Mataibo 4
4
1Dai gokiïrï xi gï bakoanatu go Suxi ami go aki Jordanïrï sai bhodïrï jii ïgai abhiadïrï kïïga ïïgiditai ïgai Diuxi Ibhïadï. Dai Diuxi Ibhïadï baidaja go Suxi oidigamu saidi buidïrï aïna go Diabora saidi ïgai abïnakidana sai soimaaxi duna go Suxi. 2Dai maita gautadai Suxi toma lïïchi ami oidigana dakatai gokobhai tasai dai kabami bhiugimuka.
3Dai bhodïrï ayi go Diabora ami buidïrï dai potïtïdai,
—Aapi Suxi, ñokidañi go ojodai bai kuadagai naatona gobai pai biaka aapi ixtumaxi ugiagi. ¿Mai ix tudu ïr Diuxi Maradï aapi?— itïtïdai.
4—Cho. Maiti an gï ïïgidagi— itïtïdai Suxi. —Diuxi ñokidïrï ikaiti sai,
Odami mai bhaiga xi kïïgakïrï óídakagi mosïkaxi kuadagaikïdï. Gï agai Diuxi ñokidï tudu sai ïgaikïdï kïïgakïrï óídakana óídakami, itïtïdai.
5Dai bhodïrï baidakai go diabora go Suxi Jerusaenamu dai ami Jerusalenïrï go gïï kiupai daama xako bamioma tïkabaga tïtïsai ïgai. 6Dai go diabora potïtïdai,
—Gïïxiñi tabhiadïrï mïï taana— itïtïdai. —Diuxi ojadïrï ikaiti sai, Diuxi otosamu tïtïañikarudï sai gï nukadakana tudu. Ami ikaiti ïpï sai,
Diuxi tïañikarudï ïïkadïkïdï gï dagïkamu pai mai sarana aapi gï ïkaso ïmo odiana, itïtïdai go Diabora ipïrhiditai sai go Suxi ïïgiadagi.
7Daidi Suxi potïtïdai,
—Diuxi ojadïrï pokaiti ïpï sai,
Maiti gï agai ïmoko xi aagiadagi Diuxi saidi iduna ïgai ixtumaxi mos nïida ïrhiditai sa bhai iduna ïgai— itïtïdai.
8Dai bhodïrï go diabora baidakai go Suxi kugïrï ïmo tubidaki daama kïïga tïkabakami daidi abhiadïrï tïtïgidi ïgai bïïxi go oidigi aipakoga xako gatïanïi dudunukami. Tïtïgidi ïgai xïï gupuka go óídakami dai dudunukami dai xïï kïïga naana maaxi bia namïakami ïpï. 9Dai potïtïdai ïgai go Suxi,
—Kïï gï tïgito nïida. Daiñi, xi gï totonakïdï kïïkibagi aapi Suxi tami gin buidïrï daidi gin xadutuadagi, aidï gia gï maakimu aanï bïïxi gobai ix makïdï nïidi aapi— itïtïdai.
10Daidi Suxi potïtïdai,
—Imïdañi tabhiadïrï aapi diabora— itïtïdai. —Diuxi ojadï ikaiti sai,
Mosïkaxi Diuxi Gïr Nukadakami buidïrï gï agai xi oigïda ñokada aatïmï dai xadutuada podukai— itïtïdai.
11Daidi go diabora dagito aidï. Dai bhodïrï ami dada tïtïañikarudï Diuxi dai soi ïgai go Suxi.
Tami aagai ixdukatai gï aaga aatadui Suxi
12Daidi gokiïrï kajioma Suxi saidi gï bhïitu go Juan daidi jii Judea munisipiañdïrï dai ayi ïgai Galileana ix makïdï ïr ïmai munisipio. 13Ami Galileana ayi ïgai go arhi kiiki Nasaretïrï. Dai gokiïrï busai ïgai Nasaretañdïrï dai jii ïgai xako Kapernaum tïgidu ïmo kiiki dai ami oidatu. Go Kapernaum ïr ïmo arhi kiiki ix makïdï ïmo gïï sudagi ugidana bipiïyi. Galilea tïgidu go gïï sudagi ïgai. Ami ïr xako óídaga piipixaradï go Sebulonkaru dai go Naftalikaru.
14Ami oidatu ïgai tudu saidi po duna ixdukatai oja go ñokituldiadamigadï Diuxi Isaiaskaru tïgidukami. Dai ïgai oja ïïki sai,
15 Tami idi ojiïrï gïn aagidamu aanï ïmo ñoki aagaitai ïmo kïïrhi ix makïdï ayi agai ami xako óídaga go piipixaradï go sebulon dai piipixaradï go neftali ïpï dai xako óídaga jaa ïpï ix makïdï maiti ïr judidiu. Amïïka ayimu ïgai baasadïrï go aki Jordan tïgidukami dai ayimu miadïrï xako kaatï go gïï sudagi Galilea tïgidukami ïpï. Ami xako óídaga mui óídakami ix makïdï maiti ïr judidiu dai óídaga ami go judidiu saagida.
16 Ami óídakami ïr koidadï dukai ibhïadïrï. Tukapi dukai óídaga ïkobai darakatai ïgai Diuxiañdïrï tudu. Dïï gia ami ayi ïmoko ix makïdï ïr ïmo gïï kudagi gï dukami go óídakami bïïtarï dai tïtïïgidi ïgai ix dukatai kïïgakïrï bubuakiagi, pokaiti ojadï go Isaiaskaru tudu.
17Dai Kapernaumïrï oidatu Suxi aidï. Dai aidï abhiadïrï gï aaga ïgai aaduindadï dai gamamaakaitadai ïgai ñoki go óídakami. Potïtïdaiña ïgai sai,
—Ka miadaimi ix gatïanïdagi Diuxi. Dai kaxkïdï gï agai mïxi ïma dukai gïn tïtïgitoagi maatïkatai saidi ïr soimaaxi ibuadami aapimï— itïtïdaiña
Suxi bai goka kïkïïrhi saidi ïr mamaatïrdamigadïkana
18Ïmo imidagai go gïï sudagi Galilea tïgidukïdï ugidana aimïraitadai Suxi dai tïï ïgai goka gïn xixïgïmï Ximuñi dai Andïrïxi tïtïgidukami. Go Ximuñi ïr gasukurhi. Dai gokadukatadai tïtiaragadï. Piduru tïgidukatadai ïgai ïpï. Sudaïrï surhigitadai ïgai redigadï dai gabubaidiña ïgai batopa. Podukai gaatabuadana ïgai tudu. 19Dai Suxi potïtïdai aidï,
—Aapimï kïkïïrhi, aapimï ïr gaagadami batopa xibi. Gin oidabïrai tudu nai aanï gïn tïïgidamu mïx dukatai gaagana aapimï óídakami bhaiyoma saidi abïnakiada aapimï saidi gin buaboitudana ïgai— itïtïdai go Suxi.
20Dai ïgai otoma amaxi bia batopa buikarudï daidi oi ïgai go Suxi.
21Daidi go Suxi bhaitïkioma kïïkigi dai tïï ïgai ïpï goka kïkïïrhi. Maamaradï ïgai go Sebedeo. Ïmoko Jakobo tïgidu dai go gïmai Juan. Ïmo barko ïrana darakatadai ïgai ogadï ïmadï dai daraxdi redigadï ixtukïdï bubaidiña ïgai batopa. Daidi go Suxi báí sai oidana 22bai otoma amaxi barko ïrana bia ïgai ogadï dai abhiadïrï bhaitiakoga oidatukïiña ïgai Suxi.
Suxi duduadi mui kokokoñiadï Galileana
23Dai bhodïrï aipakoga jii Suxi ami Galileana. Bapakïiña ïgai kikiupaigadïrï go Judidiu dai ami gatïtïïgidi ïgai ñoki. Aagidiña ïgai odami go bhai ïrhiaragai ñoki aagiditai sai ka bhai otoma gatïanïda agai Diuxi. Podukai gamamaakaiña ïgai aatagi. Dai duduadaiña ïgai bïïxi go naana maaxi kokokoñiadï ïpï.
24Dai bïïxi aipadïrï óídakami kajioma ix tuma buadana Suxi dai gamoko ajiopaiña xako daja ïgai. Asta go Siriañdïrï óídakami bïïxi kajioma ïpï. Dai go óídakami aipadïrï naana maaxi kokokoñiadï buapaiña ami. Buapaiña ix makïdï biakana diabora tïtïañikarudï dai ïmadï ix makïdï susuikiturhiga dai ïmadï ix makïdï mai oiñïiña tukugadï ïpï. Dai Suxi duduadaiña bïïxkatai ïgai. 25Kaxkïdï mui óídakami aipakoga oidiña ïgai. Jaa oidiña ix makïdï ïr Galileañdïrï óídakami dai jaa Dekapolixiañdïrï dai jaa Jerusalenañdïrï dai jaa Judeañdïrï. Ïïmoko asta go Jordan akiañdïrï basadïrï daibuiña dai oidiña ïgai go Suxi aipakoga.
Currently Selected:
Mataibo 4: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida