Lukas 3
3
Diuxi aiturhi ïmo ñoki go Juan dai aagidi sai ïgai aagidana go óídakami sai bhai gïn dukana bïïtarï xïïxkadï dibiagi Diuxi otosadï
1Xibi ojamu aanï ix dukatai gï aaga aatadui go Juan. Aidïxi pogïdui ixtumaxi gï aagidamu aanï aidï go kïïrhi César Tiberias kaxi ïr dunukamikatadai bhaibuxtama dan taama umigi amïka Romïrï. Dai aidï go Poncio Pilato ïr kaigikatadai Judeïrï dai go Herodes kaigitadai Galileïrï. Aidï go Herodes sukurhidï Felipe tïgidukïdï ïr kaigikatadai xako Itureïrï dai Trakoniteïrï tïgidu oidigi. Aidï ïpï go Lisinias kaigikatadai Abiliniana 2dai go Anás ïmadï Kaifas ïr dadaxdadami bhaitï gukakamigadïkatadai.
Aidï tudu oidigana dakatadai maradï go Zakarias Juan tïgidukïdï dai Diuxi aiturhi ïmo ñoki. 3Dai aïkai go ñoki Diuxiañdïrï bai go Juan jii abhiadïrï dai mïï gatïtïïgidi aatagi go odami go gïï aki Jordan miadïrï óídakïdï. Aagidiña ïgai sai ïmadukai gïn tïgitokana dai sai gïn bapakonana dai kïïga ibuadana sai podukai mamaaxidiña sai ka ïmadukai gïn tïgito. Aagidiña sai aidï gia Diuxi oigïlda agai soimaaxkamigadï.
4Go Juan ïgai dai idui ixdukai kaiti go Isaiaskaru ojadïrï ïïki tudu. Ami go ojadï ikaiti sai,
—Gï kaidatumu ïmo gïgïr ñokadami oidigana dai potïdamu ïgai óídakami sai,
Ka miadaimi ix tuigako dibiagai gïr Tïanïdmiga, itïdamu ïgai. Kaxkïdï abïr kïïga bhai gïn duka sai kïïga miadïgida aapimï. Ix dukai bhai buayi odami boi xïïxkadï dibida aagadagi ïmo gïï dunukami podukai abïr bhai gïn buada ïïgi aapimï sai dibiana Gïr Nukadakami.
5 Maigobai abïr dadasada bïïxi go gajiadïrï bïïtïkïdï tïgibudagai tudu dai ïmo sïïrhiñikami abïr bhïiyi. Dai ix maaxi kaatï ïmo boiyi kïï sïïrhiñikami pomaaxkami abïr bhïiyi tïgibudagai. Podukai abïr maigobai darasa bïïxi ixtumaxi sobhidagi ix aiyagi Gïr Nukadakami gïn ïmadï. 6Aidï gia bïïxi óídakami maatï nïijadamu ix dukatai kïïgakïrï bubaidi Diuxi odami, ikaiti go ojai.
Podukai oja Isaiaskaru ïïki aagaitai go Juan tudu.
7Dai mui óídakami ami daibuiña xako dakatadai go Juan saidi ïgai bapakonana. Dai go Juan potïtïdaiña go óídakami,
—Aa gia galtutuiga aapimï. Ïpïan tutuiga aapimï kookoyi di. ¿Dai xorai gïn aagidi ix bhaigobai dadana aapimï gaagaitai ixdukatai kïïgakïrï bubuakiagi sai maiti gïn aïna go gïgïbidaragai ix makïdï gïn aituldamu Diuxi?— itïtïdaiña. 8—Gï agai bhaiyoma xi sïïrhi ibuada aapimï dai maaxitudagi ix bhai buaboikïdï ka ïma dukai gïn tïgito aapimï— itïtïdaiña.
—Dai maiti abïr pokaitada ïpï sai maiti gïn ayimu go gïgïbidaragai pipiixaradïkatai aapimï go Abraamkaru. Daiñi, kïï bhaiga Diuxi xi asta ojodaiñdïrï ibuadagi piipixaradï go Abraamkaru di. ¿Kaxkïdï dukatai gïn soiñana piipixaradïkatai aapimï ? ¿Dukatai gïn soiñana gobai tudu sai maiti gïn aituldana Diuxi gïgïbidaragai?— itïtïdaiña.
9—Daiñi— ikaitiña go Juan. —Xïïxkadï mai kïïgadukagi ibhiadï ïmo uxi odami guikutaiña dai mïmïidiña. Dai aapimï ïmo uxi duu ix makïdï mai kïïgadu ibhiadï mai kïïga ibuadatai aapimï. Dai Diuxi ïr ïpïan dukai ïmo kïïrhi ix makïdï ka uxi abhana kïi tupuradï dai ka bhai gï duu xi daitudagi ix mai kïïgadukagi ibhiadï. Pomaaxi aapimï ïpï. Dai Diuxi ka bhai gï duu ix gïn maakiagi gïgïbidaragai taiyïrï— itïtïdaiña go Juan go odami ix makïdï ami daibuiña.
10Daidi go odami gatïkakai go Juan aidï daidi itïtïdai,
—¿Tumaxi gï agai xi ibuadagi aatïmï sai maiti gïr aiyagi go gïgïbidaragai tudu?— itïtïdai.
11Dai Juan potïtïdai,
—Xorai biakagi goka bapasaragai gï agai xi óídagi ïmoko ïmai ix makïdï mai bia. Dai xorai kïïga biakagi ixtuma ugiagi gï agai xi óídagi xorai mai bia ïpï— itïtïdai.
12Daidi ami dada chïki tuminxi budami ix makïdï gataanïiña kuota go Romanos bïïtarï. Dai potïtïdai ïgai go Juan,
—¿Dai aatïmï ixtumaxi gï agai xi ibuadagi sai maiti gïr aïna gïgïbidaragai?— itïtïdai.
13Daidi go Juan potïtïdai,
—Maiti abïr bhaibitukami gataanïda tuminxi, mosïkaxi xïïxi maigarxi aapimï ix gataanïdagi— itïtïdai.
14Daidi chïki sandadaru tïkakai ïpï dai potïtïdai,
—¿Dai aatïmï ix tuma duna?— itïtïdai.
Daidi go Juan potïtïdai,
—Aapimï abïr mai gubukadakïdï popiada buxtuidadï odami. Dai bhaiyoma abïr bhai gïn ïrhiada gïn maitïkikïdï xïïxi gamaitïkïi aapimï. Dai abïr mai gïpiïrï bupada odami yaatagikïdï ïpï— itïtïdai.
Go Juan potïtïdai go odami sai ïgai maiti ïr Diuxi otosadï gabhaitïkïakami. Aagidi sai dibiagai ïmai ix makïdï gia ïr ïgai.
15Dai bïïxi go odami nïnïrakatadai xi dibiagi otosadï Diuxi ix makïdï ïïki abhiadïrï pokaititadai Diuxi sai otosa agai. Dai go odami tïgito nïidiña go Juan dai pobï gïn ïrhidiña,
—Maatï xi go Juan ïr ïgai ix makïdï nïnïraka aatïmï— as ïrhidiña.
16Dïï gia go Juan potïtïdai go odami,
—Aanï gia maiti ïr Diuxi otosadï ix makïdï nïnïraka aapimï. Gokiïrioma dibiamu ïgai— itïtïdai. —Gïïpi bamioma gubuka ïgai xi aanï tudu. Aanï tomarhi mai ajïi xi ibuadagi go bamioma arhidukïdï aaduindagai ïgai bïïtarï. Mai ajïi aanï tomarhi xi upasdagi sususakadï ïpïan dukai ïmo arhi pioñigadï tudu. Daiñi, aanï mosïkaxi sudagikïdï gïn bapakonaiña dïï gia Diuxi otosadï gia Diuxi Ibhïadïkïdï gïn bapakonadamu ïmadï táíkïdï. Agia ïr gïdukami ïgai daidi ïr gubuakami— itïtïdai.
17—Gïn aagidamu aanï ix duñimu ïgai odami— itïtïdai. —Daiñi, ïpïan duñimu ïgai ïmo odami xïïxkadï gakïrhibagi tïrhigi. Kïïga gaboixikai ïgai go tuixiki xako gakïrhiba ïgai go tïrhigi. Dai ïmpaidi ïgai go tïrhigi dai bhai tuayi dïï go kosadï gobai gia taiyïrï surhigai ïgai. Podukai iduñimu ix makïdï nïnïraka aapimï tudu. Ka bhai gï duu ïgai xi ïko bubaidagi jaa odami dai jaa taiyïrï surhiga agai xako tomarhi ïmo imidagai mai tutukui tai— itïtïdai.
18Dai mui naana maaxi ñoki mamaakaiña go Juan go odami podukai aagiditai go bhai ïrhiaragai aatagi.
19Dai go Juan maa ñoki go dunukami Herodes tïgidukami ïpï dai bhagaidi ïmadï dakatai ïgai ïïgi noxidï. Go Herodes ïmadï dakatadai Herodiaxi tudu ix makïdï ïr oñigadïkatadai sukurhidï. Dai ïpï jaa naana maaxi soimaaxkami ibuadana go Herodes ïpï xi kaxkïdï bhagakarai go Juan. 20Dïï modukai mai ïmadukai gï tïgito go Herodes dai bhaiyoma ïpï ïmo soimaaxkami idui dai gatïjai maixaragai go Juan. Podukai apia oidi ïgai soimaaxkamigadï.
Mai kia gï maixatudakai go Juan aidï bakoi ïgai go Suxi
21Dai ïmo imidagai mai kia gï maixatudakai go Juan kia bapakonaitadai ïgai mui odami dai ami dibia Suxi ïpï dai Juan bakoi. Dai gï bakuanakai go Suxi sai gadaanïitadai ïgai Diuxi daidi gï kupioka go tïbagi 22dai abhai tïbagiañdïrï tïbai Diuxi Ibhïadï ïmo tudu maaxi dai Suxi daama daiba. Dai Diuxi ñokidi go Suxi tïbagiañdïrï aidï dai potïtïdai,
—Aapi Suxi ïr gin Maara dai kïïga gï oigïdai aanï. Aapi tudu ïr gin bhai ïrhiaraga— itïtïdai.
Go Lukas aagai piipixakarudï go Jose
23Aidïxi gï aaga gaatadui Suxi go odami saagida ka biakatadai ïgai ïmokobhai dan bhaibuxtama umigi. Dai go odami po gïn ïrhidiña sai go Jose ïr ogadïkatadai. Kaxkïdï ojamu aanï xorai ïr piipixaradïkatadai go Jose.
Go Jose ïr maradïkatadai go Elí. 24Dai go Elí ïr maradïkatadai Matat. Dai go Matat ïr maradïkatadai Lebi. Dai go Lebi ïr maradïkatadai go Melki. Dai go Melki ïr maradïkatadai go Jana. Dai go Jana ïr maradïkatadai ïmai Jose tïgidukami. 25Dai ïgai Jose ïr maradïkatadai go Matatías. Dai go Matatías ïr maradïkatadai go Amós. Dai go Amós ïr maradïkatadai go Nahúm. Dai go Nahúm ïr maradïkatadai go Esli. Dai go Esli ïr maradïkatadai go Nagai. 26Dai go Nagai ïr maradïkatadai go Maat. Dai go Maat ïr maradïkatadai go Matatías. Dai go Matatías ïr maradïkatadai go Semei. Dai go Semei ïr maradïkatadai ïpï ïmai Jose. Dai ïgai Jose ïr maradïkatadai go Juda. 27Dai go Juda ïr maradïkatadai go Joanan. Dai go Joanan ïr maradïkatadai go Resa. Dai go Resa ïr maradïkatadai go Zorobabel. Dai go Zorobabel ïr maradïkatadai go Salatiel. Dai go Salatiel ïr maradïkatadai go Neri. 28Dai go Neri ïr maradïkatadai go Melki. Dai go Melki ïr maradïkatadai go Adi. Dai go Adi ïr maradïkatadai go Kosam. Dai go Kosam ïr maradïkatadai go Elmodam. Dai go Elmodam ïr maradïkatadai go Er. 29Dai go Er ïr maradïkatadai go Josue. Dai go Josue ïr maradïkatadai go Eliezer. Dai go Eliezer ïr maradïkatadai go Jorim. Dai go Jorim ïr maradïkatadai go Matat. 30Dai go Matat ïr maradïkatadai go Lebi. Dai go Lebi ïr maradïkatadai go Simeón. Dai go Simeón ïr maradïkatadai go Juda. Dai go Juda ïr maradïkatadai ïpï ïmai Jose tïgidukami. Dai go Jose ïr maradïkatadai go Jonan. Dai go Jonan ïr maradïkatadai go Eliakim. 31Dai go Eliakim ïr maradïkatadai go Melea. Dai go Melea ïr maradïkatadai go Mainan. Dai go Mainan ïr maradïkatadai go Matat. Dai go Matat ïr maradïkatadai go Natan. 32Dai go Natan ïr maradïkatadai go Dabid.
Dai go Dabid ïr maradïkatadai go Isaí. Dai go Isaí ïr maradïkatadai go Obed. Dai go Obed ïr maradïkatadai go Booz. Dai go Booz ïr maradïkatadai go Salmón. Dai go Salmón ïr maradïkatadai go Naasón. 33Dai go Naasón ïr maradïkatadai go Aminadab. Dai go Aminadab ïr maradïkatadai go Aram. Dai go Aram ïr maradïkatadai go Esrom. Dai go Esrom ïr maradïkatadai go Fares. Dai go Fares ïr maradïkatadai go Juda. 34Dai go Juda ïr maradïkatadai go Jakobo. Dai go Jakobo ïr maradïkatadai go Isaak. Dai go Isaak ïr maradïkatadai go Abraam.
Dai go Abraam ïr maradïkatadai go Taré. Dai go Taré ïr maradïkatadai go Nacor. 35Dai go Nacor ïr maradïkatadai go Serug. Dai go Serug ïr maradïkatadai go Ragau. Dai go Ragau ïr maradïkatadai go Péleg. Dai go Péleg ïr maradïkatadai go Héber. Dai go Héber ïr maradïkatadai go Sala. 36Dai go Sala ïr maradïkatadai go Kainan. Dai go Kainan ïr maradïkatadai go Arfaxad. Dai go Arfaxad ïr maradïkatadai go Sem. Dai go Sem ïr maradïkatadai go Noé. Dai go Noé ïr maradïkatadai go Lamec. 37Dai go Lamec ïr maradïkatadai go Matusalén. Dai go Matusalén ïr maradïkatadai go Enok. Dai go Enok ïr maradïkatadai go Jared. Dai go Jared ïr maradïkatadai go Malalel. Dai go Malalel ïr maradïkatadai go Kainan. 38Dai go Kainan ïr maradïkatadai go Enós. Dai go Enós ïr maradïkatadai go Set. Dai go Set ïr maradïkatadai go Adán ix makïdï ïr Diuxi maradïkatadai.
Currently Selected:
Lukas 3: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida