Lukas 14
14
Suxi duadi ïmo kokoadï ibhïxtaragai tasïrï
1Ïmo imidagai jii go Suxi kiidïrï ïmo bhaitï kïakamigadï go fariseos dai ïmadï gaugi agai. Dai ix makïdï ami darakatadai kïïga nukadatadai go Suxi as tuma duna. Gaagaitadai ïgai ixtukïdï gïpiïrï bupadagi kaxkïdï. 2Dai ami Suxi buidïrï dakatadai ïmo kïïrhi ix makïdï baiguguñikatadai tukugadï. 3Dai Suxi maatïkatadai sai go tïtïgiadami sïïrhikami ïmadï go fariseos nukadatadai sa tuma duna. Daidi go Suxi gatïkakai aidï,
—¿Gïr maakai xi oigaragai gïr sïïrhikamiga xi duduadadagi aatïmï kokokoñiadï ibhïxtaragai tasïrï?— itïtïdai.
4Dai go tïtïgiadami sïïrhikami ïmadï go fariseos ka dodorhi bii aidï dai mai aa noragi ïgai ñokidï Suxi. Daidi Suxi taata go kïïrhi dai duadi dai dagito sai imïna.
5Dai Suxi potïtïdai go ix makïdï ami daraka aidï,
—¿Aapimï ix mai aatabuayi ibhïxtaragai tasïrï ix gï aagadagi? Daiñi, xi ïmo posoïrï kïï tukabakami gïxiagi gïn maara xiïpï gïn soiga boixi, ¿Bai ix mai busaidana aapimï otoma tomaxi ïr ibhïxtaragai tasïrïkagi?— itïtïdai.
6Dai go tïtïgiadami sïïrhikami ïmadï go fariseos dodorhi bii mai tïïgakai ix tïdagi.
7Ïmo kuadagiïrï dakatadai go Suxi aidï dai gï tïgito nïidi ïgai sai go gaa bapaidarxikïdï kïkïïgadukïdioma daraikaruïrï daraibaimi mesa buidïrï tïtïanïdami dukai. Daidi aagidi ïgai ïmo maaxidaragai aatagi daidi potïtïdai,
8—Xïxkadï ïmai gïn bapaidagi ïmo kunataragïrï maiti abïr kïkïïgadukïdioma daraikaruïrï daraiba. Tadu dibia ïmai baidarxikami bamioma namïakami xi aapimï. 9Bai ïgai ix makïdï gïn bapai dibia antaada dai pobai gïn tïda antaada,
—Maakañi go daikarui idi gïmai—.
Dai gïn xaïrogida antaada aapimï biakatai ix kïkibagi dai go kugatïrï daikaruana daibagi— itïtïdai.
10—Xïxkadï gïn baidatudagi ïmadutai ïmo kunataragïrï abïr bhaiyoma go bamioma soimaaxkïdï daikaruïrï daraiba. Aidï gia dibiamu ïgai ix makïdï gïn bapai dai pobai gïn tïdamu,
—Gin aaduñi, bamioma kïkïïgadukami daraikaruïrï abïr daraiba— gïn tïdamu ïgai.
Podukai gia xia gïn xadutuadamu ïgai go gaa buitapi ix makïdï darakagi ami. 11Dai pomaaxi aatabuayi Diuxi ïpï. Daiñi, Diuxi dumaltuda agai bïïxkatai ix makïdï tïka darakïdï gïn ïrhiadagi ïïgi dai ix makïdï dumarhi darakïdï gïn ïrhiadagi ïgai gia Diuxi tïkabioma darasamu— itïtïdai Suxi go gaa bapaidarxikïdï.
12Dai kia ami kuadagiïrï dakatadai Suxi daidi potïtïdai ïgai go ix makïdï baitadai,
—Aapi kïïrhi, xïxkadï bapaidagi aapi jaa sai gï urabana ïmo kuadagiïrï maiti bapaidada aapi ix makïdï kïïga ïïmadai aapi tomarhi gï xixïgi, tomarhi jaa gï aaduñi, tomarhi ix makïdï maatï aapi sai kïï gïn bipidaka. Tadu gï báí ïgai ïmo kuadagiïrï ïpï dai gokiïrï Diuxi gï tïdamu,
Kaxi gï báí go gaa ïmo kuadagiïrï dai gobai kaxi ïr gï maitïki. Ka mai tipuka agai bamioma maitïki aapi gï bïïtarï— gïn tïdamu ïgai. 13Daiñi, gï agai bhaiyoma xi bapaidagi aapi odami ix makïdï mai bia ixdukatai gï aa noraidagi, dukami soititigami dai ix makïdï mai bhaiga aaduindagai dai ix makïdï mai bhaiga aimïrdagi dai ix makïdï mai nïayi. 14Aidï gia bhai gï ïrhiadamu aapi soikïitai ix makïdï mai bhaiga xi gï aa noraidagi. Kaxkïdï tudu Diuxi gï aa namïidamu xïïxkadï duduakatudagi koidadï ix makïdï buañixi iibhïadï— itïtïdai Suxi go kïïrhi ix makïdï gabaitadai ami kudagiana.
Suxi aagidi go odami ïmo maaxidaragai aatagi aagaitai ïmo kuadagai
15Ami mesa buidïrï darakatadai go odami tudu Suxi ïmadï dai ïmadutai ïgai ix makïdï kaï Suxi aatagidï potïtïdai,
—Agia ïr buaboi sai kïïga bhai gï ïrhiadamu odami ix makïdï urabagi Diuxi ïmo kuadagiïrï ami xako gatïanïi ïgai— itïtïdai.
16Dai Suxi aagidi ïmo maaxidaragai aatagi dai potïtïdai,
—Ïmo imidagai ïmo ga amu idui ïmo gïdukami kuadagai dai mui bapaidi odami. 17Daidi ka aïkai go kaduku xi gaugi agai saidi otoi ïgai ïmo pioñigadï sai aagidana go bapaidarxikïdï sai ka dadana sai ka bhai gï duu go kuadagai. 18Dïï bïïxkatai go bapaidarxikïdï mos aagidi go pioñi ix tuixi mai bhaiga ïgai ix iimiagi. Ïmoko potïtïdai,
—Utudama sabïrhi aanï ïmo dïbïrai dai bia aanï xi mïï nïidagi. Aagidañi gï amu sai gin oigïdana dïï mai bhaiga aanï xi urabagi xibi— itïtïdai.
19Dai ïmai potïtïdai go pioñi,
—Sabïrhi aanï taama bupurhi bopoixi dai bia aanï xi mïï nïidagi kia ix bhai kïkïïgadu. Aagidañi gï amu sai gin oigïdana— itïtïdai.
20Dai ïmai potïtïdai,
—Utudama antai oñiga aanï dai mai bhaiga xi imiagi xibi. Aagidañi gï amu sai gin oigïdana— itïtïdai.
Dai mos podukai bïïxkatai go bapaidarxikïdï aagidi ix tuixi mai bhaiga ïgai xi iimiagi.
21Daidi go pioñi mïï aagidi amudï ix tïtïdai go gaa. Daidi bhamutu go ga amu dai potïtïdai ïgai pioñigadï,
—Imiñi otoma aipakoga amïï kayana dai plasana dai bhaigobai buapa bïïxi go soititigami dai ix makïdï mai bhaiga aaduindagai. Bhaigobai buapa ix makïdï maiti ixtutuidikïi ix ajiopadagi dai ix makïdï mai nïayi tudu— itïtïdai.
22Dai jii go pioñi dai dibiakai ïpamu saidi potïtïdai ïgai amudï,
—Kaxi idui aanï ixtumaxi gin tïjai aapi— itïtïdai. —Dai mai kia suda gï kii. Kia oidaga xako daraibagi ïpï jaa— itïtïdai.
23Baidi amudï potïtïdai,
—Imiñi ïpamu tudu dai xibi gia imiñi asta maigobai xako mai guka bhaabhaki go arhi boiyana dai dïdïjoi saagida dai baida xorai tïïgiagi aapi. Kabami abïnakida aapi tudu sai bhaigobai dadana sai kïïga sudana gin kii— itïtïdai. 24—Daiñi, aanï aagai sai go gaa ix makïdï bapaidi aanï tukamïrï, ïgai gia mai dïïka agai toma lïïchi idi kuadagai ix makïdï bhai dui aanï— itïtïdai.
Xorai oijada ïrhiada go Suxi gï agai xi maatïkagi sai xijiaka agai
25Dai mui odami oiditadai go Suxi Jerusalenamakoga. Dai Suxi bui nïnïaba go odami daidi potïtïdai,
—Toma xorai ix makïdï ipïrhiadagi xi ïr gin mamaatïrdamigakagi gï agai xi kïïgioma in oigïdada ïgai aanï xi bhai xi ïma maaxi. 26Gï agai xi kïïgioma in oigïdada ïgai aanï xi bhai xi xïïxi oigïdai ïgai ogadï tudu xiïpï dïïdï xiïpï oñigadï dai maamaradï dai susukurhidï dai xixïgidï. Gï agai xi kïïgioma in oigïdada ïgai aanï xi bhai xi asta ïïgi ibhïadï tudu. Pokaxi gï agai xi gin oigïdada ïgai, ïma dukai mai bhaiga ïgai xi ïr gin mamaatïrdamigakagi— itïtïdai. 27—Gï agai ïgai xi gin ïpïan buadagi dai bhai aagagi xi soimaaxi taatagi dai asta xi gï muatudagi ïgai gin oiditai. Gï agai xi bhai aagagi ïgai xi asta xixatudagi ïgai ïmo kuruxiana in oiditai tudu. Ïma dukai mai bhaiga ïgai xi ïr gin mamaatïrdamigakagi ïgai— itïtïdai.
28—Gïn aagidamu aanï ix dukatai maaxi gobai— itïtïdai. —Daiñi, xi ïmadutai aapimï kïsa agadagi ïmo tïkabakami baaki bia ïgai xi ïpïgioma tïgito nïidagi sa bhai bia ixtukïdï naatoagi go aaduindagai. ¿Mai ix pomaaxi gobai? 29Tadu dáí ïgai simientogadï dai gokiïrï ka maiti ixtui ix dukatai naatoagi. Xi poduñagi ïgai aidï gia asïda antaada jaa 30dai pokaitada antaada,
—Daiñi, gobai gï aaga idui ïmo baaki dai ka maiti ixtui naatoagi— ikaitiada antaada ïgai.
Xïïxkadï ibuada agadagi ïmoko ïmo aaduindagai gï agai xi ïpïgioma nïidagi ïgai ix bhai bia ixtukïdï naatoagi tudu.
31¿Mai ix pomaaxi ïpï xïxkadï ïmo dunukami bui kïkiba agadagi ïmai dunukami ïmo kokodiïrï? Ix biakagi ïgai bhaibuxtama mirhi sandadaru dai go gïmai biakagi ïmo kobhai mirhi bia ïgai xi kïï gï tïgitoagi sa bhai ixtutuidïna ïgai bui. 32Dai ix mai maitïda antaadakagi ïgai aidï gia otosaiña ojotoxikami sai mïï buidïrï aïna go gïmai mïkaxdïrï imïitai ïgai kia sai bhai buadana ñoki ïgai ïmadï. ¿Mai ix pomaaxi gobai? 33Dai pomaaxi aapimïkïdï ïpï xi gin oijada ïrhiadagi aapimï gï agai xi gïn tïgitokagi aapimï sa bhai daasamu aapimï ixtumaxi gï aagadagi gin oiditai. Kaxkïdï tudu xorai mai bhai aagagi ix dagitoagi bïïxi ixtumaxi biakagi mai bhaiga xi ïr gin mamaatïrdamigakagi— itïtïdai.
34—Daiñi— itïtïdai. —Onai gïn dukami aapimï dai go onai naana maaxi bïïtarï ïr soiñi. Dïï gia ix ka mai yoobikagi go onai ¿Dukatai gï yoomadana gobai ïpamu? Ka mai bhaiga. 35Gobai tomarhi mai kïïgaldi go dïbïrai xi kaxkïdï mos gï daitudai gobai. Kïïga abïr gïn tïgito kaïka gobai ix makïdï gïn aagidi aanï tudu— itïtïdai Suxi go odami ix makïdï ïmadï iimïitadai.
Currently Selected:
Lukas 14: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida