Tito 1
1
So Pablo ilata aso lere so Tito
1Aỹim Pablo, aỹim la'ac ñi qota'a chaqai aỹim lelaatec so Jesucristo quiyim sotauan da lpi'ỹaxac na lca'acseripi ñi qota'a, qaiyi ỹaatqajam ỹa'deenta na'maxare dá'maq ỹaatqajam leloxoỹaxac dá'maq llic na'qaatec qomi' seuaqlec, 2chaqai qai'neeta ỹa'deenta da quitaxac queda chaalataxac sqaica lqodoc. Dá'maq ỹachaxantac na' saqa'leca na 'laua ñí'maq qota'a, ma' ñí se na'majan. 3Chaqai nagui ỹovita yi laloqo' quiyim qara'deenaxanaxanegue da leloxoỹaxac chicqochigui nqai'en da la'qaatec ñi qarca'laxaqui qota'olec, ca' pataxalec aỹim quiyim sa'xat da la'qaatec. 4Qami' Tito, shinta'gue quiyim 'ec qami' ỹaalec, ma' ỹim chicqo'ot quiyim 'ue da rpi'ỹaxaqui' dá'maq hueeto'oto qomi'. Selata qami' ana ỹerecse, ma' sahotaque quiyim coñichiguit ca qouagaxa, chaqai da ne'xorenataxanaxa, chaqai da na'maxa chicqo'ot ñi qota'olec chaqai so qara'gaxala' Jesucristo só'maq qarca'laxaqui.
Dá'maq lo'ueenataxanaxac so Tito na' neeta'ñi ada delec Creta
5Na' ño'ueenaqta'ñi qami' ada delec leenaxat Creta, ma' sahotaque quiyim 'maxachiriñi ná'maq saqa' ỹa'maxañi, chaqai quiyim vite ná'maq la'gaxala' ná'maq mashic icoñiguit da na'qaatec quená'maq na'aateripi na'ñi. Ca' 'eda dá'maq shinac na'le: 6Ca la'gaxala' ná'maq mashic icoñiguit da na'qaatec se ỹa'maxañi quiyim 'ue ca se no'uen na'qaataxac, chaqai 'oono'lli' aca loua nqai'en, chaqai icoñiguit da na'qaatec cá'ogue ca llaalqaipi qai'neeta, qaiyi qaica ca taalec se no'uen, sauaxat da no'ueenataxac chaqai quiyim se na'xaỹaxan. 7Ma' cá'maq qaipataxalec quiyim idaanlec ná'maq mashic icoñiguit da na'qaatec, ca idaanlec ná'ogue ná'maq lo'ueenataxanaxaquipi ñi qota'a. Vichiguiño' ỹouen quiyim ỹa'maxate'tegue da nachaalataxac. Se ỹa'maxañi quiyim que'guenataxanaxai, chaqai sqai nocqaic, chaqai se ne'taaxai, chaqai se idaante'e quiyim retaxaỹa'pegue' ca liỹa, chaqai sqai queetalec quiyim imitete'e aca lauegue. 8Ta'ta'a quiyim quelolqachaqaic quiyim idaañiguit ca nouoq, chaqai nqo'ta quiyim ỹo'uet cá'maq ỹa'maqachiguiñi, na'maxateta, 'maxaraic da no'ueenataxac, co'teeta, ra'ijlec da nachaalataxac. 9Chaqai ỹaatqajam na'ñaxate'tegue dá'maq ỹaatqajam leloxoỹaxac da na'qaatec dá'maq mashic qaỹapaxaguinegue, qaiyi ishit quiyim ỹa'ñaxat ca liỹa, ỹahote'e dá'maq no'uen napaxaguinataxanaxac, ca' ishit taauec nqai'en ca loqollictaxanaxac na qollictaxanaxairipi.
10Ma' 'xoic na qollictaxanaxairipi quena judioipi, ma' se nachiñiñi naua la'qaatqa, chaqai ỹayintac na qom. 11Ca na'maxare ỹouentaque quiyim qaỹapoguilo naua laapi', ma' ỹaatqajam se neuojonta' nqai'en na neuo' laseripi, ma' rapaxaguinataxanta'pegue dá'maq se leloxoỹaxac, ma' chi imitete'e aca lauegue.
12'Uo' so ỹale 'deenaxanqachaqaic na'ñi yi Creta, so'maxare ỹa'xat ná'maq chi lauo' laseripi, 'neetasa' da la'qaatec: “Ná'maq Creta laseripi ỹaatqajam 'maatqaiquipi, chaqai yiloxoiquipi 'ec na iseripi, quemaraxauaiquipi, chaqai hualaiquipi.” 13Ca' ỹaatqajam llic dá'maq ỹa'xat. Vichiguiño' nagui ỹaatqajam viraqchira'a taqaira'a, qaiyi nachinñi da lpi'ỹaxac, 14chaqai qaiyi se na'xaỹaxana na chi na'qaataxanaxac lo'ueenatec na judioipi, chaqai na lelaataxanaxac ná'maq mashic ca'e dá'maq ỹaatqajam lliqueta leloxoỹaxac.
15Qam quená'maq co'teeta yi la'deenataxanaxac, ná'ogue nanchaqaina co'teeta. Qam quená'maq sqai huelec chaqai napio'o yi la'deenataxanaxac, ca 'ec qaica cá'maq co'teeta, ma' na'maxare vire'ta yi la'deenataxanaxac napio'o. 16Na'maxare 'naac ỹaatqajam ỹa'den ñi qota'a, qam dá'maq lo'ueenataxanaxac re'qoota quiyim se nachiñiguit dá'maq 'neetari'. Ỹaatqajam se qaishitaqchiguit chaqai se na'xaỹaxan, chaqai sqa taiguit cá'maq no'ueenataxanaxac ỹa'maqachiguiñi.
Currently Selected:
Tito 1: MCV91
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.