocol ti Diose, yu'un c'alal laj ava'iic ti sc'op Diose, ma'uc naca no'ox sc'op viniquetic laj ava'iic, ja' sc'op Dios laj ava'iic. Melel, ja' ono'ox sc'op Dios abtej ta atojolic ti c'ot ta avo'ntonic ta xch'unele. 14C'alal laj avich'ic ilbajinel yu'un ti avinquilelique,#Hch 17.5. Jchi'iltac, jech c'ot ta atojolic jech c'u cha'al ti buch'utic c'otemic ta yu'untac Dios ti oyic ta Judeae, ti ja' yu'untac ti Cristo Jesuse, yu'un laj yich'ic ilbajinel ec yu'un ti xchi'iltac ja' ti israeletique. 15Ti israeletique ja'ic laj smilic ti Cajvaltic Jesuse, xchi'uc laj smilbeic ti yaj'alc'optaque, xchi'uc laj snutsuncutic loq'uel ec.#Hch 9.23,29; 13.45,50; 14.2,5,19; 17.5,13; 18.12. Mu lecuc x'ileic yu'un ti Diose. Yu'un scontrainojic scotol ti jnaclejetic ta banomile. 16C'alal ta jc'an xcalbecutic ya'iic sc'op Dios ti jyanlumetic yo' jech ta sta ti scolelique, jech ti israeletique mu xac' xcalcutic. Ti jech taje, yacal xa ta toyel ti smulique. Ti muc'ul tsitsel yu'un ti Diose oy xa ta stojolic avi tana le' une.
Ti Pabloe oy ta yo'nton ta svu'lan ya'i ti jch'unolajeletic ta Tesalónicae
17Manchuc mi oy bu laj jch'ac jbatic c'uc sjaliluc ti mu'yuc xquilbe jba satique, Jchi'iltac, oyoxuc ono'ox ta co'ntoncutic ta jc'an xtal jq'ueloxuc ca'icutic. 18Jech co'ntoncutic ti ta xtal jq'uelotcutique. Yu'un ti vu'un Pabloune ep ta velta ti jech laj cac' persae. Ja'uc ti c'alal jech ta jnop ti jujucoje, laj smacuncutic ta be ti pucuje 19¿C'usi ti spatobil co'ntoncutic un cha'e, ti smuyubajel ti co'ntoncutique, ti matanal ti ximuyubaj ta xquich'cutique? Ja' ti vo'oxuc c'alal ta xcha'sut talel ti Jesucristoe. 20Melel, ti vo'oxuque ja' ti spatobil co'ntoncutique xchi'uc ti smuyubajel co'ntoncutique.
Currently Selected:
1 Tesalonicenses 2: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000