Tito 3
3
Dá'maq no'uen no'ueenataxac ná'maq mashic icoñiguit da na'qaatec
1No'uenaxanaxañitegue ná'maq mashic icoñiguit da na'qaatec quiyim se napacalec ná'maq nashillipi leta'allipi chaqai na lotauaripi. Ta'ta'a quiyim na'xaỹaxane'ta chaqai quiyim se resalla'ñiguit quiyim ỹo'uet canchaqaica no'uen no'ueenataxanaxac. 2Se ỹa'xat ca se no'uen quiyim queeteguelec ca liỹa. Qaidaata quiyim 'xoic ca leualaxavic chaqai qouagaxanqachaqaic, re'qoota nqai'en da neneequesenaxac quená'ogue na qomyipi.
3Ma' qomi' qai'neete' quesom qaica ca sa'deenaq, ca' se ña'xaỹaxanaxalo naua la'qaatqa ñi qota'a. So'maqatajlec chaqai qolqata'pegue' da qarqo'itaxanqachic chaqai da qaramaanaxanqachic. Seuqataugui da se no'uen chaqai da npa'guenaxanaxa. Qomi' noquiiqate' chaqai chi ñoquiaaqata'ta'. 4Qam ñi qota'a ñí'maq qarca'laxaqui na' ỹachaxan da lqouagaxa chaqai da le'xorenataxanaxa quena qomyipi, 5ca qarca'laxatec. Qam mesqaida quiyim 'ue quet ca ỹa'maqachiguiñi qaro'ueenataxanaxac, ma' ñi'maxare chi qare'xoren. Ca qarca'laxatec chicqochigui nqai'en ca qanachilaxac dá'maq 'em quiyim 'ec dalaxaic qane'xaỹoqsoxoc chaqai dalaxaic qanachaalataxac chicqo'ot so Espíritu Santo. 6Chicqochigui nqai'en so qarca'laxaqui Jesucristo, ca' ñi qota'a ỹaanema qomi' so Espíritu Santo, ỹaatqajam no'xataxachichiguilo qomi'. 7Ca' quedá'maq lqouagaxa, ca ỹa'maxarente' qomi', ca' qaiyi seconaxaguit dá'maq ñauaanqata'guit chaalataxac sqaica lqodoc.
8Ca' dajo sa'xatetac dá'maq ỹaatqajam lliqueta. Ca' vichiguiño' sahotaque quiyim repaquira'a 'xachi' dajo, qaiyi ná'ogue ná'maq huelec ñi qota'a nquipita'pegue' quiyim ỹo'uet ca ỹa'maqachiguiñi. Ma' dajo sa'xatetac 'xoic loyac chaqai ỹa'maqachiguiñi quená'ogue. 9Qam rovichira'guito' na co'uaxaquipi qaica ca 'negue, chaqai na na'qaataxanaxac queso 'auaxaic qareta'allipi, chaqai quiyim se qanachiñiguit ca niỹa, chaqai quiyim qanco'uaatapiguilo naua naqataxaco chicqoro'ot na'le so Moisés. Ma' da'maxare qaica ca 'negue chaqai qaica ca taiguit.
10No'm 'ue ca se neuojonta' nqai'en ná'maq mashic icoñiguit da na'qaatec, ca' ỹaatqajam taqaira'a ca'maxare. Ca no'm se na'xaỹaxana qami' quiyim 'óna loqo'm dos 'ñirapega, ca' chaqa'ma' ỹochire'oga. 11Ca' quedajo chaqa'ma' 'yiiñi' cajo ỹale quiyim ỹit dá'maq ỹa'maqachiguiñi. Ma' dá'maq lasauaxaset chaqaida dá'maq re'oq nqai'en quiyim ỹo'maac.
Dá'maq naqataxac queso Tito
12Ma' selata qami' ñi Artemas loqo'm ñi Tíquico, ca' se naỹaloxoñi' quiyim naquirepegue' yi Nicópolis, qaiyi ñauanaqta', ma' sahotaque senta'anyi quena no'oomaxa. 13Ỹaatqajam nquipichira'pegue' quiyim tauañi' so Apolos chaqai so Zenas só'maq qoshiilec ca 'ue ca ỹasauaxat. 'Ỹaañima cá'ogue cá'maq ỹouensaque queda llicyaxague', qaiyi qaica ca ỹouene'. 14Chaqai ná'ogue ná'maq mashic icoñiguit da na'qaatec 'maxaraic quiyim ỹa'den ỹo'uet ca no'uen qai'neeta, chaqai quiyim ỹotauan ná'maq 'ue ca louenaxanaxa, qaiyi 'ue ca 'negue da nachaalataxac.
Dá'maq pa'aatec liquinaxanaxac so Pablo
15Ná'ogue ná'maq ñauequeta'pegue' qarqaỹaripi ilata qami' da liquinaxanaxac, chaqai da iquinaxanaxac quená'ogue na qanauochaxauaripi queda qarpi'ỹaxac. Ca' ñi qota'a ỹaanema qamiri dá'maq ỹaatqajam no'uen qayicyaxaguii. Ajá'a, ca' chaqaida 'neeta dajo.
Currently Selected:
Tito 3: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.